İslam oyanişI

İslamın qurtuluş gəmisinə minmək

Bu gün İslam inqilabı, İslam oyanışı yeni bir fürsətdir. Tarix boyu bu fürsətlər yaranmış, lakin az olmuşdur. İslam tarixində də olmuş, lakin daha az olmuşdur. Əxlaqi və mənəvi dəyərlərin məhvi və müxtəlif maddi dalğalarla təlatümə gələn dəryada qəflətən bu xilasedici və möhkəm gəmi – İslamın kapitanlığı və Quranın rəhbərliyi ilə bu İslam gəmisi peyda olub, insanları özünə sarı dəvət etmişdir. Məsələ kiçik bir məsələ deyil. Bir xalq bu qurtuluş gəmisinə sığınıb. Digər xalqlar da gördülər ki, bir xalq İslamın qurtuluş gəmisinə minməklə tağutların və dünya hegemonlarının güc, fəsad və asılılıq boyunduruğundan necə xilas ola bilər.

İslam İnqilabının Böyük Rəhbərinin mübarək Qədiri-Xum bayramında çıxışı (15 mart, 2001)

İslam oyanışını İslam hakimiyyətinə yönəltmək vəzifəsi alimlərin öhdəsinə düşür

Bu gün xoşbəxtlikdən İslam dünyasında böyük bir oyanış yaranmışdır. Bu oyanışı düzgün istiqamətə yönəltmək lazımdır. Bu məsuliyyət İslam dünyasının alimlərinin və mütəfəkkirlərinin öhdəsinə düşür. Elə etməlidirlər ki, bu oyanış İslam hakimiyyəti ilə nəticələnsin. Düzdür, bu iş çətindir. Siz nümunəsini Əlcəzairdə müşahidə etdiniz. Əlcəzairdə azad seçkilər keçirildi, hökumətdən tamamilə ayrı olan bir qrup qələbə çaldı. Seçkiləri icra edənlərin özləri məğlub oldular. Bunun özü seçkilərin düzgün keçirilməsinə dair ən yaxşı dəlil idi. Amma eyni zamanda bu seçkiləri pozdular. Bunun üçün səbəb də uydurdular. Deyirlər ki, bu, diktaturaya sarı gedəcək bir demokratiyadır. Halbuki onlar özləri ilə tərəfdaş olan digər ölkələrdəki diktaturaları tam qəbul etmişlər. Bəlkə İslam hökumətinin diktatura hökuməti olmadığını da bilirlər. Hər halda bir bəhanə göstərilməli idilər və o bəhanə budur. Onlar bu vəziyyətin digər İslam ölkələrində də təkrar olunmasını ehtimal edirlər. Odur ki, ölkələrdə seçkilərin keçirilməsində BMT-nin iştirakını zümzümə edirlər. BMT Amerika deməkdir; yəni veto hüququna malik olan dövlətlər və ilk növbədə Amerika. Bunun mənası odur ki, əgər hansısa ölkədə İslamın seçki yolu ilə qələbə çalması ehtimal olunsa, Amerika zahirən qanuni bir yolla oraya müdaxilə etməli və buna mane olmalıdır. Müsəlmanlar belə bir təxribatın qarşısında dayanmalıdırlar.

Şəfəq ongünlüyü mərasimində iştirak edən xarici qonaqlarla söhbət ( 3 fevral, 1992)

Oyanış, ümid və hərəkət – Amerikanı yerində oturtmaq üçün lazım olan amillər

Bu gün sərvəti çox, imkanları modern, texnologiyası və elmi mütərəqqi olsa da, dünya xalqlarını öz zoru ilə təhqir edən, zalım və təcavüzkar şeytan olan Amerika kimi zülmkar bir dövləti bizim İslam regionumuzda asanlıqla yerində oturtmaq mümkündür; bu şərtlə ki, müsəlman xalqlar öz gələcəklərinə ümidvar olsunlar, ürəkdən və ümidlə ayağa qalxıb hərəkət etsinlər. Xoşbəxtlikdən xalqlar çox oyanmışlar. Lakin söhbət təkcə oyanmaqdan getmir, oyandıqdan sonra hərəkət etməlidirlər və bu hərəkətin ümidvarlığa ehtiyacı var.

