Söz tamama yetdi, camaatın içinə bir gülüşmə düşdü, daha nə deyim, amma biçarə Pirəli
başını sallamışdı aşağı. Deyəsən, o mərc gəldiyinə görə peşman olmuşdu. Mamoş dedi:
-Sağ ol, Ay Nəsib, sənin qadanı alım, ancaq sən allah söhbəti yarımçıq kəsmə. Bizim
Pirəlinin atının, Malaşın da tərəfini de qurtar.
-Bu saat.
Nəsib sazının yenidən sinəsinə basdı, görək burda nə dedi: Biz deyək sizlərin də canınız
sağ olsun:
Yerişdi eşşəkdi, yoxdu sürəti,
İştahası yaman çoxdu Malaşın.
Yazıq sahabanı yollarda qoyar,
At kimi hünəri yoxdu Malaşın
Yoxuşda tərpənməz, getməz irəli,
Sel-suyu görəndə gözü bərəlir,
Arpa verən kimi sanki dirilir,
İnanma ki, qarnı toxdu Malaşın.
Domuşa-domuşa gəzir, dolanır,
Ha yesə, içsə də elə bulanır,
Nəsib tək Pirvəli oda qalanır,
Dedim tərifini, baxdı Malaşın.
Pirəli Nəsibin üzündən öpdü.
-Səni Allaha and verirəm, məni bağışla, amma mən özüm də söz deyənəm. Bir işdi, oldu
da, keçdi də.
-Mən nə deyirəm ki?!
Hə , Aşıq Şenlik Nəsibi bir az da öyrənməkdən ötrü dedi:
-Nəsib, bir özün haqqında da bir şey de, bir öyrənim, görüm, kimsən nəçisən.
-Baş üstə, usta.
Nəsib sazını bir də sinəsinə basdı, amma Nəsibin çalıb çağırmağı Aşıq Şenliyin çox xoşuna
gəlmişdi. Ayə, görək Nəsib aldı görək nə dedi, vəri ilə biz deyək, sizələrə də can sağlığı.
Ustam öldü, yenə qaldım ortada,
Yarımçıqdan aşıq olmaz, neyləyim.
Şəyirtliyə kimə gedim, bilmirəm.
Hər yetişən gözüm almaz, neyləyim.
Sinəm dolu, nabələdəm yollara,
Mən naşıyam dərdə, qeyli-qallara,
Tanrı özü kömək olar qullara,
Kimsə məni yada salmaz neyləyim.
Qəza vurdu yetim qaldım atadan,
Könül evim qurtararmı xətadan.
Xəbərim var ərginədən, otadan,
Yazıq Nəsib belə qalmaz, neyləyim.
Söz tamama yetən kimi Senlik üzünü Nəsibə tutub dedi:
-A bala, mənim çox xoşuma gəldin...Gəlsənə bir elə burada yüngülvari deyişək.
-Mən razı.
-Onda qabaqcadan mən başlayıram.
-Buyur, usta.
-Ayə, indi görək burda Aşıq Şenlik nə dedi.
Deməyi bizdən, eşitməyi sizdən.
Aldı Aşıq Şenlik:
Dərdin nədi, oğul bala.
Eşqin atəşi səndədi.
Aparıblar üzüyünü,
Üzüyün qaşı səndədi.
Aldı Nəsib:
Qədərim pis, özüm xəstə,
Təbibim bulunmur mənim.
Yar-yarımçıq qalmışam mən,
Qayğıma qalınmır mənim.
Aldı Aşıq Şenlik:
Allahın tutub bəlası,
Kimin var yerdə qalası,
Bir gözəlin ah-naləsi,
Gözünün yaşı səndədi?
Aldı Nəsib:
Ürəyim yaralı qalıb,
Allahım verdiyin alıb,
Qönçə gülü əğyar çalıb,
Qisasım alınmır mənim.
Aldı Aşıq Şenlik:
Şenlik səni çox bəyəndi,
Yerindədi misra-bəndi,
Bir dünya görəsən kəndin,
Sözlərin başı səndədi.
Aldı Nəsib:
Ustam Göləli İbrahim,
Fəryadam, naləyəm, aham.
Nəsibəm əlimdə yaxam,
Düyünüm çalınmır mənim.
Söz tamama yetdi, amma Aşıq Şenlik üzünü Nəsibə tutub dedi:
-Sən əyləş, oğul, amma mənim sənə bir iki sözüm var. Ayə, burda Aşıq Şenlik götürüb
görək nə dedi, biz deyək, sizin canınız sağ olsun:
Dərd eləmə, cavan oğlan,
Hər gələn haqdan gələr,
Günlər ötər bircə-bircə
Qaradan-ağdan gələr.
