- 75 -
nümunələrindən biridir) və onlar arasındakı ziddiyyəti aradan
qaldırmağa çalışmışdır.
1
İran tədqiqatçısı Mehdi Əminrazavinin yazdığına görə
Fərabi «məntiqdə, etikada, metafizikada aristotelin baxışlarını
müdafiə etmiş, sosial problemlərin həllində isə Platonun
ideyalarına üstünlük vermişdir».
2
Əlbəttə, bu fikir ilə tam ra-
zılaşmaq olmaz; belə ki, metafizika məsələlərində Fərabi heç də
sadəcə bir aristotelçi kimi çıxış etməyərək, həm də Platondan,
xüsusən, onun ideyalar təlimindən, habelə islam dün-
yagörüşündən qaynaqlanmışdır. Bununla belə, Fərabi
sosiologiyasının Platon təlimi ilə bağlılığı mübahisə doğurmur.
«Adil şah», ədalətli cəmiyyət, «xoşbəxtlər ölkəsi» ideyasında
Nizami Gəncəvi çox ehtimal ki, Fərabidən götürmüşdür. Əl-
Fərabi Platonun «dövləti filosoflar idarə etməlidir» fikrini
inkişaf etdirərək dərin fəlsəfi biliklərə yiyələnməyi və hətta
peyğəmbərlik missiyasını adil hökmdar olmağın şərtlərindən
biri kimi göstərmişdir. O, cəmiyyətin özünün də ədalət prinsipi
ilə qurulması ideyasını müdafiə etmiş və bu baxımdan
şəhərlərin (ölkələrin) təsnifatını vermişdir.
Fərabinin Platon fəlsəfəsinə münasibəti həmişə tədqiqat-
çıların diqqət mərkəzində olmuşdur. Sovet fəlsəfi fikrində də bu
problem diqqətdən kənarda qalmamışdır. G.B.Şaymuxambetova
özünün ərəb dilli fəlsəfəyə həsr etdiyi kitabının bir bölməsini
məhz bu məsələyə həsr etmişdir.
3
Gülşad xanımın fikrinə görə,
Fərabinin şərhi digər platonşünasların şərhindən xeyli dərəcədə
fərqlidir. Məsələn, Platon təliminin monist, yoxsa dualist olması
haqqında mübahisələrə rəğmən Fərabi Platon antologiyasını
panteizm müstəvisində nəzərdən keçirir.
4
1
Farabi. Eflatun ile Aristotelesin Görüşlerinin Uzlaştırılması. –
Mahmut Kaya. İslam filozoflarından felsefe metinleri. İstanbul, 2003,
s. 151-214. Yaxud: Аль-Фараби. Об общности взглядов двух
философов – Божественного Платона и Аристотеля. – Фило-
софские трактаты, Алма-Ата, 1970, стр. 39-105.
2
Мехти Аминразави. Ал-Фараби. – Великие мыслители Вос-
тока. М. Крон-пресс. 1998, стр.568.
3
Г.Б.Шаймухамбетова. Арабоязычная философия средне-
вековья и классическая традиция. М., «Наука», 1979. стр. 52-98.
4
Yenə orada, səh. 97.
- 76 -
Fərabinin şərhində Aristotel daha aydın və anlaşıqlı ol-
duğu kimi, Platon da onun qələmi ilə sadələşir və aydınlaşır.
Fərabi Platon irsinə öz zəmanəsinin işığını əlavə edir.
Gəlin, biz də Platona Fərabi işığında baxaq.
Fərabinin Platonu az qala bir sufi kimi insan kamilliyini
önə çəkir. Və bu Platon insanın xoşbəxtliyini onun sifətinin,
bədəninin kamilliyində yox, var-dövlətində və ictimai möv-
qeyinin üstünlüyündə yox, – biliyində və mənəviyyatında
axtarır. Fərabiyə görə, deyilənlərin təsdiqini Platonun «İnsanın
təbiəti haqqında» və ya «Birinci Alkiviad» əsərində tapmaq
olar.
1
Həmin əsər ki, burada Platon İran şahlarının da, digər
Asiya hökmdarlarının da nəslinin Zevsdən başlandığını iddia
edir və bu baxımdan vahid ümumbəşəri bir allah ideyasına
doğru daha bir addım atır. Elə buradaca Platon dünyanın ən
müdrik, ən ədalətli, ən ağıllı və ən cəsur insanlarından
danışarkən Zərdüşt maqiyasının davamçılarını xatırladır. Və
maraqlıdır ki, Zərdüştü Hörmüzdün oğlu kimi təqdim edir.
