21
Məlumdur ki, Azərbaycanı işğal edən rus generalları Qafqaza gəldikləri
zaman yalnız ermənilərə bel bağlamış, onların xəyanətkar əməllərindən öz
məqsədləri naminə istifadə etmişdilər. Öz çirkin əməllərinə nail olmaq istəyən
ermənilər isə Qafqaza ali baş komandan təyin edilən hər hansı generalla dərhal dil
tapırdılar. General Sisianov da ermənilərlə yaxından əməkdaşlıq edən hiyləgər
diplomat idi. O özünü "bütün xristianların müdafiəçisi" adlandırır, bir əlilə Car
Balakəni işğal edir, digər əlilə İrəvan və onun ətrafında yaşayan erməniləri, bütün
xristianları birləşməyə çağırırdı. Sisianov "müsəlman zülmü" altında "əzilən"
erməniləri İrəvanın daxilində iğtişaşlar törətməyə təhrik edirdi (44, s. 275).
Sisianovun qəddarlığı və amansızlığına baxmayaraq Car-Balakən icması
işğalçılara qarşı qəhrəmanlıq mübarizəsini bir dəqiqə də olsun dayandırmırdı.
Məhz bu ərazidə rus qoşunlarına ağır zərbə vurulur, öz qüdrəti və hərbi üstünlüyü
ilə öyünən Car generalları məhv edilirdi. Knyaz Sisianov qraf Voronsova
göndərdiyi məlumatında on yaxşı Car generallarının Car döyüşlərində
öldürüldüyünü bildirirdi (14, s. 465).
1804-cü ildə general Qulyakovun Cara yeni yürüşü zamanı onun
öldürülməsi, rus ordusunun ağır məğlubiyyəti, xalqın azadlıq mübarizəsi Car-
Balakənin bütünlüklə Rusiyaya birləşdirilməsinə mane oldu. Daxili idarəçilik
qaydalarını saxlayan Car-Balakən icması rus qoşunlarının məhz bu ərazidən
Azərbaycanın içərilərinə soxulmaq planlarını alt-üst etdi. Lakin Rusiya Carı
müxtəlif vasitələrlə zəiflətməyə cəhd göstərir, icmalar arasında ixtilaf yaradır,
xüsusilə daha güclü olan Car icmasının hegemonluğuna son qoymağa cəhd edirdi.
Buna baxmayaraq Car-Balakən icmaları öz əvvəlki siyasi nüfuzunu qoruyub
saxlamışdı. Qafqazdakı rus qoşunlarının yeni baş komandanı A. P. Tormasovun
icmalara müraciətində Sisianovun "etibarsız yaramazlar", "xainlər", "satqınlar"
ifadəsini "sadiq və xeyirxah carlılar" ifadələri əvəz etmişdi. Hətta 1809-cu ildə
carlılar Tormasova müraciət edərək Məhəmməd-Həsən xanı yenidən Şəki
xanlığına qaytarmağı xahiş edirdi (55, s. 542). Bu isə Car-Balakən icmalarının
Qafqazda cərəyan edən hadisələrə həlledici təsir göstərmək qabiliyyətini əks
etdirirdi.
Car-Balakən icmalarına bu cür münasibət həm də İranla aparılan müharibə
ilə əlaqədar idi. Birinci və ikinci Rusiya-İran müharibələrinin gedişində Rusiya
hərbi qüvvələrinin böyük əksəriyyəti İranla müharibədə iştirak edirdi. Qulyakovun
ekspedisiyasının nəticələri göstərdi ki, möhkəm Car icmasını ələ keçirmək üçün
əhəmiyyətli və mütəşəkkil hərbi qüvvə lazımdır.
1826-1828-ci illər İkinci Rusiya-İran müharibəsi zamanı həm İran həm də
Rusiya Car-Balakənin siyasi mövqeyinə xüsusi əhəmiyyət verirdi. Müharibənin
əvvəlində İran qoşunlarının Zaqafqaziyada ilk hərbi uğurları ərazidə Rusiyanın
müstəmləkə əsarətinə qarşı mübarizənin güclənməsinə səbəb oldu. Azərbaycanın
keçmiş xanları, bəyləri yaranmış əlverişli şəraitdən istifadə edərək itirilmiş siyasi
nüfuzlarını bərpa etmək niyyətində idilər.
