yaşayıb yaratdığı dövrün rus işğalının təsadüf etməsi, işğalçılara qarşı yazdığı şeirlərin dillər
əzbəri olması, qoçaqlamalarının əsgərlər arasında marş kimi oxunması Aşıq Şenliyi Şərqi
Anadolu və Azərbaycan aşıq mühitlərində ötkəm bir sənətkar kimi tanıtmışdı. Digər tərəfdən
azəri ləhcəsində dürlü-dürlü qoşma və gəraylılar, təcnis və divanilər düzüb qoşan aşığın Türkiyə
və Azərbaycan aşıq sənətinin qarşılıqlı əlaqəsində və inkişafında böyük rolu olmuşdur. Onu da
qeyd etmək lazımdır ki, Aşıq Şenliyin qızı Gülxanım Ağbaba mahalının Xozu kəndinə gəlin
köçmüş və ömrünün sonunadək orada yaşamışdır. Sözsüz ki, Aşıq Şenliyin Ağbabada çox
məclislər keçirməsinin bir səbəbi tez-tez Gülxanımı yoluxması ilə bağlı olmuşdur. Hətta
deyilənlərə görə, “Lətif şah” dastanının mövzusunu Aşıq Şenlik Ağbabadan Çıldıra pənah
gətirən kimsəsiz bir uşağın acı taleyindən götürmüşdür. Onu demək istəyirik ki, Aşıq Şenlik
yalnız sənəti və yaradıcılığı ilə deyil, həm də şəxsi həyatı ilə Ağbaba mahalına sıx bağlı bir
sənətkar olmuşdur. Bu da bir həqiqətdir ki, Aşıq Şenlik irsinin Azərbaycanda ən kamil bilicisi
Ağbabalı Aşıq İsgəndər idi. Sənət şəcərəsi etibarı ilə Aşıq İsgəndər Aşıq Nəsibin, Aşıq Nəsib isə
Aşıq Şenliyin şagird olmuşdu. Bu baxımdan Aşıq İsgəndərin Çıldırlı Şenliyin irsinə və
repertuarına yaxından bələd olması tamamilə təbii idi. Bir sıra faktların dəqiqləşməsində, ədəbi
hadisələrin, tarixi şəxsiyyətlərin kimliyinin müəyyənləşməsində Aşıq İsgəndər ən etibarlı və
mötəbər informator olmuşdur. Qazaxıstanın və Orta Asiyanın müxtəlif vilayətlərinə səpələnmiş
müdrik Axıska türkləri, xüsusilə Xəstə Hasan və Aşıq Nurinin nəslindən olan adamlar da Aşıq
Şenlik irsinə yaxından bələd olan informatorlar idi. Hələ aspiranturada oxuyarkən Qəşəm
Vəliyev dəfələrlə həmin yerlərə səfərlər etmiş, Aşıq Şenlik irsindən əlavə digər folklor örnəkləri
də toplamışdı. Həmin materialların bir qismini biz bu kitabda “Alimin arxivindən” başlığı altında
verməyi məqsədəuyğuhn saydıq.
“Çıldırlı Aşıq Şenlik” kitabı üç fəsildən ibarətdir. Birinci fəsil Çıldırlı Aşıq Şenliyin
mühiti, dövrü və həyatı haqqındadır. Müəllif burada Aşıq Şenliyin yaşayıb yaratdığı tarixi dövrü
səciyyələndirmiş, Şərqi Anadolunun Çar Rusiyasının işğalı altında olmasının ədəbi-mədəni
mühitə, o cümlədən Anadolu folkloruna təsiri məsələsini ətraflı şərh etmişdir. Aşıq Şenliyin
oğuzların Qarapapaqlar boyundan olması, yaxuda buta alması, ustad sorağı ilə Axıskaya gedib
Aşıq Xəstə Hasanın şagirdi Aşıq Nuri ilə deyişməsi və ondan ozan-aşıq sənətinin sirlərini
öyrənməsi, müstəqil şəkildə aşıqlığa başlaması, Aşıq Zulali, Aşıq Summani, Faxralı şair Nəbi
kimi saz-söz sənətkarları ilə görüşüb deyişməsi tarixi-xronoloji ardıcıllıqla nəzərdən
keçirilmişdir. Aşıq Şenlik ədəbi irsinin Azərbaycanda tədqiqi tarixindən bəhs edərkən müəllif
yazır: “Aşıq Şenlik haqqında ilk məlumat verən M.Şəmsilcədid olmuşdur. O, aşığın Borçalı
səfərləri ilə bağlı “Qoruqçular, allahı sevərsiz”, “Həsrətin çəkdiyim.Tiflis şəhrinin” adlı
qoşmalarını oxuculara təqdim etmişdir. Bu şeirlər aşığın Borçalı aşıq mühitinə bağlı sənətkar
olmasını göstərən ilk faktlar kimi diqqətə layiqdir”. Onu da qeyd edək ki, monoqrafiyada Aşıq
Şenlik Ağbaba-Çıldır aşıq mühitinin yetirməsi kimi deyil, Borçalı aşıq mühitinin nümayəndəsi
kimi təqdim olunur ki, bu da 80-cı illər Azəbaycan folklorşünaslığının elmi nailiyyətləri ilə bağlı
bir məsələdir.
