Azərbaycan Respublikası Fövqəladə Hallar Nazirliyinin Mülki müdafiə qoşunları haqqında Ə S A S N A M Ə I. ÜMUMİ MÜDDƏALAR 1. Azərbaycan Respublikası Fövqəladə Hallar Nazirliyinin Mülki müdafiə qoşunları (bundan sonra -
mülki müdafiə qoşunları) mülki müdafiə tədbirlərini yerinə yetirən, əhalinin və ərazilərin təbii və
texnogen xarakterli fövqəladə hallardan qorunması ilə bağlı çevik reaksiya verilməsini, fövqəladə
halların qarşısının alınması və nəticələrinin aradan qaldırılması zamanı qəzaxilasetmə və digər
təxirəsalınmaz işlərin görülməsini təmin edən qurumdur.
2. Mülki müdafiə qoşunları öz fəaliyyətində Azərbaycan Respublikasının Konstitusiyasını, Azərbaycan
Respublikasının tərəfdar çıxdığı beynəlxalq müqavilələri, Azərbaycan Respublikasının qanunlarını,
Azərbaycan Respublikası Prezidentinin fərman və sərəncamlarını, Azərbaycan Respublikası Nazirlər
Kabinetinin qərar və sərəncamlarını, Azərbaycan Respublikası Silahlı Qüvvələrinin nizamnamələrini,
Azərbaycan Respublikası Fövqəladə Hallar Nazirliyi haqqında Əsasnaməni, bu Əsasnaməni və
Azərbaycan Respublikası Fövqəladə Hallar Nazirliyinin (bundan sonra - Nazirlik) əmr və
göstərişlərini rəhbər tutur.
3. Mülki müdafiə qoşunları öz vəzifələrini yerinə yetirərkən və hüquqlarını həyata keçirərkən icra
hakimiyyəti və yerli özünüidarəetmə orqanları, qeyri-hökumət təşkilatları ilə qarşılıqlı əlaqədə
fəaliyyət göstərir.
4. Mülki müdafiə qoşunları müstəqil balansa, qanunvericiliyə uyğun sərəncamında olan dövlət
əmlakına, xəzinə və bank hesablarına, üzərində Azərbaycan Respublikasının Dövlət gerbinin təsviri,
Nazirliyin və Mülki müdafiə qoşunlarının adı həkk olunmuş möhürə, müvafiq ştamplara və blanklara,
bayraq və rəmzlərə malikdir.
5. Mülki müdafiə qoşunlarının saxlanma xərcləri və fəaliyyəti Azərbaycan Respublikasının dövlət
büdcəsi və Azərbaycan Respublikasının qanunvericiliyinə zidd olmayan digər mənbələr hesabına
maliyyələşdirilir.
6. Mülki müdafiə qoşunları komandanlığı Bakı şəhərində yerləşir.