113
«Güclü və nüfuzlu dövlət olmadan bazar islahatları eybəcər, qeyri-sivilizasiya
xarakteri alır».
Bazar iqtisadiyyatı münasibətlərinə keçidin tarixi ardıcıllığını şərh edən
O.T.Boqomolov əlavə edir ki, «Mərkəzi və Şərqi Avropa ölkələrindən fərqli
olaraq Rusiyada bazar iqtisadiyyatına keçid 1-2 il gec başladı, MDB-nin digər
ölkələrində isə bu daha gec oldu. Xüsusilə Özbəkistan, Belorusiya,
Türkmənistan, Qazaxıstan və Azərbaycanda bu ilk dövrlərdə daha ehtiyatlı və
tədrici keçid idi. Bu səbəblərdən də həmin ölkələrin bir çoxunda iqtisadi
tənəzzül tədrici islahatlar deyil, daha çox postsovet məkanındakı iqtisadi
əlaqələrin pozulması, ittifaq mərkəzindən köməyin kəsilməsi, Moskva
tərəfindən idarəetmə sisteminin dağılması, kadr çatışmamazlıqları ilə bağlı idi.
İqtisadi tənəzzül 1993-1994-cü illərdən başlayaraq inkişafla əvəz
olunmağa başlandı, bəzən isə bu tənəzzül MDB ölkələrində bir çox illər üçün
uzandı. Bu zaman digər Mərkəzi Avropa ölkələrindən heç biri Rusiya,
Ukrayna və digər MDB ölkələri kimi bu dərəcədə ağır şəkildə əhalinin real
gəlirlərinin və istehsal çatışmazlıqlarını yaşamadı».
Bəs ayrı-ayrı regionlarda bu böhrandan çıxış yolunu tapmaq üçün hansı
vasitələrə əl atıldı? MDB ölkələrində islahatların proqramlı gedişi üst-üstə
düşsə də, yerlərdəki fərqli ənənəvi-mədəni dəyərlər bu proseslərə müxtəlif
cəhətlər gətirdi. İslahatların keçirilməsində nəzərə çarpan çatışmazlıqları da
yerli özünəməxsusluqla, düşüncə tərzi ilə bağlamaq olar.
Azərbaycanda 15 ildən artıqdır ki, davam edən bu proseslərin yerli
tədqiqatçılar tərəfindən necə qiymətləndirilməsinə, yəni islahatlar prosesinin
gedişinə nəzər salaq. Bildiyimiz kimi, dövlətin, cəmiyyətin inkişafı və
mənafeyi ilə bağlı olan proseslərin həyata keçirilməsi üçün
ilk növbədə hüquqi
baza olmalıdır. İ.H.İbrahimovun qeyd etdiyi kimi, «İqtisadiyyatda yaranmış
böhranı aradan qaldırmaq üçün planlı təsərrüfatdan bazar iqtisadiyyatına
keçmək qərara alındı və ilk növbədə aqrar sahədə islahatlara başlandı. İlk
vaxtlar aqrar islahatların həyata keçirilməsi üçün kifayət qədər hüquqi baza
olmadığına görə aparılan tədbirlər eksperiment xarakteri daşıyırdı».
İqtisadçı S.Ə.Şirəlizadə isə məhz özəlləşdirməni Azərbaycanda aparılan
iqtisadi islahatların özəyi hesab edir. Qeyd edə bilərik ki, məhz özəlləşdirmə
prosesi 1992-ci ilə qədər hüquqi əsaslara malik olan sovet iqtisadi sisteminin
tam inkar edilməsi demək idi. Azərbaycanda 1992-ci ildən hüquqi təminat
alan özəlləşdirmə prosesi bazar iqtisadiyyatına keçid istiqamətində ilk cəhd
idi. Azərbaycan Respublikasında özəlləşdirmə prosesi torpaq islahatları ilə
başlanmışdır. Təxminən 15 il keçdikdən sonra bu islahatların gedişinin
mütəxəssislər tərəfindən necə qiymətləndirildiyinə nəzər salaq.