240
Səməd Vurğunun vətənpərvərliyindən danışarkən onun yaradıcılığındakı bir
cəhət də qeyd olunmalıdır. Bu, şairin Vətəni əslində olduğundan böyük, gözəl
görmək xüsusiyyətidir.
Şairin «Yadıma düşdü» qoşmasında belə bir misra vardır: «Göylərə baş çəkir
Göyəzən dağı...» Əslində Göyəzən dağı S.Vurğunun doğulduğu Qazax rayonu
ərazisində kiçik bir təpədir. Bu barədə Azərbaycanın xalq yazıçısı Mirzə İbranimovun
şairlə bağlı xatirələri maraqlıdır. Onun 1985-ci il mayın 27-də S.Vurğunun ev-
muzeyində lentə alınmış xatirələrindən biri belədir: Onlar (S.Vurğun və
M.İbrahimov – A.B.) Daş Salahlı kəndində gecələyib səhər tezdən ova çıxırlar.
«Birdən Səməd həyəcanla dedi:
- Ayə, bir oraya bax, Göyəzən dağına...
Baxdım ki, orada bir təpə var. Dedim:
- Ay Səməd, sən deyəndə «Göylərə baş çəkir Göyəzən dağı», mən elə bilirdim
ki, bu Elbrusdu, ya hansı dağdır?
Səməd cavab verdi:
- Mənim «veliçiyem» (bunu rusca dedi) ondadır ki, mən təpəni dağ kimi təsvir
edirəm. Sən qorx o adamlardan ki, dağı təpə kimi təsvir eləsinlər...» (156)
«Muğan» poemasından götürdüyümüz bu misralar da şairin yüksək
vətənpərvərliyinin bədii ifadəsidir:
Kiçicik bir sudur yer üzündə Kür,
Baxsan bu dünyanın xəritəsinə.
Bəs niyə qəlbimdə ümman döyünür,
Mən qulaq asdıqca Kürün səsinə?! (133, 391)
Azərbaycanın hər bir guşəsi şair üçün əziz və doğma olmuşdur.
S.Vurğunun ev-muzeyində təsadüf etdiyimiz bir məktub bu baxımdan
diqqətimizi çəkdi. Şair məktubu 1955-ci ilin iyulunda İstisudan həyat yoldaşı Xavər
xanıma yazmışdır. Bütün yaradıcılığı boyu Azərbaycan təbiətinin gözəlliklərini, onun
təbii sərvətlərini milli qürur hissilə tərənnüm etmiş Səməd Vurğunun məktubu da bu
ruh-
241
dadır. O yazır: «Əzizim Xavər! İstisu mənə çox kömək eləyir. Bütün ömrümdə bu
qədər təsirli su, təmiz hava görməmişəm...».
∗
(31)
Əlbəttə, S.Vurğun dünyanın bir çox yerlərində olmuşdu, dünyanın bir çox yerləri
barədə məlumatı vardı. Lakin vətənpərvər şairin fikrincə, min bir dərdin dərmanı,
həyatın mənbəyi məhz doğma yurddadır, onun təbiətindədir:
Qayaları baş-başadır,
Güneyləri tamaşadır.
Gödək ömrü çox yaşadır
Canım dağlar, gözüm dağlar. («Dağlar», 131, 125)
S.Vurğun 1955-ci ilin noyabrında Vyetnama səfəri zamanı xəstələnib Pekin
xəstəxanasında yatarkən belə yazmışdı:
Vaxtsız əcəl, məndən uzaq dayan, dur,
Qürbət eldə can vermərəm ölümə.
Qılıncını məndən uzaq dolandır,
Onu bil ki, qələm aldım əlimə,
Qürbət eldə can vermərəm ölümə! (132, 296)
Şairin Vətənə məhəbbəti öz xalqının tarixinə, mədəniyyətinə, dilinə, ayrı-ayrı
şəxsiyyətlərinə, adət-ənənələrinə münasibətində də öz əksini tapmışdır.
Səməd Vurğun Azərbaycanın tarix və mədəniyyət abidələrinin qoruyucusu və
tərənnümçüsü olmuşdur. Azərbaycanın təbiəti kimi qədim tapıntılar, mədəniyyət
abidələri də onu ilhamlandırmışdır. Şair 1948-ci ildə çıxışlarının birində demişdir:
«Azərbaycanın qədim, nadir tapıntıları bizim üçün böyük qiymətə malikdir. Bu
günlərdə mən Azərbaycan Elmlər Akademiyasının işçiləri ilə birlikdə Mingəçevir
rayonunda oldum, orada qazıntı zamanı Azərbaycanın qədim mədəniyyətini əks
etdirən çoxlu əşyalar tapılmışdı.
