Gülüstan müqaviləsi
63
Qacar qoşunları ilə müqayisədə Sisianovun ixtiyarındakı qüvvələrin sayı
xeyli az idi. Zərurət yarandığı halda bu qüvvələrlə Qacar qoşunlarına mü-
qavimət göstərmək elə də asan olmayacaqdı. Sisianov isə arzulamasa da
Qacar qoşunları ilə qarşılamaq məcburiyyətində idi. Əks təqdirdə rus
qoşunları öz mövqelərini tərk edib Cənubi Qafqazdan çəkilməli idilər.
Buna yol verməmək üçün Sisianov ixtiyarında olan qüvvələrin yenidən
qruplaşdırılmasını bir də nəzərdən keçirdi və Qacar qoşunlarının yürüşü
başlamazdan əvvəl Samxetiyada olan Tiflis alayının iki taborunun
Gəncəyə gətirilməsini mümkün saydı (42).
Qacar qoşunlarının Qarabağ xanlığı üzərinə hücumu iyun ayının
əvvəllərinə təsadüf edirdi və bu vaxt Araz çayı adətən bol sulu olardı.
Belə bir vəziyyətdə Xudafərin körpüsü Araz çayını adlamaq üçün xüsusi
hərbi əhəmiyyət kəsb edirdi və bu körpünü nəzarət altına almaqla şah
qoşunlarının Qarabağ xanlığı ərazisinə daxil olmasına maneçilik
yaratmaq olardı. Bu vəzifəni həyata keçirmək üçün isə Qarabağ xanlığı
ərazisində mayor Lisaneviçin rəhbərliyi altında olan dəstədən başqa bir
qüvvə yox idi.
Rus tarixi ədəbiyyatında olan məlumata görə, mayor Lisaneviçin
rəhbərliyi altında Şuşa qalasında olan dəstə cəmi 300 nəfərdən ibarət idi.
Bu dəstə ilə mayor Lisaneviç həm qalanı, həm də İbrahim xanın özünü
nəzarət altında saxlamalı, qala daxilində Rusiya işğalına qarşı
müxalifətçiliyin baş qaldırmasına, İbrahim xanın digər Azərbaycan
xanları və Qacar sarayı ilə məktublaşmasına yol verməməli idi. Amma
yaranmış vəziyyətin təhlükəli olmasını nəzərə alaraq İbrahim xan mayor
Lisaneviçin dəstəsinin Xudafərin istiqamətinə göndərilməsinə nail oldu.
Bu dəstənin gücünün artırılması üçün Məhəmməd Həsən ağanın rəhbər-
liyi altında olan bir atlı dəstəsi də mayor Lisaneviçlə birlikdə Xudafərin
körpüsü ətrafına göndərildi. Nəzərdə tutulmuşdu ki, Xudafərin
körpüsündə şah qüvvələrinin qarşısını müəyyən müddət saxlamaqla
Qarabağ əhalisinin tarlalarda yetişdirdiyi məhsulların toplanmasına vaxt
qazanılsın. Eyni zamanda da güman edilirdi ki, şah qüvvələrinin Xuda-
fərin körpüsündə ləngidildiyi vaxt Sisianov tərəfindən göndərilən əlavə
kömək də gəlib yetişə bilər (43).
Lakin Məhəmməd Həsən ağanın və Lisaneviçin dəstəsi Araza
yetişənə kimi şah qüvvələri artıq Xudafərin körpüsünü adlamışdılar.
Qarabağ xanlığı ərazisinə ilkin daxil olan dəstələrdən biri İsmayıl xanın
rəhbərliyi altında olan dəstə idi. Bu dəstə Arazı adlayan kimi Cəbrayıl
bağlarında mövqe seçdi. Yəni, mayor Lisaneviçlə Məhəmməd Həsən
xanın dəstəsi Araz çayına yetişəndə İsmayıl xan dəstəsi ilə artıq Qarabağ
xanlığı ərazisində döyüş mövqeləri tutmuşdular. Məhəmməd Həsən ağa
Mehman Süleymanov
64
ilə mayor Lisaneviç Xudafərin körpüsünə vaxtında yetişə bilməsələr də,
Xudafərin körpüsünü ilk adlamış İsmayıl xanın dəstəsi üzərinə hücum
etməyi qərara aldılar. Sisianovun yazışmalarından aydın olur ki, bu
dəstələr arasındakı döyüş iyun ayının 9-da baş verdi (44).
