377
I BEYNƏLXALQ HƏMZƏ NİGARİ SİMPOZİUMU | Amasiya
türklərin» türkçülük uğrunda apardıqları mübarizəni müdafiə etmiş, yalnız iki
məsələdə: 1) Avropa ideyalarını ifrat şəkildə təqlid etdiklərinə; 2) islamçılığın və
tüklçülüyün elmi nəzəriyyəsi yaranmadan siyasiləşdirdiklərinə, yəni siyasi partiya
halına gətirdiklərinə görə onlarla razılaşmamışdı (Ağaoğlu, 2007, 33).
Y.Akçuraoğlu və Ə.Ağaoğlu kimi, ilk siyasi-ideoloji türkçülərdən biri də
Əli bəy Hüseynzadə olmuşdur. Fikrimizcə, bir çox ziyalıların da təsdiqlədiyi
kimi Ə.Hüseynzadə də əsil milliyyətçilik, siyasi türkçülük fəaliyyəti Türkiyədən
Azərbaycana dönüşündən sonra, yəni Rusiya-Yaponiya müharibəsi ərəfəsində
meydana çıxmışdır. Hələ, Ə.Hüseynzadə 1904-cü ildə «Türk» qəzetinə göndərdiyi
«Məktubi-məxsus» məqaləsində, bəzi istisnaları nəzərə almasaq, bütövlükdə
Y.Akçuraoğlunun «Üç tərzi-siyasət» əsərindəki «osmançılıq, islamçılıq və tükçülük»
ideolojisi ilə razılaşdığına işarə etmişdir. Belə ki, Ə.Hüseynzadə də Y.Akçuraoğlu
kimi «osmanlı milləti» ideyasını rədd edərək, əsas diqqətin islamçılıq və türkçülük
üzərində cəmləşdirmiş, yeni ideyanın islam və türk anlayışları ətrafında yaranmasını
vacib saymışdır (Hüseynzadə, 2007, 30). Bu dövrdə Ə.Hüseynzadə mədəni cəhətdən
islamı və türklüyü bütöv şəkildə gördüyünü ifadə etsə də, siyasi cəhətdən hər bir
türk millətinin milli kimliklərini (türklüklərini) və dinlərini (islamlıqlarını) tanımları-
nı, bilmələrini də vacib saymışdır (Hüseynzadə, 2007, 30-31). 1905-1907-ci inqilab
illərində və sonralar isə Ə.Hüseynzadənin yaradıcılığında nəzəri-fəlsəfi xarakter da-
şıyan «türkləşmək, islamlaşmaq və avropalaşmaq» kimi «üçlü» düsturu mühüm yer
tutmuşdur. O, «osmanlı türkçülüyü»nü Azərbaycan türkləri arasında aparılan rus-
laşdırma və farslaşdırma siyasətinə qarşı qoymuşdur. Bu baxımdan onun «osmanlı
türkçülüyü» ideyası «üçlü» düsturunun tərkib hissəsindən başqa bir şey deyildi.
Çünki bütün hallarda, onun bu «üçlü» düsturundan sonralar, xüsusilə 1910-1920-ci
illərdə bütün türk millətləri, o cümlədən Azərbaycan türkləri (M.Ə.Rəsulzadə və b.)
və Türkiyə türkləri (Z.Gökalp və b.) eyni dərəcədə yararlanmışdır.
D-MILLI-ETNIK TÜRKÇÜLÜK
Fikrimizcə, siyasi-ideoloji türkçülüyün davamı olan etnik-milli türkçülük bü-
tün türk ellərində, o cümlədən Azərbaycan və Türkiyədə 1910-cu illərin ortala-
rında meydana çıxmışdı. Bəs etnik-milli türkçülük nə deməkdir? Fikrimizcə, bu ilk
növbədə türk dünyasının ayrı-ayrı bölgələrində yaşayan türk xalqlarının müstəqil
dövlət yaratmaları ilə bağlı olmuşdu. Yəni, etnik-milli türkçülük bir növ xəyali
ümumtürk birliyindən, turan ideyasından kənara çıxaraq, daha konkret xarak-
ter almış (Azərbaycan türkçülüyü, Türkiyə türkçülüyü və s.), bununla da ayrı-ayrı
türk dövlətlərinin yarana bilməsini hədəfləmişdi. Hətta bunun nəticəsi olaraq, çox
keçmədən Azərbaycan Cümhuriyyəti və Türkiyə Cümhuriyyəti kimi müstəqil türk
dövlətləri yaranmışdı. Şübhəsiz, türkçülüyün sonuncu mərhələsi kimi qiymətləndirə
biləcəyimiz etnik-milli türkçülüyün ən tanınmış nümayəndələri isə Türkiyədə Ziya
Kökalp, Azərbaycanda isə Məhəmməd Əmin Rəsulzadə olmuşdur. İlk dəfə onlar
müstəqil türk dövlətlərinin yarana bilməsi fikri ilə çıxış etmiş və bunu, müdafiə
etmişlər.
