120
-
Ay Suren, buralar nə yaxşı yerlərmiş! Sən ölməyəsən, bu çay, bu çəmən,
bu hündür qayalar elə bil mənə deyir: Hayk, əlini qoy qulağının dibinə, bir-iki ağız
oxu…
- Sən oxumaq da bilirsən?
- Elə oxuyaram ki, dağlar-dərələr cingildəyər, səsim çatar yeddinci göyə. –
O, gülüb əlavə elədi: - zarafat eləyirəm, sən deyən səsim yoxdur, amma oxumağı
sevirəm. İki şeydən xoşum gəlir: biri «Sarı gəlin», biri də «Qaçaq Nəbi».
- «Qaçaq Nəbi» mahnısını hardan bilirsən?
- Eşidib öyrənmişəm.
- Niyə sən elə bu iki oxumağı sevirsən?
Hayk bir az ona tərəf çəkilib dedi:
- Bilirsən niyə? «Qaçaq Nəbi»də Nəbinin, onun arvadı Həcərin qoçaqlığı,
igidliyi tərif olunur. Mən də qoçaq adamları sevirəm ki,
elə bilirəm, musurman
deyil, mənim doğma erməni qardaşımdır. Çünki o da erməni ilə musurman
arasında təfavüt qoymayıb, musurmanın kasıbını istədiyi kimi, erməninin də
kasıbını istəyib, onları bəylərin, meliklərin, ağaların zülmündən qoruyub. «Sarı
gəlin»də də məhəbbətdən, bir qızın bir çobanı necə ürəkdən sevdiyindən danışılır.
Qoçaqlıqla məhəbbət bir yerdə olanda, adam xoşbəxt olar… Bax, ay Suren, sən
qoçaq oğlansan, amma bir qızı sevməmisən. Ərə, gəlsənə sənə bir xırzirəkli qızı
alım?..
Suren köksünü ötürdü:
-
Mən evlənməyəcəyəm, Hayk.
- Niyə, subay qalacaqsan? Qoy hələ bir dünya düzəlsin, biz deyən olsun,
vallah, sənə bir toy eləyəcəyəm ki, dillərdə deyilsin.
- Mən hələ evlənmək fikrində deyiləm.
- Axı niyə? Kişi-zad deyilsən?!.
- Deyirlər, evlənənlər sonra peşman olurlar.
- Yalan sözdür. Mən evlənmişəm, Şuşanikdən də çox razıyam. İndiyə kimi
aramızda artıq-əksik söz olmayıb. Ərə, adam ki, evlənmədi, ata olmadı, yaşayışın
dadını bilməz… Vallah, o balaca oğlumu mən bütün dünyaya vermərəm…
-
Düz deyirsən, Hayk. Vaxt olar, mən də evlənərəm. Sən də mənim toyumda
olarsan toybəyi. O vaxt bir yaxşı oxuyarsan…
Axşamdan bəri, sanki onlarla bərabər yeriyən, indi isə başlarının üstündə
gülümsəyən ay, parlaq ulduzlar, bir-birini dəcəl uşaqlar kimi qovan dalğalar,
üzərində uzandıqları yumşaq çəmən, öz əzəmətini əsrlər
boyu saxlayan Qaraqaya
Surenə 1918-ci ilin bir yay axşamını xatırlatdı. O, biixtiyar dedi:
- Bilirsənmi, Hayk, bu yerlərdə mənim başıma nə işlər gəlib?..
- Deyərsən, bilərəm…
Suren üç şəkilinin onun necə qabağını kəsib, yaraladıqlarını danışdı.
Onlar bir qədər dincəldikdən sonra ayağa qalxıb yola çıxdılar.
Bazar çayı, gözəl çəmən Qaraqaya – hamısı arxada qaldı. Lakin, bu xoş
gecənin, aydın səmanın dilbəri olan ay, yollarına nur çiləyə-çiləyə onlarla bərabər
gedirdi.
Ağzı yola sallanmış dərənin yanından ötəndə Suren dedi:
- Bax, Sarıdərə budur. Məni onun sarı qumlarında basdırmışdılar…
121
Onlar Şamaxı yalını aşdılar, çaydan keçib bir qədər getdikdən sonra Şəkiyə
çatdılar; daşlı-kəsəkli küçə ilə yuxarı qalxmağa başladılar.