(Yunanlarda dərin kök atmış «allahın oğlu» olmaq şərəfi
sonralar İsaya «verildiyi» kimi, Platon tərəfindən Zərdüştə də
verilmişdir).
2
Fərabinin Platonu «Teetet» əsərində biliyi tədqiq edir və
bilik insan üçün ən ali məqsəd hesab olunur. Fərabi Platonu
Protaqorla müqayisə edir və göstərir ki, Protaqora görə, insan
ətrafdakı şeylər haqqında biliklər əldə edə bilməz: o, ancaq
anadangəlmə biliklərə malikdir.
3
(Əslində Fərabinin Protaqoru
da elə Platondur, çünki Platon öz əsərlərindəki iştirakçıların
dilindən təkcə onların ona bəlli olan mövqeyini yox, həm də öz
mövqeyini ifadə edirdi.) Platon özünün «Protaqor» əsərində bu
məsələni təhlil edərkən iştirakçı tərəfin mövqeyi olaraq göstərir
ki, öyrənmə, təlim, tədqiqat doğrudan da fayda vermir və
düzgün biliklərə gətirmir. Lakin bu mövqeyə cavab kimi
1
Аль-Фараби. Историко-философские трактаты. Алма-Ата,
1985, стр. 108.
2
Платон. Собрание сочинений в 4-х томах. Том 1, М.,
«Мысль», 1990, стр. 246.
3
Аль-Фараби. Историко-философские трактаты, стр. 109.
- 77 -
göstərir ki, tədqiqat elə məhz bilikləri əldə etmək üçündür. Bu
mövqe «Menon» əsərində də davam etdirilir.
1
Maraqlıdır ki, hələ o dövrdə Platon bilikləri təkcə idrak
müstəvisində deyil, həm də fəzilət və fayda müstəvisində
nəzərdən keçirirdi. Bu yanaşma iki min üç yüz il sonra pa-
raqmatizm fəlsəfəsində yenidən gündəmə gəlir. Bir fərqlə ki,
Platon insanların faydalı və xeyirli hesab etdikləri ilə həqiqətdə
faydalı və xeyirli olanı fərqləndirirdi. Çünki ictimai rəy zərurəti
və həqiqəti ifadə etməyə də bilərdi və Platona görə bir qayda
olaraq belə də olurdu. Fərabi bu mövqeyə şərh verərək faydalı
və sərfəlini fərqləndirir. Fərabiyə görə, faydalı (Xeyir) zəruri
ola bilər, sərfəli isə heç də həmişə zəruri və müsbət bir şey
olmur.
2
Filosofu başqa sənət sahiblərindən fərqləndirən odur ki,
o, şərti-faydalı şeylərlə həqiqətən faydalı, zəruri-faydalı olan
şeylər arasındakı fərqi üzə çıxarır. «Pir» əsərində o, zəruri
biliklərin aşkarlanmasını fəlsəfənin əsas vəzifələrindən biri kimi
təqdim edir. Digər sənət sahələrində isə biliklər şərti xarakter
daşıyır. Məsələn, «İon» əsərində göstərdiyi kimi, poeziyanın
verdiyi biliklər həqiqətdən uzaq olduğuna görə nəyinki fayda
vermir, əksinə, məqsəddən uzaqlaşdırır.
Fərabi isə zəruri bilikləri deyil, zəruri mövcudatı önə
çəkir. O, «ət-Təliqat» əsərində yazır: «Müdriklik – həqiqi var-
lığın dərkidir, həqiqi varlıq isə özü-özlüyündə zəruri möv-
cudatdır. Filosof məhz özü-özlüyündə Zəruri haqqında kamil
biliyi olandır».
3
Bu məsələdə Platonla Fərabi arasında eyniyyət
məqamı həqiqi, zəruri olanın önə çəkilməsidir. Fərq isə bundan
ibarətdir ki, Platon həqiqi varlıq və zəruri mövcudluq dedikdə
ideyanı, Fərabi isə Allahı nəzərdə tutur. Fərabiyə görə,
«Birincidən başqa həqiqi filosof yoxdur, belə ki, ancaq o, özünü
1
Bax: Платон. Собрание сочинений в 4-х томах. Том 1, М.,
«Мысль», 1990. Протагор (стр. 418-476. Менон (стр. 575-612);
Аль-Фараби. Историко-философские трактаты, стр. 110-111.
2
Аль-Фараби. Историко-философские трактаты, стр. 116.
3
Аль-Фараби. Естественно-научные трактаты. Алма-Ата,
«Наука», 1987, стр. 286.
Dostları ilə paylaş: |