64
oldu. Bu çıxışlar işğalçılarla yanaşı çarizmə qulluq edən yerli feodalların
özbaşınalığı və zorakılığı əleyhinə də çevrilmişdi.
1826-cı ildə Şəki əhalisi yenidən üsyan qaldırdı. Qorxuya düşən Rusiya öz
qoşunlarını şəhərdən çıxarmaq məcburiyyətində qaldı. Səlim xanın oğlu Hüseyn
xan yaranmış vəziyyətdən istifadə edərək xanlığı ələ keçirdi. Lakin 1826-cı ilin
sonunda rus qoşunlarının qələbəsindən sonra hakimiyyəti əldə saxlaya bilməyən
Hüseyn xan İrana getdi. Şəkidəki rus hərbi qüvvələri artırıldı. 1827-ci ildə bəylərin
böyük bir hissəsi İrana getmək məcburiyyətində qaldı. Onlara məxsus olan əmlak
isə Rusiyanın dövlət xəzinəsinin ixtiyarına keçdi (106, v. 13-14).
§ 3. 1830-cu il Car-Balakən üsyanı
Şimal-qərbi Azərbaycanda çarizmin müstəmləkə əsarətinə qarşı çevrilmiş
ən böyük üsyanlardan biri də 1830-cu ildə baş verən Car-Balakən üsyanı idi.
1803-cü ildə rus qoşunları Car-Balakənə daxil olduqları ilk gündən burada
əhalinin güclü müqaviməti ilə qarşılaşmışdı. Azadlıq uğrunda mübarizə aparan
qəhrəman xalqı diz çökdürə bilməyən işğalçılar Car-Balakənin daxili idarəçiliyini
1830-cu ilə qədər saxlamağa məcbur olmuşdu. 1830-cu ildə isə Car-Balakən qəti
şəkildə işğal edildi. Car-Balakənin Rusiya tərəfindən işğal edilməsinə etiraz
əlaməti olaraq xalqın böyük üsyanı başladı. Üsyan ərəfəsində Car-Balakəndə
müridizm ideyalarının geniş şəkildə yayılması azadlıq uğrunda gedən mübarizənin
ideologiyasına çevrilmişdi. Müridizmin məğzində sihadla şəhidlik fəlsəfəsi bir-
birini tamamlayırdı. Burada torpaq təəssübkeşliyi ilə yanaşı din müqəddəsliyi də
mühüm yer tuturdu.
Üsyan ərəfəsində Car-Balkəndə, xüsusilə Car, Balakən və Katex
icmalarında müridizmin çoxlu tərəfdarları var idi. Müridizmin tərədarları içərisində
müxtəlif qruplar-tacirlər, sənətkarlar, kəndlilər birləşmişdi. İşğala qarşı mübarizə
onları birləşdirən başlıca və əsas məqsəd idi.
1830-cu ilin mayında Şimalı Qafqaz mürüdlərinin rəhbəri şeyx Şaban
carlılara müraciət edərək onları xainlərə qarşı mübarizəyə çağırdı. Bu müraciət
bütün icmalarda böyük əks-səda doğurdu. Şeyx Şaban öz müraciətində xalqı təkcə
rus-işğalçılarına qarşı deyil, eyni zamanda onların tərəfinə keçən iri torpaq
sahiblərinə qarşı fəal mübarizəyə çağırırdı. Təsadüfi deyil ki, şeyx Şabanın
müraciətini Car icmasının yığıncağında oxuyan qazı onun ayaqları altına salıb
tapdaladı.
İyunun əvvəlində Car-Balakən icmasında başlanan həyəcan rusları qorxuya
saldı və öz qüvvələrini səfərbərliyə almağa məcbur etdi. Əhali hər yerdə açıq-aşkar
rusların tələblərini yerinə yetirməkdən boyun qaçırır, öz üzərlərinə götürdükləri
mükəlləfiyyətləri ödəməkdən imtina edirdilər. Belə bir vaxtda şeyx Şabanın ilk
dəstələri Balkənin 15 kilometrliyinə gəlib çıxdı. Şeyx Şaban camaatlara göndərdiyi
məktublarda onları mübarizəyə başlamağa və onun tərəfinə keçməyə çağırdı.
