42
PUNİYA MÜHARİBƏLƏRİ
Romalılar İtaliyanın iqtisadi potensialına sahib olduqdan sonra öz nəzərlərini
Siciliya adasına dikdilər. Bu ada geniş və çox məhsuldar torpaqlara malik idi, onun
kənd təsərrüfatı yaxşı inkişaf etmişdi. Bu dövrdə Siciliyanın böyük hissəsinə
Karfagen nəzarət edirdi.
Karfagen Aralıq dənizi sahilindəki qüdrətli dövlətlərdən biri olub, Afrikanın
şimalında (indiki Tunis ərazisində) yerləşirdi. Bu gözəl şəhəri m.ə. 825-ci ildə
finikiyalılar, Tir şəhərindən olanlar salmışdılar. Deməli, bu şəhər Romadan da əvvəl
meydana gəlmişdi. Karfagen Romadan xeyli əvvəl güclü donanmaya malik
olduğundan dəniz ticarəti ilə çox varlanmışdı. Karfagen tacirləri Aralıq dənizinin hər
tərəfinə üzürdülər, hövzənin xammal və hazır mallarının bölünməsi məhz bu şəhərdə
mərkəzləşmişdi. Bundan başqa Karfagen inkişaf etmiş kənd təsərrüfatı ölkəsi hesab
olunurdu. Ona görə də siyasi hakimiyyət torpaq sahibkarlarına və tacirlərə məxsus
idi. Karfagendə də respublika quruluşu mövcud idi. Lakin burada xalq yığıncaqları
daha az rol oynayırdı. Burada Roma senatına və ya Afina 500-lər şurasına bənzəyən
300-lər şurası var idi. Karfagen ordusu muzdlu əsgərlərdən və Karfagendən asılı olan
tayfaların göndərdiyi dəstələrdən ibarət idi. Yüksək hərbi vəzifələri karfagenlilər
tuturdular və bir qayda olaraq hərbi rəislər böyük siyasi nüfuza malik olurdular. Öz
texniki təchizatına görə Karfagen ordusu başqa ordulardan yuxarıda dururdu, orduda
mühasirə maşınlarından, döyüş fillərindən istifadə olunurdu. Ən başlıcası isə
Karfagen əsasən 50 avarlı gəmilərdən ibarət güclü hərbi donanmaya malik idi.
Hələ m.ə. VII əsrdə Aralıq dənizinin iri ticarət mərkəzinə çevrilən Karfagen
özünün əlverişli coğrafi şəraitindən istifadə edib, bu rayonda ağalıq iddiasına düşdü.
Yunan kolonistləri ilə Siciliyada, Liquriyada və Pireney yarımadasında, həmçinin
qədim ispan dövləti olan Tartesslə qızğın müharibə aparan Karfagen, etrusklarla
ittifaqda Tartessi məhv etməyə müvəffəq oldu. Karfagen şimali Afrika, cənubi
İspaniya, qərbi Siciliya və Sardiniyanın geniş ərazilərini özünə tabe etdi. III əsrin
ortalarında isə bütün Siciliyanın faktiki olaraq ağasına çevrildi. Belə bir dövrdə
Aralıq dənizində Karfagen öz ticarət inhisarını saxlamağa cəhd göstərirdi. Ona görə
də bu sahədə rəqibin meydana gəlməsi ciddi təhlükə yaradırdı və iki güclü rəqibdən
birinin məhv və ya tabe edilməsi "dünya" dövlətinin yaranmasına səbəb ola bilərdi.
Roma məhz öz rəqiblərini aradan götürməklə dünya dövlətinə çevrilə bildi. Lakin
Karfagen hökmdarları da belə bir arzu ilə yaşayırdılar ki, bütün eykumenanı əhatə
edən dövlətin mərkəzi Karfagen olsun.
Karfagen sərkərdəsi Hamilkar Barka və onun oğlu Hannibal da öz qarşılarında
belə bir məqsəd qoymuşdular. Lakin çox vaxt qarşıya qoyulan məqsədlə hadisələrin
gedişi və son nəticə nəinki bir-birinə uyğun gəlmir, hətta bu məqsədi qarşıya
qoyanların özünün və onların arxalandığı böyük qüvvənin məhvinə səbəb olur. Polibi
xəbər verir ki, Karfagenlə Roma arasındakı ilk müqavilə respublikanın lap ilk
çağında Lutsi Yuni Brutun və Mark Horatsinin konsulluqları dövründə bağlanmışdı
və bu Persiya çarı Kserksin Yunanıstana müdaxiləsindən 29 il əvvəl, başqa sözlə
509-cu ildə baş vermişdi. Bu müqavilə dəniz ətrafında ticarət məsələlərini nizama
salır və əsasən Karfagenin öz sahillərindəki inhisarını təsbit edirdi. Roma ilə
Karfagenin ikinci müqaviləsi 348-ci ilə təsadüf edir, bu əsasən birinci müqavilənin
43
şərtlərini dəqiqləşdirir, buna görə də bu müqavilənin 500-cü ildə bağlandığı da iddia
edilir. Sonralar bu müqavilələr təzələnir. Lakin hətta Pirr kimi ümumi düşmənlə
mübarizə də bu iki dövləti bir-birinə o qədər də yaxınlaşdırmır və onların
münasibətlərini heç də mehriban münasibətlər adlandırmaq olmazdı. Pirr Siciliyaya
üzüb gəldikdə özünü adanın çarı elan etdi və təklikdə qalan karfagenlilər öz
düşmənlərindən bir neçə məğlubiyyət aldılar, təkcə Lilibey limanını əldə saxlaya
bildilər. Romanın onlara heç bir kömək göstərmədiyini görən karfagenlilər ittifaq
öhdəliklərini pozaraq, düşmənə sülh təklif etdilər.
