11
Azərbaycanın de-yure tanınmasını sübut edən dostluq haqqında saziş və habelə konsulluq haqqında, ticarət,
poçta-teleqraf əlaqələri, məhkəmə qərarlarının icrası və sair haqqında bir sıra ikitərəfli müqavilələr
imzalanmışdır və parlament tərəfindən həmin saziş və müqavilələr 1920-ci il aprel ayının 15-də təsdiq olunur.
Bununla yanaşı Azərbaycan Xalq Cümhuriyyəti Parlamenti öz fəaliyyəti dövründə bir sıra günün vacib
tələbləri ilə bağlı məsələləri həll edə bilməmiş və ya onların həllini uzatmışdır. Nəticədə həmin məsələlərlə
əlaqədar Parlament və hökumətə qarşı narazılıqların yaranmasına səbəb olmuşdur. Müxalifətdə olan qüvvələr,
ilk növbədə isə parlamentin sosialistlər bloku Azərbaycan Parlament və hökumətinə qarşı bu məsələlərdən
məharətlə istifadə edərək xalq arasında ona qarşı geniş təbliğat aparır, narazılıqlar yaradır, hətta hökumətə qarşı
tətillər belə təşkil etməyə müvəffəq olurdular.
Torpaq islahatı və sənaye fəhlələrinin həyat şəraitini yaxşılaşdırmaq üçün tələb olunan islahatlar
Azərbaycanda həyata keçirilməsi vacib olan köklü məsələlər idi. hələ Zaqafqaziya Seymi bunu nəzərə alaraq
torpaq islahatı haqqında qanun vermiş, həmin qanun Azərbaycan mülkədarlarının açıq narazılığına səbəb
olmuşdur. Ona görə də F. Xoyskinin Gəncədə təşkil etdiyi hökumətin ilk qərarlarından biri 1918-ci il iyun
ayının 22-də Azərbaycanda torpaq islahatı haqqında Zaqafqaziya Seyminin qəbul etdiyi qanunun icrasını
dayandırmaq haqqındakı qərarıdı. Həmin qərarda göstərilirdi ki, Azərbaycanda Müəssislər Məclisi çağırılana
qədər həmin qanunun ölkədə icrası dayandırılır, tutulmuş istər xüsusi istərsə də xəzinə torpaqları geri qaytarılır.
Qərarda əkinçilik nazirinə tapşırılırdı ki, yeni çağırılacaq Müəssislər Məclisinə təqdim etmək üçün torpaq
məsələsinin həllinə aid lazımi materiallar toplasın, qısa müddətdə yeni yaradılmış torpaq komitələrinin ləğvi və
ya yenidən
[23 - 24]
qurulmasına və torpaqların satınalma qiymətləri haqqında təklifləri hazırlayaraq Nazirlər
Şurasına təqdim etsin.
1
Baxmayaraq ki, 1919-cu ilin yayından torpaq haqqında islahat məsələsinin müzakirəsi Azərbaycan
Parlamentinin iclaslarının gündəliyinə daxil edilmişdir, təəssüflər olsun ki, bütün fəaliyyəti müddətində
parlament həmin məsələni müzakirə etməmişdir.
Məhz bu məsələnin həllinin çətinliyini hiss edən sosialist fraksiyasının üzvləri S. Ağamalı oğlu,
Ə. H. Qarayev, İ. Əbilov, Ə. C. Pepinov və başqaları ondan Parlament tribunasından Parlament və hökumətə
qarşı təziq vasitəsi kimi istifadə edirdilər. hər dəfə Parlament iclasının gündəliyi müzakirə olunarkən onlar bu
məsələni qaldırır, ilk növbədə daha vacib olan torpaq məsələsinin müzakirəsini keçirməyi təklif edirdilər.
Onların gündəliyə aid bu təklifləri uzun müddət müzakirə olunur, sonra səsə qoyularaq rədd edilirdi. O da
maraqlıdır ki, torpaq haqqında islahat məsələsi parlamentin gündəliyindəki məsələlər sırasında irəli çəkilmək
əvəzində getdikcə geriyə keçirilirdi.