Qovun-qarpız bostandadı,
Meyvələr bağdan gələr.
İsti-xəfə aran yerdən,
Sərinlik dağdan gələr.
Yetimliyin ayıb deyil,
Qəlbin olsun çox geniş.
Ərin yolu yoxuş olar,
Orda çox olmaz eniş,
Yüz kərə qəmə batarsan,
Şad olarsan bir dönüş.
Sözün safı, ən lətifi
Ürəyi sağdan gələr.
Qul Şenliyin düz söyləyər,
Həqiqəti düz deyər.
Haqqı sevər, aqilləri
Tərif edər, yüz deyər;
Yaxşı olar axrın sənin,
Tanrı “bəndəm,döz”-deyər,
Yol açılar, sədan sənin
Soldan, həm sağdan gələr.
Bəli, söz tamama yetdi. Aşıq Şenlik elə o gündən Nəsibi şagirdliyə götürdü. Məclis başa
çatandan sonra Aşıq Şenlik Nəsibi götürüb Çıldıra yola düşdü.
MƏHƏMMƏD VƏ GÜLDƏNƏ
Ərbahan çayının yanında Reyhan bağının ətəyində Camqara kəndi var idi. Həmin kənddə
Xəlil ağa adlı bir nəfər yaşayırdı. Onun uşağı olmurdu. Bir kişi də uzaq yerdən gəlib həmin Xəlil
ağaya nökər olmuşdu. Gün keçdi, ay keçdi həmin kişinin bir oğlu oldu, adını da Məhəmməd
qoydular. Aradan iki il keçdi, Xəlil ağanın bir qızı oldu. Ailədə şadlıq elədilər. Aradan az
keçməmiş Məhəmmədin atası öldü. Anası on yaşına kimi onu saxladı. Sonra o da vəfat etdi.
Qürbət eldə qohum yox, qardaş yox, Məhəmməd sahibsiz qaldı. Nəhayət, 20 yaşı tamam oldu.
Xəlil ağanın qızının adı Güldənə idi. Məhəmmədlə Güldənə bir-birini pünhan olaraq canı-
dildən sevmişdilər. Məhəmməd elin dana-quzusunu otardığı dərədə həmişə Güldənə ilə görüşüb
danışardı. Bunu Xəlil ağaya xəbər verdilər. Xəlil ağa xəncər qurşanıb atı minərək Məhəmmədin
yanına gəldi. Uzaqdan Məhəmmədi söyüb üstünə gələndə Məhəmməd bir yekə qayanın üstünə
çıxıb qışqırdı. Bunu üç nəfər atlı görüb Xəlil ağaya dedilər ki, Xəlil ağa, onun günahı nədir
öldürürsən. Xəlil ağa hirsli-hirsli dedi:
-Hələ baxın , özünə çörək tapmır mənim qızımı istəyir.
Kişilər Xəlil ağanın danladılar. Məhəmmədə də tapşırdılar ki, bir də elə iş tutmasın.
Aradan çox keçmədi ki, Güldənəyə Rəsul ağa elçi göndərdi. Xəlil ağa qızı verdi. Toy
tədarükünə on gün vaxt qoyuldu. Məclisi aparmağa Aşıq Şenlik dəvət olundu. Toya üç gün
qalanda Güldənə beş nəfər öz rəfiqəsini yığıb Ərbahan çayının ətrafında gəzməyə çıxdı. Bulağın
başında canbir qəlb rəfiqəsini bir sakit guşəyə çağırıb dedi:
-Bir neçə söz deyəcəm, onu Məhəmmədə çatdır.
Aldı görək nə dedi:
Qan-yaş töküb bu dünyada,
Salırsanmı yada məni.
Olmayaydı belə ata,
Çuladılar yada məni.
Əsən yellər qara əsdi,
Çəkəmmərəm, bu dərd bəsdi,
Molla gəldi, nikah kəsdi,
Qaladılar oda məni.
Güldənə bu dərdə dözməz,
Fələk belə yazı yazmaz,
Sənsiz bu dünyada gəzməz,
Qoy axtarsın ata məni.
Kağızı yazıb öz sirdaşı Səlbiyə verdi. Səlbi kağızı alıb cibinə qoydu. Qızlar yeyib-içib
evlərinə dağılışdılar. Səhəri Səlbi dana-quzunu örüşə bir az gec apardı. Məqsədi xəlvətcə kağızı
Məhəmmədə vermək idi. Səlbi Məhəmmədin kimi olduğunu soruşdu. Məhəmməd “ata yox, ana
yox, qohum-əqrəba yox, bir tək mən o da belə, neyləyim”-dedi. Səlbi Güldənənin məktubunu
Məhəmmədə verib onu sevindirdi. Məhəmməd namədən agah olub Səlbiyə dedi:
-Səlbi, qadan alım, bu sirri bir kimsə bilməsin. Amma bir kağız götür, nə desəm onu yazıb
Güldənəyə çatdır. Aldı Məhəmməd:
Ala gözlü mənim yarım,
Atmaq olmaz yada səni.
