330
Comərdlik də müsbət əxlaqi keyfiyyətdir. İnsanların
gündəlik münasibətlərində insanlıq forması kimi çıxış edir; bu
zaman humanizm hər bir kəs üçün tətbiq olunur. Məsələn,
əxlaqi şüurda aşağıdakı comərdlik halları göstərilir: başqasının
mənafeyinə görə özünü qurban vermək, ziyan vuranı və yaxud
bəd əməl edəni cəzalandırmaqdan imtina etmək, məğlub olana
humanist münasibət göstərmək və s. Xristian əxlaqında
comərdlik hamını bağışlamaq kimi başa düşülür. İnsanlara kini
ürəkdə saxlamamaq tövsiyə olunur, öz düşmənlərini sevmək
məsləhət görülür. Comərdliyin əksi insanlara qarşı tələbkar
olmamaq, bəd əməllərə göz yummaq və s-dir.
Qorxaqlıq ürəksizliyin ifadələrindən biridir. Mənfi
əxlaqi keyfiyyətdir. Əxlaqi tələblərə uyğun olan hərəkətləri edə
bilməyən insan davranışını xarakterizə edir. Qorxaq insan təbii
və yaxud ictimai qüvvələr qarşısında acizlik edir. Bəzən insan
kimdənsə, nədənsə qorxur, məsələn, işini itirmək, ictimai
nüfuza xələl gətirmək və s. Qorxu şüuraltı da ola bilər: insan
bilmədiyi, başa düşmədiyi ictimai və təbii qanunlar qarşısında
aciz qalaraq qorxmağa başlayır. Hər halda qorxu sosial
hadisədir, müəyyən mənada eqoizm ilə bağlıdır.
Sədaqət elə bir əxlaqi keyfiyyətdir ki, şəxsiyyətin əxlaqi
tərəfini xarakterizə edərək, cəmiyyətin, qrupun, qurumun
işlərinə sabit bağlılığını, verilən sözə əməl edilməsini, dostluq,
sevgi, nikah və s. münasibətləri ilə bağlı olduğu digər insanlarla
əlaqələrin davamlılığını bildirir. Sədaqət bir çox başqa, o
cümlədən hər hansı bir ideal, seçilən yolun doğru olmasına
inam, hərəkətlərdə, əqidədə ardıcıllığı tələb edən prinsipiallıq,
çətinliklərə qarşı dözümlü olmaq, fədakarlıq və s. əxlaqi
keyfiyyətlərlə sıx bağlıdır. Adları çəkilən keyfiyyətlərin
olmaması sədaqətin pozulmasına, xəyanətə gətirib çıxara bilər.
Sədaqət şəxsiyyəti yalnız formal cəhətdən xarakterizə
edir, onun hərəkətlərinin məzmunundan heç bir xəbər vermir.
Deməli, sədaqəti, onun dərəcəsini müəyyən etmək üçün, işin
məzmununa və mahiyyətinə varmaq lazımdır. Sədaqət çox
331
mühüm əxlaqi keyfiyyət olaraq tarix boyu formalaşmışdır.
Vətənpərvərlik də sədaqət üzərində qurulur.
Xainlik və yaxud vəfasızlıq da əxlaqi keyfiyyətdir.
Mənfi keyfiyyət olaraq o, kiminsə etibarının pozulmasına
istiqamətlənən məkrli hərəkətlərini, öhdəsinə götürülən
vəzifələrinin yolverilməz, biyabırcı şəkildə pozulmasını
bildirir. Xainlik dedikdə ilk növbədə aşağıdakı hərəkətlər
nəzərdə tutulur: verilən sözə, bağlanan razılığa, həmrəylik,
dostluq, sevgi kimi keyfiyyətlərə əsaslanan vəzifələrə
bilərəkdən əməl edilməməsi, paxıllıqdan, nifrətdən irəli gələn
başqa insana böhtan atmaq, başqasının pis vəziyyətindən,
bədbəxt hadisəsindən öz xeyrinə istifadə etmək, verilən andı
pozmaq, sonradan pozmaq niyyətilə and içmək, adamı
bilərəkdən aldadıb sonradan bu haldan özü üçün faydalanmaq,
başqa adamın əleyhinə olan məqsədlərə nail olmaq üçün onun
maraq, mənafə, bilməməzliyindən istifadə edərək intriqa, fitnə,
fəsad yaratmaq və s.
