ailələriniz gəlib, mulaqat məntəqəsinə aparacaqlar sizi. Əynimizi dəyişib getdik. Sevinirdim ki,
anamı görəcəm.
Dayımla xeyli söhbət etdik. Bakıyla bağlı söhbətləri gizli-gizli edirdim ki, yanımızda
oturan ETTELAAT nümayəndəsi eşidib qeydiyyat aparmasın. Adətən də, dövlətin bizim
məsələlərlə maraqlanmasını, işimizin hansı mərhələdə olmasını, kimlərin yanına getmələrini
soruşurdum. Dayım da xısın-xısın məlumatları sızdırır, televiziya xəbərlərindən canlı görüşlərə
qədər danışırdı.
Dayımgil məhkəmənin vaxtını öyrənməyə gəlmişdilər, gecəni də “Şəhriyar” otelində
qalmışdılar. Dayım anamın gəlməməsindən istifadə edib mənə bir çox acı gerçəklikləri dedi:
“Sizə iş kəsəcəklər, nəsə gözüm su içmir, məhkəmə də tam qəti bir şey deyə bilmir.
Dövlətlərarası razılıq olmasa, işiniz lap pis ola bilər”.
15 dəqiqə nədir ki! Vaxt sürətlə əriyib bitdi. Görüş qurtardı.
***
Hər dəfə ailəmizlə görüşməzdən əvvəl və sonra paltarlarımızı yoxlayırdılar ki, birdən
evdəkilər nəsə verər. Həmişə də paltarlarımızı eyni əsgərlər yoxlayırdılar. Əsgərlərin verdikləri
yeganə sual da bu idi:
–
Dadaş, Bakıda kabare var, hə? Heç gedib qızlarla oynayırsız? Burda ola da, of...
Şəhriyarla məni gülmək tuturdu. Amma sağ olsunlar, bizim üstümüzü o qədər də dərindən
axtarmırdılar. Hər dəfə də bizə müəmmayla baxan digər məhbusları belə başa salırdılar:
– Tanıdınız bunları? Bakılılardı da, o televizora düşmüşdülər e, bax onlar. Yazıqlar
gəzməyə gəlib, bizimkilərdə tutub salıb bura.
Edam dəhşəti
Təbriz həbsxanasında edama məhkum olunmuş adamları gördükcə insan dəhşətə gəlirdi.
Sabir adlı fruşqahçı (bufetçi) dava zəminində qonşusunu öldürmüş və edam cəzasına məhkum
edilmişdi. Ölənin anası əgər şikayətini geri götürsəydi, Sabir azad oluna bilərdi. Deyilənə görə,
qadının ürəyi yumşalıbmış, az vaxt sonra rizayətlik verəcəkmiş, amma qəfildən ölüb. Həmin
qadının ölən oğlundan başqa səkkiz oğlu da vardı. Bu da o deməkdir ki, Sabirin azad olması
üçün əvvəl əgər bir adam razılıq verə bilərdisə, indi gərək səkkiz adam şikayətçi olmayaydı.
Həmin səkkiz qardaş da diə – qan pulu istəyirdilər, hərəsi də bir miqdarda. Sabir, sözün əsl
mənasında, səkkiz “mıxa” keçmişdi və edamı qaçılmaz idi. Çünki elə səkkiz qardaş tanımıram
ki, səkkizinin də dediyi bir-birinin boğazından keçə və hansısa razılığa gələlər, özü də pul haqq-
hesabında.
Hərdən Sabirlə söhbət edəndə deyirdi: “Eşik yadımdan çıxıb, adamların üzünü
xatırlamıram, 4 ildi burdayam, ta burdan çıxmayacağımı yaxşı bilirəm, ona görə də bura öz evim
kimi baxıram. Kimsə zindana məxsus hansısa əşyanı qıranda, elə bilirəm mənim əşyamı qırır, bir
yan çirkli olanda mənə elə gəlir ki, evim batıb-bulanıb. Amma onu da bilirəm ki, bir gecə qəfil
məni oyadıb aparıb Saat Meydanındakı dirəkdən asacaqlar. Bax, onu düşünəndə beynim qarışır,
hamı bir-bir gəlib gözümün qabağından kino lenti kimi keçir, sanki ölüm mənə bütün
unutduqlarımı xatırladır”.
***
Ömürlük azadlıqdan məhrum edilənlər və yaxud artıq 6-7 il zindanda qalanların, dəbdə
olan ifadə ilə desək, “əlləri hər yerə girirdi”. Özlərinə yuxu dərmanları gətirdirdilər. O yuxu
dərmanlarını qəbul edib, bəzən iki-üç gün yatırdılar. İşin özgə yanı ondadır ki, həyatın, ömrün
iki-üç günün yuxuda keçirmiş adamlar oyanan kimi “ayın neçəsi” olduğunu soruşur, bir neçə
günü yuxuda keçirdiklərinə görə bərk sevinirdilər. Yuxudan oyananda rəngləri kağız kimi ağ
olan bu adamları görsəydiniz, deyərdiniz ki, onları bu dəqiqə əl uzadıb qəbirdən qaldırıblar. Eyni
zamanda, o solğun çöhrələrdəki diləgəlməz, həm də ağrılı sevinc az-bir az ağlı və qəlbi olan
adamı vahiməyə sala bilərdi.