22
Lakin İran və Türkiyə ilə aparılan müharibədə əldə edilən uğur Rusiyaya
Car-Balakəni tamamilə işğal etməyə şərait yaratdı. Car-Balakən üzərinə yeni hərbi
ekspedisiyanın keçirilməsi 1830-cu ilin fevral ayına təyin edildi. 1830-cu ilin
fevralın 24-də qraf Paskeviç Alazanı keçərək Muğanlı kəndinə gəldi. Yürüş
ərəfəsində Paskeviç icmalara türk dilində yazılmış bəyannamə göndərdi.
Bəyannamədə göstərilirdi ki, icmaların siyasi müstəqilliyinə son qoyulmalı,
feodalların torpaq üzərində mülkiyyət hüququ-şəriət məhkəməsi və s. saxlanmaqla
bütün daxili idarəçilik qaydaları rusların əlinə keçməlidir.
Camaatların yığıncaqlarında qızğın müzakirəyə səbəb olan bu bəyannamə
əhali arasında müxtəlif fikirlərə səbəb oldu. Müzakirələr zamanı yığıncaqların
iştirakçıların iki hissəyə ayrıldı. Yığıncaq iştirakçılarının əksəriyyəti silahlı
müqavimət göstərməyi təklif edir, heç bir vəchlə idarəçilik qaydalarının
dəyişdirilməsini istəmirdilər. Təslimin tərəfdarları isə əsasən torpaq üzərində
mülkiyyət hüququnu qoruyub saxlamaq istəyən feodallar idi. Lakin son damla
qanına qədər vuruşmağa hazır olanlar daha çoxluq təşkil edirdi. Camaatların
tərəddüdünə varlı torpaq sahibi Hacı Mahmudun gözlənilmədən təslim olmaq
təklifi son qoydu.
1830-cu ilin fevralında dağ keçidlərinin bağlı olmasından istifadə edən rus
qoşunları Car-Balakəni qəti şəkildə işğal etdi və xüsusi qanunlarla idarə olunan
Car-Balakən əyaləti təşkil edildi. 1830-cu il martın 4-də bütünlüklə Paskeviçin
bəyannaməsi əsasında hazırlanan "Car Balakən əyalətinin idarə edilməsi qaydaları
"elan edildi. Əyaləti idarə etmək üçün ki, Bekoviç-Çerkassinin (yeni yaradılmış
Car-Balakən əyalətinin rəisi idi. – Z.C) sədrliyi ilə müvəqqəti idarə təsis olunurdu
(32, s. 445).
Car-Balakəni işğal edən Paskeviç xalq həyacanlarından qorxaraq yeni
qalanın tikintisinə başladı və burada iki polk yerləşirdi. Carın bir hissəsi dağıdıldı
və Yeni Zaqatala adlanan qalanın əsası qoyuldu. Lakin tez-tez təşkil edilən
hücumlar nəticəsində qalanın dəfələrlə dağıdılması onun tikintisini xeyli ləngitdi
(129, s. 24).
§ 2. Tarixi az öyrənilmiş bir dövlətimiz - İlisu sultanlığı
XIX yüzilliyin əvvəlində şimal-qərbi Azərbaycanda mövcud olan feodal
təsisatlarından biri də XVI əsrin ikinci yarısında yaranan İlisu sultanlığı idi. Bu
inzibati vahid şimaldan və şərqdən Qafqaz dağları, qərbdən Qanıq çayı, cənub-
şərqdən Şəki xanlığı ilə həmsərhəd idi. İlisu sultanlığı əsasən iki hissədən ibarət
idi. Birinci hissə Saxur vilayəti, yaxud "Dağ mahalı" adlanırdı. Bu hissənin
tərkibinə əsasən Dağıstan torpaqları, Saxur kəndi və Samur vadisinə qədər uzanan
ərazilər daxil idi. İkinci hissə ayrıca İlisu sultanlığından ibarət olub Saxur
vilayətindən cənubdakı torpaqları əhatə edirdi.