62
SƏNƏDLƏRİN İMZALANMASI
MƏRASİMİNDƏN SONRA PREZİDENTLƏR
İLHAM ƏLİYEVİN VƏ
NURSULTAN NAZARBAYEVİN
BİRGƏ MƏTBUAT KONFRANSI VƏ
JURNALİSTLƏRİN SUALLARINA CAVAB
1 mart 2004-cü il
Nursultan Nazarbayevin bəyanatı
Hörmətli İlham Heydər oğlu!
Hörmətli qonaqlar!
Azərbaycan Respublikasının prezidenti İlham Heydər oğlu Əliyev mənim dəvətimlə ilk dəfədir ki,
Qazaxıstana dövlət səfərinə gəlmişdir. Biz əziz qonaqlarımızı görməyə şadıq.
Qazaxıstanla Azərbaycan arasında həmişə mehriban və qardaşlıq münasibətləri olmuşdur. Xalqlarımızı
mədəni-tarixi ümumilik doğmalaşdırır. Dövlətlərimizin müstəqilliyi illərində biz Azərbaycanın sabiq prezidenti
mərhum Heydər Əlirza oğlu Əliyevlə birlikdə çox böyük birgə iş görmüşük. Onun vəfatı ilə əlaqədar Qazaxıstan
rəhbərliyi və xalqımız adından bir daha başsağlığı vermək istəyirəm.
İndi yeni dövr başlanır. Azərbaycanın və Qazaxıstanın eyni coğrafi-siyasi vəziyyəti, ümumi vəzifələri və
problemləri vardır. Mən əminəm ki, bu səfər münasibətlərimizi yeni səviyyəyə qaldıracaqdır. Bunun üçün heç
bir – nə siyasi, nə də iqtisadi maneə yoxdur. Biz münasibətlərimizi bütün
istiqamətlərdə, o cümlədən neft və qaz
kompleksində möhkəmləndirmək barədə razılığa gəldik. Azərbaycan tərəfinin bu sahədə böyük təcrübəsi, yaxşı
mütəxəssisləri var və biz birlikdə işləyib böyük nailiyyətlər əldə edə, qarşılıqlı surətdə təcrübə toplaya və yaxşı
nəticələr əldə edə bilərik. Biz bu münasibətləri qaydaya salmağa çalışacağıq və Aktau–Bakı enerji dəhlizi işə
salındıqdan sonra Qafqaz vasitəsilə beynəlxalq bazarlara alternativ marşrut aça biləcəyik. Görüşdə biz həm də
yol-nəqliyyat məsələsinə və əlbəttə ki, Bakı–Tbilisi–Ceyhan neft kəməri ilə bağlı məsələyə toxunduq. Belə
razılaşdıq ki, Qafqaz marşrutu vasitəsilə biz neftimizin nəqlini artıra bilərik.
Biz humanitar əməkdaşlıq məsələlərini də müzakirə etdik. Bütün bu məsələlərdə,
o cümlədən ATƏT, MDB,
İslam Konfransı Təşkilatı, İqtisadi Əməkdaşlıq Təşkilatı kimi qurumlar çərçivəsində beynəlxalq əməkdaşlıq
məsələlərində çox oxşar mövqe tuturuq və bir-birimizi dəstəkləyirik.
İmzalanmış sənədlər əməkdaşlığın bütün sahələrində münasibətlərimizi daha yüksək səviyyəyə qaldırmağa
və xalqlarımız arasında əlaqələri dərinləşdirməyə kömək etməlidir.
İlham Heydər oğlu, biz Sizi Qazaxıstanda böyük məmnuniyyətlə qəbul edirik. Sizə bu səfərinizdə uğurlar
arzulayırıq, səfərinizin uğurlu keçməsi üçün ölkəmizdə hər cür imkan olacaqdır.
İlham Əliyevin bəyanatı
Sağ olun, hörmətli Nursultan Abişoviç!
İcazə verin, ilk növbədə, dost və qardaş Qazaxıstana dövlət səfərinə gəlmək barədə dəvətinizə görə Sizə
təşəkkür edim. Əminəm ki, bu səfər və onun gedişində imzalanmış sənədlər dövlətlərimiz arasında
münasibətlərin inkişafında yeni dövr olacaqdır.
Ölkələrimiz arasındakı tarixi, dostluq və qardaşlıq münasibətləri dövlətlərimiz müstəqillik əldə etdikdən
sonra öz təsdiqini tapmışdır. Nursultan Abişoviç, Qazaxıstanda, əsasən, Sizin liderliyiniz və Azərbaycanda
prezident Heydər Əliyevin liderliyi sayəsində ölkələrimiz demokratik və iqtisadi islahatların həyata keçirilməsi,
dövlətlərimizin müstəqilliyinin və regionda təhlükəsizliyin möhkəmlənməsi yolunda böyük uğurlar qazanmışlar.
