76
UOT 911.3 : 63
GƏNCƏ-QAZAX İQTISADİ-COĞRAFİ RAYONUNDA TƏBİİ ŞƏRAİTİN
KƏND TƏSƏRRÜFATI CƏHƏTDƏN QİYMƏTLƏNDİRİLMƏSİ
1
ABDULLAYEVA ZOYA HAMLET qızı
2
QULİYEV İSMAYIL ƏHLİMAN oğlu
3
VƏLİYEV ALLAHVERDİ CAMAL oğlu
4
HÜSEYNOVA LALƏ İSMAYIL qızı
Sumqayıt Dövlət Universiteti, 1,2-dosent, 3-baş müəllim, 4-müəllim
e-mail: lale_huseynova_1986@mail.ru
Açar sözlər: təbii şərait, təbii mühit, iqtisadi-coğrafi rayon, Gəncə-Qazax maili düzənliyi, şabalıdı
torpaqlar
Müasir cəmiyyətin maddi texniki bazasının yaradılması işinin səmərəli şəkildə qurulması
üçün ölkənin və onun ayrı-ayrı regionlarının təbii şəraiti və təbii ehtiyatlarının düzgün
qiymətləndirilməsi həyata keçirilməlidir. Bu baxımdan respublikanın təbii ehtiyat potensialından
səmərəli istifadə edilməsi və onun hər bir elementinin mühafizə olunması çox vacibdir. Əhalinin
məskunlaşması və onun təsərrüfat fəaliyyəti üçün təbii şəraiti və ehtiyatların əlverişliliyi əsas şərt
hesab olunur.Gəncə-Qazax iqtisadi-coğrafi rayonunda təbii şəraitin kənd təsərrüfatına təsiri
imkanlarını nəzərdən keçirək [5, 123-124].
Respublikanın qərbində, əsasən Kiçik Qafqaz dağlarının şimal-şərq yamacında yerləşən
Gəncə-Qazax iqtisadi-coğrafi rayonu fiziki-coğrafi baxımdan Kür çökəkliyi təbii vilayətinə aid olan
Gəncə-Qazax mailli düzənliyini və Ceyrançöl düzünü əhatə edirdi. Bu iqtisadi-coğrafi rayon xarici
ölkələrlə-şimaldan və qərbdən Gürcüstan, cənub–qərbdən Ermənistan Respublikası ilə sərhəddir.
Əlverişli təbii-coğrafi şəraitə, iqtisadi və geosiyasi mövqeyə malik olan iqtisadi rayon çox
qədimdən məskunlaşmış ərazi hesab edilir. İndiki Gəncə-Qazax ərazisi vaxtilə mövcud olmuş
Gəncə xanlığı, Şəmsəddin – Qazax sultanlığı ərazisini əhatə edir. Qeyd etməliyik ki, Azərbaycan
torpaqlarında Rusiyanın Ermənistan dövləti yaratması istəyi, qonşu Göyçə, Karvansara (İcevan),
Dilican, Borçalı və s. ərazilərdən yerli türklərin bu ərazilərin itirilməsi ilə yanaşı, mənimsənilmə və
əhali məskunlaşmasına mənfi təsir etmişdir. Gəncə-Qazax maili düzənliyinin intensiv
mənimsənilməsi və məskunlaşması XIX əsrin axırında xeyli sürətləndi. Beləki bu dövrdə çar
hökuməti tərəfindən suvarma işlərinə ilk dəfə mailiyyə vəsaitinin ayrılması nəticəsində suvarma
qurğularının çoxalması, pambığa olan tələbat Gəncə-Qazax maili düzənliyinin intensiv
mənimsənilməsini və məskunlaşmasını sürətləndirdi. Ərazinin mənimsənilməsində Bakı və Tiflisi
birləşdirən dəmiryolu tikintisinin(1883-cü il) də başa çatması əhəmiyyətli rol oynamışdır [3, səh.
