Mehman Süleymanov
70
Abbas Mirzə qoşunlara istirahət vermədən dərhal Əsgəran istiqamətinə
yollanmağı qərarlaşdırdı. İsmayıl bəy qoşun çərxçisi təyin edildi. Tanınmış
sərkərdələr olan Pirqulu xan Qacar, Əli xan Qovanlı, Sadıq xan Əzadanlı atlı
dəstələrin rəhbərləri təyin edildilər. Fərahani və Kəzzaz tüfəngdarları Hacı
Allahverdi xan Qacarın rəhbərliyi altına verildilər. Qoşun dəstəsi yenidən
qruplaşdırıldı və Abbas Mirzə qoşunların mərkəzində mövqe tutdu. Axşam
qürubuna üç saat qalmış Abbas Mirzənin qoşun dəstəsi Əsgəran yaxınlığına
yetişdi (57).
Əsgərana yaxınlaşmaqda olan rus dəstəsi polkovnik Karyaginin rəhbərliyi
altında olan dəstə idi. Tərkibində 16-cı yeger alayının 400 döyüşçüsü və iki
topu olan bu dəstə iyun ayının 21-də hərəkətə başladı və həmin ayın 24-də
Əsgəran yaxınlığındakı Şahbulaq çayına yetişdi. Elə burada da Karyaginin
dəstəsi Abbas Mirzənin döyüşçüləri ilə üzbəüz gəldi və tərəflər arasında qanlı
döyüş başladı. Rus mənbələrinə görə, şah qoşunları 3 min nəfərlik bir dəstə
idi. Amma bu dəstənin sürətli hücumu Karyaginin dəstəsini uzun müddət
müdafiə olunmağa məcbur etdi. Arada yaranan fürsətdən istifadə edərək rus
dəstəsi axşama yaxın Əsgərana yetişə bildi. Daha irəliləmək mümkün
olmadığı üçün rus dəstəsi Qarağacı məntəqəsindəki müsəlman qəbiristan-
lığında mövqe tutmalı oldu (58).
Həmin qəbiristanlıq döyüş aparmaq tutmaq üçün elə də münasib bir yer
deyildi. Çoxsaylı təchizat arabaları ilə qəbiristanlıq daxilindəki dar cığırlarla
irəliləmək çətin idi. Amma Karyagin geri qayıdıb Şahbulaqda mövqe tutmağı
da məqsədəuyğun saymadı. Şah qoşunlarının təhlükəsindən qorunmaq üçün
ruslar arabalardan dövrə qurdular, onların ətrafında xəndək qazdılar, xəndək
boyunca isə daşlar düzdülər. Toplar atəş vəziyyətinə gətirildi. Abbas Mirzə
rusların bu müdafiə tədbirlərindən heç də çəkinmədi və öz tüfəngdarlarına
müvafiq mövqelər tutmağı əmr etdi. Fars mənbələrinə görə, Fətəli şah
oğlunun rəhbərliyi altında olan qoşun dəstəsinin ruslarla qarşılaşdığını eşitcək
Damğani dəstəsini və öhdəsində 4 top olan Hüseynqulu xan Qacarı da Abbas
Mirzənin köməyinə göndərdi. Bu qüvvələrin Əsgəran ətrafına yetişməsi
Abbas Mirzənin zərbə qüvvəsini daha da gücləndirdi (59).
Güclənmiş şah qüvvələri dərhal rusların müdafiə mövqelərinin üzərinə
hücuma keçdilər və tərəfələr arasında ciddi bir döyüş başladı. Bu döyüşlə
rusların mövqelərini ələ keçirmək mümkün olmasa da hər halda onların
Şuşaya irəliləmək niyyətinin qarşısı alındı. Rus mənbələrinə görə,
Karyaginin dəstəsindən 33 nəfər öldürüldü və 164 nəfər yaralandı. Atlar
arasında da itkilər çox idi. Polkovnik Karyagin üç güllə yarası aldı, onun
köməkçisi mayor Kotlyarevski isə ayağından yaralandı. Ona görə də pol-
kovnik Karyagin Şuşa qalasına doğru irəliləmək imkanını əldən verdi
(60).
