ix
3.3.2.2
E diela shqiptare kalon
E diell në shikueshmëri .................................................284
3.3.2.3
Pasdite në Top Channel talk show më i ndjekur i pasdites .................................286
3.3.2.4
Fiks Fare shikueshmëri mbizotëruese ndaj telenovelave ....................................288
3.3.2.5 Top Channel dominues në prime time .................................................................290
3.3.2.6
Top show fiton betejën me
Opinion .....................................................................291
Përfundime ...................................................................................................................................294
Gjetje ............................................................................................................................................300
Bibliografi ....................................................................................................................................306
Anekse..........................................................................................................................................330
Abstrakt ........................................................................................................................................376
x
Falënderime
Mirënjohja dhe falënderimi i shkon udhëheqësit të kësaj teze doktorate, Profesor Artan
Fugës, i cili ka konceptuar metodologjinë e punës, ka drejtuar kërkimin shkencor dhe më ka
orientuar drejt një bibliografie të pasur me autorë bashkëkohorë të komunikimit. Pa rigorozitetin
shkencor dhe sugjerimet profesionale e miqësore të drejtuesit, ky punim nuk do të ishte në
cilësinë e kërkuar.
Gjithashtu, dëshiroj të falënderoj pedagogët e Departamentit të Gazetarisë dhe
Komunikimit, në Fakultetin Histori-Filologji, të Universitetit të Tiranës, që më dhanë mundësinë
të realizoj këtë kërkim shkencor. Asistenca dhe sugjerimet e profesorëve në këtë fakultet ka qenë
e vyer dhe një pjesë e konsiderueshme e tyre janë reflektuar në punim.
Falënderoj drejtuesit e televizionit Vizion Plus, TVSH, Top Channel dhe TV Klan për
ndihmën e ofruar dhe mundësinë e krijuar për të patur akses në arkivin
e programeve talk show,
të departamentit të financës dhe atë të marketingut.
Një falënderim shkon për të gjithë moderatorët, autorët dhe kryeredaktorët e 31
programeve talk show në Shqipëri, të cilët u treguan të gatshëm dhe të papërtueshëm për
realizimin e intervistave dhe anketimeve me to. Gjithashtu, falënderoj kompaninë "Abacus
Research", e cila më mundësoi pa pagesë të dhënat e audiencës për programet talk show në
Shqipëri, duke i dhënë një përmasë tjetër këtij punimi shkencor, si dhe gjithë personat e tjerë që
janë kontaktuar dhe kanë kontribuar për këtë punim.
Së fundi, jo për nga rëndësia, dëshiroj të falënderoj familjen time, e cila më ka
mbështetur përgjatë gjithë formimit tim, studimit në këtë shkollë doktorale dhe realizimin e këtij
punimi shkencor.
Elvin Luku Talk show në peizazhin televiziv shqiptar
xi
Parathënie
Kur zgjodha tezën "Talk show në peizazhin televiziv shqiptar", ideja fillestare ishte për të
sjellë botimin e parë që përkufizonte gjininë dhe analizonte këtë format të rëndësishëm televiziv
në ekranet shqiptare. Por, ndërsa shfletoja literaturën bashkëkohore mbi këto programe në
vendet e origjinës, si: Shtetet e Bashkuara të Amerikës, Britani e më gjerë, secili prej autorëve
rendiste elemente të ndryshme teorike, në varësi të emisionit dhe fashës orare në të cilën ai
transmetohej, periudhës kohore, kontekstit social, moderatorit me aftësitë e tij artikuluese dhe
aktoriale, etj... Askund nuk gjeta një përcaktim definitiv teorik për to. Me kalimin e kohës
kuptova se nuk kishte një të tillë, pasi programet talk show janë formate shumë fleksibël që
evoluojnë në kohë. Madje, edhe i njëjti emision përkufizohej në mënyra të ndryshme në periudha
të caktuara kohore, pasi kjo gjini karakterizohet nga tipari i përshtatshmërisë.
Studimi mbi talk show-n ishte një zgjedhje e dëshiruar prej meje dhe e mbështetur edhe
nga drejtuesi shkencor i punimit. Unë vija nga një eksperiencë pesëvjeçare si gazetar në median
vizive, punoja në një televizion satelitor kombëtar, si Vizion Plus, që ishte pjesë e objektit të
kërkimit, kisha kryer një studim shkencor në nivelin master mbi talk show-n Zonë e lirë dhe
njihja nga afër shumë prej drejtuesve të formateve të tilla. Kjo përvojë më krijonte mundësi të
kisha akses në dokumente dhe materiale arkivore rreth emisioneve në disa prej televizioneve,
marrjen e tarifave nga kompanitë e reklamave, sigurimin e një pjese të pasqyrës së të dhënave të
audiencës dhe intervistat e anketimet me moderatorët, autorët e kryeredaktorët e emisioneve talk
show.
Nga ana tjetër, ishte një sfidë profesionale, pasi duhet të përshtatesha me një kulturë dhe
metodë të re pune. Më duhej të kaloja nga natyra e gazetarit që menaxhon dhe filtron një fluks
të madh informacioni nën presionin e madh të kohës, në një gjendje krejt të re mendore dhe
organizimi të punës, siç e kërkon dhe imponon kërkimi i mirëfilltë shkencor; nevojitej të
përshtatesha nga një stil publicistik të shkruari, në një tjetër ku mbizotërojnë fjalitë protokollare,
faktike e statistikore; isha i detyruar të kaloja nga gjendjet emocionale që të ofrojnë
shumëllojshmëria e ngjarjeve që pasqyroheshin në ekran, në një përpjekje për të qenë krejtësisht
i distancuar emocionalisht nga objekti i analizës të cilën unë arrita ta realizoja falë ndihmës së
drejtuesit shkencor të kësaj teze doktorature.
Kërkimi dhe analiza e programeve talk show në Shqipëri ka kaluar disa vështirësi. E
para, ishte faza seleksionuese e emisioneve, për shkak të numrit të madh të formateve të tilla në
ekranet shqiptare. Duke u mbështetur në disa tipologji dhe karakteristika të talk show-ve, që i
kisha huazuar edhe nga literatura e huaj, unë zgjodha 31 prej tyre. Të gjitha dilemat dhe
vendimet e diskutueshme për këtë zgjedhje janë trajtuar në këtë punim.
Vështirësia e dytë lidhet me mungesën e literaturës dhe numrit të vogël të botimeve nga
autorë shqiptarë, por dhe mungesën e studimeve të huaja të përkthyera në shqip në këtë zhanër
televiziv. Ky fakt përbën një pengesë të madhe dhe për vetë drejtuesit e emisioneve talk show, të
cilët nuk kanë patur referenca teorike për programin e tyre, por janë frymëzuar vetëm vizualisht
nga formatet e huaja.
Problematika e tretë me të cilat jemi përballur ka të bëjë me mbledhjen e dokumenteve
dhe materialeve të cilat i takojnë anës financiare të emisioneve, informacioneve mbi pagat e
kontratat e deri te tarifat e reklamave, pasi ato konsiderohen nga ana e drejtuesve të
televizioneve si të dhëna të rezervuara pasi mund të cenojnë konkurrencën.
Vështirësia e katërt lidhet me të dhënat e audiencës që nuk botohen. Kompanitë e matjes
së shikueshmërisë i japin këto shërbime kundrejt pagesës, tarifat e të cilave konsiderohen të larta