Azərbaycan – Türkiyə münasibətləri II beynəlxalq elmi konfransının materialları
404
İlya Nikolayeviç Berezin 1818-ci ilin iyul ayının 19-da Perm quberniyasının Ekaterinburq qəzasında
məmur ailəsində anadan olmuşdur. Ekaterinburq qəzasında peşə məktəbində və Perm gimnaziyasında təhsil
alaraq, 1834-cü ildə orta təsilini başa vurmuşdur. Həmin ildə Kazan Universitetinin şərqşünaslıq fakültəsinə
daxil olmuşdur. Berezin Kazan Universitetində professorlar A.Kazımbəy və F.Erdmanın rəhbərliyi altında
xüsusi olaraq ərəb və fars dillərini öyrənmişdir. 1837-ci ildə Universiteti bitirən Berezin şərq filologiyası üzrə
magistr dərəcəsi almışdır (6, 173–177).
Berezin 1841-ci ildə «Что способствует развитию просвещения и останавливает ход его в державах
магометанских» adlı dissertasiyasını müdafiə edərək elmlər namizədi elmi dərəcəsini alır. Növbəti il, 1842-ci
ildə Berezin Universitet rəhbərliyinin təlimatı əsasında və Unversitetin hesabına, A.Kazımbəyin plan və
göstərişləri əsasında Şərq ölkələrinə özünün elmi səyahətinə çıxır. Üç il müddətində Zaqafqaziya, Persiya,
Mesopotomiya, Suriya, Livan, Fələstin, Misir, Kiçik Asiya ölkələrində səyahətdə olaraq, şərq dillərini daha da
dərindən öyrənməklə yanaşı, həmçinin bu yerlərin xalqlarının həyat tərzini və Qədim Şərq dövlətlərinin
ədəbiyyatını öyrənir (8, 511-512; 6, 173–177).
İ.N.Berezinin şərq ölkələrində apardığı qiymətli araşdırmalar, topladığı olduqca əhəmiyyətli məlumatlar
1845-1846-cı illərdə Kazan Universitetinin “Elmi Əsərlər” toplusunda nəşr olunur (Bax: 9; 10; 11).
Şərqin praktiki dil bilikləri və ədəbiyyatı ilə zənginləşdirilmiş çox geniş matereal toplayan gənc şərqşünas
Kazana qayıdaraq 1846-cı il 19 (31) mart tarixində doğma Universitetinin türk dili kafedrasında eksdraordinar
(ştatdankənar) professor vəzifəsini tutdu. 1847-ci ilin martında Kazan Universiteti Fəlsəfə fakültəsinin I şöbəsi
Berezinin gündəliyini müzakirə edərək belə qənaətə gəldi ki, o, “Şərqə dair çox qiymətli materialların zəngin
mənbəsidir” (7, 132.).
Kazanda Berezin 9 il ərzində müntəzəm olaraq Universitetdə mühazirə söylədi. 1855-ci ildə Peterburq
Universitetinin nəzdnində Şərq dilləri fakültəsi açıldıqdan dərhal sonra o, paytaxta dəvət olundu və həmin
fakültənin türk-tatar dilləri kafedrasının ştatlı professoru təyin edildi. 1855-ci ildə Berezin Kazanı tərk edərkən
“Catalogue des mémoires et des médailles du cabinet numismatique de l’université de Casan”, (Kazan
Universiteti numizmatika kabinetinin sikkələr və abidələr katoloqu” adlı məcmuə nəşr etdirdi.
Peterburqdakı fəaliyyəti dövründə alimin “Türk tayfalarının xalq ata sözləri (1856) «Народные
пословицы турецкого племени» (1856), “Guide du voyageur en Orient. Dialogues arabes d’après trois
principaux dialectes: de Mésopotamie, de Syrie et d’Egypte” (1857), “Şərq səyahının bələdçisi. Ərəblərin üç
əsas dialekti:Mesopotomiya, Suriya və Misir, “Türkiyə müntəxabatı” (3 cilddə., 1857–1890), həmçinin
persiyanın məhşur dövlət xadimi və tarixçisi (Hülaki-Elxani vəziri) (1247–1318) Rəşidəddin ət-Təbibinin
“Monqolların tarixi” «История монголов» əsəri rus dilində tərcümə və qeydlərlə nəşr olunub.
Bununla yanaşı Berezin müxtəlif dövrü məcmuələrdə Şərq ölkələri haqqında çox geniş seriyalı
məqalələrlə çıxış etmişdir. Xüsusən “Moskva xəbərləri” «Московских Ведомостях» məcmuəsində nəşr
olunan “İran körfəzi”, “Türkiyə polisi”, həmçinin “Rus xəbərləri” dərgisində «Русском Вестнике» nəşr olunan
“İstanbulda ramazan” (1856), “Bayram” (1856), Səhra mənzərələri «Сцены в пустыне» (1856), “Müsəlman
qadının xoşbəxtliyi” «Блаженство мусульманина» (1867) adlı əsərləri nəşr edilmişdir.
1864-cü ildə Berezin “Xan Yarlıklarına görə Cuci Ulusunun daxili quruluşu» “Внутреннее устройство
улуса Джучиева по ханским ярлыкам” adlı doktorluq dissertasiyasını müdafiə edir və növbəti il bu tədqiqat
işi kitab halında nəşr edilir. 1871-ci ildə Berezin Peterburq Universitetinin əməkdar professoru adına layiq
görülür. 1889-cu ilin dekabr ayında isə Peterburq Universitetinin fəxri üzvü seçilir (Bax: 4).
