215
Harisin qızı Meymunə ilə nikah bağladı. O, Məkkəyə gələndə bu niyyəti var idi,
lakin nikahı ziyarətdən sonraya saxladı. Bu siyasi haqq-hesab güdən nikah idi,
çünki Meymunə əlli bir yaşında olan dul qadın idi. Bu nikahla o, iki qüdrətli
tərəfdar qazanırdı. Onlardan biri Xalid ibn əl-Vəlid idi, o, dul qadının qohumu
olmaqla, igid döyüşçü idi və məhz həmin döyüşçü Ühüd döyüşündə peyğəmbəri az
qala öldürmüşdü. İndi o, islamın ən qabiliyyətli döyüşçüsü olacaqdı və sonralar
“Allahın qılıncı” ləqəbini alacaqdı.
İslam dininə digər yeni keçən isə vaxtilə Məhəmmədə həcvlər yazan Əmr
ibn As idi. Bu vaxtdan etibarən isə o, yad torpaqlarda əvvəllər mübarizə apardığı
dini belə çalışqanlıqla yayacaqdı.
Meymunə peyğəmbərin sonuncu arvadı oldu və qocalığına baxmayaraq,
onun arvadlarının hamısından çox yaşadı. Bu qadın Sarifdə vaxtilə ona nikah
bağlanan vaxtı qoyulmuş çadırın yerində ucalan ağacın altında ölmüşdü. O, orada
da dəfn edildi. Doqquz əsr sonra orada olan tarixçi həmin yerdə Meymunənin
şərəfinə qara mərmərdən məscid ucaldıldığını yazırdı. Məscid Allahın elçisinin və
onun sonuncu arvadının yatağı olan yerdə tikilmişdi.
Məhəmmədin Ərəbistandan kənara göndərdiyi elçilərdən biri Suriyanın
sərhədindəki ticarət mərkəzi olan Busra hökmranının yanına gedirdi. Burada
Məhəmməd vaxtilə yeniyetmə vaxtı ilk karvan səfərində gəlmişdi. Lakin səfiri
Mutə şəhərində öldürdülər. Elçinin qətlinin qısasını almaq üçün Məhəmməd üç
minlik qoşun yığdı və onu cinayətkar şəhərin üstünə göndərdi. İlk dəfə olaraq
müsəlmanlar Roma imperiyası ilə vuruşacaqdı. O, qoşuna rəhbərliyi Zeyd ibn
Harisə həvalə etdi, o, gözəl arvadı Zeynəbi peyğəmbərə güzəştə getməklə öz
sədaqətini sübut etmişdi. Onunla Əbu Talibin oğlu Əlinin qardaşı Cəfər də getdi.
Cəfər ibn Əbu Talib öz natiqlik qabiliyyəti ilə Abissiniya çarı qarşısında islam
təlimini müdafiə etməyi bacarmışdı. Zeydi həm də qılıncı ilə məşhurlaşmış bir şair
olan Abdullah ibn Rəvaha müşayiət edirdi. Üçüncüsü isə dini yenicə qəbul etmiş
Xalid ibn Vəlid idi. Onlar Mutəni qəflətən tutub, sakinləri islam dininə keçməyə
sövq etməli idilər. Onlara qadınlara və uşaqlara, rahiblərə və korlara aman vermək,
evləri dağıtmamaq və ağacları kəsməmək tapşırılmışdı.
216
Mutə yaxınlığında düşmənlə qarşılaşdılar və qızğın döyüşdə Zeyd ölümcül
yaralandı. Müqəddəs bayraq onun əlindən düşəndə Cəfər bayrağı qapıb yuxarı
qaldırdı. Döyüş bayrağı ələ keçirmək üstündə gedirdi. Cəfər igidliklə onu
qoruyurdu. Bayrağı tutduğu qol zərbə ilə kəsildikdə, o, bayrağı başqa əlinə
götürdü. Digər qolu da vurulub kəsildikdə o, qana bulaşmış dirsəyi ilə bayrağı
saxlamışdı. Qılınc zərbəsi onun başını yarı böldü və cəsədi torpağa düşdü. Ölən
halda da o, bayrağı döşünə sıxmışdı. Şair Abdullah bayrağı qaldırdı, lakin o, da
qılınc zərbəsindən öldü. Onda dinə yenicə keçmiş Xalid üç müsəlman başçısının
öldürüldüyünü görüb, bu bəlalı bayrağı qapdı. Onun səsi tərəddüd edən
müsəlmanları bir yerə topladı. O, qüvvətli əlləri ilə düşmən içərisindən özünə yol
açırdı. Onun özünün sonralar söylədiyinə görə doqquz qılınc vurduğu güclü
zərbələrdən onun əlində qırılmışdı. Gecə düşəndə döyüş yarımçıq qalmışdı.
