125
Siranuş qeyri-ixtiyari olaraq geri çəkildi. Başı fırlandığından, tez yerə oturub
ürəyini tutdu…
- Yaxşı qız nişanlısına vəfalı olmalıdır. Yəqin ki, bu gün, sabah toyunuz
olacaq. Əlbəttə, Baqrat ağanın qızı general-nahankapetə getməmiş, kimə
gedəcəkdi…
- Mən ona getməyəcəyəm. Məni zorla nişanlayıblar… O, mənim gözümdə
itdən də pisdir.
- Elə yaxşı qız itin-qurdun payı olur…
- Suren, yalvarıram, mənə yazığın gəlsin! Məni xəncərsiz, bıçaqsız öldürmə!
Mənə yol göstər.
- Nə yol?
- Mən daha atam evində qalmaq istəmirəm.
- Tez ərə get…
- Apar məni. Elə bu saat apar! Mən bilirəm ki, sənin nə evin var, nə pulun.
Qəlbin, məhəbbətin mənə bəsdir. Mən səninlə çöldə, kahada, kol dibində
yaşayaram… Qurtar məni əzabdan, Suren! Dur gedək, hara istəyirsən gedək!
Atam, anam yaylaqdadır. Samvel evdə yatıb. Mənim səninlə qaçmağıma indi fürsət
var. Gedim evdən paltarlarımı götürüm. Dillən, Suren, gedimmi?
Surenin dillənmədiyini görərək, Siranuş hönkürdü…
- Sakit ol, Siranuş! Axı, mən səni hara aparım? Özün bilirsən ki, mən köçəri
kimi bir şeyəm…
- Onda mənim günahım nədir? Mən nə eləyim?
- Mən ailəmə zülm eləyənlərdən qisas almayınca, sənə bir söz deyə
bilmərəm, Siranuş, qəlbim ancaq bu hiss ilə doludur. Dur get, qardaşın səni
axtarar…
Suren intiqam alacağı adamların adını çəkmədisə də, Siranuş yəqin etdi ki,
o, Baqratdan, Samveldən və Karodan intiqam alacaq. Armenakın, Anahidin
ölümünü, Araksinin dəli olduğunu bildiyinə də onda şübhə qalmadı.
Siranuş yanaqlarını od kimi yandıran göz yaşlarını silib dedi:
- Qisas alandan sonra, deyirsən, hə? Mən də sənə kömək eləyəcəyəm. Özü
də mərd-mərdana!
Suren Siranuşun dolmuş gözlərinə təəccüblə baxdı…
Baxışları bir-birini maqnit kimi çəkdi. Deyəsən, ürəkləri də bir-birinə
yaxınlaşırdı… Siranuşun şəvə təkin qara gözlərindəki qəm buludunu, uzun
kirpiklərinə düzülmüş ağ inciləri görməmək üçün Suren üzünü yana çevirib dedi:
- Siranuş, dur get!
- Mən səninlə gedəcəyəm! Qisas deyirsən, alım!
- Sənin kimilər heç kəsə əl qaldıra bilməz… - Suren yenə Siranuşa tərəf
çöndü.
- Eləmi bilirsən?!. Yaxşı, heç yerə getmə, öz gözlərinlə gör! – Siranuş ayağa
qalxdı. – Mən atamın yurdunu bu saat yandırıb, kül eləyəcəyəm!..
- Nə eləyəcəksən? Yandıracaqsan?
- Bəli, sənin qisasını mən alacağam. Razısanmı?
Suren ona cavab verməyib, fikrə getdi. «Siranuşu incitməkdə mən insafsız
hərəkət eləmirəmmi? Doğrudan da onun nə günahı var? Mənim kimi yoxsul,
126
yurdsuz-yuvasız bir oğlanı sevən qızın etibarına inanmamaq olarmı? Atasının
cinayətlərinə omu cavab verməlidir?..»
Surenin gah çatılıb, gah açılan qaşlarına, fikirli sifətinə baxan Siranuş
mülayim bir səslə dedi:
- Sağ ol, Suren! Daha gedirəm!..
Suren qızın kədər dolu gözlərinə baxdı.
- Siranuş, sənin məhəbbətini daşa vurmaq istəmirəm. Mənim sinəmdəki də
daş deyil. Elə güman eləmə ki, səni sevmirəm… Ancaq özün mənim vəziyyətimi
bilirsən… İndi səni heç yerə apara bilmərəm. Hələlik gözlə. Güman edirəm ki,
məhəbbətimizi birləşdirəcək vaxt, dövran gələcəkdir… Bir də, Siranuş, sən
nişanlısan… Mən səni indi aparsam…
Siranuş onun sözünü kəsdi:
- Mən nişanı pozacağam, arxayın ol! Könülsüz tikəni zorla yeməyəcəyəm.
Neçə vaxt deyirsən, yenə səni gözləyim.
- Neçə vaxt? Onu deyə bilmərəm.
- Neynək, on il də olsa, səni gözləyəcəyəm. Ancaq yerini məndən gizlətmə,
nigaran oluram…
- Hələlik Xınzirəkdə, Hayk Aslanyangildə olacağam. Ancaq bunu səndən
başqa heç kəs bilməsin. – Suren yerindən qalxdı.
- Arxayın ol. Sən də məni gözlə! Yüz canım da olsa, sənin eşqinə qurban
verəcəyəm…
Təzədən əhd-peyman bağlayan iki sevgili bir-birinə yaxınlaşdığı zaman,
Arzo ilə Hayk içəri girdi.