411]
Gəncə-Qazax mailli düzənliyi və Ceyrançöl ərazisi iqtisadi-coğrafi rayonun təsərrüfat
fəaliyyəti üçün əlverişli şəraitə malik hissəsidir. Orta dağlıq ərazilərdə dəmyə əkinçiliyin inkişafı
üçün səmərəli imkanlar mövcuddur. Beləki, rütubətin kifayət qədər olması və yağıntının əsasən
bitkilərin vegetasiya dövründə düşməsi, qara və qonur, qəhvəyi torpaqların yayılması dəmyə
əkinçiliyin inkişafına imkan verir. Yüksək dağlıq hissələr əhalinin daimi təsərrüfat fəaliyyəti üçün
əlverişli deyil [3].
Ceyrançöl düzündə yarğan-qobu şəbəkəsinin geniş yayıldığı ərazilər kənd təsərrüfatının
fəaliyyəti üçün yararsız hesab edilir. İqtisadi rayonun cənub hissəsi çay dərələri ilə parçalanmış
dağlıq relyefə malikdir. Şahdağ, Murovdağ, Murğuz dağlarının şimal yamacları və bu dağ
silsilələrindən ayrılan dağ tirələri, dağarası çökəkliklər relyefə xüsusi rəngarənglik verir və
Sumqayıt Dövlət Universiteti – “ELMİ XƏBƏRLƏR”– Sosial və humanitar elmlər bölməsi
Cild 13 № 1 2017
77
özünəməxsus təsərrüfat sahələrinin inkişafına zəmin yaradır. Gəncə rayonun iqlim müxtəlifliyi
suvarmada müxtəliflik yaradır. Belə ki, Şahdağ və Murovdağ silsilələrindən başlanğıcını alan çoxlu
çaylar axıb Kür çayına tökülür. Bu çaylar şəbəkəsi suvarma əkinçiliyində mühüm rol oynayır. Bəzi
illərdə yaz aylarında bu çaylarda daşqınlar da baş verir. Yayda quruyan çayların hesabına
quraqlıqların qarşısını almaq üçün bu çaylar üzərində süni göllər yaradılması su ehtiyatı yaradır.
İqtisadi–coğrafi rayon şirin su ehtiyatları ilə yaxşı təmin olnmuşdur. Burada Kür, Ağstafaçay,
Tovuzçay, Şəmkirçay, Zəyəmçay, Gəncəçay, Qoşqarçay, Kürəkçay, Qaraçay və.s. kimi çay
şəbəkəsi, Şəmkir, Yenikənd, Ağstafaçay, Coğaz su anbarları, Göygöl, Candargöl, Maralgöl və.s.
gölləri, artezian suları əsasən şirin su mənbələridir. Qeyd edilən bu şirin su mənbələri kənd
təsərrüfatının suvarma suyuna, əhalinin və sənayenin suya olan təlabatını əsasən təmin edir.
Samux və Goranboy rayonunun şirin suya olan təlabatının ödənilməsində Qabırrı çayının və
Mingəçevir su anbarının rolu böyükdür. Ən böyük suvarma kanalı Ağstafaçay su anbarından
başlanan, uzunluğu 69 km olan, Qazax, Ağstafa, Tovuz, Şəmkir rayonlarının 30 min hektardan çox
sahəni suvaran Ağstafaçay çay kanalıdır [3, səh.413]. Gəncə-Qazax çoxlu sayda mineral bulaqlarla
zəngindir. Aşağı Daşkəsən, Yuxarı Daşkəsən, Alaxançallı, Qabaqtəpə, Narzan, Gədəbəy, Slavyanka
v. s. mineral su mənbələri daha əhəmiyyətli olub tərkibinə və sutkalıq debitinə gorə bir- birindən
fərqlənirlər. Bu sular müalicəvi əhəmiyyəti ilə bərabər süfrə suyu kimi də istifadə edilir.
Gəncə-Qazax iqtisadi-coğrafi rayonunun relyefi, xüsusilə yüksəklik amplitudunun
böyüklüyü (3500m-dən çox) əhalinin məskunlaşması və ərazinin mənimsənilməsində müxtəliflik
yaradır. Bu iqtisadi-coğrafi rayonda ərazilərin mənimsənilməsi və məskunlaşma şəraitinə görə dörd
zona ayrılır.