Sənsən mənim intizarım,
Necə verim yada səni.
Atam yoxdu elçi gedə,
Anam yoxdu sinə didə,
Hər yaramaz gədə-güdə,
Əl atıban tuta səni.
Məhəmmədəm qan ağlaram,
Bağrımın başın dağlaram,
Mən Allahı çağıraram,
Yetirsin murada məni.
Həmin gün yenə qızlar seyrəngaha çıxdılar. Səlbi kağızı gizlindən Güldənəyə verdi.
Güldənə namənin məzmununu başa düşüb daha yaşamaq istəmədi. Ərdahan çayının daşan vaxtı
idi. Güldənə çay uzunu gəzib qızlara dedi ki, qulaq asın, qızlar, ürəyim elə doludur. Yanıqlı-
yanıqlı dedi:
Eləmi bir çəməni,
Gəzərəm bir çəməni,
Gəlin halalın verin,
Görməzsiz bir də məni.
Qızlar dedi:
-Ay qız, nə deyirsən o qədər uzağa gedən olur ki, nişanlın da varlı adamdır.
Güldənə dedi:
Eləmi solar keçər,
Gül açar solar keçər,
Sevgisinə çatmayan,
Yaşamaz, ölər keçər.
Qızlar yenə dil-ağız elədilər. Güldənə bir də dedi:
Eləmi Ərdahandan,
Çay gəlir Ərdahandan,
Yaşama, ay Güldənə,
Alırlar canı candan.
Qızlar ona, “ağlına gələni danışma”-dedilər. Güldənə: “Vətən şirindir”-deyib asta-asta
körpüyə çıxdı. Oradan da bir daşın üstünə atılıb “eşidin qızlar”-dedi:
Başına döndüyüm Ərdahan çayı,
Aparırısan hansı diyara məni.
Cəsədmi dolandır sellər içində,
Ölmüyncə atma kənara məni.
Özümü qayadan atanda qərq et,
Əlimlə daşlardan tutanda qərq et,
Cəsədmi cəsədlə çatanda qərq et,
Qoyma döşəyimdə fuqara məni.
Güldənə xanımı eyləmə ibrət,
Atamla anamı bulmasın cənnət
Çəksin həsrətimi oğlan Məhəmməd,
Salsın dildən,-dilə sorağa məni
Güldənə özünü çaya atdı. Qızlar ağlaşıb o yan-bu yana qaçdılar. Bu səsi eşidib yaxınlıqdan
keçənlər qaçıb gəldilər. Özlərini suya vurub Güldənənin çıxartdılar. Onu başı üstə ağacdan
asdılar. Güldənə xeyli vaxtdan sonra özünə gəldi. Kəndə xəbər çatdı, el töküldü. Həmin xəbər
gələn vaxt Şenlik də məclisin içində idi. Hamı Güldənənin boğulduğu yerə gəldi. Hamıdan qabaq
anası Kübra qızına sarılıb belə dedi:
Başına mən dönüm Ərdahan çayı,
Niyə saldın bu balamı, bu hala,
Bu mənim dünyada bircə balamdı,
Niyə saldın bu balamı bu hala.
Saçlarım ağzımda qarğış eylərəm,
Balasız dünyada malı neylərəm?
Məhşər günü haq-divanda söylərəm,
Necə kəsdi nəsimimi bu bala.
Mən Kübrayam, halım oldu çox yaman,
Yaradanın özü qoy versin iman,
Xəlil ağa bir gün vermədi aman,
Niyə saldın bu balamı, bu hala
Məhəmməd çöldə gördü ki, el Ərdahan çayına doğru tökülür. Xəbər aldı, dedilər:
-Xəlil ağanın qızı Güldənə özünü suya atıb.
Bunu eşidəndə Məhəmməd ağlayıb dedi:
Yar yanına gedən əziz qardaşlar,
Verin yar yolunda sadağa məni.
İstəməm yaşamaq yardan ziyadə,
Verin yar yolunda sadağa məni
Tutunum tutmamış ağrıdı başım,
Hələ iyirmiyə çatmadı yaşım
Qaralar bağlasın yarım, yoldaşım,
Verin yar yolunda sadağa məni.
