Dədə Qorqud ● 2015/I I 166
Folklorumuzun digər janrlarından fərqli olaraq bu gün də həyatımızla, mə-
işətimizlə, siyasi, iqtisadi, sosial durumumuzla bağlı bütün bölgələrdə yeni-yeni
məsəllər yaranır və yayılır. Bu da, hər şeydən öncə, ondan irəli gəlir ki, məsəllər
söhbətin mənasını, məzmununu dərinləşdirir, fikir tutumunu dolğunlaşdırır,
obrazlılığını və poetikliyini qat-qat artırır, onu dada-tama gətirir, şirinləşdirir.
İslam SADIQ
Filologiya üzrə fəlsəfə doktoru
AMEA Folklor İnstitutunun
aparıcı elmi işçisi
AŞIQ, BİR AĞIZ DA KOROĞLUDAN OXU
Bir məclisdə aşıq çalıb-oxuyurmuş. Tez-tez də Koroğludan oxumağı xa-
hiş eləyirlərmiş. İki nəfər aşığa qulaq asmır, öz aralarında danışırmış. Aşıq Ko-
roğludan başladığı söhbəti təzəcə qurtarıbmış ki, həmin iki nəfərdən biri deyir:
– Aşıq, qadan alım, bir ağız da Koroğludan oxu.
Məclisdə bir gülüşmə, qəhqəhə qopur ki, gəl görəsən.
Bir adam söhbətin əvvəlinə qulaq asmayanda, yaxud söhbətin nədən getdi-
yini bilməyib həmin söhbəti təkrar danışdırmaq istəyəndə deyirlər ki: “Aşıq, bir
ağız da Koroğludan oxu!”
BABANIN ATI KİMİ DÜZ GETDİ
Borçalı mahalında Baba adında bir kişi yaşayırmış və onun da bir atı va-
rıymış. Günlərin bir günü Babanın atı naxoşlayır və gözlərinin ikisi də tutulur.
At sədaqətli heyvandı, heç vaxt sahibini darda qoymaz. Adamlar da ona görə ata
qarşı çox mehriban olurlar. Bir də dədə-babadan at namusdan sayılıb. Baba da
atı kor olandan sonra onu atmır, əksinə ona daha çox canı yanır. Bir neçə dəfə
atı yedəyində bulağa aparıb sulayır və yedəyində də geri qaytarır. Elə ki, at
bulağın yoluna vərdiş eləyir, daha onu yedəklərində aparmırlar. Qapıdan onun
üzünü bulağa sarı yönəldib buraxırlarmış, at da özü gedib bulaqdan su içib qayı-
dırmış. Hara gedirsə, bir dəfə Baba özü evdə olmur və uşaqları atı bulağa düz-
gün səmtləşdirmirlər. At yolu tutub gedir, ancaq bulağı tapmır, yolu səhv düş-
düyünə görə, harasa gedir və yoxa çıxır. At o gedən olur.
İndi bir adam nəyisə itirəndə, kimsə acıq eləyib gedəndə deyirlər ki: “Ba-
banın atı kimi düz getdi!”
Dədə Qorqud ● 2015/I I 167
BU DA YETİM SEVİNDİRMƏK KİMİ BİR ŞEYDİ
Üç yoldaş yol gedirmiş. Görürlər ki, bir yetim uşaq əl açıb dilənir. Kim
ona pul verirsə, sevincindən yerə-göyə sığmır. Pul verənə də, Allaha da alxış
eləyir. Onlardan biri deyir:
– Necəsiniz, mən o yetimə bir qara quruş da verməyim, ancaq onu hamı-
dan çox sevindirim.
Yoldaşları deyirlər ki, bu ola bilməz. Sən neyləyə bilərsən ki, yetimi ona
pul verənlərdən çox sevindirəsən? Sən görmürsənmi hər dəfə ona pul veriləndə
sevincindən atılıb-düşür.
Oğlan deyir:
– Yaxşı, indicə görərsiniz.
Gəlib yetimin yanına çatırlar. Oğlan yetimin səhərdən bəri yığdığı pulun
hamısını tutub əlindən alır. Yetim onun ayağına düşür, yalvarıb-yaxarır ki, pulu-
mu qaytar. Oğlan onun nə yalvar-yaxarına, nə də göz yaşlarına məhəl qoymur,
ürəyi yumşalmır ki, yumşalmır. Yetim də onun ətəyini buraxmır, göz yaşını sel
kimi axıdır. O qədər yalvarır ki, daha yetimin səsi batır, heyi kəsilir. Oğlan onun
pulunu özünə qaytarır. Yetim elə sevinir, elə sevinir, heç olmayan kimi. Oğlanın
əlindən, ayağından öpür. Atılıb-düşür. Oğlan yoldaşlarına deyir:
– Gördünüz, yetimi necə sevindirirlər?
Birinin işini əvvəlcə haqsızlıqla, zorakılıqla əyib sonra düzəldəndə, yaxud
haqqını kəsib çox minnət-sünnətdən sonra qaytaranda deyirlər ki: “Bu da yetim
sevindirmək kimi bir şeydir”.
YARA SAĞALACAQ OLSA, TƏBİB QƏNŞƏR GƏLƏR
Bir kişinin aman-zaman bir oğlu olur. Bu oğlan bir sağalmaz dərdə tutulur.
