431
21 Dekabr – Xalq artisti, xanəndə Tükəzban İsmayılovanın 95 illiyi,
(1923-2008)
Tükəzban Məhərrəm qızı İsmayılova 1923-cü il dekabrın
21-də Bakı şəhərində anadan olmuşdur. O, 1939-1944-cü
illərdə Asəf Zeynallı adına Musiqi Texnikumunda təhsil almış
və peşəkar xanəndə kimi çıxış etməyə başlamışdır. Tükəzban
İsmayılova 1948-1956-cı illərdə Azərbaycan Dövlət
Filarmoniyasının solisti olmuşdur (1939-1946, 1949-1978).
Azərbaycan Dövlət Qastrol-Konsert Birliyinin (1978-2008)
solisti olmuşdur. 1994–2004-cü illərdə isə İncəsənət
Gimnaziyasında pedaqoji fəaliyyət göstərmişdir. Milli
musiqimizin böyük sənətkarlar nəslinin görkəmli nümayəndəsi
olmuş Tükəzban İsmayılova yüksək ifaçılıq qabiliyyəti və
səhnə mədəniyyəti ilə fərqlənirdi. Ömrünün altmış ildən artıq
bir dövrünü muğama həsr edən Tükəzban İsmayılova
musiqimizin inkişafı naminə böyük əmək sərf etmişdir. Müğənninin oxuduğu klassik
Azərbaycan muğamları və xalq mahnıları ifaçılıq sənəti tariximizə həmişəlik daxil
olmuşdur. Repertuarında muğam, təsnif, xalq mahnıları ("Kürdün gözəli", "Yeri, dam
üstə yeri", "Qarabağ şikəstəsi", "Qaragöz" və s.) və Azərbaycan bəstəkarlarının
mahnıları əsas yer tutur. Onun özünəməxsus üslubda oxuduğu “Qatar”, “Xaric segah”,
“Şahnaz”, digər muğam və mahnılar milli musiqi xəzinəmizi zənginləşdirmişdir.
Tükəzban İsmayılova mədəniyyətimizdə öz dəst-xətti ilə seçilən sənətkar olmuşdur.
Bir çox mahnı və təsnif məhz onun təkrarsız ifası ilə geniş yayılmışdır. Tükəzban
İsmayılova dünyanın bir çox ölkələrinə (Almaniya, Polşa, İraq, İran, Türkiyə, Misir,
Əlcəzair və s.) qastrol səfərləri zamanı Azərbaycan mədəniyyətini layiqincə təmsil
etmişdir. O, respublikamızda gənc xanəndələr nəslinin yetişdirilməsində də öz
qüvvəsini əsirgəməmişdir.
Tükəzban İsmayılovanın Azərbaycan musiqi mədəniyyətinin inkişafındakı
xidmətləri yüksək qiymətləndirilmişdir. O, Azərbaycan Respublikasının ali
mükafatlarından biri olan “Şöhrət” ordeni ilə təltif edilmişdir. 1993-cü ildə Azərbaycan
Respublikasının xalq artisti 1998-ci ildə Azərbaycan Respublikasının "Şöhrət ordeni"
ilə təltif edilmişdir. 2008-ci il mart ayının 24-də Bakıda vəfat etmişdir, məzarı II Fəxri
Xiyabandadır.
Filmoqrafiya: O olmasın, bu olsun (film, 1956), Havalansın Xanın səsi (film, 2001),
Oxuyan ürəkdir (film, 2003) və s.
