13
sovet
dönəminin
20-30-cı
illərində
ictimai-siyasi
mühitin
müəyyənləşdirdiyi prinsiplərə əsaslanma üstünlük təşkil edirdi. Bu, sovetlər
dönəminin birbaşa özü ilə bağlı məsələdir. Çünki imperiyanın gəlişi,
yaşayışı və çökməsi özlüyündə ədəbi mühitin bütün tərəfləri ilə içindən
keçirdi. Əfsanə, rəvayət, nağıl, dastan, atalar sözü, lətifə, bayatı, nəğmə və
s. kimi örnəklər bu proses boyu daim yazılı ədəbiyyat üçün bir mənbə,
istinad yeri olmuşdur.
Bu dövrün poeziya, nəsr və dramaturgiyasında nağıl mövzusunda
yazılmış əsərlərdə şahlar, xanlar, bəylər istismarçı sinif nümayəndələri kimi
qəddar və qaniçən obrazında göstərilir, sadə xalq nümayəndələri isə
məzlum və istismar olunan əzabkeş rolunda verilirdi. Məsələn,
Əfəndiyevin, “Apardı sellər Saranı”, “Qarı dağı” hekayələri, M.Təhmasibin
“Bir qalanın sirri” pyesi bu qəbildəndir.
Keçən əsrin altımışıncı illərində ictimai-siyasi mühitdəki
yumşalmalar, repressiya və deportasiya, sürgün bəraətləri ədəbi mühitdə də
yeni münasibətləri formalaşdırır. Artıq yeni tarixi-siyasi şərait və ona bağlı
olan ədəbi-mədəni mühiti özünün reallıq və yeni düşüncə prizmasından
məsələlərə yanaşır. Məhz R.Rzanın, İ.Hüseynovun, İ.Şıxlının,
B.Vahabzadənin, M.Arazın, N.Həsənzadənin, Y.Səmədoğlunun, Anarın,
İ.Məlikzadənin, Elçinin, M.Süleymanlının və başqalarının əsərlərində
həmin keyfiyyətlər bu və ya digər dərəcədə özünə yer tapmağa başladı.
Nağıl təhkiyəsi və nağıl forması bir vasitə kimi yazıçıların yazı manerasına
daxil oldu. Burada imperiyanın siyasi müstəvidə xalqlara qarşı yeritdiyi
məkrli siyasətin bir növ təhlili aparıldı. Ancaq onu da əlavə edək ki, həmin
çatışmazlıqların, qüsurların verilməsi birbaşa deyildi. Hansısa əsərdə
epizodik şəkildə, bəzən bir cümlə ilə, bəzən mətnaltı vasitələrlə, obrazların
dili ilə və yaxud da hadisələrin təsvirini tarixin dərinliklərinə daşımaqla baş
verirdi. Ona görə də XX əsrin siyasi problemlərinin çoxluğu və
mürəkkəbliyi ədəbiyyatın özündə də düşüncə və ifadə müxtəliflikləri ilə
müşahidə olunur. Bunlar, hətta, xalq yaradıcılığının ayrı-ayrı janrlarına
müraciətin özündə də görünür. Məsələn, 40-cı illər ədəbiyyatında bütün
diqqət demək olar ki, müharibə düşüncəsinə, vətən sevgisinin ifadəsinə
yönəlmişdi. Artıq 60-cı illər ədəbiyyatında tədricən ədəbi-estetik düşüncə
milli ruhun axtarışları və imperiya ideologiyasının mahiyyətini açmağa üz
tutur. Bir növ ədəbiyyatda yeni tendensiyaların nümayişi özünü göstərməyə
başlayır. Bu mənada İ.Hüseynovun “Saz”, “Faciə”, “Kollu Koxa”,
”Şəppəli”, “Tütək səsi”, “İdeal” və s. əsərləri 60-cı illər ruhunun ifadəsidir.
