İslam oyanişI

Birinci fəsil: İslam oyanışının zərurətləri

Maddi sivilizasiyaların xalqlara ağır yük olması

Bu gün dünya maddi sivilizasiyadan qaynaqlanan ağır boyunduruqlardan təngə gəlmişdir və qurtuluş yolu axtarır. Bu gün sizin Misir və Tunis kimi bəzi İslam ölkələrində müşahidə etdiyiniz İslam oyanışı bəşəriyyətin mövcud durumdan cana yığılmasının bir nümunəsidir. Şeytanlar (insan şeytanlar cin şeytanlardan daha təhlükəlidir) xalqın həyatına hakim olduqda, onun ictimai həyatına, xüsusi həyatına, iqtisadiyyatına, dərkinə və baxışına müdaxilə edən dünya hegemonları insanları azğın yollara sürükləyirlər. Həyata qaranlıq çökür və bu ağır, qaranlıq mühit insanların fitrəti ilə uyğun olmadığından, nəhayət fitrət oyanır. Bu gün dünyada baş verən budur. Maddi güclərə əsir olan Qərb dünyası da bu hökmranlıqdan təngə gəlmişdir. Əgər biz müsəlmanlar İslamı düzgün tanıtdıra bilsəydik, əgər öz əməllərimizi İslamla uyğunlaşdıra bilsəydik, əmin olun ki, dünya bütövlüklə İslama yönələrdi. Zəiflik bizdədir, nöqsan bizdədir. Quran və Peyğəmbər (s) buyuruqlarının ilk ünvanları bizik; özümüzü islah etməliyik.

Peyğəmbərin (s) doğum günündə hakimiyyətin məsul şəxsləri ilə görüşdə çıxış (21 fevral, 2011)

Misirdə İslam hərəkatını gücləndirməyin zəruriliyi

Bu gün Misirdə, Tunisdə və digər yerlərdə xalq səhnədədir. Bu yönəldilməlidir. Düşmənlər bu hərəkatı qeyri-islami hərəkat kimi göstərməyə çalışırlar. Bu yanlışdır; heç şübhəsiz, İslam hərəkatıdır. Misirin keçmişi də bunu göstərir, bu günü də. Xalqın şüarları, cümə namazında iştirakı da buna sübutdur. Buna görə, heç şübhəsiz, İslam hərəkatıdır; düşmənlər Misirdə, yaxud başqa yerlərdə bunun İslam hərəkatı kimi möhkəmlənməsinin qarşısını almağa çalışsalar da. Bu hərəkatı gücləndirmək lazımdır.

İslam Birliyi Konfransının iştirakçıları ilə görüşdə çıxış (20 fevral, 2011)

Xalqların İslam hökmlərinə ehtiyacı

Bu gün xalqların İslam hökmlərinə ehtiyacı var. Bu gün nəinki müsəlman xalqların, hətta müsəlman olmayanların da İslam hökmlərinə ehtiyacları var. Xalqların böyük güclərin ağır zəncirləri altında əzilib əziyyət çəkmələri İslamdan uzaq düşmələrinə görədir. İslam oyanışı xalqları xilas edəcək. Odur ki, bu gün müxtəlif ölkələrdə ən ağıllı insanlar Quranın göstərdiyi İslam xəttinə üz tutmuşlar. Çünki bu, izzət və qurtuluş yoludur. Hal-hazırda İslam dünyası əmmaməlilərin, ruhanilərin, alimlərin, natiqlərin, vaizlərin, dini tələbələrin, məscid imamlarının, təbliğat, dəvət və din libasına bürünmüş bütün şəxslərin bütün varlığı ilə ifa edə biləcəyi rola ehtiyaclıdır.

Mübarək ramazan ayı ərəfəsində ölkənin müxtəlif bölgələrinin ruhaniləri, məscid imamları və vaizləri ilə görüşdə çıxış (13 mart, 1991)

İslam əsasında cəmiyyət və mədəniyyət qurmaq

Bəllidir ki, İslamın ən böyük məqsədlərindən biri olan cəmiyyət və mədəniyyət qurmaq işinin düşmənsiz olması mümkün deyil. Erkən İslam çağında da İslam üsul-idarəsinin və İslam cəmiyyətinin təşkil edilməsi ilə düşmənçilik edildi. Bu gün də belədir. Bu gün İslam dünyasında müsəlman xalqlar özlərində İslama münasibətdə qürur ruhiyyəsi duyur, İslama görə iftixar hissi keçirirlər. İslam oyanışı real bir həqiqətdir - İslam ümmətinin düşmənləri istəsələr də, istəməsələr də! Bu yolla getmək üçün ölkələrin məsul şəxslərinin güclü iradəsi lazımdır.

