36
qarşılıqlı yardım haqqında Sovet-Türk müqaviləsini müzakirə etmək üçün
Ankaraya göndərmişdi.
Xarici işlər komissarı M.Litvinov 1939-cu ilin aprel ayının 21-də Türkiyədə
SSRİ-nin müvəqqəti işlər vəkili İ.O.Nikitnikova vasitəsi ilə Ş.Saracoğluna
çatdırmışdı ki, təcili əlaqələr yaratmaq məqsədilə SSRİ Xarici İşlər Komissarlığı
Ş.Saracoğlunun əvvəlki xahişinə uyğun olaraq Potyomkini Ankaraya göndərir.
Eyni zamanda az əvvəl Sovet İttifaqı ilə əlaqələrə intensiv xarakter vermək üçün
Ş.Saracoğlu Batuma gəlib Sovet nümayəndələri ilə görüşməyə hazır olduğunu
bildirmişdi. Lakin Sovet tərəfi Ş.Saracoğlunun Moskva səfərinə qədər Batum
görüşünü təxirə salmağı və zəruri olan məsələləri V.Potyomkinlə Ankarada
müzakirə etməyi məqsədəuyğun saymışdı (62).
V.Potyomkin hələ Bolqarıstan xarici işlər naziri ilə danışıqlarda "dost Türkiyə
hökuməti ilə" Şərqi Avropa və Balkanlara alman təhlükəsinin artması ilə bağlı
həyəcanlı vəziyyəti müzakirə etmək barədə ona tapşırıq verildiyini bildirmişdi və
aprel ayının sonlarında Sofiyadan İstanbula yola düşmüşdü (63).
Aprel ayının 29-da Potyomkin Ş.Saracoğlu, aprelin 30-da isə İ.İnönü ilə
görüşdü. V.Potyomkinin Moskvaya göndərdiyi təcili teleqramdan aydın olur ki,
İ.İnönü Avropada təcavüzkara qarşı Türkiyə, Balkan Antantası, SSRİ və
İngiltərənin eyni mənafeyə malik olduqlarını vurğulayıb. Danışıqlar zamanı
Türkiyənin prezidenti təcavüzkarın qarşısında ciddi sədd ola biləcək Balkan
ölkələri birliyinin yaradılmasına böyük əhəmiyyət verdiyini, SSRİ və İngiltərənin
bu işdə mühüm rol oynaya biləcəyini xüsusi qeyd etmişdi. İ.İnönü bildirmişdi ki,
Türkiyə gözlənilən İtaliya təcavüzünə qarşı İngiltərə ilə qarşılıqlı yardım haqqında
saziş bağlamağa hazırdır. Eyni zamanda o, əlavə etmişdi ki, Boğazlara İtaliya,
yaxud Almaniya tərəfindən təcavüz olarsa, Türkiyə öz silahlı qüvvələri vasitəsi ilə
Boğazları müdafiə edəcəkdir. Bu istiqamətdə İ.İnönü İngiltərə və Sovet İttifaqının
iqtisadi, maliyyə, texniki vasitələr və hərbi sursatla köməyinə böyük ehtiyac
olduğunu açıqladı. Hətta İ.İnönü bildirdi ki, əgər İtaliya və alman təcavüzü
Balkanlarda Türkiyənin milli maraqları və təhlükəsizliyini təhdid etsə, Türkiyə
təcavüzkara müqavimət göstərəcəkdir (64).
May ayının 1-də Ş.Saracoğlu V.Potyomkinlə danışıqlarda onu aprelin 15-də və
25-də Britaniya səfirinə göndərdiyi məktubların məzmunu ilə tanış etdi. Bu
məktublarda təcavüzkara qarşı mübarizədə Türkiyə-İngiltərə, İngiltərə-SSRİ və
SSRİ-Türkiyə qarşılıqlı yardım haqqında sazişlərinin mühüm rol oynaya biləcəyi
göstərilirdi. Sənəddən aydın olurdu ki, təhlükəsizlik sistemini etibarlı etmək üçün
Türkiyə hökuməti İngiltərə və Türkiyənin SSRİ ilə danışıqlarının nəticələrini
gözləməyi zəruri sayırdı. Bununla belə V.Potyomkin Moskvaya verdiyi
məlumatda İngiltərə və Türkiyə arasında danışıqların gizli qaldığını yazırdı (65).
