62
Cəfərqulu xan üsyançılara qanlı divan tutdu. 40 nəfər üsyançı həbs edilərək
qalaya salındı. Cəfərqulu xan belə hesab edirdi ki, üsyançılara ağır cəza vermək və
bu işi əhalinin gözü qarşısında həyata keçirmək lazımdır ki, xalqı daim qorxu
içərisində saxlamaq mümkün olsun. Üsyançıların xeyli hissəsi kötəklə döyülmə
cəzasına məruz qaldı. Üsyana qoşulan bəylər isə cəzalandırılmaq üçün ciddi
nəzarət altında Tiflisə göndərildi. Onlar burada Rusiya qanunları ilə mühakimə
edilərək Sibirə sürgün edildi (85, s. 288).
§ 2. 1814-cü il Şəki üsyanı
1807-ci il Göynük üsyanı yatırıldıqdan sonra da Şəkidə mövcud üsul
idarəyə qarşı xalqın ümumi narazılığına son qoymaq mümkün olmadı. 1814-cü il
noyabrın 8-də Qafqazdakı rus qoşunlarının baş komandanı general N. F. Rtişşevin
imperatora göndərdiyi raportdan aydın olur ki, Cəfərqulu xanın ölümündən sonra
Şəkiyə yeni xanın-İsmayıl xanın təyin edilməsi yerli əhalinin kəskin müqaviməti
ilə qarşılandı (6, s. 556). Cəfərqulu xanın sağlığında Rusiyaya sədaqəti ilə diqqəti
cəlb edən və buna görə də xanın varisi kimi tanınan İsmayıl xanın Şəki xanı elan
edilməsi Şəkidə üsyanın başlanılmasına səbəb oldu. Yerli əhali yaxşı başa düşürdü
ki, İsmayıl xan da öz atası Cəfərqulu xan kimi Rusiyanın müstəmləkə siyasətini
can-başla yerinə yetirəcək.
Yeni xanın hakimiyyətini rəsmi şəkildə elan etmək üçün general-mayor
Axverdov Şəkiyə gəldi. Bu xəbəri eşidən xalq qalanın ətrafına yığılaraq öz
narazılığını bildirdi. Xalq Rusiyadan asılı olmaq istəmir və İsmayıl xanın
hakimiyyətini tanımayacaqlarını bildirirdilər. Başlanan üsyana əhəmiyyətsiz
yanaşan Axverdov mahalları idarə edən bəylərin və məliklərin yığıncağında
İsmayıl xanı Şəki xanı elan edərək bu ərazidən Şirvan xanlığına getdi. Məqsəd,
vaxtilə Cəfərqulu xanla-Şirvan xanlığı arasında yaranmış ümumi narazılığa son
qoymaq və yeni xanla-İsmayıl xanla Mustafa xan arasında rus imperiyasının
mənafeyi naminə xoş münasibət yaratmaq idi. General-mayor Axverdovun
getməsindən sonra xalqın ümumi narazılığı daha da artdı. Üsyan genişlənərək
yaxın kəndlərə və xanın bütün iqamətgahına yayıldı. Üsyançılar Rusiyapərəst
İsmayıl xanın divanının bağlanmasını tələb edir və yeni xanın hakimiyyətini
tanımayacaqlarını bildirirdilər.
Üsyanın getdikcə genişlənməsi təhlükəsi Nuxada yerləşdirilmiş Sevastopol
piyada polkunun kapitanı Denibekovu cəld bir sıra tədbirlər həyata keçirməyə
məcbur etdi. O, İsmayıl xanın və Şəkinin bir sıra nüfuzlu bəylərinin məsləhəti ilə
üsyan başçıları ilə danışığa girdi. Lakin kapitan Denibekov xəyanət edərək
danışığa gələn 4 nəfər üsyan başçısının həbs olunması haqqında əmr verdi. Öz
tərcüməçisini 2 nəfər kazakla üsyançıların yanına göndərən Denibekov onlara
evlərinə dağılışmağı məsləhət gördü, əks halda silahlı divan tutulacağı ilə hədələdi.
