Gülüstan müqaviləsi
53
üçün əlinə düşən fürsəti də fövtə vermək istəmirdi. Mövcud məlumata
görə, Əbülfət ağa hətta Bərgüşad çayına qədər olan yaşayış
məntəqələrinin böyükləri vəzifəsinə öz adamlarını təyin etdi. Bununla
kifayətlənməyən Əbülfət ağa Qarabağın bir çox kəndlərinin və elatlarının
bəylərini yanına çağırdı və onlardan xana tabe olmamağı tələb etdi. Və-
ziyyətin getdikcə mürəkkəbləşdiyini görəndə İbrahim xan müqavimət
göstərməyi qərara aldı və Məhəmməd Həsən ağa ilə birlikdə Tuğ kəndinə
gəldi. Mehdiqulu ağa ilə Xanlar ağa isə əlavə kömək toplanması üçün
Zəngəzur tərəfə yola düşdü və Əbülfət ağa Tuğ üzərinə hücuma başlayana
qədər onlar da özlərini İbrahim xana yetirdilər. Məhz onların rəhbərliyi
altında olan dəstənin vaxtında köməyə yetişməsi nəticəsində Əbülfət ağanın
dəstəsini məğlub etmək mümkün oldu (20).
Sisianovun yazışmalarından belə bir qənaətə gəlmək olar ki, 1805-ci ilin
fevral-aprel ayları ərzində Fətəli şahın üç elçiliyi İbrahim xanın yanına gəldi.
Amma İbrahim xan bu elçiliklərin şaha itaətlə bağlı gətirdikləri təkliflərinin
heç birini qəbul etmədi (21).
Qacar elçilərinin gətirdiyi təklifi İbrahim xan birmənalı qarşılamadı.
Dərhal da İbrahim xan bu barədə Sisianova məktub göndərdi. Bu məktubla
İbrahim xan çox güman ki, Sisianova onunla ciddi və ehtiyatlı
davranılmasını çatdırmaq istəyirdi. Yazışmalardan və elə sonrakı
proseslərdən də görünür ki, İbrahim xan Qacar sarayının təklifini qəbul
etmədi. Amma Fətəli şah elçilərinin Şuşaya gəlməsi istər-istəməz Sisianovu
ciddi təşvişə salırdı. Sisianov qorxurdu ki, bu gediş-gəlişlərin nəticəsində İb-
rahim xan Qacar şahının təklifini qəbul edə bilər. Çünki konkret tarixi
şəraitdə, Sisianovun ixtiyarında Qarabağ xanlığını şah qoşunlarından qoruya
biləcək yetərincə qüvvə yox idi. Belə olanda isə İbrahim xan çıxış yolu kimi
Qacar sarayına sığına bilərdi. Sisianov Qarabağ xanına yazdığı cavab
məktublarında bildirirdi ki, əgər İbrahim xan Rusiya təbəəliyini qəbul edirsə,
onda imzalanacaq müqavilənin şərtlərinə görə o, qonşu xanlarla və hakim-
lərlə ünsiyyəti yalnız Gürcüstanın baş komandanının (yəni, Sisianovun)
razılığı ilə qura bilərdi. Ona görə Sisianov İbrahim xanı birtərəfli şəkildə
Qacar sarayı ilə danışıqlara getməkdən çəkindirməyə çalışırdı (22).
Hər halda məlumdur ki, İbrahim xan şah elçilərinin gətirdiyi təklifləri
qəbul etmədi. Əvəzində isə 1805-ci il aprel ayının sonu və may ayının
əvvəllərində bu müqavilənin imzalanmasına əməli hazırlıq işləri baş-
landı.
