18
Qara Qarayev məktəbi onun həyatının davamıdır
Qara Qarayev dahi bəstəkar və dahi müəllim idi. Çünki
müəllimlik də bir vergidir. Dərs demək üçün istək azdır, bunu
bacarmaq lazımdır. Q.Qarayevin müəllim kimi ən başlıca
xüsusiyyəti ondan ibarət idi ki, onun sinfində oxuyan tələbələrin
mənliyini, şəxsiyyətini aça bilirdi. Buna görə də onun
tələbələrindən hər biri yolunu tapıb. Q.Qarayev müəllimliyi
sevirdi. Onun həmişə böyük sinfi olub. Maraqlı idi ki,
Q.Qarayevin dərslərində tələbələr ancaq ixtisasla məşğul
olmurdu. Burada ədəbiyyat haqqında, musiqidən kənar
mövzularda söhbətlər gedirdi. Bunlar hamısı tələbənin şəxsiyyət
kimi yetişməsində böyük rol oynayırdı. Q.Qarayevin dərsləri
haqqında böyük bir kitab yazmaq olar. Onun nə qədər tələbələri
olub. Bəstəkarlıq belədir ki, müəllimlə tələbənin ünsiyyəti
yaranmalıdır. Q.Qarayevin sinfində tələbələr istedadına görə
fərqlənirdilər. Onların yaş fərqi də müxtəlif idi. Q.Qarayev hər
tələbə ilə müxtəlif üslubda, tələbənin qabiliyyətinə uyğun
məşğul olur, yol göstərirdi. Tələbələr Qara müəllimin sinfində
zövq barəsində böyük inkişaf keçirdilər. Q.Qarayev həmişə
özünə tələbkar və tənqidi yanaşırdı. Onun bir tələbəsini
digəri ilə müqayisə etmək olmur. O çalışırdı ki, hər tələbənin
daxili imkanlarını üzə çıxarsın və buna nail olurdu. Bu
da onun müdrikliyindən, uzaqgörənliyindən irəli gəlirdi.
Q. Qarayev həm də gözəl pedaqoq idi. O, 35 illik müəllimlik
fəaliyyəti dövründə (Azərbaycan Dövlət Konservatoriyasında)
70 nəfərə yaxın professional, indi adları dünyanın hər tərəfindən
eşidilən bəstəkarlar nəsli yetişdirmişdir. R.Hacıyev, F.Əlizadə,
A.Məlikov, H.Xanməmmədov, V.Adıgözəlov, X.Mirzəzadə,
O.Zülfüqarov, T.Bakıxanov və başqaları məhz Q.Qarayevin
yetirmələridir.
19
Qara Qarayev şagirdlərinin dilindən
Rauf Hacıyev: Azərbaycan bəstəkarlıq məktəbinin inkişaf
prosesi bu insanın adı ilə sıx bağlıdır. Şagirdinə yüksək mənəvi
dəyərlər aşılamaq Q.Qarayev üçün əsərlərimizin üstünlüklərini
və çatışmazlıqlarını nəzərimizə çatdırmaq qədər əhəmiyyətli
idi.
Vasif
Adıgözəlov: Gözəlliyi
duyub-anlamaq,
həyatın
təzadlarını biri-birindən ayırmaq və bunları öz yaradıcılığımda
əks etdirmək bacarığını mən müəllimim Qara Qarayevdən
öyrənmişəm. Sənətə olan məhəbbət mənə ondan yadigar qalıb.
Xəyyam Mirzəzadə: Q. Qarayevlə hətta ən gözlənilməz görüş
Ustadın eyni sualı ilə başa çatardı: “Nə zaman əsər
göstərəcəksən?” Və hər bir əsərə baxış və araşdırma hər
birimizin taleyində son dərəcə maraqlı Böyük İnsan və Böyük
Ustadın olduqca dəyərli tövsiyələri ilə başa çatan yeni, daha
məsul bir imtahan kimi yozulurdu.
Məmməd Quliyev: Qara Qarayev olmasaydı, mənim
bəstəkarlığım, yəqin ki, şübhə altındaydı. Mən sənətimlə,
deməli, varlığımla ona borcluyam. Qara Qarayevlə bir neçə
saatlıq söhbət etmək aylarla cürbəcür elmlərə aid kitablar
oxumaqdan daha üstündür.
Afaq Cəfərova: Lap başlanğıcdan Qara Qarayev yeni şagirdləri
ilə ayrı-ayrı bəstəkarlıq məktəblərinin özəl cəhətləri kimi dil –
üslub və quruluş, yazı texnikası, ifadə yolları, eləcə də musiqiçi
zövqünün və bədii duyumun yetkinləşməsi məsələlərini
nəzərdən keçirməyi lazım bilirdi.
20
Sevda İbrahimova: Qara Qarayevin misilsiz dərsləri... Onun
bütün tələbələrə doğmalığı, ata qədər əzizliyi unudulmazdır.
Yazdığın əsəri bəyənirdisə, sən göylərə uçmaq istəyirdin.
Nərgiz Çəfiyeva: Böyük müəllimimiz Q.Qarayev qəlbinin
müdrik ziyası, qüdrətli sənətkar sözünün güclü məntiqi ilə biz
şagirdlərin düşüncələrini daim kamillik Yüksək Sənət anlamına
çatdırmağa qadir olmuşdur.
İsmayıl Hacıbəyov: Q. Qarayev bizi texniki ixtiraçılığa
həvəsləndirərək, hər bir səs xəttinin, hər bir notun tutarlı
lazımlılığı ilə şərtlənən musiqidə məntiqlə düşünməyi öyrədirdi.
Çünki yalnız sənətin bütün incəliklərinə yiyələnmiş sənətkar,
Böyük Sadəlik məqamına yetişə bilər ki, həmin məqamda
musiqi təbiətin gerçək olayı kimi yozulur.
Firəngiz Əlizadə: Qara Qarayevin dərsləri arasında oxşarını
tapmazdın. Yalnız bircəciyi təkrarlanırdı: düz vaxtında, qəti
addımlarla, alnıaçıq sinifə girən Ustad hamı ilə əl tutub
görüşərdi. Görüşdükləri bu “hamı” isə sayca az deyildi: hazırkı
və keçmiş tələbələri, qonaqlar və sadəcə maraqlananlar. Öz qısa
salamlaması ilə o, hər bir kəsə bir növ sual verərək sinifdə baş
verənlər barədə öncədən bilgi alardı ki, həmin alınan bilgilər
dərsin gedişində öz əksini tapırdı.
Azad Zahid: Qara Qarayev həyatımda ən işıqlı xatirədir. O,
özünəməxsus bir yol seçmiş, mənsub olduğu xalqın musiqi
mədəniyyəti əsasında yeni söz deyə bilmiş, novator bir bəstəkar
kimi sənətkarlığın yeni pilləsinə qalxa bilmişdir.
Dostları ilə paylaş: |