"Müsavat" partiyası və partiyasızlar fraksiyası tərəfindən torpaq İslahatı haqqında 29 maddədən ibarət qanun
layihəsi ümumxalq müzakirəsi üçün 1920-ci il fevral ayının 21-də "Azərbaycan" qəzetində dərc olunur. Həmin
qanun layihəsinə görə torpaq üzərində xüsusi mülkiyyət hüququ saxlanmaqla torpaqların onların sahibləri
tərəfindən istifadə olunmayan hissəsi hökumət tərəfindən pulla alınaraq torpaqsız kəndlilərə paylanmalı idi.
Digər tərəfdən isə kəndlilərə həmin torpaqları almaq üçün dövlət tərəfindən güzəştli şərtlərlə kreditlər verilməsi
nəzərdə tutulurdu. Təəssüflər olsun ki, aprel çevrilişinə qədər bu qanun layihəsi parlament iclaslarında müzakirə
olunmayaraq kağız üzərində qalmışdır.
Sənaye müəssisələri üzərində də xüsusi mülkiyyət hüququnun qorunub saxlanılması hökumətə və parlamentə
bu sahədə də az-çox köklü dəyişikliklər həyata keçirməyə imkan vermirdi. Dəfələrlə sosialistlər fraksiyası
parlamentdə bununla əlaqədar məsələlər qaldırır, onların həll olunmamasından istifadə edərək fəhlələr arasında
təbliğat aparır, fəhlə tətilləri təşkil edirdilər. Sovet
[24 - 25]
Rusiyasında torpağın, sənaye müəssisələrinin
milliləşdirildiyi, onların fəhlə və kəndlilərə verildiyi haqqında sosialistlər fraksiyası açıq-açığına təbliğatla
Azərbaycan Xalq Cümhuriyyəti hökumətinə və Parlamentinə qarşı pozuculuq siyasəti yeridir, Azərbaycanın
nicatını yalnız Sovet Rusiyası ilə birləşməkdə olduğunu açıq və gizli şəkildə təbliğ edirdilər. Bütün bunlara
baxmayaraq Azərbaycan Xalq Cümhuriyyəti və onun Parlamentinin xalqımızın dövlətçilik və ictimai-siyasi fikir
tarixində rolu əvəzsizdir.
Azərbaycan Parlamentinin yaranması və fəaliyyətində Azərbaycan Xalq Cümhuriyyətinin liderləri –
M. Ə. Rəsulzadənin, Ə. M. Topçubaşovun, F. X. Xoyskinin, N. Yusifbəylinin, H. Ağayevin, M. Y. Cəfərovun,
M. H. Hacınskinin və başqalarının böyük xidmətləri olmuşdur.
Əlbəttə 70 ildən sonra yenidən öz müstəqilliyini əldə etmiş Azərbaycan Respublikası Parlamentinin öz
sələfindən öyrənə biləcəyi çox şeylər var. Bununla yanaşı yuxarıda deyildiyi kimi həmin parlamentin öz işində
buraxdığı nöqsanlar da az olmamışdır. Bu gün Azərbaycan Xalq Cümhuriyyəti Parlamenti protokollarının
əsillərini çap etməkdən məqsəd bir tərəfdən xalqımızın tarixinin bu şanlı səhifələrini doğru-düzgün
işıqlandırmağa kömək göstərməkdirsə, digər tərəfdən bugünkü parlamentimizin öz sələfinin işlərinin müsbət
cəhətlərindən bəhrələnməsinə şərait yaratmaq, onların təcrübəsindən istifadə edərək buraxdıqları nöqsanları
görmək və onları təkrar etməyə yol verməməyə gömək etməkdir.
1
Azərbaycan Cumhuriyyəti hokumətinin qanun və binaküzarlıqları məcmuəsi. № 1, mad. 12, səh.12.