AŞIQ ŞENLİYİN HƏYATI VƏ MÜHİTİ
Doğu Anadolunun Çıldır mahalı XIX yüzilliyin sonu, XX yüzilliyin əvvəllərində özünün
yetirdiyi saz-söz ustaları ilə tanınırdı. Aşıq Ruhani, Aşıq Şenlik, Aşıq Qarani, Aşıq Gövhəri və
başqaları bu mahalda doğulub boya-başa çatmış, poetik duyğuları ilə şöhrətlənmiş,
yurddaşlarının şad günündə sevinmiş, qəmli-ələmli günlərində onlara ürək-dirək vermişdir.
Adları çəkilən sənətkarlar arasında saz-söz ustadı Aşıq Şenlik daha çox seçilirdi.
Aşıq Şenliyin anadan olduğu Çıldır mahalı tarixi olaylarla bağlı gah Türkiyənin, gah da
Çar Rusiyasının əlində olmuşdur. 1877-ci il Rus-türk müharibəsi nəticəsinə görə Doğu
Anadolunun Qars vilayəti 1920-ci ilə kimi Rusiyaya verilməklə İrəvan quberniyasına
birləşdirilmişdir. Aşıq Şenliyin Azərbaycan və Türkiyə ədəbi-mühitində tanınmasında bu amilin
də təsiri olmuşdur.
Aşıq Şenliyin həyat və yaradıcılığı haqqında dövri mətbuatda az-çox bilgilər verilsə də, bu
ustad sənətkarın Azərbaycan folklorşünaslığında tutduğu mövqe və bədii irsi geniş
araşdırılmamışdır.
Aşıq Şenliyin doğumu və ölümü haqqında fikir söyləyən Türkiyə alimi Orxan Özbək
aşığın ölüm tarixi barədə əsaslı mənbəyə-qəbir daşına əsaslanaraq 1853-cü ildə anadan
olduğunu, 1912-ci ildə öldüyünü söyləyir. Orxan Özbək çap etdirdiyi “Aşıq Şenlik” adlı
kitabının son fəslini ustadın başdaşına yazılmış beytlə başlayır. Vəsiyyətinə əməl olunaraq
başdaşına ölüm ayağında söylədiyi “Öyünsün” rədifli qoşmasından bir beyt yazılmışdır:
İstər ixtiyar ol, istər növcavan,
Bu dünyada baki qalan öyünsün.
Çıldırlı Şenlik-1912
Ustadın qəbri Çıldır gölünün səkkiz kilometr şərqində yerləşən Suxara
kəndindədir.Türkiyə alimi F.Kırzıoğlu da O. Özbəyə əsaslanaraq Aşıq Şenliyin 1853-cü ildə
anadan olduğunu, 1912-ci ildə ölüdüyünü söyləyir. Aşığın qəbrinin Suxara kəndinin qırağında
yerləşən “Təzə məzərlik” deyilən yerdə olduğunu göstərir. Biz də xeyirxah niyyətli
tədqiqatçılarımızın söylədikləri fikirlərə söykənir, Aşıq Şenliyin 1853-cü ildə anadan olduğu və
1912-ci ildə ölməsi tarixini təsdiqləyirik.
Aşıq Şenliyin atası Qədir ağa XIX yüzilliyin əvvəllərində Borçalıdan Cıldırdan mahalının
Suxara kəndinə köçmüşdür. O, əkinçiliklə, ev quşları saxlamaqla öz ailəsini dolandırarmış. Anası
Züleyxa oxuyub-yazmağı bacaran, aydın zəkalı bir qadın olub. Aşıq Şenliyin kiçik yaşlarından
güclü hafizəsi olmasında, hər şeyə maraq göstərməsində anasının köməyi danılmazdır.
Aşıq Şenlik haqqında el arasında yaşayan xatirələrdən, el sənətkarlarının, müdrik
qocaların dilindən eşitdiklərimizdən aydın olur ki, ustad ilk təhsilini mədrəsədə almış, dövrün bir
sıra elmlərinə yiyələnmişdir. Ata-anası onu savadlı bir adam kimi görmək istəyiblər. Bu
məqsədlə də onu öz kəndlərində yaşayan Molla Mehdinin yanında şagird qoyublar. Şenlik güclü
hafizəsi, bacarığı ilə dini bilikləri asanlıqla mənimsəyir. Bu haqda danışarkən Ensar Aslan yazır:
“Şenlik də qulaqdan dolma bu dini bilikləri köyündəki imamlardan və oxuyur-yazar olan anası
Zalxadan öyrənməkdədir. Zalxa, Şenlik daha kiçik ikən ona cəng kitabları, dini qissələr oxur,
dinlədirdi. Ayrıca Suxarada Molla Mehdi, Yusif elində Əşrəf Xoca Şenliyə bu xüsusda yardımcı
olaraq dini bilgilər vermişdir. Şübhəsiz, aşığın gəncliyində yiyələndiyi dini biliklər onun
yaradıcılığında öz əksini tapmışdır. Eyni zamanda vətəni Çıldır mahalının Çar Rusiyasının işğalı
altında olması, gördüyü haqsızlıqlar, xalqın düçar olduğu zülm və məşəqqətlər onun dünya -
görüşünün formalaşmasına təsir göstərmişdir.