Mehman Süleymanov
72
Farsdilli mənbələrdən biri həmin döyüşü təsvir edərkən yazır ki,
Abbas Mirzə rus qoşun dəstəsinin yaxınlaşması xəbərini eşidən kimi
qoşunları Allahverdi xan Xəzinədara və Mehdiqulu xan Qovanlıya
tapşırdı. Özü isə İsmayıl xan Damğani, Pirqulu xan Şambayati, Əlixan
Qovanlı, Sadıq xan Əzadanlı, habelə Fərahani, və Kəzzazi atlıları və
piyadaları ilə Əsgərana tərəf yola düşdülər. Bu yürüşdə onu bir neçə top
da müşayiət edirdi. Dəstə axşama yaxın Sisianovun göndərdiyi qüvvə-
lərlə rastlaşdı və dərhal da döyüşə girdi. Hava qaralana kimi tərəflər
arasında döyüş davam etdi. Mənbə döyüşün ağır keçdiyini və Abbas Mir-
zənin bu döyüş zamanı xüsusi mərdanəlik nümayiş etdirdiyini xəbər
verir. Hücum zamanı Sadıq xan Əzadanlı yaralandı, bir neçə dəstə başçısı
isə dünyasını dəyişdi. Döyüş kifayət qədər gərgin keçdiyi üçün Pirqulu
xan Qacar şahın yanına çapar göndərdi və ondan kömək istədi. Rus
qoşun dəstəsinin qəbiristanlıqda yerləşməsi, gecə ikən müdafiə xətti
boyunca rusların xəndək qazmaları faktı bu mənbədə də təsdiq olunur.
İkinci gün səhər tezdən tərəflər arasında döyüş davam etdi. Həmin gün
Kəzzazi və Fərahani tüfəngdarları ətraf yüksəkliklərdə mövqe tutdular,
atlılar isə üç tərəfdən rus mövqeləri üstünə hücumu davam etdirdilər (61).
Ümumən, bu döyüş zamanı polkovnik Karyaginin dəstəsi kifayət
qədər ağır bir vəziyyətlə üzləşdi. Sisisnovun bu vəziyyətdən xəbər tutub-
tutmadığını söyləmək çətindir. Hər halda Sisianov bu ümiddə idi ki, pol-
kovnik Karyaginin ön dəstəsi çətin şəraitlə üzləşəcəyi təqdirdə İbrahim
xan və mayor Lisaneviç onun köməyinə çata bilərdilər.
Sisianovun ümid etməsinə baxmayaraq İbrahim xan polkovnik
Karyaginə kömək göstərmədi. Rus generalı bundan da çox qəzəbləndi və
iyunun 23-də İbrahim xana göndərdiyi məktubunda öz qəzəbini açıq
bəyan etdi. Sisianov İbrahim xana belə yazırdı: “...Siz istəyirsiniz ki, mən
özüm qoşunla gəlim və sizin əvəzinizə farslarla döyüşüm? Siz isə öz
tərəfinizdən Rusiya qoşunlarına azacıq da olsa kömək etməyəsiniz? Siz
polkovnik Karyaginə heç bir kömək etmədiniz ki, o, mayor Lisaneviçlə
görüşsün və Şuşa qalasına gəlsin” (62).
İbrahim xan vəd etmişdi ki, Qarabağa göndərilən Karyaginin
dəstəsinin azuqə və təchizat məsələlərinin həllinə də kömək
göstərəcəkdir. Sisianov artıq buna da inanmırdı və İbrahim xandan izahat
istəyirdi. İbrahim xan isə qalada üsyan qalxması ehtimalından
ehtiyatlandığı üçün Karyaginin kömək göndərə bilmədiyini yazırdı və
əlavə olaraq yenidən Sisianovdan kömək göndərilməsini xahiş edirdi.
Sisianov isə cavab məktubunda qəzəblə İbrahim xandan soruşurdu ki,
göndərdiyi dəstəyə kömək etmədiyi halda ona əlavə kömək göndərməyə
arxayın ola bilərmi?