Nəhayət Pirr Siciliyadan İtaliyaya qovuldu, bəlkə də Romanın hucumu
təhlükəsi altında italik müttəfiqlərinin xahişlərinə görə adanı tərk etdi. Bu hadisədən
sonra Roma ilə Karfagen arasındakı ittifaqdan söhbət gedə bilməzdi. Əksinə, onların
arasında qarşıdurma bərpa olundu və bu münaqişə qorxusu yaratdı. 306-cı il
müqaviləsinin qarşılıqlı olaraq pozulması baş verdi: Karfagen Roma hücumuna qarşı
Tarentə kömək göstərməyə cəhd etdi, romalılar isə Siciliyadakı Messana şəhərinin
işinə qarışdılar. Bunlar müharibənin başlanması üçün bəhanə oldu və 264-cü ildə
Birinci Puniya müharibəsi başlandı. 264-262-ci illər kampaniyasında romalılar
Sirakuza çarı ikinci Hieronu öz tərəflərinə keçməyə məcbur etdilər və Karfagen siysi
cəhətdən izolə olundu. Belə başlanğıc müharibənin son nəticəsini əvvəlcədən həll
etdi. Buna qədər Sirakuza çarı Karfagenin müttəfiqi idi və bu Karfagenə bütün adada
ağalıq etmək imkanı verirdi.
Bir qədər sonra karfagenlilər özlərinin adadakı mühüm strateji məntəqəsini
itirdilər. Bundan sonra onların ixtiyarında bir neçə sahil şəhəri qaldı, onlar da
dənizdən təchiz və müdafiə olunurdu. Rəqiblər qarşısında qurtarmaq bilməyən,
üzücü müharibə perspektivi açılırdı. Karfagen təkcə dəniz qüvvələri vasitəsilə
müharibəni uda bilməzdi. Roma da təkcə quru qoşunları vasitəsilə müharibəni uğurla
sona çatdıra bilməzdi. Ona görə də birincinin qarşısında döyüşkən piyada qoşunu
yaratmaq vəzifəsi meydana çıxdı, ikinci isə qısa müddətdə özünə yeni hərbi gəmilər
qayırmaq və dənizçiləri öyrətmək zərurəti qarşısında qaldı.
Bu yarışda Roma hərbi xadimləri qalib gəldilər. Karfagen gəmisi - penteranın
nümunəsindən istifadə edib, romalılar artıq 260-cı ildə 120 gəmidən ibarət
donanmaya sahib oldular. Romalılar dəniz döyüşündə yeni taktika işləyib
hazırladılar. Onlar abordaj körpüləri icad etdilər, bu körpülər vasitəsilə düşmən
gəmisinə keçir və əlbəyaxa döyüş aparırdılar. Bu yolla romalılar dəniz döyüşündə də
öz piyadalarının üstünlüyündən istifadə etməyə başladılar. Romalılar 259-cu ildə
dəniz döyüşündə qalib gəldilər, bu döyüşdə onlar Puniya donanmasının yarısına
qədərini - 50 gəmini batırmışdılar və əsir götürmüşdülər. Bu vaxt romalılar Karfageni
Afrika ərazisində də diz çökdürmək imkanı əldə etdilər. Bu məqsədlə Afrikaya 4
legion göndərildi. Konsul Requl Karfagenin bütün Afrika torpaqlarını öz nəzarəti
altına götürdü və üsyan etmiş liviyalıları özünə müttəfiq etdi.
Karfagen hökuməti Siciliya və Sardiniyanın itirilməsi ilə razılaşıb,
müharibədən çıxmaq istədi. Lakin romalılar üçün bu az idi. Onlar danışıqlar vaxtı
tələb etdilər ki, puniyalılar öz hərbi donanmasını məhv etsinlər və gəmiləri Romaya
verməyi öz öhdələrinə götürsünlər. Bu şərtlərin qəbul edilməsi Karfagenin bir böyük
dövlət kimi ləğv olunması və onun birbaşa Roma asılılığına keçməsi demək idi. Buna
görə karfagenlilər müdafiə olunmağı qərara aldılar. Siciliyadan qoşunları geri
Dostları ilə paylaş: |