Kürün sağ sahili və Kiçik Qafqazın şimal şərq ətəkləri arasında yerləşən Gəncə-Qazax maili
düzənlikləri əhalinin, iqtisadi potensialın, sosial infrastrukturun əhəmiyyətli hissəsinin cəmləndiyi
əsas ərazidir. Bu ərazi üçün düzən relyef, əlverişli torpaq-iqlim şəraiti, xüsusilə bol aqroiqlim
ehtiyatları xarakterikdir. Məhsuldar şabalıdı və açıq şabalıdı torpaqların geniş yayılması, qışın
yumşaq keçməsi, ayazların çox gec düşməsi burada kənd təsərrüfatının inkişafina böyük imkan
yaradır. İsti iqlim rütubət çatışmazlığı suvarma əkinçiliyinə səbəb olmuşdur [3]. Kürün sol sahili ilə
Gürcüstanın dövlət sərhədi arasında yerləşən Ceyrançöl təpəli düzənliyinin qışı yumşaq keçən
yarmsəhra quru-çöl iqlimi, efemerli–yovşanlı bol yem bazası daimi istifadə olunmayan geniş ərazi
potensialı heyvandarlığın inkişafı üçün böyük təbii imkanlar yaradır. Ona görə də Ceyrançöl
Azərbaycanın mühüm qış otlaqından birinə çevrilmişdir. Otlaq örüş şəraitində heyvanların -
xüsusən də qoyun və keçilərin saxlanmasına şərait yaratmışdır. Gəncə iqtisadi rayonun aran
yarımzonasında orta illik temperatur 12,1-13,20C, aktiv temperaturun miqdarı 3860-41670C,
yağıntılar 282-451 mm-dir. Dağətəyi və dağlıq yarımzonada orta illik temperatur 10,3-11,80C aktiv
temperaturun miqdarı 3200-37000C və yağıntıların miqdarı 346-525mm-dir. Zonanın açıq –
şabalıdı və çəmən torpaqlarında birillik və çoxillik bitkilərin becərilməsi, hevandarlığın inkişafı
üçün yemçiliyin inkişafı əsas yer tutur. İqtisadi rayonun dağətəyi və alçaq dağlıq zonası düzən
ərazilərlə müqayisədə çay dərələri ilə nisbətən çox parçalanmasına və rütubət çatışmazlığına
baxmayaraq əkinçilik və heyvandarliq üçün əlverişlidir. Dağlıq ərazilərlə düzən ərazilərin
qovşağını əhatə edən bu zona, coğrafi konveyer prinsipi üzrə hər iki hissənin müsbət amillərindən
istifadə etməklə, kənd təsərrüfatının intensiv inkişafına zəmin yaradır. Ona görədə burada həm
heyvandarlıq, həm də əkinçilik yaxşı inkişaf etmişdır. Orta zona Gəncə və Zəyəm çayları ərazisini
əhatə edir. Orta dağlıq ərazilərin relyefi kənd təsərrüfatı bitkilərinin becərilməsi üçün daha
əlverişlidir. Regionun dəniz səviyyəsindən 1000 -2000 m mütləq yüksəkliklər arasinda yerləşən orta
dağlıq zonasının meyilliyi az olan yamacları dəmyə əkinçiliyi üçün əhəmiyyətlidir. Beləki, ilin isti
dövründə 500-600 mm-ə qədər yağıntının düşməsi, onun 70%-nin yazda və yayın əvvəllərində baş
verməsi dəmyə əkinçiliyə imkan verir. Ərazidə təbii şəraitin bu xüsusiyyətləri kartofçuluq və yazlıq
taxılçılığın daha geniş inkişaf etdirilməsinə şərait yaradır. Daşkəsən, Gədəbəy, Tovuz, qismən
Şəmkir rayonlarının yüksək keyfiyətli dəmyə kartof əkini sahələri bu zonada yerləşir [2, səh.120]
Abdullayeva Z.H., Quliyev İ.Ə., Vəliyev A.C., Hüseynova L.İ.