Peterburq Universitetinin “Türk-tatar ədəbiyyatı” kafedrasının professoru İ.N.Berezin 1896-cil mart
ayının 22-də (3 aprel) Peterburqda vəfat etmişdir (Bax: 12).
V.V.Bartold görkəmli şərqşünas İ.N.Berezin haqqında bunları demişdir: “Baxmayaraq ki, İ.N.Berezinin
elmi bioqrafiyası iki dövrə - Kazan və Peterburq dövrlərinə bölünür, məhz Kazanda bu böyük alim hərtərəfli
istedada malik tədqiqatçı və şərqşünaslığın müxtəlif sferalarında mükəmməl alim səviyyəsinə yüksəlmişdir.
Bartold həmçinin qeyd edir ki, Berezin təkcə filoloq kimi deyil həm də tarixçi kimi özünün elmi və alimlik
fəaliyyətinin ilk dövrlərində tam aydın baxışlara sahib olmuş və sona qədər bu yanaşma öz stabilliyini
qorumuşdur” (1, 737).
Azərbaycan – Türkiyə münasibətləri II beynəlxalq elmi konfransının materialları
405
Berezinin Şərq ölkələrinə səyahətinin məcmusu olan “səyahətnaməsi” iki cilddə “Şərqə Səyahət” adı ilə
Kazanda nəşr edilmişdir. Müəllifrin səyahətnaməsinin birinci cildi “Dağıstana və Zaqafqaziyaya səyahət”
(1849) (Bax: 2) ikinci cildi isə “Şimali Persiyaya Səyahət” (1852) adlanır (Bax: 13).
İlya Nikolayeviç Berezinin “Dağıstana və Zaqafqaziyaya səyahət” əsəri Cənubi Qafqaz və Azərbaycan
tarixinin, siyasi coğrafiyasının, şəhərlərinin, əhalinin sosial-iqtisadi vəziyyətinin öyrənilməsi baxımından
olduqca əhəmiyyətlidir.
1.
Dərbənd və Bakı şəhərlərinin sosial-mədəni həyatının təsviri
Rus səyyahı İ.N.Berezin XIX əsrin birinci yarısında Cənubi Qafqazın və Azərbaycanın sosial-iqtisadi və
mədəni həyatı haqqında olduqca qiymətli məlumatlar vermişdir. İlk növbədə Dərbənd şəhərinin ümumi sosial
həyatı haqqında məlumat verən İ.N.Berezin yazır: “Dərbəndin orjinal fizionomiyası ilə tanış olmaq üçün bazarı
gəzmək kifayətdir. Burada möminlərin adi ictimai həyatı cəmləşmişdi: köhnə paltar alverçilərinin qışqırtısı, öz
işlərilə məşğul olan misgərlərin taqqıltısı, çarvadarların qulaqları batıran qeyri-adi səsləri, qırmızı saqqal
tacirlərin mühüm görünüşləri diqqəti cəlb edirdi. Dərbənd bazarı demək olar ki, şəhərin yarısını tutur. İpək və
kağız məhsulları ilə dolu dükanlar küçə kimi uzanır, onlara iki karvan saray bitişmişdi. Bunlar dörd qapılı böyük
evlər olub yoldan keçən gəlmələrin heyvanları və özləri üçün idi...” (2, 147).
Şərqşünas İ.N.Berezinin Dərbənd bölgəsinin sosial həyatı haqqındakı məlumatları olduqca
əhəmiyyətlidir. Berezin şəhərin etnik mənzərəsini belə təsvir edir: “... Dərbəndin əhalisi əsasən şiə
təriqətindən olan müsəlmanlardan ibarətdir. Sünnülər burada azdır və “mikellər” adlanırlar. Onlardan başqa
burada ermənilər və jidlər (yəhudilər) də yaşayır. Jidlər Dağıstanlı qardaşları kimi öz dinlərinə çox bağlı
deyillər. Dərbənddə yalnız xidmətdə olan ruslar yaşayırdılar...” (2, 149).
Dərbən əhalisinin dili haqqında məlumat verən Berezin qeyd edir ki, “Dərbənddə türk dili hakimdir.
Dərbənd dialekti Qərbi türk dilinə məxsusdur. Dərbəndlilər bir neçə hərfin deyilişini dəyişmişdilər. Onlar “dir”
şəkilçisi əvəzinə “di” şəkilçisini işlədirlər...” (2, 151).
İ.N.Berezin öz əsərinin əlavələr hissəsində Dərbəndin 1825 və 1842-ci illərdəki müxtəlif sahələrinin
göstəricilərini özündə əks etdirən statistik cədvəl vermişdir. Bu cədvəl həmin dövrün sosial həyatını təhlil
etməyə imkan verir (2, Əlavələr IV. Statistik cədvəl).
Dərbənd şəhəri
1842-ci il
Əhali:
Kişi .............................. 5745 nəfər
Qadın ................................. 5963 nəfər
Şəhərətrafı və kənd evləri ..................... 1800
Erməni ailəsi .......................................... 40
Jidov (Yəhudi) ailəsi ............................. 60
Məscidlərin sayı ....................................... 16
1825-ci ildə Dərbənd əhalisinin ümumi sayı .......... 10294 nəfər
Erməni ailəsi.................................... 40
Yəhudi ailəsi ..................................... 89
Karvansaray ..................................... 3
Hamam ................................................... 4
Un dəyirmanı .......................................... 8
Torpaqlar ........................................................... 17, 650 sajen
O cümlədən, Əkin sahəsi ................................... 10, 000 sajen