130
- Tüfəngin, patronun yerini mən bilirəm. – Oturanların
onun üzünə bir növ
şübhə ilə baxdıqlarını görən Hayk azacıq tutuldu. – Yoxsa, mənə inanmırsınız? Elə
bilirsiniz zarafat eləyirəm? Daşnakların silah anbarı bizim Xınzirəkdə də var.
Manuçar Sarumovun zirzəmisi silah anbarıdır. Bilirsiniz hansı Manuçarı deyirəm?
Milli Şuranın üzvü Manuçarı. Onun nökəri ilə dostam. O, mənə deyirdi: «Bizim
zirzəmimizdə tüfəng-patron saxlayırlar. Heç kəs bilmir. Gecələr anbarın qapısında
qarovulçu durur». İstəyirsiniz bir şey eləyək. Mən, Suren, bir də təzə tanış
olduğum bu Qiyas yoldaş gecə ikən gedək, qarovulçunu öldürək, anbarı yarıb,
istədiyiniz qədər tüfəng, patron götürək…
Vahan:
- Silah əldə etmək lazımdır, - dedi. – Ancaq… Nə isə, bu barədə
fikirləşərik… Mən sizə başqa bir məsələ haqqında da danışmaq istəyirəm.
Ermənistanın bəzi yerlərində kəndlilər mülkədar torpaqlarını zorla tutub, öz
aralarında bölür və əkirlər. Doğrudur, buna
daşnak hökuməti yol vermir, kəndliləri
həbs edir, öldürür… Ancaq belə bir vəziyyətin yaranması öz-özlüyündə kəndlilərin
azadlıq və gözəl yaşayış uğrunda mübarizəyə ciddi girişdiklərini göstərir. Belə
hallar Zəngəzurda da ola bilər. Bizim vəzifəmiz kəndlilərin başladıqları
mübarizəyə kömək eləmək və istiqamət verməkdir. Ola bilsin ki, bu yaxınlarda,
Xınzirəkdə də bir hadisə baş versin. Açıq deyim ki, mənim bu barədə məlumatım
vardır, yoxsullar mülkədar Manuçar Sarumovun yerini zorla əkmək istəyirlər. Biz
belə kəndliləri müdafiə eləsək, onlar bizim mübarizəmizə qoşularlar.
…Onlar, daşnak hərbi hissələri arasında təbliğat işi aparmaq haqda,
əsgərlərin öz zabitlərinə qarşı çıxması üçün nə kimi iş görmək lazım
olduğu barədə
də danışdılar.
Nəhayət, onlar nə vaxt və harada görüşəcəkləri barədə şərtləşdilər.
Söhbət gecə yarısına kimi çəkdi.
Comərd, Şahmərdan və Qiyas getmək üçün ayağa qalxdı.
Surenlə Hayk onları kənddən çıxardıb, xeyli ötürdülər…
Üç yoldaş yol ilə söhbət eləyə-eləyə gedirdi. Onlar məişət, ailə
məsələlərindən danışırdılar.
Bakıdan beş-altı gün bundan əvvəl gəlmiş Comərd qardaşı uşaqları ilə və
Rüstəmlə görüşmüşdü. O, qardaşının ölümünə çox kədərlənmiş, ürəkdən yanmışdı,
Növrəstənin başına gələnlər isə onda qəzəb oyatmışdı.
Comərd ağıllı düşünən bir adam kimi, Növrəstəyə hirslənməmiş, onu əsassız
yerə günahkarlandırmamışdı. Şahmərdanı da onunla barışmağa məcbur
eləməmişdi. O, inanırdı ki, Şahmərdan gec-tez bu
fəlakətin əsl səbəbini özü
anlayacaq. Başa düşəcək ki, Növrəstənin və onun kimi minlərlə namuslu qadınların
ismətinin ayaqlar altına düşməsinə səbəb zəmanədir.
