verilə bilən hər cür zərəri dəf etmək üçün və eyni zamanda adam və
heyvan öldürməyə, hətta meyvə qopartmağa qarşı idi. Üçüncü möhür
Maniçilik inancına və təmizliyinə qarşı olan hər cür düşüncəni qadağan
etmişdi. Bu üç möhür indi də deyimlərimizdə “əlinə, dilinə və belinə
sahib ol” kimi işlənir. Yetkinlərə qadınlar da daxil edilirdi. Yetkinlərin
bu həyatı buddist keşişlərinin həyat tərzinə çox bənzəyirdi, yeganə fərq
yetkinlərin daimi qaldıqları müəyyən bir yerin olmaması idi.
2.
Dinləyənlər- bunlar dinə kor-koranə inananlar idi və sayları
təbii ki, yetkinlərdən çox idi. Bunlar Maninin 10 əmrinə tabe olanlar idi:
Yaşanılmış zamana inanmaq
Çoxallahlılıq dövrünün olduğuna inanmaq
Özünü yalan danışmaqdan qorumaq
Pis insan olmamaq
Ət yeməmək
Özgəsinin namusuna pis gözlə baxmamaq
Oğurluq etməmək
Oxumaq, sehrlə həqiqəti tanıyaraq bunları bir-birindən ayırmaq
Əhali içərisində inanclı olmaq
İşində yavaş və etinasız olmamaq
Bu on əmr bütpərəstliyi, namussuzluğu, qətli, zinanı, oğurluğu,
yalançılığı, sehrbazlığı, ikiüzlülüyü və dinə xəyanəti qadağan edirdi.
Dinləyənlər yetkinlərə (və ya seçilmişlərə) hörmət etməli, onların
qarşısında diz çökməli idilər. Bunun müqabilində yetkinlərdən meyvə
və göy-göyərti alardılar. Maniçilikdə ibadət günorta, axşamüstü, gün
batdıqda və günün batmasından 3 saat sonra olmaqla gündə 4 dəfə
(Əslində namaz 7 dəfə idi, fəqət insanlar 4-nü yerinə yetirirdi.) edilirdi.
Gündüz duaları Günəşə, gecə duaları isə Aya baxaraq edilirdi. Ay və
Günəşin olmadığı zamanlarda isə üzlərini Şimala doğru tuturdular.
Duadan əvvəl təmizlənmək üçün sudan, olmadıqda isə torpaqdan
istifadə olunurdu. Həftənin ilk günü Günəşin şərəfinə hamı oruc
tutmalı idi. Yetkinlər isə həftənin ikinci günü Ayın şərəfinə də oruc
tutardılar. Eyni zamanda hamı hər yeni ayda iki gün oruc tutmalı idi.
Manilikdə 3 möhürlə yanaşı mövcud olan 5 buyruğun əvvəlində 100
günlük orucluq dayanırdı. Yetkinlər öldükdən sonra mütləq cənnətə
qovuşacaqlar, dinləyənlər isə müəyyən bir mərhələdən sonra səadətə
çatacaqlar. Ölümdən sonra İlahi Məhkəmənin olduğu qəbul edilir.
Maniyə görə, keçmiş, indi və gələcək zamanın mənbəyində də nur və
zülmət dayanır.
Bema mərasimi-Maninin ölüm gününə həsr olunurdu və çoxlu dualar
edilməklə, müqəddəs yazılar oxumaqla qeyd olunurdu. Bu ayin barədə
yetərli bilgilər mövcud deyildir. Məlum olan 5 pilləli bir sahənin üstünə
boş taxtın qoyulmasıdır. Eyni zamanda Maniçilikdə keçirilmə qaydası
bizə gəlib çatmayan Vaftiz ayini də mövcud olub.
Manilikdə insanlara rəhbərlik etmək üçün Mani tərəfindən
təlimatlandırılmış bir öndər dayanır. Bu öndərdən sonra 5 təbəqə özünə
yer alır. Bunlar 12 müəllim, 72 keşiş, 360 ağsaqqal, yetkinlər və
dinləyənlərdir.
