ki, girib içində oturasan. Əl çək! Yenə get döşünü qabağa ver, peyinin içində
çapala. Sən bir öz sifətinə bax, gör nə günə düşmüsən. Tezliklə
gəbərəcəksən burda. Hələ bu da bəs eləmir sənə. Şüar deyirsən, çağırışa
qoşulursan. Geridə qalanları ardınca çağırırsan. Əlinə bir düdük veriblər,
çalırsan! Əl çək məndən, daha bəsdir!
Yenə Bektay uzaqlaşırdı. Addımlarını qarın üstünə elə bərk-bərk basırdı ki,
onun ayaq basdığı yerlər əlbəəl
qaralıb, su ilə dolurdu...
Tanabay qaçıb ona yetişdi:
– Bektay. Bektay, bir dayan, mənə qulaq as! Gör sənə nə deyirəm?
– Başqalarına de. Dünyada axmaq
çoxdur!
– Dayan. Bektay. Bir dur, söhbət eləyək.
Ancaq onun dediklərini Bektay heç eşitmək də istəmirdi.
– Məhkəməyə düşəcəksən!
Bektay son dəfə geri
dönüb dişlərini qıcırdatdı:
– Bu cür yaşamaqdan türmə yaxşıdır!
– Sən dezertirsən!
Bektayın vecinə deyildi.
– Cəbhədə sənin kimiləri güllələyirdilər!
Bektay gedirdi.
Tanabay onun qolundan yapışdı:
– Dayan, deyirəm sənə!
Bektay qolunu dartıb çıxartdı, yoluna davam elədi.
Tanabay Bektayın çiyinlərindən
tutdu:
– Qoymaram, qoymaram! Sənin buna ixtiyarın yoxdur! – dedi və birdən ağ
təpələr onun başına dolandı, gözlərinə duman gəldi. Çənəsinə vurulan
gözlənilməz zərbə Tanabayı yerə sərdi.
O, başı gicələ-gicələ ayağa duranda Bektay təpəni aşmışdı.
Onun ayaq izləri qar üstdə qaralırdı.
– Bədbəxt oldu,
bədbəxt oldu, – deyə-deyə Tanabay zarıya-zarıya yerdən qalxmağa çalışdı.
Qalxdı. Əlləri qara, palçığa bulaşmışdı.
Nəfəsini dərdi. Bektayın sürüsünü
qabağına qatıb, dərdli-dərdli geri qayıtdı.
17
İki nəfər atlı aulu arxada qoyub, dağlar səmtə üz tutmuşdu. Biri kəhər at
minmişdi, o biri səmənd at.
Hər iki atın quyruğu bərk-bərk düyülmüşdü – uzağa gedəsi idilər. Atların
ayağı altında qarlı palçıq xırçıldayırdı, palçıq ətrafa sıçrayırdı.
Möhkəm
cilovlanmış Gülsarı mətin addımlarla dağyuxarı qalxırdı. Sahibi uzun müddət
xəstə yatmışdı, bu vaxtlar at dincəlmişdi. Ancaq indi onun üstündə gedən
Çoro deyildi, naməlum bir adam idi, əyninə xəz palto geymişdi, paltonun
üstündən brezent plaş salmışdı. Bu adamın üst-başından rezin və boyaq qoxusu
gəlirdi. Çoro yanaşı gedirdi, başqa ata minmişdi. Hərdən belə şeylər olurdu –
Çoro öz atını rayondan gələn yoldaşa verirdi. Əslində, bunun Gülsarı
üçün heç bir fərqi yox idi. İlxıdan, əvvəlki sahibindən ayrılandan sonra onun
üstündə çox adamlar gəzmişdi. Cürbəcür adamlar – yaxşısı da olmuşdu,
pisi də. Bəzisi yəhərdə düz oturmuşdu, bəzisi əyri oturub atı da narahat
eləmişdi. Gülsarı dəliqanlı adamlar da görmüşdü. Belələrindən onun zəhləsi
gedirdi. Çünki onlar atı var gücləri ilə qovub, sonra birdən yüyəni
çəkirdilər, at dikəlib şahə qalxırdı və yenə çapmalı olurdu. Belələri min cür
oyundan çıxırdılar – təki onların yorğa ata mindiyini görəydilər. Gülsarı hər
şeyə öyrənmişdi. Bircə tövlədə qalmaqla arası yox idi. Əvvəlki ehtiras
hələ də Gülsarının canında idi – çapmaq, çapmaq, çapmaq. Kimi çapdırmağın
fərqi yox idi. Belə şey çapanları maraqlandırırdı – onlar üçün hər atın öz
yeri vardı. Əgər bir kəs Gülsarını minirdisə, deməli, hörmətli adam idi,
ondan qorxurdular. Gülsarı gözəl at idi, qüvvətli, rahat. Onu minən adama
heç bir xətər toxuna bilməzdi.
Bu dəfə Gülsarı rayon prokuroru Seqizbayevi aparırdı, onu kolxoza təhkim
eləmişdilər. Seqizbayevi müşayiət eləyən
kolxozun partorqu idi – heç, əslində, o da kiçik adam deyildi. Ancaq partorq
susurdu, görünür, qorxu canını almışdı: axı, qoyunçuluqda vəziyyət pis
idi. Çox pis idi. Qoy qorxsun, heç danışmasın. Boş-boş danışmağın nə mənası?