Döyüşçülərin öz başçısı kimi tanıdıqları Xalid sübut etdi ki, onun hərbi qabiliyyəti
igidliyinə bərabərdir. Bir neçə yerdə cəld keçidləri və hərəkəti ilə o, düşməni
aldada bildi və onlar güman etdi ki, ona güclü kömək gəlmişdir. Ona görə də Xalid
hücumu bərpa edəndə, düşmənin geri çəkilməsi qaçmağa çevrildi, Xalid isə onları
dəhşətli qan tökməklə təqib edirdi. O, onların düşərgəsini qarət etdi, orada nəhəng
qənimət qalmışdı. Öldürülənlərin arasında Cəfərin cəsədini də tapdılar, onun
bədənindəki bütün yaralar qabaq tərəfdən vurulmuşdu. Onun igidliyinə və
peyğəmbərlə qohumluğuna hörmət əlaməti olaraq onu orada dəfn etmədilər,
Mədinəyə aparıb orada təntənəli qaydada torpağa tapşırdılar.
Qoşun qənimətlə qayıtsa da, onun şəhərə daxil olması matəm mərasiminə
bənzəyirdi. Sevinc səsləri hönkürtülərə qarışmışdı. Qələbəyə sevinən xalq üç
sevimli sərkərdəsini itirməsinə görə yas saxlayırdı. Hamı Cəfərin ölümünə
ağlayırdı. Onun kiçik oğlu ilə gözəl arvadı qalmışdı. Məhəmməd yetim qalmış
uşağı qucağına götürüb onu göz yaşları ilə islatmışdı. Bu vaxt ona sədaqətli Zeydin
gənc qızı yaxınlaşdıqda, o, daha da mütəəssir oldu, daha bərkdən ağlamağa başladı.
Qoşun qayıdandan üç gün sonra Cəfərin dəfn mərasimi keçirildi. Məhəmməd
özünə gəlmişdi və adamları sakitləşdirmək üçün deyirdi: “Mənim qardaşımın
ölümünə ağlamağı kəsin. Dinin bayrağını qoruyanda o, iki əlindən məhrum
217
olmuşdu. Buna görə onu cənnətə aparan iki qanad verilmişdir ki, orada nəhayətsiz
xoşbəxtlikdən həzz alsın. Bu döyüş meydanında həlak olan hər bir mömin üçün
həqiqi mükafatdır”. Xalidin igidliyi və fərasəti hesabına bu təhlükəli iş uğurla həll
edildiyinə görə Məhəmməd onu “Allahın qılıncı” adlandırdı və bu ad altında o,
məşhurlaşdı.
Silahın gücü və bəlağətli nitqi ilə Məhəmməd ərəb tayfalarının çoxu
üzərində ağalıq əldə etdi. Onun rəhbərliyi altında çox minli döyüşçülər ordusu,
aclıq, susuzluq və qızmar günəşlə möhkəmlənmiş çöl oğulları var idi. Onlar üçün
müharibə spartalılar kimi əziyyət deyil, bir əyləncə idi. Məhəmməd onlardakı
dəlisovluğu tərbiyə edib, qanuna tabe olmağı sövq edə bilirdi. Lakin onun vətəni
olan Məkkə hələ də onun barışmaz düşmənlərinin əlində idi. Kəbə hələ də
bütpərəstlərin simvolları və adətləri ilə təhqir olunurdu. Doğma şəhərin divarları
üzərində bu bayrağı qaldırmaq, onu murdarlanmaqdan təmizləmək və islama itaət
edənlərin ixtiyarına vermək indi onun ən böyük arzusu, istəyi və niyyəti idi.
Qüreyşlilərlə bağlanan müqavilə hansısa hərbi əməliyyatın qarşısını alırdı. Ancaq
Qüreyşlilər də müsəlmanların qüdrətinin belə sürətlə böyüməsindən təlaş
keçirirdilər. Onlar müsəlmanlarla hər cür sözləşməni və incikliyi yoluna qoymaq
istəyirdilər. Onlar öz başçıları Əbu Süfyanı məcbur etdilər ki, elçi kimi Mədinəyə
getsin və ümid edirdilər ki, öz qızı Ümmü Həbibənin köməyindən istifadə edərək
peyğəmbəri sülhə inandırmağa nail olacaqdır. Qüreyşlilərin məğrur başçısına
vaxtilə yalançı kimi güldüyü və təqib etdiyi bir adamın yanına xahişçi sifətində
getmək olduqca ağır idi. Lakin o, daha ağır alçalmaya məruz qaldı. Məhəmməd bu
elçiliyin zəiflik əlaməti olduğunu görüb təklifə heç cavab da vermədi.
Əbu Süfyan öz qəzəbini gizlətməyə məcbur olub, Əbu Bəkrə, Ömərə və
Əliyə vasitəçilik barədə müraciət etdi. Lakin onlar Məhəmmədin əsl niyyətindən
hali olduqlarından bu xahişi rədd etdilər. Sonra o, Məhəmmədin qızı, Əlinin
zövcəsi Fatimənin xoş münasibətini qazanmağa cəhd etdi. Ana məğrurluğunu
qızışdırmaq üçün xahiş etdi ki, qoy onun altı yaşlı oğlu Həsən Əbu Süfyanın
himayəçisi olsun. Fatimə buna qürurla cavab verdi: “Mənim oğlum himayəçi
olmaq üçün çox balacadır. Həm də hansısa bir himayəçilik Allahın iradəsinə qarşı
Dostları ilə paylaş: |