Azərbaycan Respublikasının Fövqəladə Hallar Nazirliyinin fəaliyyətinin təmin edilməsi
ilə bağlı bəzi məsələlər haqqında
AZƏRBAYCAN RESPUBLİKASI PREZİDENTİNİN
FƏRMANI
1. Azərbaycan Respublikasının Fövqəladə Hallar Nazirliyinin strukturuna daxil olan aşağıdakı
qurumların əsasnamələri təsdiq edilsin:
1.1. Dövlət Yanğın Nəzarəti Xidməti haqqında Əsasnamə (əlavə olunur);
1.2. Mülki Müdafiə qoşunları haqqında Əsasnamə (əlavə olunur);
1.3. Hərbiləşdirilmiş Xüsusi Mühafizə Xidməti haqqında Əsasnamə (əlavə olunur);
1.4. Kiçik Həcmli Gəmilər üzrə Dövlət Müfəttişliyi haqqında Əsasnamə (əlavə olunur);
1.5. Dövlət Material Ehtiyatları Agentliyi haqqında Əsasnamə (əlavə olunur);
1.6. Tikintidə Təhlükəsizliyə Nəzarət Dövlət Agentliyi haqqında Əsasnamə (əlavə olunur).
2. Ləğv olunmuş Azərbaycan Respublikasının Dövlət Tikinti
və Arxitektura Komitəsinin
"Azərdövlətlayihə" Dövlət Baş Layihə İnstitutu (Mühəndis-axtarış Mərkəzi ilə birlikdə),
"Azərinşaatlayihə" Dövlət Baş Layihə - Konstruktor və Texnoloji İnstitutu, "Azkommunlayihə"
Kommunal Layihələndirmə İnstitutu və Tikintidə Qiymətqoyma Mərkəzi Azərbaycan Respublikasının
Fövqəladə Hallar Nazirliyinin tabeliyinə verilsin.
3. "Azərbaycan Respublikasının Fövqəladə Hallar üzrə Dövlət Komissiyasının yaradılması haqqında"
Azərbaycan Respublikası Prezidentinin 1995-ci il 13 dekabr tarixli 244 nömrəli Sərəncamı
qüvvədən
düşmüş hesab edilsin.
4. Azərbaycan Respublikasının Fövqəladə Hallar Nazirliyinin strukturuna daxil olan Sənayedə İşlərin
Təhlükəsiz Görülməsi və Dağ-mədən Nəzarəti Agentliyinin adı Sənayedə İşlərin Təhlükəsiz
Görülməsi və Dağ-mədən Nəzarəti Dövlət Agentliyi adlandırılsın.
5. Azərbaycan Respublikasının Nazirlər Kabinetinə tapşırılsın ki:
5.1. Azərbaycan Respublikasının Fövqəladə Hallar Nazirliyinin strukturuna
daxil olan Sənayedə
İşlərin Təhlükəsiz Görülməsi və Dağ-mədən Nəzarəti Dövlət Agentliyinin Əsasnaməsinin layihəsini
hazırlayıb on beş gün müddətində Azərbaycan Respublikasının Prezidentinə
təqdim etsin;
5.2. qüvvədə olan normativ hüquqi aktların bu Fərmana uyğunlaşdırılması
barədə təkliflərini
hazırlayıb bir ay müddətində Azərbaycan Respublikasının Prezidentinə təqdim etsin;
5.3. bu Fərmandan irəli gələn digər məsələləri həll etsin.