Aşağı vəzifəli adamların yuxarı vəzifəlilərdən qorxmağı yaxşıdır. Yoxsa,
heç bir qayda-qanun ola bilməz. Bəziləri tabelərində olan adamlarla çox
yumşaq rəftar eləyirlər, elə təpik də adama onlardan dəyir, özü də elə dəyir
ki, it kimi zingildəməli olursan. Vəzifə böyük şeydir, məsul şeydir. Vəzifə
başında oturmaq hər adamın işi deyil.
Gülsarının belində oturub, atın
addım səslərinə uyğun bir ahənglə yırğalana-yırğalana gedərkən, Seqizbayev
belə düşünürdü. O, çobanları yoxlamağa gedirdi, orada ürək açan bir şey
görməyəcəyinə əmin idi, buna baxmayaraq, prokurorun kefi pis deyildi. O
bilirdi ki, bu il qış çox sərt keçib, hələ də çəkilib getmək istəmir və qışla
yazın bu çarpışmasında çoxlu qoyun-quzu tələf olub. Əslində, hər il belə idi.
Bunu hamı bilirdi. Ancaq, madam ki, onu kolxoza təhkim etmişdilər,
deməli o, kimisə məsuliyyətə almalı idi. Üstəlik, ürəyinin harasındasa
Seqizbayev builki böyük tələfatın özü üçün sərfəli olduğunu hiss eləyirdi.
Axı, rayonda maldarlığın vəziyyətinə cavabdeh o deyildi, Seqizbayev prokuror
idi, bir də olsa-olsa raykom bürosunun üzvü idi. Bütün bunların
məsuliyyəti birinci katibin boynuna düşəcəkdi. Katib təzə gəlib, qoy əcrini
çəksin. Bütün bu işlərə Seqizbayev kənardan baxacaqdı. Buna, yəqin ki,
yuxarıda oturanlar da baxacaqdılar və biləcəkdilər ki, kənar adamı buraya
katib göndərməkdə səhv eləyiblər. Seqizbayev bu işdən çoxdan narazı idi –
axı, o, burada ola-ola niyə kənardan katib göndərilməli idi? Neçə il idi ki,
Seqizbayev rayonun prokuroru idi, özünün nəyə qadir olduğunu dəfələrlə
sübut eləmişdi. Eybi yoxdur, hələ dostlar ölməmişdilər, lazım olsa, arxasında
duracaqdılar. Bəli, bəli, partiya işinə keçməyin vaxtı çatmışdı.
Prokuror stulunda əyləşmək kifayət idi... Bu at da lap qiyamət at imiş. Gəmi
kimi yırğalanırdı, qarı-palçığı heç vecinə də almırdı. Partorqun atı
çoxdan köpük içində idi, ancaq bunun canına hələ təzəcə tər gəlirdi...
Çoro isə öz aləmində idi. Görkəmi heç yaxşı deyildi. Yorğun, üzgün. Sifəti
sapsarı saralmışdı, gözləri yumulurdu. Neçə il idi ki, ürəyinin əzabını
çəkirdi və yaxşılığa doğru heç bir əlamət görünmürdü, halı get-gedə
ağırlaşırdı. Bu yandan da ağır fikirlər ürəyini ağrıdırdı. Bəli, Tanabay
haqlı idi. Sədr qışqırırdı, hay-küy salırdı, əlindən özgə bir iş gəlmirdi.
Bir ayağı rayonda idi, gündə bir şeyi bəhanə eləyib gedirdi. Partiya
iclasında sədrin məsələsini qoymaq lazım idi, buna da rayon icazə vermirdi,
gözləməyi məsləhət görürdülər. Axı, nə üçün? Söz vardı ki, Aldanovun özü
keçmək istəyir, bəlkə, buna görə rayon etiraz eləyirdi? Əlbəttə, getməyi
məsləhət idi. Lap Çoronun özünün də vaxtı çatmışdı. Onun kolxoza nə xeyri
dəyirdi? Həmişə xəstə idi. Samansur tətilə gəlmişdi, o da belə məsləhət
görürdü. Bir də, işdən çıxmağa nə vardı ki? Çoronu öz vicdanı qorxudurdu.
Samansur ağıllı oğlan idi, çox şeyi atasından yaxşı bilirdi. Tez-tez
təsərrüfat məsələlərindən söhbət salırdı. Onlara yaxşı elmlər öyrədirdilər.
Bəlkə, orada professorların dedikləri bir vaxt, doğrudan da, həyata
keçiriləcəkdi, ancaq hələlik özgə əlac yox idi – görünür, Çoro xəstə ürəyini
bu yolda qoyacaqdı. Öz dərdinin əlindən o, hara qaça bilərdi? Bir də, o,
işdən çıxsaydı, kənardan baxanlar nə deyərdi? Vəd verdin, qızışdırdın,
kolxozu xirtdəyəcən borca saldın, indi qaçıb aradan çıxmaq istəyirsən, eləmi?
Yox, bu cür Çoro heç vaxt rahatlıq tapa bilməzdi, axıracan durmaq lazım idi.
Gec-tez kolxozun köməyinə gələcəkdilər, belə qala bilməzdi. Bircə tez
gələydilər. Özü də əməlli adamlar gələydilər, beləsi yox. Bu dağıntı üçün,
deyir, adamları məsuliyyətə cəlb eləyəcəyik. Elə görək! Ancaq məhkəmə ilə
bu düzəlməz. Oturub, qaşqabağını sallayıb, elə bil dağdakıların hamısı
canidir, bundan başqa kolxoza can yandıran yoxdur... Əslində isə heç kolxoz
Dostları ilə paylaş: |