23
Sultanlığın şimal hissəsi, əsasən dağlıq ərazi Saxurların məskunlaşdığı ərazi
idi. Onların əsas məşğuliyyəti heyvandarlıq idi. Sultanlığın mərkəzi və cənub
hissəsi, dağətəyi və düzənliklər isə muğalların və ingiloyların yaşadığı ərazi hesab
olunurdu. Burada yaşayan əhali isə bir qayda olaraq əkinçiliklə məşğul olurdu.
Sultanlığın yaranması haqqında müxtəlif fərziyyələr var. Saxur vilayətinin
qədim dövrü və sultanlığın orta əsrlər tarixi haqqında yazılı mənbələr sonuncu İlisu
sultanı Daniyal bəyin 1844-cü ildə öz tərəfdarları ilə birlikdə Şamilin tərəfinə
keçməsindən sonra məhv edilmişdir.
Sultanlığın yaranması haqqında ilkin fərziyyə xalq söyləmələri və
rəvayətlərə əsaslanır. Əfsanəyə görə ilk əvvəl əsas yaşayış məntəqəsi olan Saxur
kəndində bütün Saxurlular azad icma halında yaşayırdılar. Sonralar başçı seçilməsi
zamanı böyük özbaşınalıqlar yarandı və bu zaman xalq bərabər hüquqlara malik
toxumlara (icmalara) ayrıldı. Hər bir toxum başçını öz aralarından seçməyə cəhd
göstərirdi. Nəticədə toxumlar arasında güclü ədavət və düşmənçilik başladı.
Başlanmış ədavətə son qoymaq üçün xalq bütün toxumların mənafeyinə uyğun
olaraq başçını yad adamlar içərisindən-Saxurda yaşayan, lakin camaatlara məxsus
olmayan və icma torpaqlarından istifadə etməyən bəylərin içərisindən seçirdi.
Camaat Saxur hakimlərini yalnız bəylərin içərisindən seçirdi. Əvvəlcə seçkilər
Saxurda, sonra isə İlisu kəndində keçirilirdi. Əfsanəyə görə sultanın Saxurlara yad
adamlar, yəni muğallar arasından seçilməsinin əsas səbəbi toxumlar arasında
mövcud olan narazlıqlara son qoymaq məqsədi daşıyırdı.
Saxur əhalisinin dediyinə görə iqamətgahın İlisuya köçürülməsi də bir
rəvayətlə bağlıdır. Belə ki, xalqı idarə etmə hakimiyyətinə yiyələnən bəylər
özbaşınalıqlar və qanunsuzluqlar törətməyə başladı. Qəzəblənən əhali bütün
bəyləri arvad-uşaqları ilə birlikdə döymək qərarına gəldilər. Xilas olan bir hamilə
qadın İlisuya qaçdı və orada bir oğlan doğdu. Onu I Əlibəy adı ilə başçı seçdilər. O
vaxtdan Saxur hakimləri İlisuda yaşamağa və sultan adlanmağa başladı.
İqamətgahın İlisuya köçürülməsinin ilkin səbəblərini iqtisadi amillərdə
axtarmaq lazımdır. Belə ki, vadilərin əlverişli coğrafi mövqeyi Saxur hakimlərinin
Qax ərazisində möhkəmlənməsini tələb edirdi.
İlisu sultanlarının hakimiyyətinin tanınması haqqında ilk sənədlər Səfəvi
şahlarına və Osmanlı sultanlarına aid fərmanlardır. Sayı 35-dək olan bu
fərmanların demək olar hamısı mühafizə olunaraq Daniyal sultan tərəfindən ruslara
təqdim edilmişdi. Verilən fərmanlar nəticəsində Qax əyalətində sultan və şahdan
asılı olmayan, müstəqil hakimlik hüququna malik olan Saxur hakimlərinin
mövqeyi getdikcə güclənirdi. Bu fərmanlar sultanlığı gürcü feodallarının təsiri
altına düşməkdən qoruyurdu.
1562-ci ildə I şah Təhmasibin verdiyi fərmanla Saxur hakimi Qurqulu bəyin
ərazi üzərində hakimiyyəti təsdiq olunurdu. Fərmana görə heç bir gürcü Carı onun
hakimiyyəti altında olan əraziyə iddia ilə çıxış edə bilməzdi. Bu torpaqlara Qaxdan
cənub-qərbdə yerləşən kəndlər: Babalı, Şotavar və Qoraqan da daxil idi. XVI
24
yüzilliyin sonunda Qurqulu bəy türk sultanından həmin ərazilər üzərində
hökmdarlığını təsdiq edən yeni fərman aldı. Varislik prinsipi əsasında iki dağətəyi
kənd-Qax və Məşəbaş üzərində onun hakimiyyəti tanınırdı (86, s. 771).