Azərbaycan rəhbərliyinin bugünkü vəzifəsi bu siyasəti, ölkələrimizin və xalqlarımızın yaxınlaşdırılması xəttini
davam etdirməkdən ibarətdir. Bundan ötrü xalqlarımızın yaxınlığı,
mədəniyyətlərimizin ümumiliyi, iqtisadi
zəmin kimi gözəl şərait var. Əminəm ki, bütün bunlar ölkələrimizin bundan sonra da inkişafına kömək edəcək
və onlar bir-birinə daha da yaxın olacaqlar. İqtisadiyyatlarımız daha sıx bağlı olacaqdır.
İndi gündəlikdə duran məsələlər nəinki ölkələrimiz arasında münasibətlərə, həm də regionda, bəlkə də daha
böyük miqyasda vəziyyətə təsir göstərəcəkdir. Həyata keçirilən energetika, nəqliyyat, sərmayə layihələri
regionda təhlükəsizliyi və əməkdaşlığı təmin etməyə xeyli dərəcədə imkan verəcəkdir. Əlbəttə, Qazaxıstanın
energetika layihələrində iştirakı da Xəzər hövzəsindəki enerji ehtiyatlarının işlənilməsi üçün həlledici amildir.
İqtisadi münasibətlərimiz inkişaf edir. Hökumətlərarası komissiyanın keçirilmiş iclasları göstərdi ki, əmtəə
dövriyyəsini xeyli artırmağa gözəl imkanlar var. Hökumətlərarası komissiya çərçivəsində humanitar əlaqələr
63
sahəsində razılaşmalar əldə olunmuşdur. Biz xalqlarımızın bir-birini daha yaxşı tanıması üçün mədəniyyət və
elm xadimlərimizin Qazaxıstanda, Qazaxıstan xadimlərinin isə Azərbaycanda bu proseslərdə daha fəal iştirakını
təmin etmək niyyətindəyik. Biz yaxşı qonşular, qardaşlarıq. Bizim təkcə bir problemimiz var –
necə edək ki,
münasibətlərimiz daha yaxşı, xalqlarımızın həyatı daha gözəl olsun. Əminəm ki, biz birgə səylərlə, bir-birimizə
yardım və kömək göstərməklə buna nail olacağıq.
Möhtərəm Nursultan Abişoviç, dəvətə görə Sizə bir daha təşəkkür etmək istəyirəm. Bu mənim üçün
əhəmiyyətlidir, mən bunu çox yüksək qiymətləndirirəm. Sizi əmin etmək istəyirəm ki, prezident Heydər
Əliyevin xalqlarımızın yaxınlaşması üçün Azərbaycanda apardığı xətt davam etdiriləcəkdir.
* * *
S u a l:
Siz Böyük İpək yolu çərçivəsində nəqliyyat dəhlizinin perspektivini necə qiymətləndirirsiniz?
İkinci sual, türkdilli ölkələrin ittifaqının yaradılması perspektivini necə təsəvvür edirsiniz?
N u r s u l t a n N a z a r b a y e v: Qazaxıstan Bakı–Tbilisi–Ceyhan boru kəməri layihəsini dəstəkləyir.
Biz Qafqazdan keçən nəqliyyat dəhlizinin müstəsna əhəmiyyəti olduğunu başa düşürük və bu bizim üçün də çox
vacibdir, çünki enerji daşıyıcılarımızın Azərbaycan ərazisi ilə nəqlinə böyük əhəmiyyət veririk. Hazırda
komissiyalarımız bu məsələyə dair danışıqlar aparırlar. Əminəm ki, Qazaxıstanın nefti və qazı Azərbaycandan
keçən boru kəmərləri vasitəsilə nəql olunacaqdır. Biz bu məsələləri İlham Heydəroviçlə müzakirə etdik və ilk
vaxtlar neftin bir hissəsi Xəzər dənizi ilə tankerlərlə daşına bilər. Hasilatın həcmi 20 milyon tonu
keçdikdə isə,
boru kəməri barədə düşünmək lazım gələcəkdir.
O ki qaldı türkdilli dövlətlərin əlaqələri çərçivəsində qarşılıqlı münasibətlərimizə, Qazaxıstan bu təşəbbüsü
həmişə dəstəkləyir. İndi inteqrasiya prosesləri gedir və dünyada baş verən qloballaşma baxımından bu təşəbbüs
xalqlarımızın yaxınlaşmasına kömək edəcəkdir. Ona görə də biz türkdilli ölkələr arasında əməkdaşlıq ideyasını
qətiyyətlə dəstəkləyirik.