İslam İnqilabının Böyük Rəhbərinin mübarək Məbəs bayramında hakimiyyətin məsul şəxsləri ilə görüşdə çıxışı (24 sentyabr, 2003)

İmperializmin İslam dünyasının təbii və insani mənbələrinə göz dikməsi

On illər öncəki təlimlərin və onlara qayıdışın sayəsində müasir dövrdə İslam oyanışı başladı, tövhid bayrağı yenidən dalğalandı. Bu hərəkətin zirvəsi İslam dünyasının bu həssas nöqtəsində İslam Respublikasının təşkil edilməsi idi. Onda da bütün müsəlmanlar şəxsiyyət və izzət duydular. Biz bu gün, tənəzzül və süqutun başlandığı əsrlərdə İslam ümmətinin üzləşdiyi bir təcrübə ilə qarşı-qarşıya qalmışıq. Bu gün də bu hərəkəti beşikdə boğmaq üçün İslam ümməti əleyhinə müharibəyə başlayıblar. Bu gün də tamahkar və hegemon qüvvələr İslam dünyasının tükənməz təbii və insani ehtiyatlarına və əzəmətli qaynaqlarına tamah salıb (bunu özləri açıqcasına deyirlər) bir müharibəyə başlayıblar. Bu müharibənin hegemonluq tərəfindən olan bayraqları aldadıcı demokratiya və azadlıq bayrağıdır. Lakin məsələnin məğzi başqadır. Əsl məqsəd İslam ümmətinin başucalıq amilini, yəni İslamı məhv etməkdir. Əsl məqsəd müqavimət mərkəzini məhv etməkdir ki, bu regionda işğalçıların qarşısında heç bir maneə mövcud olmasın.

Əziz İslam Peyğəmbərinin (s) risalət məqamına çatdığı mübarək Məbəs günü münasibətilə İslam İnqilabının Böyük Rəhbərinin hakimiyyətin məsul şəxsləri ilə görüşdə çıxışı ( 14 sentyabr, 2004)

İslam dünyası imperializmin əsas problemidir

Hegemonlar üçün əsas məsələ İslam dünyasıdır. Onlar bir milyarddan artıq cəmiyyəti olan, günün ehtiyacı sayılan maddi və təbii sərvətlərin böyük bir hissəsinə sahib olan və bu gün İslamın yeni ruhu, hərəkatı və oyanışı üzərində mücadilə aparan İslam dünyasını məhv etmək istəyirlər. Onların məqsədi İslam dünyasıdır.

İslam İnqilabının Böyük Rəhbərinin Qurani-kərimin 21-ci beynəlxalq müsabiqəsində iştirak edən qiraətçilərlə görüşdə çıxışı ( 17 sentyabr, 2004)

İslam oyanışı və İslam birliyi imperializmin hökmranlığına mane olur

Şübhə etmək lazım deyil ki, imperialist dünya müsəlmanların oyanışını, İslam birliyini, bizim xalqlarımızın elm, siyasət və yenilik sahələrində inkişafını öz qlobal hökmranlığına maneə sayır və var-gücü ilə onunla vuruşur. Müstəmləkəçilik və modern müstəmləkəçilik dövrlərinin təcrübəsi biz müsəlman xalqların gözü önündədir. Postmodern müstəmləkəçilik dövrü olan bugünkü gündə o təcrübələrdən dərs almalı və növbəti dəfə düşməni öz taleyimizə hakim etməməliyik.

İslam İnqilabının Böyük Rəhbərinin Böyük Həcc Konfransı münasibəti ilə müraciəti ( 9 yanvar, 2005)

İslam dünyasına hökmranlığını möhkəmlətmək istəyən imperializm

İndi İslam dünyasının bəzi nöqtələrində mübarizlərin fədakarlığı, rəhbərlərin qorxmazlığı və sədaqəti sayəsində İslam oyanışı öz dairəsini genişləndirib, bir çox İslam ölkələrində gəncləri, görkəmli şəxsləri və bütün xalqı meydana çəkdiyindən, hökmranlıq istəyində olanların qəddar siması bir çox müsəlman siyasətçilərə və rəhbərlərə aşkar olduğundan, imperializm başçıları İslam dünyasına hökmranlığı davam etdirmək və möhkəmlətmək üçün yeni üsullar axtarırlar.

İslam İnqilabının Böyük Rəhbərinin Böyük Həcc Konfransı münasibəti ilə müraciəti ( 9 yanvar, 2005)