80
Bu dövrdə eyni zamanda islam dini doqmatikasının
rasionallaşdırılmasına ehtiyac yaranmışdı. Həmin bu ehtiyac isə
ortodoksal islam sxolastikasını formalaşdırdı. Ərəb fəlsəfəsinin əsas
istiqamətlərindən biri olan kəlam təlimi belə bir sxolastika idi. Dini
həqiqətlərin mütləqləşdirilməsi kəlamın özəyini təşkil edir. Bu təlimin
tərəfdar
ları - mütəkəllimlər - özlərini mötəzilə tərəfdarlarına qarşı
qoyurdular.
Kəlam ortodoksal islam sxolastikası olaraq özünün ilkin
formasında, protofəlsəfi səviyyədə YIII əsrin başlanğıcında Misirdə
meydana gəlmişdi. 908-ci ildə isə kəlamın əşərilik adlanan bir
qolunun da əsası qoyuldu. Bu vaxta kimi mötəzilə nümayəndəsi kimi
tanınan Əbü-l-Həsən Əşəri həmin il mötəziləni bir günah kimi etiraf
etdi, təntənəli surətdə tövbə edərək ondan üz döndərdi, «mötəzilə
çirkabı»ndan təmizləndiyini bildirdi. Lakin, Əşəri öz keçmişinin
üstündən tamamilə xətt çəkə bilmədi. O, mötəzilə üçün səciyyəvi olan
rasionalizmi dinə gətirdi. Heç də təsadüfi deyildir ki, Əşəridə Quranın
da Allah qədər mütləq, əbədi və əzəli olduğu fikri irəli sürülür.
Əşərizmdə şəhərli rasionalizmi aşkar olaraq duyulur. Əgər
mötəzilə başlıca olaraq tacir dünyaduyumunun nəzəri ifadəçisi idisə,
əşərilik daha çox dövlət məmuruna xas olan dünyaduyumu ifadə
edirdi.
İctimai həyatda məmurun oynadığı rolun əhəmiyyəti artdıqca
müsəlman aləmində bu rolun ən uğurlu ifadəsi olan fars fenomeninin
də cəmiyyətdə əhəmiyyəti və rolu artırdı. Bağdadda siyasi
hakimiyyətə əslində büveyhilərin, Orta Asiyada isə samanilərin sahib
olması fars fenomeninin və bununla bağlı olaraq şəhərli təfəkkür
tərzinin islam cəmiyyətində əhəmiyyətinin artmasından xəbər verirdi.
Əşəriliyin təkamülü büveyhilərin hakimiyyətə doğru irəliləyişi
ilə paralel baş verirdi. Səciyyəvidir ki, əşərilik Quranı müsəlman
əxlaqının bir rasional kodeksi olaraq qavramış və onu Allahın
yaratdıqlarından, sadəcə olaraq, biri kimi deyil, Allahın özünün
təcəssümü kimi qəbul etmişdir.
Ümumiyyətlə, götürüldükdə isə, əgər mötəzilə təliminin
davamçıları dini ehkamların mütləqliyini qəbul etməyib, əksinə
dünyəvi şüuru mütləqləşdirirdilərsə, ortodoksal təlimin tərəfdarları
dini şüuru mütləqləşdirirdilər.
Fərabi müsəlman təfəkkürü meydanına belə bir tarixi şəraitdə
çıxdı.
Fərabi dövlət məmuru ailəsindən idi. Onun özü də bir dövlət
məmuru idi. Odur ki, Fərabi daha çox bir dövlət məmurunun
dünyaduyumunu rasionallaşdıran fəlsəfə yaradırdı. Aristotelin
fəl
səfəsi elə bu səbəbdən də Fərabiyə
yaxın idi.
81
Fərabi deyirdi: Əgər
mən Aristotelin zamanında dünyaya
gəlsəydim, onun ən gözəl şagirdlərindən biri olardım.
O, hələ sağlığında ikinci müəllim (
Aristoteldən
sonra nəzərdə
tutulur) adlandırılırdı.
Fərabi həm də türk təfəkkürünü təmsil edirdi. Görünür elə bu
səbəbdən də
Fərabinin elmi fəaliyyətində təkcə şəhərli ruhunun deyil,
həm də cəngavər ruhunun
rasionallaşdırılmasına meyl müşahidə
olunur. Və bu meyl aristotelizmdən platonizmə üzvi bir keçidlə öz
ifadəsini tapır. Fərabi dünyanın Platon tərəfindən yaradılmış ümumi
mənzərəsini Aristotelin məntiqi ilə vahid bir dünyagörüş çərçivəsində
birləşdirməyə çalışmış və müəyyən mənada
öz məqsədinə nail
olmuşdur. Fərabi yunan fəlsəfəsinin özündən əvvəlki şərhçilərindən
fərqli olaraq müsəlman dünyasına Platonun və Aristotelin təkcə
əsərlərini və sözlərini deyil, həm də onların ruhunu gətirdi.
Bu hal
Fərabinin estetik baxışlarında özünü daha qabarıq bir
şəkildə göstərir. Fərabi yazırdı: hər hansı bir predmetin gözəlliyi,
doğrudan da, onun mahiyyətinin reallaşması və kamilliyə nail
olmasıdır.
Bu fikir həddindən artıq platonik görünür. İndi isə Fərabidən
daha bir səciyyəvi sitat: “Ahəng və simmetriya isə gözəlliyin obyek
tiv əsaslarıdır”
İndi isə Fərabinin estetikasının aristotelist mənbələri barədə.
Fərabi yazırdı: “Aristotel tamamilə doğru deyirdi. Sənətin və bədii
yaradıcılığın əsasında, həqiqətən də, təqlid dayanmalıdır.” Fərabi
Aristotelin bir ardıcılı olaraq gözəlliyə atributiv nöqteyi-nəzərdən
yanaşırdı. Fərabi belə hesab edirdi ki, sənətkar öz təxəyyülü sayəsində
ümumi ideyaları vahid nümunələrdə təcəssüm etdirir. Fərabi də
Aristotel kimi incəsənətə əsasən katarxik nöqteyi-nəzərdən baxırdı. Bu
hal xüsusilə onun musiqiyə dair baxışları üçün səciyyəvi idi, musiqi
həm mənəvi-təmizləyici, həm də tibbi-müalicəvi əhəmiyyətə malikdir.
Buradan həmçinin incəsənətdən praqmatizmə və utilitaristə də bir
çıxış sezilir.
Fərabi Aristotelin bir ardıcılı olaraq həm də nəzəriyyəçiliyə,
məntiqçiliyə, logistikaya meylli idi, o, cümlədən də estetikaya,
incəsənətə musiqiyə baxışlarında da. Musiqi haqqında elm, hər halda,
bütövlükdə iki yerə bölünməlidir: birincisi – musiqi haqqında təcrübi
elm və ikincisi isə – musiqi haqqında nəzəri elm. Musiqi haqqında
təcrübi elmin vəzifəsi təbii səs (boğaz, dil, dodaq, səs telləri) və ya
müxtəlif sənət alətlərinin köməyi ilə hissi şəkildə qavranıla bilən
melodiyaların yaradılmasından ibarətdir. Musiqi haqqında nəzəri elmə
gəldikdə isə onun məqsədi ahəng və melodiya haqqında insana bilik
verməkdən, melodiyanı doğuran amillərdən bəhs etməkdən ibarətdir.