596
- Dünya birliyinin aqressiv separatizm probleminə diqqətinin artırılmasına və
dövlətlərin sərhəd toxunulmazlığı prinsipinin bərpasına nail olmaq;
- Müxtəlif güc mərkəzlərinin geosiyasi maraqlarının kəsişdiyi Qafqazda bütün
maraqlı tərəflər üçün cəlbedici faktora çevrilmək, güc mərkəzlərinin geosiyasi
ziddiyyətlərindən istifadə edərək öz dövlətini möhkəmləndirmək;
- Ərazilərdəki etnik münaqişələri dinc yolla həll etmək, ərazi bütövlüklərini bərpa
etmək;
- Rusiyadan asılılığı azaltmaq üçün Qərbin siyasi və iqtisadi strukturlarına
inteqrasiyaya üstünlük vermək;
- Neft
və qaz yataqları ilə zəngin olan regionda əsas tranzit ölkəyə çevrilmək, birgə
enerji və nəqliyyat layihələrində iştirak edərək Qərbə çıxış üçün alternativ yollar
tapmaq və s.
Lakin
məqsədlər eyni olsa da, ölkələrdəki şərait, ictimai-siyasi və iqtisadi vəziyyət
fərqlidir. Azərbaycandan fərqli olaraq, Gürcüstan təbii ehtiyatlara malik deyil və
Rusiyadan daha çox asılıdır. Bu isə Azərbaycanın Gürcüstan üçün strateji əhəmiyyətini
bir qədər də artırır. Çünki yaranmış vəziyyətdə Gürcüstanın əsas ümidi ölkənin coğrafi
vəziyyəti və tranzit imkanlarından maksimum bəhrələnməkdir ki, bu da Azərbaycanla
əməkdaşlıq etmədən qeyri-mümkündür.
2005-ci ilin iyulunda Gürcüstan parlamenti ölkənin Milli Təhlükəsizlik
Konsepsiyasını qəbul edib. Ölkənin milli maraqları, xarici siyasətin prioritetləri və digər
dəyərləri əks etdirən sənədə görə, Gürcüstanın xarici siyasi tərəfdaşlığının prioritetləri
aşağıdakı kimi qeyd olunub:
1. Strateji tərəfdaş – ABŞ, Ukrayna, Türkiyə və Azərbaycan
2. Tərəfdaş – Rusiya
3. Praqmatik əməkdaşlıq – Ermənistan
Konsepsiyadan da göründüyü kimi, Azərbaycan Gürcüstanın 4 əsas strateji
tərəfdaşından biridir.
Bütün bunlar Bakı ilə Tbilisinin strateji tərəfdaşlığını şərtləndirən və iki ölkəni
birləşdirən amillərdir. Amma bir sıra prinsipial fərqlər də var və bu, ilk növbədə, özünü
xarici siyasi kursda göstərir. Azərbaycan bölgədə marağı və nüfuzu olan bütün ölkələrlə
dostluq və tərəfdaşlıq əlaqələri saxlamaqla bu prosesi ağrısız keçmək yolunu tutduğu
halda, Gürcüstan rəhbərliyi yalnız Qərblə inteqrasiya kursunu dəstəkləyən dövlətlərlə
597
əməkdaşlığa üstünlük verir. Birtərəfli siyasət yeridən Gürcüstan bölgədəki əsas güc
mərkəzlərindən olan Rusiya ilə münasibətlərdə ciddi gərginlik yaşayır və bu, regionda
təhlükəsizlik üçün ciddi problemlər yarada bilər. Çünki Gürcüstanın regional
təhlükəsizlik proseslərində Rusiyanın kənarda qalmasına yönəlmiş siyasəti, nəticə
etibarilə iki ölkə arasında münasibətləri daha da gərginləşdirə bilər. Bu zaman isə
Rusiyada məskunlaşmış yüz minlərlə gürcünün mümkün deportasiyası, Cənubi Osetiya
və Abxaziyadakı dondurulmuş, Cavaxetiyada isə potensial münaqişələrin
qabardılmasının şahidi ola bilərik.
Gürcüstandan
fərqli olaraq, Rusiya ilə münasibətlərində problemi olmayan
Ermənistan Cənubi Qafqazda formal təhlükəsizlik siyasəti yürüdür. Əslində, onun bütün
məsələlərə yanaşması digər bölgə ölkələrindən geridə qalmamaq üçün təbliğat xarakteri
daşıyan “müstəqil dövlət” imitasiyasından başqa bir şey deyil. Rusiyanın hərbi
qüvvələrini öz ərazisində yerləşdirən, onun yaratdığı Kollektiv Təhlükəsizlik Müqaviləsi
təşkilatının tələblərindən çıxa bilməyən Ermənistanın müstəqil təhlükəsizlik siyasəti
yürütməsi, sadəcə olaraq, mümkün deyil.
Rəsmi İrəvan ABŞ və Avropa İttifaqının regiondakı proseslərdə iştirakını məqbul
saysa da, bu güc mərkəzlərinə regional dövlətlərlə eyni statusun verilməsinin
əleyhinədir. İranın təklif etdiyi 3+3 formuluna cavab olaraq, rəsmi İrəvan alternativ təklif
– «3+3+2» formulunu irəli sürüb. Bu təklif 3 Cənubi Qafqaz ölkəsi+Türkiyə, Rusiya,
İran+ ABŞ və Avropa İttifaqı» sxemini nəzərdə tutur. Göründüyü kimi, bu sxemdə ABŞ
və Avropa İttifaqı regiondakı dövlətlərlə eyni statusda yox, daha çox, köməkçi
elementlər kimi göstərilib.