63
Üsyançılar şəhər ətrafına çəkildi və möhkəmlənməyə başladı. Kapitan
Denibekov üsyançıların güclənməsinə yol verməmək üçün vaxt itirmədən özü ilə
70 əsgər və bir top götürərək qaladan çıxıb üsyançıların üzərinə yeridi. Silahsız
xalq müqavimət göstərməyin çətin olduğunu görərək əz yaşayış yerinə qayıtdı:
Şəkidə Üsyan əhval-ruhiyəsini isə uzun müddət yatırmaq mümkün olmadı.
Məhz bu qorxu Şəki qalasında yerləşdirilmiş qarnizonun yeni hərbi
qüvvələr hesabına möhkəmləndirilməsinə səbəb oldu. Vəziyyətin ağırlığını görən
general-mayor Axverdov yenidən Şirvan xanlığından Şəkiyə qayıtmağa məcbur
oldu. O general N. F. Rtişşevə göndərdiyi məlumatda artıq sakitliyin yaranması
haqqında xəbər verirdi.
Şəkidə yaranmış sakitlik isə yalnız zahiri xarakter daşıyırdı. Mübarizəni
axıra qədər davam etdirmək istəyən 250 nəfər Car ərazisindən keçərək Kaxetiya
vasitəsilə Tiflisə, general N. F. Rtişşevin yanına getdi. Bundan xəbər tutan general
üsyançıları şəhərə buraxmamaq haqqında əmr verdi. N. F. Rtişşev tərəfindən
üsyançıların yanına göndərilən Gürcüstan qubernotoru gen.-m. Simonoviç və
Tiflisin hərbi komendantı 16 nəfərlə Tiflisə qayıtdı. Onlar əsasən üsyan başçıları və
Şəki xanlığında əhalinin daha çox inandığı, hörmət etdiyi din xadimləri idi.
General-mayor N. F. Rtişşev nəinki üsyan başçılarının şikayətinə qulaq asdı, hətta
hiylə ilə onları bu işdən çəkindirməyə çalışdı. Üsyançıların möhkəm dayandığını
və geri çəkilmədiyini görən N. F. Rtişşev onları hərbi məhkəməyə verdi.
Üsyançıların bir hissəsi Sibirə və Orenburqa sürgün edildi, bir hissəsinə kötəklə
döyülmə cəzası verildi, qalanları isə cəzalandırmaq üçün İsmayıl xanın ixtiyarına
göndərildi.
Tiflisə gedən üsyançılar İsmayıl xanın məmuru Maqsud ağanın başçılığı
altında bir rotanın müşayəti ilə Şəkiyə qaytarıldı. Onlar yeni xana və Rusiya
imperiyasına sadiq qalacaqlarına and içdi.
Sonralar Şəki əhalisinin Qafqazda rus qoşunlarının yeni baş komandanı A.
P. Yermolova yazdığı məktubdan aydın olur ki, Sibirə sürkün olunanlardan 8
nəfəri orada ölmüşdü. Əhali sağ qalanların, o cümlədən Mahmud ağa
Hacıxanovun, Molla Hacının, Hacı Əli oğlunun, Məmmədyusif Səfərovun və b.
geri qaytarılmasını xahiş edirdi (54, s. 730).
1814-cü il üsyanı yatırıldı. Təpədən-dırnağadək silahlanmış rus ordusuna
qarşı müqavimət göstərmək olduqca çətin idi. Buna baxmayaraq xalq yadelli
əsarətinə-ağalığına qarşı öz qəzəb və nifrətini bildirməkdən çəkinmirdi. Şəki
xanlığına yeni hərbi qüvvələr gətirilir, üsyan baş verməməsi üçün bütün tədbirlər
görülürdü.
Görülən tədbirlərə baxmayaraq Azərbaycanın şimal-qərb ərazisi
müstəmləkə əsarətinə qarşı çevrilmiş ən qüvvətli mübarizə mərkəzi olaraq qalırdı.
İkinci Rusiya-İran müharibəsi zamanı azadlıq uğrunda mübarizə daha da
gücləndi. Müharibənin əvvəlində İran qoşunlarının müvəffəqiyyətli hərbi
əməliyyatları çarizmin milli müstəmləkə siyasətinə qarşı çıxışların artmasına səbəb