Yazıçı bütün mənfiliklərə nağıl obrazından istifadə edərək “hamısı Div
irsidir” şəklində üstüörtülü məna verir. İ.Şıxlının “Həkimin nağılı” (1947),
14
“Ayrılan yollar” (1957), “Dəli Kür” (1957-1966), “Məni itirməyin” (1984),
“Namərd gülləsi” (1991) kimi müxtəlif janrlarda qələmə aldığı epik
əsərlərin mahiyyətində də, məhz imperiya ruhuna mətnaltı yazıçı etirazı
öz əksini tapıb. Azərbaycan ədəbiyyatının digər nümayəndələrinin
yaradıcılığında da belə müraciətlər, dövrün və mühitin çatışmazlıqlarının
ifadəsi vardır. Həmın qüsurların cəmiyyətə çatdırılmasının yollarından biri
də, yuxarıda dediyimiz kimi, nağıl formulundan istifadə idi. Bu mənada
nağıla, daha doğrusu, nağıl mövzusuna müraciət bir forma, ifadə hadisəsi
kimi mühüm əhəmiyyət daşıyırdı. Məhz R.Rzanın, İ.Hüseynovun,
İ.Əfəndiyevin,
İ.Şıxlının,
M.Dilbazinin,
H.Arifin,
M.Arazın,
Y.Səmədoğlunun, İ.Məlikzadənin , N.Həsənzadənin, Anarın, Elçinin,
M.Süleymanlının və başqalarının yaradıcılığında bu keyfiyyət aydın
şəkildə özünü göstərir. Məsələn, İ.Əfəndiyevin “Geriyə baxma, qoca”
romanında “Möhnət qocanın nağılları” silsiləsi bütünlükdə nağıl
mövzusuna söykənir.
Görkəmli sənətkar “Geriyə baxma, qoca” romanında sırf nağıl
formul və motivlərindən, nağıl ənənəsindən gələn bədii-üslubi
keyfiyyətlərə üstünlük vermiş və bununla əsərin dəyərini xeyli dərəcədə
artırmışdır. Onu da əlavə edək ki, ayrı-ayrı əhvalatların təqdimində,
xüsusən də başlama manerasında da nağıl üslubu, nağılvari təhkiyə özünü
göstərir. Məsələn, “İndi sizə kimdən danışım, Kamırxan qarıdan” bölməsi
boyaboy nağıl üslubunda hekayə olunur. “Kamirxan qarı öz əməlində
olsun, indi eşit çoban Mahmuddan” əsərdəki “Qızyetərlə Çoban Mahmud
nağılı” bölməsi müəllifin əsəri nağıl manerasında yazmağa üstünlük
verməsinin əyani təzahürüdür.
Xalq yazıçısı Süleyman Rəhimov nağıl mövzusuna böyük maraq
göstərən və bu istiqamətin XX əsrin ikinci yarısından etibarən keyfiyyətcə
yeniləşməsində mühüm rol oynayan qüdrətli söz ustasıdır. Onun nağıl,
əfsanə və rəvayət mövzusuna müraciəti və bu səpkidə əsərlər yaratması
yaradıcılığının bütün mərhələlərində müşahidə olunur. Hətta, kitablarında
“Əfsanələr” başlığı altinda verilən “Gülən balıq” (1963), “Ovqan və ilan”
(1963), “Güzgü göl əfsanəsi” (1967), “Gülsabah”(1968), “Arpaçay
əfsanəsi” (1978), “Kəsilməyən kişnərti” (1968) və s. hekayələrinin
mahiyyətində də əslində nağıl motivləri, strukturu dayanır. Burada xalqın
faciələrinin, itkilərinin kökləri və məkrli düşməninin əsil mahiyyəti barədə
çox ciddi rəmzi-məcazi işarələr görünür.
Xalq yazıçısı Əzizə Cəfərzadənin yaradıcılığında da nağıl
mövzusuna müraciət tez-tez müşahidə olunur. Onun “Çörək”, “Qarı və
pişik”, “Yumurta əhvalatı” kimi nağıl-hekayələrində qaldırılan problemlər