Rus tədqiqatçılarının yazdığına görə isə Araz çayı boyunca dayanan
Qarabağ qarovullarından şah qüvvələrinin Araz çayını adlaması xəbərini
eşidən kimi Lisaneviç öz dəstəsi ilə irəliyə doğru hərəkət etdi. Şah
qüvvələrinin 7 qrupda hərəkət etməsi müşahidə olunurdu. Rus
qüvvələrini görən kimi, şah silahlıları dərhal irəli atıldılar. Şah qüvvələri
elə böyük bir sürətlə hücuma qoşuldular ki, rus toplarının atəşləri də
onların qarşısını saxlaya bilmədi. Yalnız döyüş səngərlərinə yaxınlaşanda
rus hərbçiləri tüfəng atəşləri ilə onların hərəkətini dayandıra bildilər. Şah
qüvvələri bir qədər geri çəkilib yenidən qruplaşdılar və bir daha irəli
atıldılar. Lakin bu dəfə də kazaklar və Məhəmməd Həsən ağanın
rəhbərliyi altında olan atlı dəstə şah döyüşçülərinə yaxınlaşmaq imkanı
vermədilər. Bildirilir ki, ciddi müqavimətə rast gələn Qacar qüvvələri
geri çəkilib yaxınlıqdakı təpəliklərə sığındılar. Amma sonra hücumu
davam etdirdilər. Bununla belə, Qacar qoşunlarının hücumunun qarşısı
bir də alındı və onlar hətta Məhəmməd Həsən ağanın dəstəsi və kazaklar
tərəfindən müəyyən məsafədə təqib olundular. Mövcud məlumata görə,
iyunun 12-də mayor Lisaneviç Qacar dəstəsinin Arazın cənubuna
çəkilməsi haqqında məlumat aldı. Bundan sonra o özü də Cəbrayıldan
Şuşa qalasına qayıtdı. Rus tarixi ədəbiyyatında olan məlumata görə, bu
qərar bir tərəfdən Lisaneviçin ixtiyarında süvari qoşun qüvvələrinin
olmaması və növbəti hücumun qarşısının alınmasının qeyri-
mümkünlüyü, o biri tərəfdən də İbrahim xan tərəfindən onun qalaya
çağırılması ilə bağlı idi. Guya İbrahim xan deyibmiş ki, Lisaneviç geri
qayıdaraq Qacar qoşunlarından qorxan Şuşa əhalisinin şəhərdən
qaçmasının qarşısını almalıdır. Bu məlumatın doğruluğu şübhəli görünür.
Çünki İbrahim xan mayor Lisaneviçin qalada olmasına belə ehtiyac
duysaydı, onda onun yenidən Şuşa qalasından uzaqlaşmasına razı
olmazdı. Mayor Lisaneviç qalaya qayıdandan sonra İbrahim xan
Sisianova daha bir məktub yazdı və bu məktubda Araz kənarında baş
verən döyüçü xatırladaraq Sisianovdan əlavə kömək istədi. Həmin
məktub Sisianova mayor Lisaneviç vasitəsilə göndərildi. Əgər İbrahim
xanın qalada mayor Lisaneviçin köməyinə xüsusi ehtiyacı olsaydı onda
Sisianova yazdığı məktubu da onunla göndərməzdi.
General Sisianovun yazışmalarından aydın olur ki, iyunun 9-10-da
baş verən döyüş mayor Lisaneviçin dəstəsi üçün kifayət qədər ciddi bir
döyüş olmuş və onun gedişində ruslar itkilərlə də qarşılaşmışdılar.