Tanrı və Şeytan- Mani dualizmində İşıq Tanrının, qaranlıq isə Şeytanın
simvolu hesab edilir. Zülmət və nurun bir-birilərinə münasibətdə heç
birinin üstünlüyü yoxdur. Qaranlıq və İşıq özlərindən üstün bir qüvvə
tərəfindən yaradılmayıb və heç biri daha əvvəl olmayıb. Zülmət
dünyada Arkonlar adlanan varlıqlar mövcuddur ki, bunlar İblisin
əsgərləri hesab edilir və hər cür pisliyi törədirlər. Manilikdə “Üç an”
adlanan kosmoloji bölgü vardır ki, buraya keçmiş, mövcud və gələcək
zaman daxildir. Keçmiş zamanda zülmət və nur bir-birilərinə qarşı
olmayıb, ayrı-ayrı dünyalar vəziyyətində idi. Mövcud indiki zaman
maddi olanın mənəvi olana hücumu ilə başlanmış və bu hal hazırda da
davam edir. Kosmosun yaranması bilavasitə bu hadisə ilə əlaqədardır.
Qaranlıq işığa hücum edərkən kosmos yaranmış və kosmos nə xeyir, nə
də şərdir, o bir qarmaqarışıqlıq, xaos anlamındadır. Gələcək zamanda
zülmət və nur əvvəlki kimi bir-birilərindən ayrılacaqdır ki, bu da
kosmosun sonu olacaqdır. İnsan nə qədər pislik edərsə, dünyadakı
qarmaqarışıqlıq, xaos çoxalacaq, əks halda bu proses çözüləcəkdir.
Zərdüştiliyin monist ideyasının tam əksinə olaraq manilikdə xeyir və
şər anlayışları tamamilə dualist xarakterlidir. Belə ki, Zərdüştilikdə
xeyir və şəri bilgəlik Tanrısı Ahura Mazda (Hörmüzd) yaratmışdır,
Manilikdə isə hər iki qüvvə əbədidir, onları heç bir üstün varlıq
yaratmayıb və bir-birilərindən asılı deyillər. Maniliyə görə, dünyanın
sonu gəldiyi zaman böyük bir savaşdan sonra İsa (ə) yenidən dünyaya
gələcək, məhkəmə kürsüsü qurulacaq, yaxşılar pislərdən ayırd
ediləcəkdir. Bu hadisədən sonra dünya atəşlə yox ediləcəkdir. Bu atəş
1468 il davam edəcəkdir, ta ki sonuncu şər maddə də aydınlıqdan
ayrılaraq yox olsun. Manilikdə hər cür pisliyi, şəri yaradanlar Div
adlandırılıb.
Maniliyin yayılması- Roma və Sasanilərin kəskin müdaxiləsinə
baxmayaraq manilik tezliklə qərbə və şərqə yol almağa başlayır. IV
əsrdən etibarən şərqi İrana yayılan Manilik Böyük İpək yolu vasitəsilə
Əfqanıstana və Tarım hövzəsinədək genişlənir. 762-ci ildə Uyğur
dövlətinin rəsmi dövlət dini olduqdan sonra Manilik Çinə doğru
genişlənməyə başlayır. IX əsrdə Uyğur dövlətinin yox olmasından sona
ta Çingiz xanın zamanınadək Tarım hövzəsində öz mövqeyini qoruyub
saxlayır. Çində isə ölkənin güney ərazilərinə qədər yayılır. Çinin
Fukien əyalətində XVI yüzillikdə də maniliyə rast gəlinir. Əl-Biruni
haqlı olaraq qeyd edir ki, “Şərq türklərinin böyük bir hissəsi, Çin və
Tibetdə yaşayanlar və Hindistanın bir hissəsi Mani dininə etiqad
edirlər”. Əməvilərin zamanında xilafətdən heç bir zərər görməyən
Maniçilər İraqın bir çox kəndlərinə yayılırlar, fəqət Abbasilərin
zamanında “zındıq” adı altında təqib olunmağa başlayırlar. Bu
təzyiqlər nəticəsində Maniçilər Xorasana və dinin geniş yayıldığı Uyğur
torpaqlarına köç etməyə başlayırlar. Xristianlıq tərəfindən qəbul
edilməyən "Tomas İncili", "Addas təlimləri" və "Hermesin Çobanı" kimi
İncil mətnləri Manilik tərəfindən qəbul edildiyindən Tomas, Addas ve
Hermesin Maniliyin həvariləri olduğu fikrini yaranır. Addasın Şərqdə,
Tomasın Suriyada və Hermesin Misirdə həvarilik etməsi qeyd olunur.
Dostları ilə paylaş: |