Aşıq Şenlik adı ilə tanıdığımız bu ustad sənətkarın əsil adı Həsəndir. Bunu aşığın qızı
Gülxanımın xatirələrinə əsaslanan Aşıq İsgəndər Ağbabalı, türk alimləri O.Özbək, E.Aslan da
təsdiq edirlər. Maraqlıdır ki, Şenliyin əlimizdə olan şeirlərində əsil adının Həsən olduğuna işarə
edilmir.
Aşıq Həsənin “Şenlik” təxəllüsü götürməsi haqqında xalq arasında müxtəlif rəvayətlər
vardır. Onların söyləmələrinə görə, Şenlik el-oba, oymaq nəğməkarı, xalq adamı, el adamı
deməkdir. “Şenlik” sözü həm də insanpərvərlik, müdriklik, qonaqpərvərlik, insana məhəbbət,
nəciblik kimi sifətləri özündə əks etdirir. El şənliklərində şən-şux, müdrik kəlamları ilə Qars,
Anadolu, Ərzurum, Ayrım çökəyi, Dərələyəz, Şərur, Qazax, Borçalı, Ağbaba bölgələrində
aşıqlarla döş-döşə gəlib həmişə qalib çıxdığına və öz şuxluğunu itirmədiyinə görə “Şenlik” ad
təxəllüsü də bu ustad sənətkara olan xalq məhəbbətinin ifadəsidir.
Aşıq Şenliyin gənc yaşlarından şeirlər deməsi ilə bağlı müdriklərin söylədikləri rəvayətlər
ayrıca maraq doğurur. O da bir çox dədə sənətkarlarımız kimi sevgilisini yuxuda görmüş,
pirindən badə içərək haqq vergisi almışdır. Fikrimizi aydınlaşdırmaq üçün Aşıq İsgəndər
Ağbabalının ustad haqqında söylədiklərinə diqqət edək: “Aşıq Şenlik” /Həsən/ bədahətən söz
demək qüdrətinə malik olmuşdur. Həsən 15-18 yaşına qədər atasına kömək edir. Bir gün atası
qoyun sürüsünü ona tapşırıb kəndə gəlir. Həsən sürünü meşənin ətrafına gətirir, özü isə sürünün
yanında bir qədər gəzindikdən sonra uzanır. Onu yuxu aparır. Yuxuda görür ki, ağacın dibində
bir qız durub ona tamaşa edir. Həsən istəyir ki, qıza sarı getsin. Bu zaman qoca bir kişi əlində
piyalə ona doğru gəlir. Deyir: “A bala, a Həsən, o qızı görürsənmi”? O qız sənin sevgilinin
camalıdır, ancaq özü deyil. Al bu piyaləni iç, ürəyin sərinləsin”. Piyaləni içəndə Həsənin ürəyi
od tutub yanır. Huşsuz uzanıb qalır. Qədir kişi görür ki, axşam düşdü, qoyun örüşdən gəlmədi.
O, ora-buranı gəzir, sürünü bir yerə toplayır, oğlunu tapır. Görür ki, yatıb, aləmi-röyadadır.
Oğlunu yuxulu götürüb evinə gətirir. Həsən bu əhvalatı anasından savayı heç kimə danışmır.
Axşam olur. Yuxuya gedəndə yenə həmin şəkil, həmin kişi yuxusuna girir. Bu vaxt Həsən
kövrəlib anasını səsləyir. Atası Qədir kişi, dayısı İbrahim səsə gəlirlər.Atası, dayısı nə qədər
edirlərsə Həsəndən heç bir söz ala bilmirlər. Ürəyi qövr eyləyən Həsən üzünü onlara tutub deyir:
Yığılın əhbablar, yaran yoldaşlar,
Bir sağalmaz dərdə düşdüm bu gecə.
Hikməti-pir ilə abu-züladan,
Kövsər bulağından içdim bu gecə.
Qüdrət məktəbində verdilər dərsi,
Zahirdə göründü ərş
ilə kürşü,
Hifzimdə zəbt oldu ərəbi-farsi,
Lüğati-imranı seçdim bu gecə.
Səfil Şenlik haqdan buldu kamalı,
Bu fikirlə vəsli halım deməli,
Bədirlənmiş gördüm gözəl camalı,
Təğayür hal olub çaşdım bu gecə.