1805-ci il may ayının əvvəlində Qarabağ xanlığı ilə Gəncənin sərhəd
xəttini təşkil edən Kürəkçay sahilində İbrahim xanla Sisianovun görüşü
və danışıqları baş tutdu. İbrahim xanı bu görüşdə oğlanları Məhəmməd
Həsən ağa, Mehdiqulu ağa, Xanlar ağa və Qarabağın bir sıra tanınmış
Mehman Süleymanov
54
bəyləri müşayiət edirdilər. İbrahim xanın dəvəti əsasında
kürəkəni olan
Şəki xanı Səlim xan da ora gəldi. Aparılan danışıqların nəticəsi kimi,
1805-ci il may ayının 14-də Qarabağ xanı Rusiyanın təbəəliyini qəbul
etmək barədə andı və tərtib olunmuş müqaviləni imzaladı. Bu müqavilə
sonradan Kürəkçay müqaviləsi kimi tanındı.
İbrahim xanın imzaladığı sədaqət andında bildirilirdi ki, o, Rusiya
imperatoruna sədaqətli olmaqla ona xidmət etməyə, dövlətə fayda
verməyə, dövlətin maraqlarına cavab verməyən əməllərin qarşısını
almağa çalışmaqla xanlığı imperator adından idarə etməyə, dövlət
sirlərini qorumağa, Rusiyanın yerdəki canışınınə şərtsiz tabe olmağa və s.
söz verir (23).
On bir maddədən ibarət olan Kürəkçay müqaviləsi də İbrahim xanın
sədaqət andı ruhunda tərtib olunmuşdu. Rusiya İbrahim xanın şərtsiz
tabeçiliyinə nail olmağa çalışsa da müqavilədə xanlığın müstəqilliyini
təmin edə biləcək müəyyən məqamlar mövcud idi. Doğrudur, müqavilə
xanın və onun varislərinin hakimiyyətini müəyyən nəzarət altına alırdı.
Bununla belə, ona bütünlükdə əməl olunacağı təqdirdə Qarabağ xanlığını
və xanlıq daxilində yerli hakimiyyəti qoruyub saxlamaq mümkün idi.
Müqavilənin giriş hissəsində göstərilirdi ki, bu müqavilə Qarabağ
xanı İbrahim xanla Rusiya imperatoru Aleksandr Pavloviçin iradəsini
həyata keçirən tam infanteriya (piyada) generalı Pavel Sisianov arasında
Qarabağ xanının Rusiya təbəəliyini qəbul etməsi ilə imzalanır.
Müqavilənin 1-ci maddəsi İbrahim xanın Rusiya təbəəliyini qəbul
etməsini təsbit edirdi. Maddədə deyilirdi: “Mən Şuşalı və Qarabağlı
İbrahim xan öz adımdan, varislərim və vəliəhdim adından İran və ya hər
hansı bir dövlətin hər hansı vassallığından və ya hər hansı ad altında olsa
da hər cür asılılığından təntənəli surətdə həmişəlik imtina edərək və
bütün dünya qarşısında bununla bildirirəm ki, mən özüm və varislərim
üzərində bütün Rusiyanın böyük imperator həzrətlərinin və onun yüksək
varislərinin və vəliəhdlərinin ali hakimiyyətindən başqa heç bir dövlətin
hakimiyyətini tanımıram, həmin taxt-taca sədaqət vəd edirəm çünki onun
sadiq quluyam və bu haqda, adətə görə müqəddəs Qurana and
içməliyəm” (24).
Müqavilənin ikinci maddəsində Rusiya hakimiyyəti adından Rusiya
təbəəliyini qəbul edən İbrahim xanın və onun varislərinin xanlıq
daxilindəki hakimiyyətinin qorunub saxlanacağına vəd verilirdi: “
İmperator həzrətləri zati-aliləri həzrətlərinin belə səmimi söz verməsini
qəbul edərək özünün və vəliəhdinin adından imperator sözü ilə vəd edir
və söz verir ki, onlar zati-aliləri Şuşalı və Qarabağlı İbrahim xandan və
onun varislərindən öz sadiq təbəələri kimi mərhəmət və nəcib havadarlığı