Türkiyədə etnik-milli, müstəqil türkçülük ideologiyasının əsas ideoloqu
Ziya Gökalp yazır ki, bir vaxtlar islamçılıq ideologiyasının müsəlman xalqlarının
müstəqilliklərini təmin edəcəyi, müstəmləkə vəziyyətindən xilas olacaqları düşü-
nülürdü. Təcrübə isə göstərdi ki, islamçılıq müsəlman dünyasında milli ideologiya-
nın meydana gəlməsinə maneçilik törədir. Milli özünüdərk prosesinin ləngiməsi isə
xalqların öz müstəqil dövlətlərinin yaratması fikrinə sipər çəkmək deməkdir. Məhz
378
I BEYNƏLXALQ HƏMZƏ NİGARİ SİMPOZİUMU | Amasiya
belə bir dövrdə türkçülük ideologiyası ön plana keçir. Z.Göyalpa görə, türkçülər
siyasətdə xalqçı, yəni müstəqil, demokratik türk dövlətlərinin yaranmasının,
mədəniyyətdə isə türkçü, türk birliyinin olmasının tərəfdarıdırlar: «Türkçülük siyasi
bir partiya deyildir, elmi, fəlsəfi, estetik bir məktəbdir, başqa bir deyimlə, kültürlə
bağlı bir çalışma və yeniləşmə yoludur. Bu səbəbdəndir ki, türkçülük indiyə qədər
bir partiya şəklində siyasi mübarizə meydanına atılmadı, bundan sonra da, şübhəsiz
atılmayacaqdır. Bununla birlikdə, türkçülük büsbütün siyasi ülkülərə (məfkurələrə)
də biganə qalmır. Ona görə ki, türk kültürü digər ülkülər ilə birlikdə siyasi ülkülərə
də malikdir» (Gökalp, 1991, 132).
Qeyd edək ki, bu dövrdə Z.Gökalpın dərin təhlil edib təkmilləşdirdiyi «türkçülük»
ideyasının M.Ə.Rəsulzadəyə böyük təsiri olmuşdu. Z.Gökalpın «Türk millətindənəm,
islam ümmətindənəm, Qərb mədəniyyətindənəm» şəklində irəli sürdüyü şüarı
türkçülük, xalqçılıq vəzifələri üzərində təşəkkül edən «Müsavat»ın proqramına sa-
lan Rəsulzadə, bununla da Azərbaycanda etnik-milli türkçülüyün təməl daşlarını
qoymuşdu. Bunu, «Açıq söz» qəzetinin ilk sayında nəşr olunan «Tutacağımız yol»
(1915) məqaləsində M.Ə.Rəsulzadə açıq şəkildə ifadə etmiş, etnik-milli türkçülü-
yün əsas prinsiplərini göstərmişdir. Onun fikrincə, etnik-milli türkçülüyün əsas idealı
millətin müstəqil varlığıdır ki, 20-ci əsr də milliyyət əsri olduğuna görə, Azərbaycan
türkləri bir milliyyət olaraq meydana çıxmalıdır.
Onun fikrinə görə, hər bir milliyyət, millət azad yaşayıb da, tərəqqi edə bilmək
üçün üç əsasa: 1) dil; 2) din; 3) zaman-müasirliyə istinad etmək məcburiyyətindədir.
Milliyyətin birinci əsası dildir ki, dili türk olan bu xalqın etnik mənsubiyyəti də türk-
dür: «Dilcə - biz türküz, türklük milliyyətimizdir» (Hüseynov, 2007, 101). Milliyyətin
ikinci əsası isə dindir: «Dincə - müsəlmanız. Hər bir din ona inananları arasında
məxsusi bir yeniləşmə vücuda gətirmişdir ki, bu mədəniyyət də bir beynəlmiləliyyət
səbəbi təşkil edir. Müsəlman olduğumuz üçün biz türklər beynəlmiləliyyəti-
islamiyyəyə daxiliz» (Hüseynov, 2007, 102). Milliyyətin varlığının üçüncü əsası isə
zamandır-müasirləşməkdir: «Zamanca da - biz texnikanın, elm və fənnin möcüzələr
yaradan bir dövründəyiz» (Hüseynov, 2007, 102). O sonda belə bir nəticəyə gəlir:
«Demək ki, sağlam, mətin və oyanıq məfkurəli bir milliyyət vücuduna çalışmaq
istərsək ki, zaman bunu tələb ediyor - mütləqə üç əsasa sarılmalıyız: türkləşmək,
islamlaşmaq və müasirləşmək. İştə millətimizin ictimai həyatının islahı üçün üzərinə
dayandığımız üç payeyi-mədəniyyət!» (Hüseynov, 2007, 102). Azərbaycan türkçü-
lüyü ideyasının müəllifi Rəsulzadə və onun silahdaşları müstəqil Azərbaycan türk
milləti, Azərbaycan türk dili və s. ilə bağlı nəzəri ideyalarını 1918-ci ilin mayın 28-də
qurulan Azərbaycan Cümhuriyyətinin dilinin və millətinin adını türk olaraq əməli
şəkildə müəyyənləşdirməklə, bu məsələyə son nöqtəni qoymuş oldular. Bununla da
Azərbaycan türkçülüyü öz rəsmi ifadəsini milli və müstəqil Azərbaycan ideyasında-
Azərbaycan Cümhuriyyətində tapmış oldu.
1920-ci ilin əvvəllərində də M.Ə.Rəsulzadə hesab edirdi ki, müstəqil türk
dövlətlərinin yaranması Türk-Turan birliyini parçlamır, əksinə Azərbaycan turançıları
bunu siyasi bir fəlsəfə kimi qəbul edərək qurduqları milli siyasi partiyanın prinsipi
elan ediblər. Bu siyasi fəlsəfəyə görə, bütün müsəlmanları «İslam birliyi» altında
birləşdirmək mümkün deyilsə, ancaq bütün türklər öz aralarında böyük dünya fe-
derasiyasına nümunə olmaq üzrə bir federasiya yarada bilərlər: «Yeni Turan, mədəni
birlik üzərində təsis edilib ancaq gələcək birər Türk hökumətlərinin federasyonu
şəklində təsəvvür oluna bilər. Azərbaycan da bu gələcək Turan silsiləsinin mühüm
bir halqasıdır» (Rəsulzadə, 1990, 36).