∗
Биз С.Вурьунун бу мяктубуну «Мядяниййят» гязетиндя дярж етдирмишик.
242
Bunlar çox da böyük olmayan tapıntılar idi. Ancaq onlar məni ilhama gətirdi. Mən
«Muğan» poemasını yazdım və bu nadir tapıntılardan ilhamlanaraq poemanın bütöv
bir fəslini Pompey qoşunlarına və başqa işğalçılara qarşı igidliklə vuruşan
Azərbaycan xalqının keçmişinə həsr etdim». (59)
Şair qazıntı zamanı tapılmış hər hansı bir əşyanın, kiçik parçanın belə tariximizin
öyrənilməsi üçün xüsusi əhəmiyyətini qeyd etmişdir:
Kim bilir, neçədir dünyanın yaşı
Tarixin nə qədər yazısı vardır.
Hər saxsı parçası, hər məzar daşı
Nəsildən-nəsilə bir yadigardır. (132, 28)
S.Vurğun bu cür tapıntıların qan yaddaşımıza çevrildiyini, özündə ulu tariximizi
və kökümüzü yaşatdığını «Bakının dastanı» poemasında da işıqlandırmışdır. Şair
Azərbaycan elminin mərkəzləşdiyi Elmlər Akademiyasını oxucuya təqdim edərkən
ilk növbədə buradakı əlyazmaları, qədim tapıntıları yada salır. Min illərdən qalmış
dəri üzərindəki əlyazmaları bizə ulu babalarımızdan yadigardır. Bu yazılar həm
tariximiz, həm də babalarımızın müqəddəs sənəti kimi əhəmiyyətlidir. Onları hər bir
vətəndaşımız görməli, mənasını duymalıdır:
...Akademiya!.. Nələr vardır burda bilsən!
Min illərdən qalmış o əlyazmaları
Xəbər verir yurdumuzun keçmişindən,
Hər vətəndaş bircə dəfə görsün barı!
O dərilər üstündəki gözəl xətlər
Babaların müqəddəs bir sənətidir.
O toz basmış, zaman görmüş hər bir əsər
Nəsillərin bir-birilə söhbətidir. (132, 311)
243
Poemanın Şirvanşahlar sarayı ilə bağlı misraları bu abidəyə şairin məhəbbətini
əks etdirir. Beş yüz il bundan əvvəl Şirvanşah Xəlillüllahın tikdirdiyi saray bu gün
həm nadir sənət incisi, tarixi abidə, həm də Azərbaycan dövlətçiliyinin rəmzidir.
Burada xalqımız yadellilərin basqınlarını dəf etmiş, öz paytaxtını yaratmış və
qorumuşdur:
Bakı adlı, dünya görmüş bir limanda
O hökmüdar qurdu Şirvan paytaxtını.
Qəsbkarlar axışdığı bir zamanda
Dönə-dönə o sınadı öz baxtını... (133, 319)
S.Vurğun burada toplanmış tapıntıları da unutmur. Onların hər birinin tariximiz
üçün mühüm əhəmiyyətini qeyd edir. Daşlar üzərində yonulmuş at, qoç, öküz
surətləri xalqımızın igidliyini və məşğuliyyətini, bir də sənətkarlığını əks etdirir.
Müəllifin diqqəti burada mühafizə olunan saxsı qablardan da yayınmır.
Arxeoloci qazıntılar zamanı tapılmış bu əşyalar həm tariximizin, həm də
incəsənətimizin öyrənilməsi üçün əhəmiyyətlidir. Bu qabları ulu babalarımız
hazırlamış, istifadə etmişlər. Saxsı qablarda əcdadlarımızın əl izləri yaşayır. Qablar
üzərindəki müxtəlif lövhələr, pələng, ceyran, qırqovul surətləri bu əşyaları sənət əsəri
kimi də təqdim edir. Belə zəngin sərvətin sahibi öyünməkdə haqlıdır:
Hələ qablar, saraydakı saxsı qablar
Tufan görüb dəyişməmiş öz rəngini…
O qablarda nə lövhələr, surətlər var!
Əzəl seyr et bizim dağlar pələngini. (133, 320-321)
«Muğan» poemasının on üçüncü nəğməsini şair Mingəçevir qazıntıları zamanı
üzə çıxarılmış tapıntılara həsr etmişdir. Qoca alimlə Sarvan söhbət edirlər. Sarvanın
«Axtardığınız şeylər nədir?» sualına alim belə cavab verir:
Dostları ilə paylaş: |