götürdü, özünə baxdı. Axı onun dodaqlarında portretdəki kimi büküşlər yoxdur!
Bu, nə olan şeydir?
Dorian
gözlərini ovuşdurdu; portretə daha da yaxın gəldi, yenə diqqətlə şəklə
baxmağa başladı. Şübhəsiz, rənglər yerindəydi, şəklin ora-burasını da düzəldib-
eləməmişdilər. Lakin üz cizgiləri açıq-aşkar dəyişmişdi. Bu, onun əksi deyildi!
Onun portreti qorxunc şəkildə dəyişmişdi!
Dorian kresloya oturub fikrə getdi. Birdən yadına düşdü ki, portret hazır olan gün
Bazil Holvardın studiyasında o nələri söyləmişdi. Bəli, o, çox gözəl xatırladı: o
vaxt Dorian demişdi ki,
çox istəyir özü yox, portret qocalsın; o özü əbədi gənc
qalmaq istəyir. Qoy onun gözəlliyi itib getməsin, saralıb-solmasın; əvəzində
bütün ağrı-acılar, həzz və iztirablar, günahlar portretin sifətində əks olunsun! Bəli,
o, bunu istəmişdi, bunu arzulamışdı! İstəmişdi ki, həyatının bütün iztirab və ağrı
izləri yalnız kətan parça üzərində görünsün; Dorian
özü isə üzündə ilk dəfə dərk
etdiyi gənclik çağının əbədi təravətini, sevinc və fərəhini, zərif əlvanlığını
qoruyub saxlaya bilsin. Görəsən, doğrudanmı, onun istəkləri çin olub? Belə şeylər
qeyri-mümkündür! Hətta bu barədə düşünmək belə adama dəhşətli gəlir! Bununla
belə, onun qarşısındakı portretdə dodaqlarının qəddar büküşləri əmələ gəlib, o,
bunu görür!
Amansızlıq! Məgər o, amansızlıq edib? Günahkar qızın özü deyilmi? Onun nə
günahı var ki? O, Sibili böyük aktrisa kimi görürdü və buna görə də ona
vurulmuşdu. Qız onun ümidlərini puça çıxartdı, onu peşman etdi. Qız onun
sevgisinə layiq olmayan dəyərsiz bir adam oldu! Lakin
Dorian bu dəqiqələrdə
qızın onun ayaqlarına düşüb uşaq kimi ağladığını, ona yalvardığını xatırladı;
yadına düşdü ki, o, Dorian, çox sərt bir qəddarlıq göstərdi, qızı laqeydliklə seyr
etdi. Görəsən, nə üçün belə etdi? Axı niyə onun ürəyi birdən-birə daşa döndü?
Axı o da əzab çəkmişdi?! Tamaşa vaxtı, o dəhşətli üç saatı kim yaşamışdı?
Dorian! O ağrılı və iztirablı saatlar ona bir əsr kimi görünmüşdü; o, bu əzabları
yaşamışdı! Axı hər halda, onun həyatı da qızın həyatı kimi qiymətlidir, dəyərlidir!
O, Sibilə əbədi yara vurdu, axı qız da Dorianı saatlarla incitmiş,
onu peşman
etmişdi! Qadınlar kişilərə nisbətən dərdi, ağrı-acını yüngül keçirirlər; onlar
yaranışdan belədir! Qadınlar yalnız hisslərlə yaşayır, emosiyalara üstünlük
verirlər! Qadınlar öz məşuqlarını da ona görə əldə saxlayırlar ki, öz emosiyalarını
onların üstünə tökə bilsinlər. Bunu lord Henri demişdi ona; lord Henri, görünür,
qadınları yaxşı tanıyır. Bəs Sibil Veyn nə üçün onu bu qədər
narahat edir, hə? O
qız Dorian üçün daha heç kmdir, heç kim!
Bəs bu portret necə olsun? Bu nə məsələdir belə? Bu portret onun həyatının
gizlinlərini özündə saxlayır; bu portret onun taleyidir. Portret ona sevməyi
öyrətmişdi – öz gözəlliyinə vurulmağı anlatmışdı. Doğrudanmı, bu portret ona
özünə, öz gözəlliyinə, qəlbinə nifrət bəsləməyi də öyrədəcək? Bu kətan parçadakı
o portretə Dorian bundan sonra necə baxacaq, hə?