Nə qədər dava-dərman eləyirlərsə, xeyri olmur. Deyirlər buna çarə tapsa, Loğ-
man tapacaq. Loğman da Misirdədi. Oğlan yemək-içmək də götürüb üz tutur
Misirə sarı. Soraqlaşa-soraqlaşa gəlib çıxır Loğmanın mülkünə, dərdini ona de-
yir. Loğman bir xeyli fikirləşib deyir ki, oğul, çıx get, sənin dərdinin çarəsi yox-
du. Oğlan kor-peşman geri dönür. Yolda bir yandan yorğunluq, bir yandan da
xəstəlik onu əldən-dildən salır. Qəbristanlıqda bir kolun dibində uzanır ki,
dincini alsın. Elə gözünü yummaq istəyir ki, bir də görür, budu, bir qara qoç gəl-
di, ayaqlarını aralayıb bir quru kəllənin içinə sağıldı. Sonra çıxıb getdi. Üstün-
nən az keçmiş bir şahmar ilan sürünə-sürünə gəlib kəllədəki südün yarısını içdi,
yarısına da zəhər töküb getdi. Oğlan fikirləşir ki, daha canımdan bezmişəm, qoy
bu zəhəri içib ölüm. Bu fikirlə durub kəllədəki zəhəri başına çəkir. Elə o saat da
yıxılıb özündən gedir. Gün yarımdan sonra özünə gəlir. Ayağa qalxıb görür ki,
sappasağlamdı, canında azar-bezardan heç nəm-nişana da yoxdu. Gəlir evlərinə.
Baxır ki, qazanlarda ət bişirirlər. Soruşur ki, bu nədi belə?
Dədə Qorqud ● 2015/I I 168
Deyirlər:
– Bəs sən gedəndən xeyli vaxt keçib, bir səs-soraq çıxmadı,elə bildik tələf
olubsan. İndi sənə yas tutub ehsan veririk.
Oğlanın sağalmaq sorağı hər yana yayılır. Yas dönüb olur toy. Yeddi gün,
yeddi gecə şadlıq eləyirlər.
Bir müddət keçir. Bir gün oğlan öz-özünə deyir ki, gərək gedəm Loğmana
deyəm ki, sən yalan deyibsən, mənim dərdimin əlacı varıymış. Hazırlıq görüb
Misirə yollanır. Loğmanı tapıb əhvalatı onun yadına salır. Loğman o saat ona
deyir ki, de görüm belə-beləmi oldu. Loğman qəbristanlıqda oğlanın başına gə-
lənlərin hamısını bir-bir danışır. Oğlan qalır mat-məəttəl ki, Loğman bunu har-
dan bilmiş olar?
Loğman onun karıxdığını görüb gülümsəyir:
– Bala, mən sənin dərdinin davasını bilirdim, ancaq hardan tapaydım sən-
dən ötrü qırx ilin qafasını, şahmarın ağısını, qara qoçun da südünü?! Qismətində
sağalmaq varıymış. Yara sağalacaq olsa, təbib qənşər gələr.
Loğmanın ağzından çıxan bu söz o vaxtdan məsələ çevrilir. Çətin bir iş tə-
sadüfən düzələndə deyirlər ki: “Yara sağalacaq olsa, təbib qənşər gələr”.
XALAM BİLDİ, ALƏM BİLDİ
“Xalam bildi, aləm bildi” xalq arasında çox yayılmış məsəldir. Həm də
Azərbaycanın elə bölgəsi yoxdur ki, orada bu məsəl işlədilməsin. Bu da məsəlin
qədimliyini göstərir.
Bəs bu məsəl harda yaranmışdır, necə yaranmışdır?
“Kitabi-Dədə Qorqud”da “Bəkil oğlu Əmranın boyunu bəyan edər” bo-
yunda Bəkil ova gedir. Yay-kirişlə buğaya kəmənd atır, ancaq onu saxlaya bil-
mir. Buğa özünü bir uca yerdən atır, Bəkil də özünü saxlaya bilmir, sağ ayağı sı-
nır. Birtəhər ata minib evə gəlir, ancaq ayağının sındığını heç kəsə demir. Bir
neçə gün kefi pozğun olsa da, bu sirri açmır. Ancaq arvadı əl çəkmir, Bəkil də
sirri açıb deyir ki, atdan yıxılmışam, ayağım sınıb.
Xatunu bu sirri bacısına deyir, bacısı da kimi görür ona deyir. Xəbər
düşmənə çatır. Bəkilin üstünə yağı gəlir. Bəkil oğlu Əmranı çağırıb deyir ki, gör
bu sirri yağı hardan öyrənib? Əmran atasından soruşur ki, sən kimə demisən?
Bəkil də cavab verir ki, bircə sənin anana. Əmran anasının yanına gəlir, soruşur
ki, bu sirri kimə açmısan? Anası da bircə öz bacısına dediyini söyləyir. Əmran
orda deyir:
– Xalam bildi, aləm bildi.
O vaxtdan bu günə qədər bir adam sirrini başqasına açanda bu məsəli
çəkib deyirlər ki, “Xalam bildi, aləm bildi”.
Dostları ilə paylaş: |