Ermənistanın bu mövqeyi izah olunandır. Artıq qeyd edildiyi kimi, bu ölkənin
geosiyasi maraqları, təhlükəsizliyi və iqtisadi vəziyyəti yalnız bir dövlətdən – Rusiya
Federasiyasından asılıdır. İki ölkə arasında hərbi, siyasi və iqtisadi əlaqələr kifayət
qədər möhkəmdir. İndiyədək ölkələr arasında 160-dan çox beynəlxalq hüquqi sənəd
imzalanıb. Bunların arasında bəziləri strateji əhəmiyyət daşıyır və Ermənistanın
Rusiyadan tam asılılığını rəsmən təsdiqləyir. 1997-ci il avqustun 29-da imzalanmış
“Dostluq, əməkdaşlıq və qarşılıqlı yardım haqda” müqavilə, 2001-ci il sentyabrın 15-də
imzalanmış “2010-cu ilədək uzunmüddətli iqtisadi əməkdaşlığa dair” müqavilə, XXI
əsrdə Rusiya ilə Ermənistan arasında müttəfiqliyə dair bəyannamə və digər sənədlər
Ermənistanın Rusiyadan siyasi, hərbi və iqtisadi cəhətdən tam asılılığını sübut edir.
Rusiya
Ermənistanı özünün Cənubi Qafqazdakı yeganə etibarlı strateji müttəfiqi
(forpostu) hesab edir. Ermənistanın geostrateji mövqeyi, işğalçılıq siyasəti və iqtisadi
598
potensialının səviyyəsi bu ölkənin regiondakı proseslərdə müstəqil iştirakını istisna edir
və Rusiya ilə eyni mövqedən çıxış etməyə vadar edir. Bu gün Ermənistan Rusiyanı öz
müstəqilliyinin və təhlükəsizliyinin yeganə qarantı hesab edir. Bu ölkə bütün sahələrdə,
xüsusilə də hərbi sahədə Rusiyanın inhisarındadır. MDB Kollektiv Təhlükəsizlik
Müqaviləsinin cənub istiqamətində əsas və yeganə tərəfdaşı funksiyasını icra edən
Ermənistanın hava məkanını, İran və Türkiyə ilə sərhədini də rus hərbçiləri qoruyur. İki
ölkə arasında hərbi müttəfiqliyin bünövrəsi 1992-ci il avqustun 21-də prezidentlər Boris
Yeltsinlə Levon Ter-Petrosyanın imzaladığı Ermənistan ərazisindəki Rusiya Hərbi
Qüvvələrinin hüquqi statusuna dair müqavilə ilə qoyulub. 1995-ci ilin martında isə
prezidentlər Moskvada Ermənistan ərazisindəki hərbi bazaya dair 25 illik müqavilə
imzalayıb. Sənəd Ermənistandakı 102-ci hərbi bazanın 2020-ci ilədək ölkə ərazisində
qalmasını nəzərdə tutur. Bundan başqa, Rusiya-Ermənistan birgə hərbi qruplaşması
yaradılıb, Ermənistan MDB-nin havadan vahid müdafiə sisteminə qoşulub, Kollektiv
Təhlükəsizlik Müqaviləsinin fəal üzvüdür, Rusiya Ermənistana silah və hərbi texnikanı
güzəştli qiymətlə satır və s. Bütün bu faktlar regiondakı geosiyasi vəziyyəti
gərginləşdirən, bölgədəki qüvvələr nisbətinin dəyişməsinə səbəb olan və Dağlıq
Qarabağ probleminin həllinə mane olan amillərdir.
Problemin
həllinə mane olan digər amil Ermənistanın İranla münasibətləridir.
Rusiya ilə Ermənistanın strateji müttəfiqliyini və Moskva-Tehran əlaqələrini nəzərə
alsaq, söhbət artıq Rusiya-İran-Ermənistan xəttinin formalaşmasından gedir. Xarici
ekspertlər hesab edirlər ki, bu gün artıq bu “üçlər” bloku de-fakto mövcuddur. Üstəlik,
İran öz geosiyasi maraqları naminə irəli sürdüyü əsas prinsipdən – regiondan kənar
dövlətlərin bölgədəki proseslərə müdaxiləsinin yolverilməzliyi prinsipindən də imtina
etməyə və bu bloka daha bir üzv “qəbul etməyə” hazırdır. Buna bariz nümunə İranla
Ermənistanın Yunanıstanın regionda aktivləşməsinə yönəlmiş addımlarını göstərmək
olar. 1997-ci ildə Afinada İran, Yunanıstan və Ermənistan arasında «Qarşılıqlı
anlaşma və əməkdaşlıq haqda» memorandum imzalanıb. Düzdür, hələlik rəsmi
Afinanın regionda aktivliyi hiss olunmur və sözügedən sənəd bölgədə qüvvələr nisbəti
və geosiyasi vəziyyəti dəyişməyib. Üstəlik, son illər Yunanıstan-Türkiyə
münasibətlərində gərginliyin nisbətən aradan qalxması da nəzərdən qaçmamalıdır.
Amma hər halda, bu sənəd gələcəkdə yarana biləcək müəyyən tendensiyanın
göstəricisidir.
İran, Rusiya və Ermənistanın müttəfiqliyini şərtləndirən daha bir amil Türkiyə
faktorudur. Türkiyə ilə tarixi ədavəti olan hər 3 dövlət Ankaranın bölgədə
Dostları ilə paylaş: |