Qadın məsələsi
Zindanda gecə üstüaçıq yatan adamları gördükcə başa düşürsən ki, bu narahat yatan,
yorğanı üstündən atan adamlar nə qədər qadınsızdırlar və kişi üçün qadın nə deməkdir. Kişi
qadınını itirəndə, sanki, yorğanını da itirir.
***
Həbsxanada axşam olanda gözünü ağ divarlara zilləyib düşünməyə başlayırsan, insanın
ürəyinə diləgəlməz, izaholunmaz ağrılar çökməyə başlayır. Sanki, bütün ağrıların canında
yerbəyer olur: evinə-eşiyinə, yurduna-yuvana qayıda bilməmək ayaqlarına, həsrət ürəyinə,
gücsüzlüyün qollarına çökür...
***
Qadınları ilə görüşüb cinsi münasibətdə olmaq istəyənlərin növbəyə durub rəsmi icazə
kağızı alması, o kağızı almaq üçün dəridən-qabıqdan çıxmaları, görüşəndən sonra həyat
ləzzətindən həbsxana divarları arasına qayıdıb o xoşbəxt üç saatı xatırlayaraq başılovlu
gəzmələri insanın əlini-ayağını yerdən üzən, ürəkağrıdıcı məqamlardan idi. Onlar üçün o
əvəzedilməz bir günü gözləmək də böyük sevinc idi.
Həbsxananın gözü – Rza Əzimzadə
Təbriz zindanında biz qalan bəndin “gözü” Rza Əzimzadə idi. Qız Rza deyirdilər, burcuda-
burcuda yeriməyi vardı, hər gün məcburən adamların – “böyüklər”in paltarlarını yuyurdu. Əli
daim suda olurdu. Kimin yanından keçirdisə, o saat söz atırdılar məzluma: “Yanasan, qız səni”.
Evlərindən tozsovuran şnuru və 2 kq düyü oğurladığına görə anasının şikayəti ilə həbs edilmişdi.
Hər gün evlərinə zəng edib anasına yalvarırdı:
– Ana, rizayətlik ver çıxım burdan, ta paltar yumaqdan bezmişəm, qurban olum, başına
dolanım şikayətini geri götür, gəlib bacım oğlunu görüm, çox darıxıram.
Anası isə rizayətlik vermirdi. Qəribə paradoks idi: hamının anası övladını həbsdən azad
etdirməkdən ötrü əlindən gələni edirdi, heç olmasa ağlayıb-sıtqayırdı, amma Rzanın anası oğlunu
“içəri”də saxlamaq üçün əlindən gələni “əsirgəmirdi”.
Rza hərdən bəndin ən hörmətsiz adamını öyrədirdi ki, anamla telefonla danışanda qəsdən
dəstəyi sənə verəcəm, deyərsən ki, mən bəndin vəkilbəndiyəm, bu Rza da çox yaxşı oğlandı,
əxlaqı da xoşgildi, gəl Allah eşqinə bu oğlanı azad elə – şikayətini geri götür. Rza beləcə
hiyləgərlik edirdi. Amma anası gözünə döndüyüm də Rzanı azad etmək əvəzinə oğlunu həmin
adama tapşırırdı:
– Sən vəkilbəndsən, Rzadan muğayat ol, hələ bir yerdə çox qalacaqsız, uşaqdan göz ol... –
kəsəsi Rzanın biclikləri anasının döşünə yatmır, daş qəlbini zərrəcə də yumşalda bilmirdi.
***
Qız Rza başqalarının paltarını yuyurdu, İtdiş Musa da onun başının qarışıq olmasından,
əyilməsindən istifadə edib barmaqlayırdı. Qız Rza çönüb Musaya dillənməli oldu:
– Mulaqat günün gözlə, anan gələndə barmaqlayarsan, – İtdiş Musa gülə-gülə yenə
barmağını və dilini dinc qoymadı:
– Anam gələnəcən dözəmirəm da, ala, ala... (barmaqlayırdı) yanasan qız səni, ay yanasan
qız səni – aralanıb hırıldayırdı, Musanın saralmış qabaq dişləri uzun və əyri idi, güləndə,
doğurdan da, itə oxşayırdı.