Aşıq Şenliyin Ağbaba mahalının Qaranamaz (Yeniyol 1935-Ağvorik-1991) kəndində Aşıq
Ələsgərlə görüşüb deyişməsi hər iki sənətkarın yüksək ustalıq və ədəb-ehtiram nümayiş
etdirməsi Aşıq Şenliyin həyatını, qarşılıqlı sənət əlaqələrini öyrənmək baxımından maraq
doğuran məqamlardır. Təqdirəlayiq haldır ki, bütün bu məsələlər Azərbaycan və Türkiyə
folklorşünaslığı kontekstində araşdırlımış, faktik materiallar əsasında bir sıra mübahisəli fikir və
mülahizələrə aydınlıq gətirilmiş, elmi təməli olmayan bəzi müddəalar təkzib olunmuşdur.
Əlbəttə, bu və bu kimi cəhətlər yalnız həmin fəslin deyil, monoqrafiyanın üstün elmi
dəyərlərindən sayılmalıdır.
Əsərin ikinci fəsli Aşıq Şenliyin lirik yaradıcılığına həsr olunmuşdur. Q.Vəliyev ustad
aşığın lirik poeziyasını üç aspektdən araşdırmışdır: a) məhəbbət lirikası b) ictimai-siyasi şeirlər
c) təbiət gözəlliklərinin tərənnümünə həsr olunmuş peyzaj lirikası. O da maraqlıdır ki, müəllif
Aşıq Şenliyin lirikasını və ümumiyyətlə, onun həyat və yaradıcılığını yalnız Türkiyədə,
Azərbaycan və Gürcüstanda nəşr olunmuş kitab, qəzet və jurnal materialları əsasında
öyrənməmişdir. Yeri gəldikcə o, informatorların məlumatlarına əsaslanmış, topladığı
materiallarla müqayisələr aparmış və bütün bunlardan sonra elmi qənaətlərini açıqlamışdır.
Aşıq Şenliyin poetik irsini qeyd edilən istiqamətlərdən araşdıran alim aşığın təriqət
şeirlərini, bu şeirlərin dini-ürfani mahiyyətini, sufi simfolikasının bəzi məqamlarını incələməyə
də diqqət yetirmişdir.
Bəllidir ki, Aşıq Şenlik yaradıcılığının mühüm bir qolunu onun dastanları təşkil edir.
Azərbaycan folklorşünaslığında da ustad sənətkarın bədii irsindən söhbət düşərkən ən çox onun
dastan yaradıclığından, xüsusilə “Lətif şah” dastanından bəhs edilmişdir. Əski türk epik
ənənəsinin dini-mifoloji, tarixi-genetik, ədəbi-mədəni köklərindən ustalıqla yararlanan Aşıq
Şenlik yaşadığı dövrün məşhur dastançılarından biri olmuşdur. Ümumiyyətlə, Ağbaba-Çıldır
saz-söz sənətkarlarının dastan yaradıcılığı o qədər geniş və əhatəlidir ki, bu, ayrıca bir təqdiqat
mövzusu ola bilər.
Qəşəm Vəliyevin Aşıq Şenliyi müasirlərindən fərqləndirən səciyyəvi cəhətlərdən biri kimi
onun dastan yaradıclığını ayrıca bir fəsildə incələyib araşdırması həmin problemlərlə bağlıdır.
Mərhum folklorşünas, aşığın “Lətif şah”, “Sövdəgar şah və Gülənaz Soltan”, “Salman bəy və
Durnatel xanım”, “Məhəmməd və Güldənə”, “Əhməd və Gözəl ” kimi məhəbbətdən və el
qəhrəmanlarının fəaliyyətindən bəhs edən “Səməd bəy” dastanları (əslində son üçü dastan-
rəvayətdir-A.A) mövcuddur” elmi qənaətinə gəlmişdir. Müəllif dastanların yaranma tarixi, süjet
və kompozisiyası, obrazların tipologiyası, sənətkarlıq xüsusiyyətləri kimi məsələlərin dolğun və
əhatəli elmi təhlilini aparmış, polemik düşüncələrini faktiki materiallara əsaslanaraq
gerçəkləşdirmişdir. Ümumiyyətlə, monoqrafiyanın hər üç fəsli faktiki folklor örnəklərinin
zənginliyi ilə diqqəti çəkir. Bir daha qeyd etmək yerinə düşər ki, bütün bu zəngin folklor
materialları Q.Vəliyevin şəxsi ekspedisiyaları sayəsində toplanıb elmi-nəzəri araşdırmaya cəlb
olunmuşdur.
Yaşasaydı Qəşəm Vəliyevin-bu zəhmətkeş və istedadlı folklorşünasın 50 yaşı tamam
olardı. Çox hayıf ki, əcəl macal vermədi. Q.Vəliyev 50 yaşa yetişmədi. Ulularımız “yaşın oldu
əlli, adın oldu bəlli”-demişlər. Qəşəm Vəliyevin adı əlli yaşından çox əvvəl elm aləmində bəlli
oldu, tanındı və sevildi.
Azərbaycan aşıq ədəbiyyatına, ozan-aşıq sənətinə maraq ildən ilə böyüyür. Azərbaycan
aşıq sənətinin YUNESKO-nun mənəvi irs siyahısına daxil edilməsi bu marağın beynəlxalq
çevrəsinin nə qədər geniş olduğunu göstərir. Eyni zamanda yeni-yeni tədqiqatların aparılmasının
zəruriliyini də ortaya çıxarır. “Çıldırlı Aşıq Şenlik” kitabı aşıq ədəbiyyatımızda bu cür mövcud
problemlərin həllinə bir töhfə, Qəşəm Vəliyevin nakam ömrünə özünün bağışladığı bir
ərməğandır.
Avtandil Ağbaba