5
vəhdət təşkil edir. Qara Qarayev Azərbaycanın qədim musiqisi
ilə Qərbi Avropa və rus klassik musiqisinin ən yaxşı
nümunələrini birləşdirərək yaradıcılıq üfüqünü çox cəsarətlə
genişləndirdi. Onun novatorluğunu bütün dünya qəbul edirdi.
Q. Qarayevin musiqisi onun həyatının – sənətkar həyatının,
parlaq, dolğun və istedadlı insan həyatının dəqiq inikası idi.
Müasir bəstəkarlıq məktəbinin layiqli başçısı olan Q.Qarayev öz
ideyalarını, fikirlərini, elmə, incəsənətə baxışlarını səxavətlə
başqaları ilə hər zaman bölüşmüşdür.
Dövrdən, zamandan,
quruluşdan asılı olmayaraq bəstəkarın dərin məna çalarları ilə
zəngin əsərləri hər zaman bəşərə, estetik və mənəvi tərbiyəyə,
əxlaqa, inama, etibara, ülvi hiss və sevgiyə, nəzakətə,
mehribanlığa, vətənə, doğma torpağına, təbiətə və cəmiyyətə
dəyərli ismarıc bir vasitə olmuşdur desəm, yəqin ki, yanılmaram.
Qara Qarayevin musiqisi bəşəri ideyalarla elə zəngindir ki,
tükənmək bilməyən bədii fantaziyası ecazkar bir aləm yaradıb.
Q.Qarayevin bədii təfəkküründən süzülən hər bir musiqi
əsəri təsirli, düşündürücü fikir və ideyalarla zəngindir.
Bu
il görkəmli Azərbaycan bəstəkarı Qara Qarayevin 100 yaşı
tamam olur. Bu münasibətlə F.Köçərli adına Respublika Uşaq
Kitabxanasının Elmi Metodika şöbəsi olaraq bu vəsaiti yazmağı
özümüzə borc bildik. Vəsait iki hissədən ibarətdir. I hissədə
Q.Qarayevin həyat və yaradıcılığından söhbət açılır. II hissədə
isə kitabxanaçılara metodik köməklik məqsədilə Q.Qarayevin
yubileyi ilə bağlı keçiriləcək tədbirlərin planı verilmişdir.
6
Qara Qarayevin ölməz irsi
Azərbaycan xalqının mədəniyyət salnaməsini yaradan böyük
şəxsiyyətlər arasında musiqiçilər həmişə şərəfli yer tutmuşlar.
XX əsr bu baxımdan Azərbaycan incəsənəti üçün sözün əsl
mənasında qızıl əsrdir. Dahi Ü. Hacıbəyov ilə yanaşı, bu əsrin
tarixi səhifələri böyük bəstəkar, pedaqoq, musiqi-ictimai xadimi
Q. Qarayevin adı ilə bağlıdır. Q. Qarayev musiqisi əsrin
yaddaşına təkcə Azərbaycan hüdudlarında deyil, ümumbəşəri
əhəmiyyətə malik xəzinə kimi daxil olmuşdur. Bəli, Q. Qarayev
dünya musiqi mədəniyyətinin nadir simalarındandır. Onun dərin
məzmunlu, zəngin, milli gerçəklik hüdüdlarından kənara çıxan,
böyük ümumiləşdirmə qüvvəsinə malik musiqisi XX əsr
ümumbəşər mədəniyyətinin ən nadir səhifələrindən biri kimi
əhəmiyyətlidir. Bəstəkar özündən əvvəl gələn sənətkarların
yaradıcılıq irsinə yeni baxışla yanaşmış, incəsənətdə öz yolunu
tapmağa nail olmuşdur. Bəstəkarın "Leyli və Məcnun" simfonik
poeması, "Yeddi gözəl" və "İldırımlı yollarla" baletləri, "Don
Kixot" simfonik qravürləri, III simfoniyası, skripka və orkestr
üçün əsərləri musiqi salnaməsinin ən qiymətli səhifələridir.