***
İki dost varıydı, biri 15 il müddətinə azadlıqdan məhrum edilmişdi, həmin müddət bitəndən
sonra isə asılacaqdı. Hər gün böyük əzabla ölümünü gözləyən bu adam üçün ümid dolu günlər,
görünür, bitməmişdi. Hərdən yanıma gəlir və ölməyəcəyi təqdirdə Bakıda görəcəyi “işlərdən”
danışırdı. Deyirdi ki, inşallah burdan çıxsam, iki-üç ay çalışıb pul qazanacam, sonra da o pulları
götürüb Bakıya gələcəm və gecə-gündüz demədən xərcləyəcəm, o bar sənin, bu bar mənim.
Bu edama məhkum olmuş adamın cinayəti çox dəhşətli idi. Deməli, bu dostlardan biri
qadın geyimi geyib maşının arxa oturacağında oturur, yolda maşında qadın əyləşdiyini görən bir
qız taksiyə əl edib saxlatdırır. Taksi gözdən-könüldən uzaq bir yerə yol alanda qız qışqırsa da,
xeyri olmur. Əynindəki qadın paltarını soyunan oğlanlar və sürücü qızı çöldə zorlayırlar. Qız
şikayət edəndən sonra cinyətkarlar tapılır. Onlardan birinin nişanlısı vardı, bütün bu hadisələrdən
sonra belə hər dəfə görüş günü onun yanına gəlirdi və deyilənlərə inansaq, nişanlısı edam
olunana qədər ərə getməyəcəyinə də söz veribmiş.
***
Edama məhkum olunanlar üç-beş il və ya daha az həbs olunanlara yuxarıdan aşağı baxırlar.
Onlara elə gəlir ki, onlar zindanın əbədi sakinləri, digərləri isə köçəri quşdurlar. Ona görə az
müddət həbs olunanlara “dərin sir”lər vermirlər. Həbs müddəti az olanlarsa, elə hey gedənəcən
nəsə öyrənmək istəyirlər.
Edama məhkum olunmuşlar artıq uzun illər həbsxanada qalacağını biləndən sonra orda işə
düzəlirlər. Pulsuz çalışırlar. Bu işə dözməklərinin əsas səbəbi, gizli də olsa siqaret çəkmək fürsəti
əldə etməklə bağlıdır. Yəni həbsxananın bölmələrinə və ya xəstəxanaya gedərkən ürəkləri
istəyən qədər siqaret çəkirlər. Bundan başqa, onlar saçlarını bir qədər uzun saxlaya bilərlər. Həm
də telefonla danışmaq imkanları daha çox olur. Bu cür “üstünlük”lərlə, hətta, fərəhlənən
məhbuslar da olur.
Edam hökmü almışlar heç bir bayramda onlara əfv düşmür deyə, hər bayramda azad olan
yüzlərlə məhkumun arxasınca baxırlar. Azadlıq kağızı gələn adamın ərşə qalxan sevinci ilə öz
çantasını toplayanları kənardan susqun-susqun izləyən edam məhkumlarının yerin dibinə batan
kədəri arasındakı uçurum aydın sezilir. Azad olunub gedən adamı digər məhkumlar qapıya qədər
ötürürlər, amma bu ötürmə heç də rahat olmur. Azad olunanı zarafatyana döyürlər, hərəsi bir
yerinə şillə-təpik ilişdirir ki, bir də yolu zindana düşməsin.
Həbsxanadan azad olunanların çoxu bir daha ora qayıtmır. Ancaq bu hal oğrulara aid deyil,
ona görə də, onlara “tövbəsizlər” deyirlər. Elə olur ki, azad olunandan üç gün sonra hansısa oğru
öz “müqəddəs” peşə vərdişinə görə yenidən zindana qayıdır.
***
Edam məhkumlarına ailələri çox yaxşı baxır. Təsəvvür edin, xəstələnəndə anamız necə
qeydimizə qalır. Valideyn düşünür ki, övladıma nəsə ola bilər. Onda qalsın, asılacağını hamı
bilir və bu labüdlük hər kəsi dəhşətə salır.
Edam olunacaq məhbuslar özlərinə çox yaxşı fikir verirlər, onlara elə gəlir ki, qalan ömrü
gözəl yaşamalıdırlar, bu onlara ölümün labüdlüyünü az da olsa unutdurur.
Asılacağını bilən hər məhbus peşmandır, hər biri zindana düşəndən sonra beyinlərində
həmin vəziyyətdə “öldürməməyin” yollarını axtarıb-tapırlar, amma artıq çox gecdir. Heç nəyi
geri qaytarmaq mümkün deyil.