Qurqulu Əli bəyin oğlu Carı Əli bəy 1607-ci il fərmanı ilə Osmanlı dövləti
tərəfindən İlisu sultanı təsdiq olunmuşdur. Əlisultan bəy isə 1695, 1701, 1710-cu
illərdə Səfəvi şahı, 1722, 1729, 1731-ci illərdə isə Osmanlı sultanı tərəfindən
fərmanlar almışdı (89, s. 774, 96, s. 776, 10, s. 1121). Səfəvi şahları tərəfindən
verilən başqa bir fərmanla Əhməd xan Saxur hakimi kimi tanınırdı (39, s. 777).
İlisu sultanları camaatların yığıncağında lakin bir qayda olaraq sultan
ailəsinin üzvüləri arasından seçilirdi. Əslində sultan bütün xalqın hakimi rolunu
oynayırdı.
XVIII yüzillikdə Car-Balakənin siyasi nüfuzunun güclənməsi İlisu
sultanlarının da mövqeyinə öz təsirini göstərirdi.
Carlılar yalnız bir dəfə XVIII əsrin sonu, XIX əsrin əvvəlində sultan
seçgisinə qarışmışdılar. Belə ki, sultan Xan-Baba bəyin tərəfdarları kömək üçün
carlılara müraciət edir. Əhməd xanla Carlı qoşunlarının müdafiə etdiyi Xan-Baba
bəyin tərəfdarları arasında olan döyüş Baba bəyin qələbəsi ilə qurtarır. Bu zaman
Əhməd xan Gürcüstanda möhkəmlənən ruslara müraciət edir və onların köməyi ilə
itirilmiş hakimiyyətini bərpa edir. Bu hadisədən sonra sultanların xalq tərəfindən
seçilməsinə son qoyuldu və hakimiyyəti irsi olaraq Əhməd xanın varislərinə
keçirdi.
Car icması ilə İlisu sultanları arasında mövcud olan münasibətlər o qədər
yaxın və möhkəm idi ki, Qafqaz Arxeoqrafiya Komissiyasının Aktlarında sultanlıq
"Car əyaləti"nin tərkib hissəsi kimi göstərilirdi.
1803-cü ildə Car icmasının öz üzərinə götürdüyü öhdəlikdə qeyd olunurdu
ki, bizimlə qonşu olan, daim müttəfiqlik və dostluq münasibəti saxlayan tatar İlisu
sultanı Əlisultan bütün əhalisi ilə birlikdə Rusiyanın ali hakimiyyətini qəbul edir
(19, s. 686).
İlisu sultanlığının xəzinəyə ödəyəcəyi vergilər Car icması vasitəsilə
verilirdi. Vergilərin gecikdirilməsi zamanı icmaları hədələyən general Sisianov bu
vergilərin ləngidilməsində günahkar bilinən İlisu sultanını da təhqir edirdi:
"Utanmaz və fars ürəkli sultan!.. Sən öz payına düşən vergini iki ildir ki,
vermirsən. Səndə it qəlbi və eşşək ağlı var. Məktubunda məni hiyləgər bəhanələrlə
aldatmağa çalışırsan. Əgər bu dəfə də müəyyən edilmiş vergini vaxtında ödəməsən
çəkmələrimi sənin qanınla yuyacağam" (33, s. 695).
Sultan Əhməd xanın zamanında İlisu sultanlığının nüfuzu yüksəlməyə
başladı. O Qafqazdakı Rusiya Hökumətinin nümayəndələri ilə danışığa girir,
onlarla birbaşa əlaqə yaradaraq rus komandanlığının dəstəyini və rəğbətini
qazanmağa çalışırdı. Əhməd xan 1807-ci ildə 13 yaşlı böyük oğlu ilə Tiflisə
gedərək Rusiyaya şəxsi sədaqətini və itaətini bildirdi. Hətta bu sədaqətini sübut
etmək üçün öz oğlunu Tiflisdə girov qoyaraq onun Tiflis əsilzadə məktəbinə