Qarşılıqlı yardım müsbət əxlaqi keyfiyyətdir. Belə
vəziyyət ümumi maraq və məqsədlər şəraitində yaranır. Burada
səylərin birləşdirilməsi, eyni zamanda vəzifə bölgüsü, hər bir
kəsin fərdi səyləri, qarşılıqlı dəstəyi nəzərdə tutulur. Qarşılıqlı
yardım insan cəmiyyətində formalaşmış əmək bölgüsündən
irəli gəlir. Əməyin ictimai xarakteri bir çox adamların ümumi
səylərini, bu səylərin birləşdirilməsini tələb edir. Belə
olmasaydı, maddi və mənəvi mədəniyyət zənginliyi
yaranmazdı. Qarşılıqlı yardımın təməli hələ ibtidai cəmiyyətdə
qoyulmuşdu.
Günah və yaxud günahkarlıq (nahaqlıq) elə bir
vəziyyətdir ki, haqqın əksi olaraq, insan tərəfindən pis əməlin,
cinayətin görülməsi nəticəsində özünün düşdüyü vəziyyəti
xarakterizə edir. Günahkarlıq əxlaqi vəziyyətin ifadəsi olaraq
şəxsiyyətin digər insanlara, bütövlükdə cəmiyyətə qarşı
düşdüyü vəziyyəti xarakterizə edir. İnsan öz əməllərinə görə
cəmiyyət qarşısında məsuliyyət daşıdığına görə, öz əxlaqi
332
borcunu yerinə yetirmədiyi üçün günahkar sayılır. Hüquq
elmində və praktikasında insanın günahkar olub – olmaması
xüsusi prosedurlar əsasında müəyyənləşdirilir.
Əxlaqda günahkara qarşı yalnız məzəmmət, töhmət
tətbiq olunur. Əgər insan öz günahını boynuna alırsa, o vicdan
əzabını çəkir, utanır, peşman olur, bəzən də cəzasını gözləyərək
qorxu hissini keçirir. Dini əxlaqda günah insanda əzəldən, “ilk
günah”ın nəticəsi olduğu sayılır. Burada günahın yuyulması
Allahın mərhəməti ilə əlaqələndirilir. Eksiztensializmin
banilərindən biri sayılan M.Heydegger hesab edirdi ki,
günahkarlıq insan mövcudatının cuziliyindən irəli gələn insanın
daimi durumu olaraq, onun ölməyi ilə bitir. Bəzi tədqiqatçlar
(məsələn, marksistlər) isə göstərirdilər ki, günah müvəqqəti hal
olaraq insanın konkret durumu ilə bağlıdır.
Haqqın (əvəzin) verilməsi əxlaqi dəyərlərə uyğun olaraq
insanın gördüyü əmələ görə həyata keçirilən hərəkətdir. Haqqın
verilməsi ədalətin zəruri tələblərindən biri sayılır. Haqqın tələbi
olmadan insanlardan hər hansı bir davranış qaydalarının tələbi
mümkünsüz sayılırdı. Əvəzin verilməsi prinsipi hüquqda da
tətbiqi olunur (cinayətin ölçüsü və ağırlığına görə cəza),
ümumiyyətlə, insan fəaliyyətinin maddi stimullaşdırılmasının
əsasında durur.
Bəzən elə bir vəziyyət yaranır ki, insan şəxsi
maraqlarını ictimai maraqlardan üstün tutur, nəticədə haqqın
verilməsi prinsipi pozulur. Dini əxlaqda, məlum olduğu kimi,
haqqın verilməsi axirət dünyasına aid edilir. İnsanın mənəvi
cəhətdən kamil olması o dünyada haqqın verilməsinə bir
zəmanətdir. Hal-hazırda əxlaqi sanksiyalar mükafatlandırma və
cəzalandırma sahələrinə bölünür.
Doğruluq əxlaqi keyfiyyət olaraq onu bildirir ki, insan
düz danışmağı özünə adət edərək, real vəziyyəti heç kəsdən
gizlətmir. Doğru olmaq, düz danışmaq insanların həqiqəti
bilmək arzusu ilə bağlıdır. Real həyatda heç də həmişə belə
olmur. Bəzən yalanın yerinə düşməsini qeyd edirlər. Bununla
Dostları ilə paylaş: |