Q.Qarayevin həyata müasir baxışı, həyat həqiqətlərini əsl
vətəndaş mövqeyindən tərənnüm etmək, ona müdaxilə etmək
bacarığı, milli motivlərə müasir münasibət, onun sənət qayəsinə
xas olan əsas cəhətlərdir. Elə buna görə də maestro Niyazi Qara
Qarayev musiqisini "ürəkdən od qoparan sirli bir dünya"
adlandırmışdır. Q. Qarayev milli musiqimizə yeni məzmunla
yanaşı müasir ifadə vasitələri, yeni janrlar gətirmişdir. Bəstəkar
həm klassikaya arxalanır, həm də klassik ənənələri daxilən
dinamik şəkildə dəyişdirir, müasir məzmuna tabe edir. Məsələn,
E. Rostanın "Sirano de Berjerak" komediyasının motivləri
əsasında "Çılğın qaskoniyalı" müziklində müasir estrada
musiqisinin səciyyəvi xüsusiyyətləri intibah dövrünün üslubu ilə
uzlaşdırılır, II simfoniyada İ. S. Bax yaradıcılığının dəsti-xətti,
simli kvartetdə V. A. Motsartın, baletlərin dramaturji
7
kompozisiyasında P.İ.Çaykovsiki və S.Prokofyevin, orkestr
çalarlarında isə impressionizmin təsiri duyulur. Bəstəkarın
yaradıcılığında diqqəti cəlb edən daha bir cəhət onun başqa
xalqların musiqi və mədəniyyətinə böyük marağıdır. Bu maraq
onun vətəndaşlıq pozisiyası, onun bir sənətkar kimi dünyada baş
verən hər bir hadisəyə öz münasibətini bildirmək məsuliyyəti ilə
bağlı meydana gələn bir maraq idi. Bu cəhətdən onun "Vyetnam
suitası", "Alban rapsodiyası", "İldırımlı yollarla" baleti, "Don
Kixot" qravürləri diqqəti cəlb edir.
Qara Əbülfəz oğlu Qarayev 1918-ci ildə Bakıda həkim
ailəsində anadan olmuşdur. O, ilk musiqi təhsilini musiqi
məktəbində Kozlovun başçılığı altında alır, 30-cu ildə isə Bakı
musiqi texnikumunda yüksək professional keyfiyyətlərə malik
müəllim Şaroyevin sinfində təhsilini davam etdirir. Bəstəkarlığa
olan meyil onu Konservatoriyaya gətirib çıxarır. Hələ tələbə
ikən o, öz qələmini simfonik və kamera əsərlərində sınayır.
1937-ci ildə onun "Tsarskoye selo heykəli" fortepiano əsəri,
orkestr üçün yazılmış "Nəğmələr" əsəri meydana gəlir. Bəstəkar
1939-cu ildə Moskva Dövlət Konservatoriyasına daxil olur.
Burada təhsil illərində Cövdət Hacıyevlə birgə "Vətən" operası
üzərində işləyir. Bu dövrdə yazdığı əsərlər artıq onun fitri
istedada malik olduğunu nümayiş etdirir. Bu, “Fortepiano
üçün üçsəsli fuqa” " (1939), simfonik orkestr üçün "Passakaliya
və üçmövzulu fuqa" (1941), nəfəsli alətlər üçün "İdman" süitası
(1938), "Ömər Xəyyamın sözlərinə 6 rübai" (1946) romanslar
məcmuəsi idi. 1943-cü ildə bəstəkar 2 hissədən ibarət olan
si-minor simfoniyasını başa çatdırır. Bu əsər S. Hacıbəyov və
C. Hacıyevin simfoniyaları ilə yanaşı milli simfonizmin
yaranmasına zəmin yaradır. 1946-cı ildə bəstkar Do-major
tonallıqlı II simfoniyasını başa çatdırır. 5 hissədən ibarət olan
bu əsərdə Böyük vətən müharibəsinin qurtarması ilə əlaqədar
olaraq, insanların keçirdiyi həyacan hissi təsvir olunmuşdur.
1947-ci ildə Nizami Gəncəvinin anadan olmasının 800 illiyi ilə
əlaqədar Q.Qarayev "Leyli və Məcnun" simfonik poemasını
Dostları ilə paylaş: |