Siz agah sözümə eyləyin səbir,
Bizim ikimizə bir qazın qəbir,
Məhəmmədəm, mənim məqsədim budur,
Verin yar yolunda sadağa məni.
Məhəmməd belə deyəndə Xəlil ağanın və Rəsul ağanın adamları istədilər ki, Məhəmmədi
öldürsünlər. Kərəm adlı bir oğlan sinəsini qabağa verib dedi:
-Bu yazığın heç kimi yoxdur və heç bir günahı olmayıb. Qızın da ona görə özünü suya atıb.
Sizin bunu öldürməyə heç haqqınız yoxdur.
O, Məhəmmədin əlindən tutub Güldənənin olduğu yerə gətirdi. Məhəmməd Güldənənin bu
vəziyyətdə görüb yanıqlı-yanıqlı dedi:
Yığılan qonşular, gələn qardaşlar,
Həbib kimsə dərdə dərman eyləsin.
Bu dünya fanidir kimə qalacaq,
Bu cavandır, el-obamız ağlasın.
Könül dərgahında, əlim duvada,
Səbəb olan heç gülməsin yuvada,
Mənim ahım heç qalarmı dünyada,
Həbib olan yaralarım bağlasın.
Güldənə dərdindən düşdü çaylara,
Qalmaz ahu-zarı həftə aylara,
Dumanım başımdan çıxdı göylərə,
Yazıq canım bu sitəmə neyləsin
Fələk bu Xəlilin başından vursun,
Kor olsun gözləri, ürəyi dursun,
Xar olsun dünyada, el-oba gülsün,
Hər kim görsə divanlarda söyləsin.
Yazığam sözümə bir qulaq asın,
Güldənə, Məhəmməd buna neyləsin,
Yar dizinin üstündə başımı kəsin,
Aşıqlar dastanda məni söyləsin
Kərəm irəli durub “Güldənə Məhəmmədindir”-dedi. Hamı razı oldu. Güldənənin bədənini
bir qədər sıxdılar, ağzından xeyli su getdi. Güldənənin ağlı başına gəldi. Kərəm irəli yeriyib qızın
əlini Məhəmmədin əlinə verdi. Bu, məclis əhlinin ürəyindən oldu. Aşıq Şenlik sədəfli sazını dilə
gətirdi.
Xəlil ağa, sənin boynun qırılsın,
İnsan balasına düşmən olarmı?
Ürəyin dayansın, qanın qurusun,
İnsan balasına düşmən olarmı?
Bunları yazıbdır yaradan kişi,
Verməsən olarsan naşıdan naşı,
Allah salsın sənin başına daşı,
İnsan balasına düşmən olarmı?
Şenlik bu dastanı görəndə yazdı,
Gözəlin irəngi solanda yazdı,
Məhəmməd üstünə gələndə yazdı,
İnsan balasına düşmən olarmı?
Kərəm Məhəmmədi qardaş əvəzi evinə gətirdi. Üç-dörd gün Məhəmmədə toy çaldırdı.
Aşıq Şenlik məclisi apardı. Cavanlara xeyir-duva verdi.
MÜNDƏRİCAT
Aşıq Şenlik haqqında dəyərli tədqiqat ................................. 3
Aşıq Şenliyin həyatı və mühiti ............................................ 10
Aşıq Şenliyin lirikası ........................................................... 56
Dastan yaradıcılığı ............................................................... 91
Alimin arxivindən ................................................................ 144
Şirəkli Həsən
Söylə
Var
Var
Keçdi
Aşıq İsgəndər Ağbabalı
Telli sazım
Bəhanədi
Gəlmədi
Görünməz
Aşıq Heydər
Yaz havası
Yeri-yurdu qurulama
Vədəsidi
Çorlu Məhəmməd
Tutuldu
Mən
Mənim
Gəlin
Qalıbdı
Tapılmadı
Aşıq Şenlik və qartal əhvalatı .............................................. 156
Aşıq Şenliyin atası Qədir ağanın quşları ............................. 158
Aşıq Şenliyin Nəsiblə görüşü .............................................. 161
Məhəmməd və Güldənə ....................................................... 168
Qəşəm Camal oğlu Vəliyev
ÇILDIRLI AŞIQ ŞENLİK
Bakı, “Azərnəşr”, 2010
Kompüterdə yığdı:
Asiman Babayeva
Kompüyer tərtibatçısı:
Murad Nəsirov
Korrektor:
Afət Rəfiyeva
Yığılmağa verilib: 09.01.2010
Çapa imzalanıb: 21.07.2010
Kağız formatı: 60х84 1/16
Çap vərəqi: 11
Tiraj: 200
Qiyməti müqavilə yolu ilə
_____________________________________
Dostları ilə paylaş: |