İnternetdə:
https://az.wikipedia.org
432
27 Dekabr – Xalq artisti, aktrisa Safurə İbrahimovanın 80 illiyi, (1938)
İbrahimova Safurə Ağabala qızı 1938-ci il dekabr ayının
27-də Bakıda doğulub. Orta məktəbi bitirdikdən sonra dram
dərnəyində çalışıb. 1960-cı ildə Mirzağa Əliyev adına
Azərbaycan Dövlət Teatr İnstitutunun dram və kino
aktyorluğu fakültəsinə daxil olub. Birinci kursda
onu Akademik Milli Dram Teatrının repertuarında
olan İslam Səfərlinin "Ana ürəyi" dramının tamaşasında
Xatirə roluna dəvət ediblər. Bundan sonra daha bir neçə
rol oynayan tələbə-aktrisa 1961-ci il noyabr ayının 1-
də Akademik teatrın truppasına daxil olub. Həmin vaxtdan
indiyə qədər bu kollektivdə çalışır. Xaraktercə lirik-dramatik aktrisadır. Komik
personajlarda da məharətlə oynaya bilir. Səhnədə səmimiyyəti, obrazın psixoloji
xarakterini həssaslıqla duyması ilə seçilir. Mənalı sifət ifadələrindən və plastik
emosional hərəkətlərdən istifadə etməkdə səriştəlidir. Safurə İbrahimova səhnədə
Kamalə, İnci ("Toy" və "Xoşbəxtlər", Sabit Rəhman), Əsmər ("Alov", Mehdi
Hüseyn), Fernando ("Dəlilər", Lope de Veqa), Gülnar və Tamara ("Vaqif", Səməd
Vurğun), Nazlı ("Ölülər", Cəlil Məmmədquluzadə), Ofeliya ("Hamlet", Vilyam
Şekspir), Hafizə ("Pəri cadu", Əbdürrəhim bəy Haqverdiyev), Karola ("Füsunkar qız",
Mlkolaş Dyarfaş), Jasmen, Vəfa ("Knyaz" və "Xəyyam", Hüseyn Cavid), Daduno
("Darıxma, ana!", Nodar Dumbadze), Sona ("Xanuma", Avksenti Saqareli), Cen
("Mariya Tüdor", Viktor Hüqo), Maral ("Sənsiz", Şıxəli Qurbanov), Saşa ("Canlı
meyit", Lev Tolstoy), Sevil ("Sevil", Cəfər Cabbarlı), Balaxanım ("Adamın
adamı", Anar), Mədinə, Tubu xanım ("Sevgililərin cəhənnəmdə vüsalı" və "Hökmdar
və qızı", İlyas Əfəndiyev), Durdensiya ("Dişi canavar", Federiko Qarsia Lorka), Zəhra
bəyim ("Anamın kitabı", Cəlil Məmmədquluzadə), Mələk ("Köhnə ev", Əli Əmirli)
rollarında daha çox sənət uğurları qazanıb. Aktrisanın kino rolları arasında Telli
("Arşın mal alan"), Həbibə ("Qatır Məmməd"), Dilbər ("Sevil"), Gülpəri ("Dərviş
Parisi dağıdır"), Mədinə ("Alma almaya bənzər") obrazları daha məşhurdur. Safurə
İbrahimova teatr sənətindəki xidmətlərinə görə Azərbaycan Respublikasının əməkdar
artisti (1 iyun 1974) və xalq artisti (24 dekabr 2002) fəxri adları ilə təltif edilib. Mehdi
Məmmədovun quruluşunda Hüseyn Cavidin "İblis" faciəsindəki Rəna roluna görə
Dövlət mükafatı laureatıdır. SSRİ dövründə Novruz bayramı keçirilərkən, ilk bahar
qızı məhz Səfurə İbrahimova olub.
Filmoqrafiya: Arşın mal alan (film, 1965), Bizim Cəbiş müəllim (film, 1969), O qızı
tapın (film, 1970), Sevil (film, 1970), Qatır Məmməd (film, 1974), Alma almaya
bənzər (film, 1975), Dərviş Parisi partladır (film, 1976), Şir evdən getdi (film, 1977),
Qayınana (film, 1978), Əlavə iz (film, 1981), Sən həmişə mənimləsən (film, 1987),
Sahilsiz gecə (film, 1989), Hökm (film, 1994) və s.
İnternetdə:
https://az.wikipedia.org
Milli Qəhrəmanlar Zirvəsi