Yox! Bu, olsa-olsa, qəlb çırpıntılarının törətdiyi aldadıcı hisslərdir! O, dəhşətli bir
gecə yaşamışdı! Onun beynində qəflətən sirli qırmızı ləkə yaranmışdı – bu, adamı
dəli edər! Şəkil heç dəyişməmişdi! Bu barədə düşünmək, sadəcə,
dəlilik
əlamətidir!
Lakin portretdəki adam şəkli ona istehzayla baxırdı; şəklin füsunkar üzünə qəddar
təbəssüm qonmuşdu. Onun qızılı saçlarını səhər günəşinin şəfəqləri yalayırdı.
Mavi gözləri canlı Dorianın baxışları ilə toqquşdu. Dorianın qəlbində hədsiz
mərhəmət oyandı; bu şəfqət özünə qarşı deyildi, portretdəki əksinə qarşı idi!
Portretdəki adam dəyişmişdi və görünür, bundan sonra daha çox dəyişəcəkdi!
Onun qızılı qıvrım saçları bozarıb çallaşacaq. Qırmızı və ağ qızılgüllər saralıb-
solacaq. Dorianın işlətdiyi hər bir günah bir ləkə kimi portretin üzünə vurulacaq
və onun portret gözəlliyi beləcə korlanıb məhv olacaq...
Lakin o, bir daha günah işlətməyəcək! Portret dəyişsin, ya heç dəyişməsin, dəxli
yoxdur – bütün hallarda bu portret onun vicdanı olaraq qalacaq!
Bu gündən
etibarən yoldan çıxmayacaq, nəfsini boğacaq! O, bir daha lord Henrini
görməyəcək! Onunla görüşməyəcək! Hər halda, onun incə zəhər kimi təhlükəli
nəzəriyyələrinə qulaq asmayacaq! Bazilin bağında Henrini dinləyəndən sonra
Dorian yoldan çıxdı; onda qeyri-mümkün şeylər üçün ehtiraslı meyillər oyandı.
Dorian Sibil Veynin yanına qayıtmaq qərarına gəldi; o gedib günahlarını
yuyacaq! Onunla evlənəcək, Sibili yenidən sevməyə çalışacaq! Bəli, bu, onun
borcudur! Qız, görünür, ondan daha çox iztirab çəkib. Yazıq qızcığaz! Dorian nə
qədər axmaq və amansız olub ona qarşı! Onun qıza olan məhəbbəti mütləq
qayıtmalıdır! Onlar birlikdə xoşbəxt olacaqlar. Onun Sibillə birgə həyatı
təmiz və
gözəl olacaq!
Dorian yerindən qalxdı; qarşısındakı portretə əsə-əsə bir də baxdı.
– Necə qorxuncdur, aman Allah! – donquldanaraq pəncərəyə tərəf yeriyib onu
açdı.
Dorian yaşıl çəmənli bağçaya çıxdı, dərindən nəfəs alaraq təmiz sübh havasını
uddu; bu sübh havası, sanki, başındakı qara-qura fikirləri də çıxarıb atdı; o yalnız
Sibil barədə düşünməyə başladı. Onun əvvəlki məhəbbətinin məsum əks-sədası
qəlbinə qayıtdı; Dorian qızın adını çəkdi, qəlbində Sibili təkrar-təkrar səslədi. Şeh
basmış bağçada civildəşən quşlar gül-çiçəyə, sanki, Sibil barədə nəsə
oxuyurdular.
SƏKKİZİNCİ FƏSİL
Dorian yuxudan duranda günortadan xeyli keçmişdi. Xidmətçisi bu müddət
ərzində bir neçə dəfə ayaqları ucunda onun yataq otağına girmiş, cavan sahibinin
oyanıb-oyanmadığını
yoxlamaq istəmişdi; o, sahibinin bu qədər yatmasına
təəccüb eləmişdi. Nəhayət, yataq otağından zəng gəldi; Viktor əlində çay sinisi