Suren Hayka uçuq
evləri, tövlələri, samanlıqları göstərib dedi:
- Bu xarabalıq da, iki xalqın arasına salınmış qanlı davanın nəticəsidir. Bax,
sağ tərəfdəki uçuq evi görürsənmi? Ora bizim Comərdgilin, atamın qardaşdan artıq
istədiyi dostu Nəbigilin evin idi. Mən pristav Karpovun əlindən qaçıb bu evdə
gizlənmişdim. Mən bu evdə çörək yemişəm, yaralı yatmışam. Bura mənə ata evi
kimi doğma idi. Bu müsəlman kəndində indi ermənilər olur.
Onlar çağırış vərəqələrindən bir neçəsini yatmış kəndin küçələrinə atdılar,
bir neçəsini divarlara yapışdırdılar, nəhayət Şəkidən çıxıb Əngələvid yoluna
düşdülər.
Deyirlər ki, torpaq adamı çəkər…
Gül-çiçək açmış öz köyşənlərinin ətrini hiss edən Suren get-gedə addımını
yeyinlədir və düşünürdü: «Ey
doğma kənd, doğma ölkə, doğma vətən, sizdən şirin,
sizdən əziz dünyada nə var!..»
- Ayağını bir az yeyin at, Hayk, bu döngəni burulanda, bizim kənd
görünəcək!
Onlar döngəni buruldular. Gecənin sərin və həzin
mehi üzlərinə vura-vura
kəndin qırağına çatdılar.
- Hayk, görəsən bizimkilər evdədilərmi? – deyə Suren dərindən köks dolu
nəfəs aldı. – Ürəyim yerində durmur…
- Tələsmə, bir azdan hamısını görəcəksən.
- Yox, hələ bizə getməyək. Əvvəlcə işimizi görək… Səhərə çox qalmayıb…
Onlar kəndin ortasına çatdılar, vərəqələrdən bir neçəsini məktəbin, kilsənin
divarlarına, evlərin qapılarına yapışdırdılar.
Surenlə Hayk, işlərini görüb qurtardıqdan sonra, heç kəsə rast gəlmədən
kəndin qırağındakı evə yaxınlaşdılar. Açıq darvazadan həyətə girdilər. Surenin
nəzərinə ilk çarpan alma ağacı oldu. Onunla əlaqədar olan xatirələr könlündə baş
qaldırdı. Bu tək ağacdan alma dərib Siranuşa verdiyi gün yadına düşdü…
Suren
ağaca tərəf getsə idi, onun susuzluqdan saralmış yarpaqları, bürüşmüş
almaları dil açıb deyərdi: «Qayıt burdan get, Suren! Sahibsiz həyətinizə baxma!
Bayquşlar ulayan evinizə girmə! Atanı, bacını daha axtarma! Dəli olub küçələrə
düşmüş ananı tap. Bəlkə, o yazıq səni görüb ağla, huşa gələ!..»
Gözlənilmədən qarşısında açılan mənzərə Surenin qəlbini qana döndərdi…
Onlar xarabaya bənzər evdən-həyətdən çıxıb darvazanın yanında dayandılar.
«Atamgil hara köçüb? Nə vaxt köçüb?» - deyə fikirləşən Surenin ürəyinin
başına sanki Ağrı dağı çökdü. O, bu ağır qəm yükünün altında necə gedəcəyini,
hara gedəcəyini bilmədi. «Bəlkə heç biri də sağ deyil? Hər halda Saak dayıdan
doğru məlumat ala bilərəm!..
Bilmirəm, onun da başında nə iş varsa, çoxdandır
gəlib bizi tapmır, bəlkə, onu təzədən həbs etdilər?»
Haykla Suren Saakgilə getdilər. Evdə heç kəsi görmədiklərindən geri
döndülər.
Suren indi də Arzogilə getməyi qərara aldı, çünki Arzo kişi onların çox
mehriban və yaxın qonşuları idi.