Həzrət İmam Xomeyninin(r) tarixi hökmünün şərhi seminarında iştirak edən daxili və xarici qonaqlarla, xalqın müxtəlif təbəqələrilə görüşdə çıxış ( 2 mart, 1991)

İslam inqilabının həyata keçməsində özünüislah və bəndəliyin təsiri

İslamın əzəməti tarix boyu müsəlmanları yetişdirmiş və həqiqətən Allah bəndəliyi üçün hazırlamışdır. Əgər İran xalqı Allah bəndəliyinə hazır olmasaydı, bu əzəmətli hərəkatı yaradıb dünya müsəlmanları arasında İslam cəmiyyətinin örnəyi, hətta bütün məzlum xalqlar arasında mücahidlik, fədakarlıq, oyanış və agahlıq nümunəsi kimi tanınmazdı. Əgər bu gün də İran xalqı bu ağır əmanəti daşımaq və ideal məqsədə çatdırmaq istəyirsə, özünüislahdan başqa heç bir yolu yoxdur.

Fitr bayramı namazının xütbələri ( 27 may, 1990)

İslam həyat tərzi xalqların haqqıdır!

Biz bütün dünyada İslam oyanışını müdafiə edirik, dünyanın müxtəlif yerlərində öz İslam həyatına və İslam mədəniyyətinə qayıtmaq istəyən müsəlmanları dəstəkləyirik; çünki haqq onlarladır. Bu gün dünyada eşidilənlərin hamısı eyni deyil, şüarların hamısı bir həqiqəti nəzərdə tutmur. Dünyada müsəlmanların işləri barədə yürüdülən mühakimələr hamısına qarşı eyni mühakimələr deyil. Lakin bizim üçün qəti olan məsələ müsəlmanların İslama qayıdışıdır. Bu gün dünya müsəlmanlarının İslamı və Quranı uca tutmağa haqları var; uca tutacaqlar da, İslam həyat tərzinə qayıdacaqlar da, çalışmaların və əzmələrin də heç bir faydası olmayacaq.

Tehranın cümə namazı xütbələri ( 9 fevral, 1990)

Əqsa məscidi - mübarizə və oyanış mərkəzi!

Dünyanın müxtəlif bölgələrində İslam düşmənləri insan hürriyyətinin mərkəzi, onun Allahla rabitə yeri, zər və zor şeytanlarının şeytənətindən məlumat əldəetmə mərkəzi olan məscidlərə dərin nifrət və ədavətlə baxırlar, onların varlığı və fəaliyyətlərinə qarşı var gücləri ilə vuruşurlar. İndi müsəlmanların ikinci qibləsi və Allahın lütfü ilə oyanış və mübarizə mərkəzi də olan Əqsa məscidi mənfur sionistlərin hörmətsizliyinə məruz qalmışdır. Fransa və Hindistanda da məscidlər hörmətsizliyə məruz qalmış və uçurulmuşdur.

Bəsic komandirlərinin ümumrespublika toplantısına müraciət ( 23 noyabr, 1989)

Erkən İslam çağı hadisələri - müsəlman xalqlar üçün nümunə

Baxın, erkən İslam çağı səhnəsi bizim üçün örnəkdir. İddia etmək istəmirəm ki, bizim bütün hadisələrimiz eynilə erkən İslam çağının hadisələrinə bənzəyir. Xeyr, dünya dəyişmişdir, məqsəd və formalar dəyişilmişdir. Lakin erkən İslam çağı çox mürəkkəb, sənətkarcasına işlənmiş və sistematik bir tablodur. İslam ümmətinin bu günədək və əbədi olaraq tarixi həyatının müxtəlif hissələrini bu tablonun parçalarında müşahidə etmək olar. İnsan bu hissələrin hər hansı birini nəzərə alsa və öz dövrü ilə uyğunlaşdırsa, dərk edə bilər.

İslam Vəhdəti konfransının iştirakıçıları ilə görüşdə çıxış ( 20 fevral, 2011)

İslam vəhdətinin təsiri və xalqların həmdərdliyi

İslam birliyinin ilk təsiri xalqların bir-birinin dərdinə şərikliyi olmalıdır; bir xalq sevinəndə digərləri də sevinsinlər, qəmgin olanda digərləri də qəmgin olsunlar, biri çətinlikdə olanda digərləri də ona şərik olsunlar, kömək istəyəndə kömək etsinlər. Bu bizim vəzifəmizdir. Bu zaman irəliləyiş olacaq. Biz Allahın vədini qəbul edirik, ona əminik və etiqadlıyıq: “Bizim uğrumuzda çalışanları (cihad edənləri) öz yollarımıza yönəldəcəyik”. Və Allah-Taala heç şübhəsiz, mömin xalqa kömək edəcək.

İslam Vəhdəti konfransının iştirakçıları ilə görüşdə çıxış ( 20 fevral, 2011)