Mehman Süleymanov
78
qoşunla Qarabağa gəlmək niyyətində idi. Polkovnik Karyaginin sözlərinə
görə, Fətəli şah Gəncə üzərinə irəliləməyi planlaşdırırdı. Şahın özünün
qoşun dəstəsi ilə Qarabağa gəlməsi ehtimalı polkovnik Karyaginin onsuz
da ağır vəziyyətdə olan dəstəsinin vəziyyətini çıxılmaz edə bilərdi. Ərzaq
ehtiyatı qurtardığı üçün dəstə üzvləri ot və dəstədə olan atların ətini
yeməklə dolanırdılar. Polkovnik Karyaginin yazdığına görə, qərar
tutduğu qala Abbas Mirzə tərəfindən mühasirə olunmuşdu və Abbas
Mirzənin fikrincə, rusların ona təslim olmaqdan başqa yolu yox idi.
Polkovnik Karyagin bildirirdi ki, Sisianovun gözlənilən cavabının gəti-
rilməsi üçün Abbas Mirzə qala üzərinə hücumlar ara vermişdi. Yoxsa,
polkovnik Karyaginin artıq ona müqavimət göstərmək gücü yox idi.
İbrahim xandan və mayor Lisaneviçdən də ona kömək gəlmədiyini
polkovnik Karyagin təəssüflə Sisianovun diqqətinə çatdırırdı (75).
General Sisianovun yenə də təsəlli verməkdən başqa heç nəyə gücü
çatmadı. Bir gün sonra erməni bələdçi ilə Sisianov polkovnik Karyaginə
göndərdiyi məktubda yeni hərbi qüvvələrin hələ yetişmədiyini və həmin
qüvvələrin bir neçə gündən sonra yetişəcəyini bəyan edirdi. Sisianov vəd
edirdi ki, bu qüvvələr yetişənə kimi dərhal Qarabağa yola düşəcəkdir.
Sisianov eyni zamanda polkovnik Karyaginin adından Abbas Mirzəyə
məktub yazdırdı və onu da polkovnik Karyaginə yolladı. O da öz növbə-
sində bu məktubu Abbas Mirzəyə göndərməli idi. Həmin məktubun məz-
munu ondan ibarət idi ki, Rusiya dövlətinin sərhədi Kür və Araz
çaylarından keçir. Sərhəd xəttinə qədər olan ərazilər Rusiya əraziləridir
və rus hərbçiləri də bu ərazilər uğrunda qanlarını tökməyi özlərinə
xoşbəxtlik bilirlər (76).
Bu məktubun Abbas Mirzəyə çatıb-çatmadığını söyləmək çətindir.
Amma Abbas Mirzə polkovnik Karyagindən təkidlə təslim olmağı tələb
edirdi. Polkovnik Karyagin isə son cavabı verməyi uzadırdı. Nəhayət,
general Sisianovdan kömək gəlməsinə ümid olmadığını biləndə xəlvəti
şəkildə mühasirədən çıxmağa cəhd göstərməyi qərara aldı. O əvvəlcə
Abbas Mirzəyə məktub göndərdi və təslim olmağa hazırlaşması ilə ona
ümidverici mövqe çatdırdı. Sonra polkovnik Karyagin dəstəsi ilə gizli
olaraq qaladan çıxıb Cermuq dərəsinə doğru irəlilədi. Aldığı cavabdan
arxayın olan Abbas Mirzə və onun sərkərdələri rus dəstəsinin
yoxluğundan vaxtında xəbər tuta bilmədi. Rus dəstəsi Cermuq
dərəsindəki qalaya doğru iki gün yol getmiş olduqlarından şah qüvvələri
onları yaxalaya bilmədilər. Bir müddət burada qalıb qüvvələrini bərpa
edən rus dəstəsi sonra Murov dağının xəlvət yolları ilə Gəncəyə tərəf
hərəkəti davam etdirdi (77).