65
Rusiya əvvəlcə varlı toxum başçıları və din xadimlərinin vasitəçiliyi ilə
şeyx Şabanla danışığa girməyə cəhd göstərdi. Onlar Şabandan bu yürüşdən əl
çəkərək geri qayıtmağı tələb etdilər. Lakin göstərilən bütün cəhdlər nəticəsiz qaldı.
İyunun 21-də döyüş başladı. Şeyx Şabanın dəstələri sürətlə hərəkət edərək
Qəbizdərəni keçdi və Balakənə yaxınlaşdı. Yolda onlara Balakən, Katex, Car və
Zaqataladan olan atlı dəstələri də qoşuldu. Rus qoşunları ilə gedən şiddətli vuruşma
bir neçə gün davam etdi. Döyüş toplarından istifadə edən rus qoşunları qələbə
qazandı. Şeyx Şaban dağlara çəkildi. Şeyxin Balakənə hücumu zamanı ona
qoşulanların böyük əksəriyyəti həbs olundu. İlk müvəffəqiyyətdən razı qalan ruslar
sərt cəza tədbirlərinə əl atdılar. Əhali üzərinə qoyulan vergilər artırıldı və onun
yığılması başlandı. İşğalçılar əhalini bir sıra ağır mükəlləfiyyətləri yerinə
yetirməyə məcbur edirdilər. Onların bir hissəsi tikilməkdə olan Zaqatala qalasına
tikinti materialı daşıyıb gətirməli, onun inşasını sürətləndirmək üçün bir sıra işləri
görməli idi.
Lakin iyun üsyanından sonra Carda mövcud olan vəziyyət nəinki yoluna
düşdü, əksinə daha da gərginləşdi. Əgər iyun üsyanı ərəfəsində şeyx Şaban Car-
Balakənlilərin ona qoşulacağına tam əmin deyildisə, indi carlılar işğalçılara qarşı
mübarizədə təşəbbüsü öz əllərinə almışdılar. Onlar passiv şəkildə dağlıların gəlib
çıxmasını gözləmir, əksinə özləri yeni üsyana hazırlaşırdılar. Vəziyyətin kəskin
olduğunu görən Zaqatala qalasındakı rus qoşunlarının komandanı Sergeyev hətta
qraf Paskeviçdən iyun üsyanı zamanı həbs olunanların cəzalandırılmasını bir qədər
ləngitməyi xahiş edirdi. Onun fikrincə bu hadisə vəziyyəti bir qədər də
mürəkkəbləşdirə bilərdi. Paskeviç isə nəinki günahkarların qısa müddətdə
cəzalandırılmasını istəyir, eyni zamanda Car-Balakən camaatlarının Tiflisdə olan
girovlarının həbs olunmasını tələb edirdi. Nəhayət, Sergeyevin ciddi xahişlərindən
sonra o iyun üsyanı zamanı həbs olunanların cəzalandırılmasını 1831-ci ilin
yanvarınadək təxirə saldı.
Car-Balakən camaatlığında mövcud vəziyyəti qiymətləndirən dağlıların
silahlı qüvvələri 1830-cu ilin sentyabrında yenidən toplaşmağa başladı.
Car-Balakən üsyançıları ilə əlaqə yaradıldı. Bu dəfə hərəkatın başında
Həmzət bəy dururdu. 2 minə qədər silahlı dağlı qoşunlarının düzənlikdə görünməsi
üsyanın başlamasına işarə oldu.
Üsyan ərəfəsində rus qoşunları içərisində yayılan epidemiya ciddi qarışıqlıq
yaratmışdı. Yeni Zaqatala qalasının tikintisi dayandırıldı. Üsyan genişlənərək İlisu
sultanlığının da ərazisinə yayıldı.
Oktyabrın 10-da ruslar yeni hərbi qüvvələr gətirdi. Rusiya başlanmış üsyan
zamanı qüvvələri parçalamaq məqsədi ilə yenə də ingiloyları öz tərəfinə çəkməyə
cəhd göstərdi. Rusiya ingiloylara müraciət edərək onları üsyançılara qoşulmamağa
çağırdı, əvvəzində isə onları bütün vergi və mükəlləfiyyətlərdən azad edəcəyini
bildirdi. Həmzət bəy hücuma keçərək tikilməkdə olan Zaqatala qalasındakı rus
qoşunlarının bir hissəsini mühasirəyə aldı. Oktyabrın 13-qalanın xarici aləmlə