Siranuş sevgilisinin gözlərinə baxıb içəridən çıxdı.
- Ərə, Suren, qızın xətrinə dəymədin ki? – deyə Arzo gülümsədi. – O, səni
də, ananı da çox istəyir. Vallah, elə bil Baqratın övladı deyil. Belə təmiz, belə
mehriban qız mahalda yoxdur…
- Bəli, pis qız deyil, Arzo dayı. Biz bu saat yola düşürük. İşdir, atamgildən
bir xəbər bilsən, çox xahiş eləyirəm, mənə çatdırasan. Mən Xınzirəkdə, bu
Haykgildə olacağam.
Suren ailəsini axtarmaq üçün dağa-daşa düşməsin deyə, Arzo hər şeyi ona
xəbər vermək qərarına gəldi. Lakin o, ağzını açmamış bayırdan səs eşidildi:
Saraldı gülüm,
Uçdu
bülbülüm,
Mən niyə qaldım?
Hardasan,
ölüm?!.
- Deyəsən axı, bu mənim anamın səsidir? – deyə rəngi ağarmış Suren
təəccüblə Arzoya baxdı.
Özünü itirmiş Arzo nə cavab verəcəyini bilmədi. Bu an qapı birdən şaqqıltı
ilə açıldı. Araksi içəri girdi.
- Ana! Anacan! – deyə Suren yerindən sıçradı.
Araksi qəhqəhə çəkib, çiyinlərini ata-ata geri çəkildi.
127
Suren anasının kor olmuş gözünə, yana əyilmiş alt dodağına, kilkələnmiş
saçlarına, yalın ayağına, cırıq paltarına baxıb qışqırdı:
- Səni kim bu günə salıb, ana?! Məni tanımırsanmı, ana? – Suren onu tutub
boynunu qucaqladı.
- Can oğul!..
Araksi huşunu itirdi, səndələyib yıxılarkən, Suren onu qucaqlayıb yerə
uzatdı.
Bir deyin, bu fəlakətə ağlamamaq olardımı?! Axı Surenin sinəsindəki daş
deyildi, oğul ürəyi idi!.. Onun göz yaşları pır-pır axmağa başladı.
Arzo Armenakla Anahidin öldürüldüyünü, Araksinin başına gələn müsibəti,
Siranuşun bu evə nə üçün gəlib-getdiyini Surenə danışdı.
Suren sarsıntılar içində, elə bil yenidən, heç kəsin məğlub eləyə bilməyəcəyi
bir qüvvətə gəldi. Onun qəlbində qanlı hökmranlığa, daşnak zülmünə qarşı intiqam
hissi yüz qat artdı.
- Arzo dayı, dur, məni qəbiristana apar. Atamın, bacımın son borcunu
vermək üçün baş daşlarını qucaqlayıb öpəcəyəm. Mən onların qəbri üstündə
qatillərdən intiqam almağa bir daha and içmək istəyirəm.
- Bu gecə vaxtı hara getmək olar, oğul, qoy sabaha qalsın.
Evi bir neçə dəqiqə kədərli bir sükut bürüdü.
Suren gözünü anasının meyit rəngi almış sifətindən çəkib dedi:
- Dur gedək, Hayk!
Hayk yerindən qalxdı.
- Araksini…
Suren Arzonun sözünü kəsib:
- Mən anamı burda qoya bilmərəm, - dedi, - onu çiyinlərimdə aparacağam.
Araksini qaldırmaq istəyəndə ayıldı, dartınıb oğlunun əlindən buraxılmaq,
qaçmaq istədi. Ancaq Surenlə Hayk onun qolundan bərk-bərk yapışıb bayıra
çıxartdılar.
Arzo onları kənddən xeyli uzaqlaşana kimi ötürüb qayıtdı.
…Surengil poçt yolunun üst tərəfilə, daşların, tikanların arasıyla gedirdilər.
Araksi onları bərk incidirdi. Gah dartınır, gah dayanır, gah yerə oturub qalxmaq
istəmirdi.
Gecədən xeyli keçmiş onlar Şəki köyşənlərinə çatdılar. Surenlə Haykın üz-
gözündən tər axırdı. Dinclərini almaq üçün Araksini bir güc-bəla ilə yerə oturdub
özləri də oturdular.
Araksi nədənsə titrəyirdi. Suren isti yay gecəsində dişi-dişinə dəyən anasını
qızdırmaq üçün qolunu onun çiynindən aşırıb qucaqladı. Araksi başını oğlunun
köksünə qoydu. Sakit dəqiqələr ötüb keçdi… Araksinin huşu, ağlı başında olsaydı,
bəlkə də deyərdi: «Ey zalım insanlar, daha mənə dəyməyin! Mən öz oğlumun
qucağında nəfəs almaq, yaşamaq, çox yaşamaq istəyirəm…».
Araksi birdən kəskin hərəkətlə başını Surenin köksündən götürdü. Tək
gözünü, uzaqlarda görünən zəif işıqlı tək ulduz kimi, onun üzünə dikdi, oğluna nə
isə demək, kimdənsə şikayət etmək istəyirmiş kimi, xeyli baxdı…
Araksi qəfil yerindən qalxıb, qaçmağa başladı.
- Ana! Qaçma, ana! – deyə Suren də onun dalınca yüyürdü…
Dostları ilə paylaş: |