Şahmərdan isə həmişəki kimi, Comərdə böyük bir yoldaş, bir əməldaş kimi
hörmət edirdi. Ailə incikliyi onların ideya və məqsədləri arasında uçurum yarada
bilməmişdi. Çünki onların
möhkəm dostluğu, səmimi yoldaşlığı bir yerli ya qohum
olduqlarından deyil, böyük arzular, məqsədlər və mübarizələr əsasında yaranmışdı.
…Onlar Azərbaycan sərhədinə çatmışdılar. Kiçik bir enişdən aşağı
sallananda, qarşıda kola bənzər bir şey gördülər. Lakin, ona heç bir əhəmiyyət
131
vermədən yollarına davam etdilər. Kol zənn etdikləri qaraltı tərpəndi. Comərdgil
onun yeridiyini gördülər.
Qiyas:
- Comərd qağa, ora bax, düz bizə tərəf gəlir… - dedi. – Dayanaq, bəlkə
daşnaklar Xınzirəkdə olduğumuzu biliblər, qabağımızı kəsmək
üçün irəliyə adam
göndəriblər…
- Ola bilər! – deyə Comərd dayandı.
Şahmərdanla Qiyas da ayaq saxladı. Naməlum adam tez özünü yolun
üstündəki ağacların dalına verdi.
- Əşi, bəri gəlin gedək, hər kimdir, bizə nə var! – deyə Şahmərdan
addımladı.
- Dayan bir! – deyə Comərd onun qolundan yapışdı. – O kimdirsə, şübhəli
adamdır… Düz adam yoldan çıxmaz.
- İndi ki, belədir, mən bu saat onu tutacağam! – deyə Şahmərdan tapançanı
pencəyinin qoltuq cibindən çıxartdı,
adama tərəf getmək istəyəndə, Comərd onu
qoymadı.
- Hara gedirsən? Yoldan kənara çıxmaq lazımdır. Dalımca gəlin!
Onlar yoldan çıxıb, ağacların arasıyla bir qədər geriyə qayıtdılar, sonra yerə
oturub, gözlərini naməlum adamın gizləndiyi yerə zillədilər. Xeyli gözlədilər, lakin
hər yer qaranlıq içərisindəydi, kimsə görünmürdü.
Üç yoldaş, o tək adamın başqa tərəfdən çıxıb getdiyini zənn edərək yola
çıxanda, onu qarşılarında gördülər.
Şahmərdan qaranlıqda üzünü seçə bilmədiyi adamdan ermənicə soruşdu:
- A kişi, kimsən? Hara gedirsən?
Ölü kimi hərəkətsiz dayanmış adam ermənicə bilmədiyindənmi, ya
nədənsə
cavab vermədi. Lakin birdən sanki cana gəlib, iti hərəkətlə əlini belinə atdı.
Onun məqsədini başa düşmüş Qiyas tez onun biləyindən yapışıb:
- Əlini belinə atma! – dedi və onun qollarını arxada çarpazlayıb saxladı.
Şahmərdan yenə ermənicə soruşdu:
- Adın nədir? Hansı kənddənsən?
Tək adamdan cavab çıxmadı.
Şahmərdan tapançasını onun sinəsinə dayayıb soruşdu:
- Ərə, hayes, turkes?
1
O, bu dəfə də dillənmədi.
Comərd həmin adamın özünü karlığa, lallığa vurduğunu başa düşdü. Onun
«kar» qulağını, «lal» dilini açmaq üçün qəsdən dedi:
- Bu heç düz-əməlli adama oxşamır. Çəkin dərəyə! Beyninə bir güllə vurun.
Qorxu «lalın» dilini o saat açdı:
- Bıy, sizi pir olasınız! Mən ki, öz müsəlmanlarıma rast gəlmişəm! Vallah,
elə bildim ki, ermənisiniz, özü də daşnaksınız. Yəni, erməninin lap pisindən…
- Kimsən, a kişi? Adın nədir? – Şahmərdan tapançanın lüləsini onun
sinəsindən geri çəkdi.
- Hardan gəlib, hara gedirsən?
1
Ə, ermənisən, müsəlmansan?