78
diktəsini ifadə edir. Tale kultu, görünür, elə bu səbəbdən də,
cəsarətliliyə xidmət edir. Həqiqətin gerçəkləşdiricisi olaraq insanın
oynamamalı olduğu rol qabaqcadan müəyyənləşdiyindən, burada şərin
və bədbəxtliyin xüsusi izahlarına ehtiyac qalmır.
Dünyanı hərəkətə gətirən həyat axını öz təcəssümünü Taledə
tapmaqla cəngavər mədəniyyətinin mütləq dayağını və istinadgahını
təşkil edir.
Cəngavər mədəniyyəti kişi əxlaqının dəyərlərinə söykənir,
onun başlıca əxlaqi keyfiyyətləri cəsarət və ürəklilikdir, ürəyin
çağırışına inam və sədaqətdir. Cəngavər ağlına deyil, ürəyinə daha çox
inandığından, onun üçün əməlin nəticəsi deyil, əməlin özü dəy
ərlidir.
Əməldən doğula bilən n
əticənin qorxusundan ürəyin səsinin
boğulması cəngavər üçün yolverilməz olduğundan, Tale kultu
cəngavər davranışının nüvəsini təşkil edir.
Cəngavər dəyərləri çərçivəsində rəiyyət yoxdur, burada heç
vətəndaş da yoxdur, burada igidlər vardır. Burada varlı yoxdur, burada
kasıb yoxdur, burada yalnız mərd və onun əksi olan namərd vardır.
Burada mərd olmayan kəs insan deyildir. Cəngavər mədəniyyətinin
dəyərləri çərçivəsində namərd insan kimi deyil, nəsə iyrənc bir əşya
kimi qavranılır.
Cəbrizm şəhər mədəniyyəti tərəfindən arxa plana sıxışdırılmış
mifologiyanın Tale ideyasını yenidən həyata qaytarır.
Cəbrilik şəhərli utilitarizmi ilə mübarizəyə girərək, onun
mənən qırılmasına yönəlmişdi. Şəhərli ruhu özünü ifadə etmək yolu
ilə özünü müdafiə etmək məcburiyyətində qaldı. Şəhərli ruhu ilə
cəngavər ruhu arasındakı bu təfəkkür mübarizəsinin gedişində şəhərli
ruhu da, cəngavər ruhu ilə birgə müəyyən qədər rasionallaşdırıldı.
Əgər cəngavər mədəniyyəti Tale kultuna istinad edirsə, şəhər
mədəniyyəti ağıl kultu üzərində qurulur. Əgər tale kultu cəsarətliliyin
dünyagörüş zəminini yaradırsa, ağıl kultu varlanmaya xidmət edir.
Əgər Tale kultu döyüşçü ruhu ilə uyuşursa, ağıl kultu, müəyyən
mənada tacir ruhu ilə uyuşur.
Şəhərli ruhu öz ilkin ifadəsini qədərilik təlimində tapdı. Qədər
ərəb dilində, elə Azərbaycan dilində də, tale mənasını verir. Lakin,
qədərilik təlimi, gözlənildiyi kimi, tale ideyasının müdafiəsinə deyil,
əleyhinə yönəlmişdir. Qədərilik tale ideyasının əleyhinə öz
arqumentlərini yönəldərkən ,əslində, iradə azadlığından çıxış edirdi.
Lakin, qədərilik təsdiqedici bir cərəyan olmayıb, təkzibedici bir
cərəyan olduğu üçün şəhərli ruhunun ontoloji prinsiplərinin
yaradılmasından daha çox, əks mövqenin təkzib olunması ilə
qayğılanırdı.
79
Şəhərli ruhunun ontoloji prinsiplərinin yaradılması daha çox
başqa bir cərəyanda, mötəzilə cərəyanında baş verdi. Mötəzilə şəhərli
təfəkkürünün ontoloji əsası olan determinizm prinsipini müəyyən
qədər rasionallaşdırdı və mütləqləşdirdi.
Mötəzilənin banisi Vasil İbn Əta (700-749) qədərilikdə olduğu
kimi tale kultunu təkzib edir, lakin qədərilikdən fərqli olaraq tale
ideyasının əleyhinə şüurlu olaraq iradə azadlığını qoyurdu. Mötəzilədə
şəhər mədəniyyətinin azadlıqsevərlik meylləri aşkar
olaraq duyulur.
Mötəzilə azad insan zəkasını hətta əxlaqın da ən yüksək meyarı hesab
edirdi. Burada əxlaqın mənbəyi ilahi vəhydən daha çox, insanın iradə
azadlığında axtarılır. Mötəzilədə əxlaqın ilahi mənşəyi əslində inkar
edilir, insani zəka onun meyarı kimi qəbul olunur. İnsan davranışının
əsası müqəddəs yazılarda deyil, dünyəvi prinsiplərdə axtarılır. Hətta
Quranın əzəli olması belə inkar edilir
.
Mötəzilə tərəfdarları -
mutazilitlər - dini ehkamların mütləqliyini qəbul etməyib, əksinə,
zəkanın, ağlın qüdrətini etiraf etdiklərindən, yalnız zəkanın
önəmliliyini tanıdıqlarından ilk müsəlman rasionalistləri kimi çıxış
etmiş olurdular.
Zəkanın qüdrətinə olan inam iki fəlsəfi cərəyanın əslində
şərikli başlanğıcını təşkil edir. Birinci istiqamət cəngavər
dünyaduyumunun və onun zəminində formalaşmış aristokratizmin
rasionallaşdırılmasından ibarətdir. Həmin istiqamət insan zəkasını
fövqəlbəşər və fövqəltəbii zəkanın təzahürü kimi başa düşür, insan
zəkasının kamilliyini ilahi zəkaya uyğunluq dərəcəsində görür. İnsan
zəkasının qüdrətindən çıxış edən digər istiqamət isə praqmatik cərəyan
idi. Zəka burada insanın dünyadan faydalanma vasitəsi idi və bu
zəmində də qiymətləndirilirdi. Praqmatik zəminli zəka kultu əslində
analitik təfəkkürün insan qarşısında duran bütün problemləri həll edə
biləcəyinə olan inam idi.
Mötəzilənin yaranması və tərəqqisi Əməvilərin hakimiyyəti
illərinin ikinci yarısına təsadüf edir və bu illərdə şəhər mədəniyyətinin
kifayət qədər inkişaf etdiyini ifadə edir. Mötəzilə, əslində, Abbasilərin
hakimiyyəti üçün mənəvi zəmin hazırlayırdı.
Deterministik fikir ənənələrinin möhkəmlənməsi, əlbəttə ki,
ateizmlə nəticələnməli idi və bu, İbn əl-Rəvandinin şəxsində baş
verdi.
Ateistləşmə müsəlman aləmində mutazilitlərə və onları
dəstəkləyən xəlifə sarayına qarşı gizli bir nifrət doğurdu. Bəlkə də bu
nifrətdən qorxan xəlifə əl-Mütəfəkkil (847-861) mötəziləçiləri - əl-
Kindini, İbn əl-Rəvandini daha himayə edə bilmədi. Bu insanlar hər
tərəfdən təqiblərə məruz qaldılar və belə bir şəraitdə də mötəzilənin və
ümumiyyətlə, dünyəvi fəlsəfənin inkişafı bir müddət səngidi.