S u a l:
Mənim sualım Azərbaycan prezidenti İlham Əliyevədir. Siz sahilyanı dövlətlər tərəfindən
Xəzərin bölünməsi məsələsinin həlli perspektivlərini necə qiymətləndirirsiniz?
İ l h a m Ə l i y e v: Hesab edirəm ki, bu məsələnin hərtərəfli həlli üçün çox yaxşı zəmin var. Qazaxıstanla
Azərbaycan, Qazaxıstanla Rusiya və Rusiya ilə Azərbaycan arasındakı sazişlər beynəlxalq hüquq və beynəlxalq
praktika normalarına əsaslanır. Bu ikitərəfli sazişlər çoxtərəfli sazişlərdə də əksini tapa biləcək bütün məsələləri
tamamilə əhatə edir. İndi Xəzərin sektorlara bölünməsi prinsipi heç kimdə sual doğurmur. Bu prinsipə lap
əvvəldən iki ölkə – Qazaxıstan
və Azərbaycan tərəfdar olmuş, sonra digərləri də qoşulmuşlar. Əminəm ki,
mövcud prinsiplər hərtərəfli saziş üçün əsas götürülərsə, biz birgə sazişə çox asanlıqla və ağrısız-acısız nail ola
bilərik.
S u a l:
Cənab Nazarbayev, mənim sualım Dağlıq Qarabağla bağlı problem barədədir. Səhv
etmirəmsə, münaqişə təzəcə başlananda Siz Qarabağa getdiniz və bu münaqişənin həllinə kömək etməyə
çalışdınız. İndi bu məsələ ilə ATƏT-in Minsk qrupu məşğul olur və prezidentimiz İlham Əliyevin dəfə-
lərlə bəyan etdiyi kimi, bu qrupun fəaliyyətində hələlik heç bir irəliləyiş yoxdur. Qazaxıstanın bu
münaqişənin tezliklə həll olunmasına kömək etmək fikri varmı?
N u r s u l t a n N a z a r b a y e v: Əlbəttə, mən bu hadisələrə elə başlandığı vaxtdan bələdəm. 1990-cı ilin
sentyabrında biz Rusiyanın gələcək prezidenti Yeltsinlə münaqişə zonasına getdik və tərəfləri razılığa gətirməyə
cəhd göstərdik. O vaxtdan münaqişə davam edir və tərəflərə heç də xoşbəxtlik gətirmir. Bundan ermənilər də,
Ermənistan
dövləti də əziyyət çəkir, Ermənistanın iqtisadi inkişafı, əhalisinin həyat səviyyəsinin yaxşılaşması
ləngiyir. Digər tərəfdən, Azərbaycanda bir milyon qaçqın-köçkün doğma torpaqlarını itirməkdən əziyyət çəkir.
Qazaxıstanın mövqeyi bundan ibarətdir ki, ərazi bütövlüyü toxunulmazdır və mövcud sərhədlər təsdiq
olunmuşdur, özü də bu fikir MDB-nin ilk sənədində və bütün beynəlxalq sənədlərdə öz əksini tapmışdır. MDB-
də hamı belə bir prinsiplə razılaşmışdır ki, respublikaların SSRİ dövründəki mövcud inzibati sərhədləri tam
razılaşdırılmışdır. Odur ki, biz davakar separatizmin hər cür təzahürünün əleyhinəyik, ərazi bütövlüyü prinsipinə
tərəfdarıq. Bu barədə Birləşmiş Millətlər Təşkilatının sənədləri var, ATƏT-in
Minsk qrupu da bununla
məşğuldur. Lakin xalqlar özləri çıxış yolunu tapmalıdırlar. Axı qonşunu seçmirlər. Buna görə də hər iki tərəf
gələcək nəsillər naminə bu məsələdə razılığa gəlməlidir. Biz isə – buna ehtiyac olarsa – öz tərəfimizdən
münaqişənin sülh yolu ilə həllinə kömək etməyə həmişə hazırıq. Mən bu prosesə dəfələrlə qoşulmuşam, prosesə
təsir göstərmək üçün müxtəlif tərəflərlə söhbət aparmışam. Zənn edirəm ki, indi hər iki dövlətin prezidentləri bu
məsələnin məqbul həllini tapacaqlar.
Bu gün Qazaxıstan kimi, Azərbaycan da yaxşı sürətlə inkişaf edir. Bizdə ÜDM-in illik artımı 11 faizdən
çoxdur. Azərbaycanın da imkanları çoxalır və bu imkanlar mövcud olan məsələlərin
sülh yolu ilə həlli üçün
istifadə edilə bilər. Millətlərarası münaqişələri tez həll etmək qeyri-mümkündür, məsələnin tərəflər üçün məqbul
həllini tapmaq üçün tədricən irəliləmək lazımdır. Mən tərəflərə bu məsələnin tezliklə həll olunmasını
arzulayıram.