Rza qızışır, hirslənir barmaqlarını qız kimi düyünləyib yumruq atırdı. İtdiş Musa hırıldaya-
hırıldaya Rzanın yumruğunu tutub qolunu buranda nəzarətçi onları görüb cəzalandırdı. İtdiş
Musaya bir-iki təpik vurub buraxırdılar, çünki əlində işi vardı, növbə ilə adamları hamama
yollamalıdı idi, – vəzifəsi məsuli-hamamdı.
Yazıq Rzanın üzünü divara çevirib, dizini və burnunu divara söykəyib, əllərini arxasına
“bərkidib”, burnunun da üstünə qənd qoyurdular. Bir saat ərzində tərpənsə, qənd burnunun
üstündən yerə düşsə cəzası bir az da artmalıydı. Rza ağlaya-ağlaya al günün altında üzü divara
dayanımışdı, boynunun da dalı gündən yanmışdı, gəlib-keçənlər də üzünün divara olmasından
bərk yararlanıb Rzanı barmaqlayır, – azarlarını öldürürdülər.
***
Qız Rzayla həbsxana əhli məzələnirdilər, hərə bir yerinə əl atır, Rzanı söyür – “Anasını
satdıran” deyirdilər. Rza da guya söyənlərə cavab verirdi:
Hə, satdırıram, amma qəvvatı (adam tapanı) sənsən...
Radioda həzin bir musiqi səslən kimi, Rza çiyin ata-ata, burcuda-burcuda, tullana-tullana
oynayırdı. Bir dəfə Rzanın belə burcuda-burcuda oynamağını görən Vəhid yanındakı yoldaşına
dedi:
– Əclafı o gün hamamda qıçlarını, sinəsini qırxan yerdə tutdum, and içirdi ki, qırxmıram,
yarımqırxılmış qıçını, sinəsini və əlindəki tiqəni göstərib sözümü sübut elədim. Sonra tiqəni
əlindən alıb əli ilə suyun içindəki bütün tükləri bir-bir dənlətdirdim. Demişdim bir dəfəyə iki tük
götürsən, dumbuzu qoyacam kəllənə. Üç saata yeri-yurdu gül kimi elədi.
Qorxu
Həbsxanada insanın qəribə qorxuları – ehtiyatları olur. Vaxtında yatmaq, vaxtında
oyanmaq, fürsətlərdən maksimum yararlanmaq istəyirsən. Sanki təhtəlşüurunda narahatlıqlara
qarşı bir oyanma, qorxu qıcığı olur. Hamı hansısa işinin narahat gedəcəyindən qorxur. İndiki
məqamda bu, yadıma Jan-Pol Sartrın “Divar” hekayəsindəki maraqlı bir məqamı salır:
hekayədə qəhrəman bilir ki, sabah onu ölümə aparacaqlar, necə öləcəyini düşünmək istəyir,
amma düşünmür. Çünki sonuncu dəfə yatan bu adam yuxusunu qarışdırmaqdan qorxur.
.
***
Həbsxanaya da hardasa kişilik məktəbi demək olar, hərçənd o məktəbi heç kəsə
arzulamıram. Bu məktəbdə kişilərin çoxu qorxaq olur. Həbsxanada qorxmayan adama rast
gəlmək mümkün deyil. Edama məhkum olunmuş adam da ümidlidir. Ən azından gözləyir ki,
şikayətçi şikayətini geri götürə bilər, hakimiyyət dəyişə bilər. Kəsəsi, Allahın qüdrətinə sığınır.
Həmin o zəif işıq kimi közərən ümid hər kəsi qorxaqlaşdırır. Biri digərini o vaxt əzir ki, o bəri
başdan cəzalanmayacağını bilir. Əgər bu qorxu olmasa, kannibalizmin qarşısını almaq olmaz.
Qorxusuzluğunu nümayiş etdirənlərsə daha çox gücsüzlərdir. Onlar döyüləndən, şillə altına
salınandan sonra şəstlə iddia edirlər ki, guya özlərini güclə saxladılar, yoxsa aləmi
dağıdacaqdılar. Hamı qorxusuz görünür, amma hamı qorxur. Bu dəhşətli qorxu inkarına Jan-
Pol Sartrın “Divar” hekayəsində rast gəlmişdim:
–
Onun ayaqlarının arasında yaranan gölməçəyə şalvarından damcılar axırdı. O
çaşqınlıqla mızıldandı:
–
Bu nədir belə?