Gülüstan müqaviləsi
79
Polkovnik Karyaginin dəstəsi böyük itkilər verərək geri dönsə də, şah
qoşunları Qarabağda qalmaqda idi. Bu isə nəinki mayor Lisaneviçin
dəstəsinin, habelə bütünlükdə Qarabağın itirilməsinə təhlükə yaradırdı.
Ona görə Sisianov qərar qəbul etdi ki, öhdəsində olan qüvvələri səfərbər
edib Qarabağa doğru hərəkət etsin. Onun İbrahim xana yazdığı
məktubuna əsasən müəyyən etmək olar ki, 1805-ci il iyul ayının 12-də
Sisianov ixtiyarında olan dəstə ilə Gəncədən Qarabağa doğru hərəkətə
başladı. Həmin məktubunda Sisianov nəvəsini girov kimi hələ də Tiflisə
göndərmədiyi üçün İbrahim xanı hədələməklə ondan rus dəstəsinə yem
və azuqə toplanmasını da tələb etdi (78).
General Sisianovun dəstəsinə Tiflis muşketyor alayının qrenadyor
taboru, Sevastopol alayının iki taboru, 9-cu yeger alayının 10 bölüyü, 10
ədəd top və 109 nəfər kazak daxil idi.
Dəstənin ümumi şəxsi heyəti 2371 nəfər idi. Rus mənbələrinə görə,
bu dəstə 4 gün yol getdikdən sonra Tərtər çayının sahilinə çatdı (79).
Sisianov ixtiyarında olan dəstə ilə Qarabağa doğru yola düşəndə
polkovnik Karyagin hələ Gəncəyə çatmamışdı. Lakin təhlükəli şəraitdən
çıxmağa imkan tapmışdı. Sisianov onun dəstəsinin vəziyyətini
yüngülləşdirməklə bərabər, həm də Qacar qoşunlarını Qarabağ xanlığı
ərazisindən uzaqlaşdırmağa çalışmalı idi. Sisianovun yazdıqlarına görə,
o, Gəncədən Qarabağa doğru hərəkətə başlayanda Fətəli şah rəhbərlik
etdiyi qoşun dəstəsi ilə Araz çayını keçərək Qarabağ ərazisinə daxil
olmuşdu (80). Farsdilli mənbələrdə isə bu məlumat birmənalı şəkildə
təsdiqlənmir. Mirzə Məhəmməd Sadıq Vəqayeneqar yazırdı ki, Fətəli şah
Sisianovun Qarabağa hərəkət xəbərini alan kimi qoşunları hərəkətə
gətirdi, Araz çayını keçərək Aslandüzdə düşərgə saldı (81). Aslandüzün
Arazın cənubunda olduğunu nəzərə alsaq, müəllifin bu cümlələrindən
aydın olmur ki, Fətəli şah qoşunları ilə Qarabağ ərazisinə daxil oldu ya
yox.
Havaların çox isti olması ilə bağlı general Sisianovun dəstəsi çox
ləng hərəkət edirdi. İyulun 14-də Sisianovun dəstəsi Tərtər çayına yetişdi
və elə həmin gün də Qacar qüvvələrinin hücumuna məruz qaldı. Bu
hadisə farsdilli mənbələrdə də təsdiqlənir. Bildirilir ki, Sisianovun dəstəsi
ilə Tərtər çayı yaxınlığına yetişməsi xəbəri alınan kimi Abbas Mirzənin
tapşırığına əsasən, İsmayıl bəyin rəhbərliyi altında ruslara qarşı qoşun
dəstəsi göndərildi. İsmayıl bəyin dəstəsi hərəkət zamanı rus atlıları və
piyadaları ilə qarşılaşdı. Mənbənin məlumatına görə, İsmayıl bəyin dəs-
təsi rusların bir hissəsini qırdı, bir hissəsini də əsir götürdü və sonra da
Abbas Mirzənin dəstəsinə geri döndü. Bildirilir ki, bu döyüşdən sonra
Sisianov daha irəli hərəkət edə bilmədi.