37
SSRİ-nin Türkiyədə səlahiyyətli nümayəndəsi A.V.Terentiyevin Xarici İşlər
komissarı V.Molotova 10 may 1939-cu il tarixli teleqramından aydın olur ki,
Sovet İttifaqı artıq xaricdəki nümayəndələrinə Almaniya diplomatları ilə
yaxınlaşmaq barədə göstəriş vermişdir. A.Terentiyev V.Molotova yazırdı: Sizin 9
may 1939-cu il tarixli direktivinizi dəqiqliklə rəhbər tutaraq Papenlə görüşdüm.
Səmimi və nəzakətli keçən söhbət 40-50 dəqiqə davam etdi. Məndə belə bir
təəssürat yarandı ki, Papen ola bilsin Berlindən gələn direktivə uyğun olaraq Sovet
İttifaqı nümayəndəsinə loyal münasibət nümayiş etdirmək qərarına gəlib, halbuki
biz son illər indiki alman səfirinin sələfləri tərəfindən belə bir münasibəti qəti
şəkildə görməmişdik. Söhbət zamanı Papen iki dəfə bildirdi ki, indi SSRİ ilə
Almaniya arasında səmimi münasibətlərin olmamasına baxmayaraq, müxtəlif
ideologiyalar və rejimlər bu dövlətlərin yaxınlaşmasına maneçilik törətməməlidir.
Papen dedi: "İdeologiyam bir tərəfə qoymaq və Bismark dövrünün dostluğuna
qayıtmaq lazımdır. Onun fikrincə, SSRİ və Almaniyanı heç bir ziddiyyət bir-
birindən ayırmırdı" (66).
1939-cu ilin may ayının 12-də A.Terentiyev SSRİ Xarici İşlər Komissarlığına
göndərdiyi teleqramda göstərirdi ki, Baş nazir R.Saydam bu gün ingilis-türk
sazişinin mətnini parlamentdə oxudu və bu barədə geniş bəyanatla çıxış etdi. O
bildirdi ki, indiyə qədər Türkiyə hökuməti sülh siyasətinə öz sədaqətini neytrallıq
prinsiplərini əsas tutmaqla ifadə edib. Lakin təhlükəli hadisələr Balkanlara
yayıldığı vaxtdan, Aralıq dənizinin təhlükəsizliyi Türkiyənin milli həyatında
özünü hiss etdirməyə başladığı andan Türkiyə hökuməti belə bir nəticəyə gəldi ki,
bundan sonra onun bitərəf qalması mümkün deyildir. Bütün bunlara aydınlıq
gətirdikdən sonra R.Saydam bildirdi ki, Türkiyə İngiltərə ilə yanaşı dayanmağa
qərar verdi. Hökumət İngiltərə ilə imzalanmış Bəyannaməni sülh və
təhlükəsizliyin qorunması, müharibənin başlanması təhlükəsinin uzaqlaşdırılması
kimi xarakterizə edirdi. R.Saydam qeyd etdi ki, bu Bəyannamədən və Böyük
Britaniya ilə Sazişin bağlanması başa çatdıqdan sonra Fransa ilə də eyni
məzmunlu danışıqlar başlanacaq. Baş nazir bildirdi ki, bizim böyük qonşumuz və
dostumuz Sovetlər ilə daha artıq səmimi və yaxın əlaqələrimiz davam etdriləcək.
Baxışlarımızın və maraqlarımızın eyniliyi bizim qarşımızda açılan əməkdaşlıq
yolunun nə qədər aydın olduğunu göstərir.
Böyük Millət Məclisinin iclasından dərhal sonra R.Saydam SSRİ-nin
səlahiyyətli nümayəndəsi A.Terentiyevlə görüşdü və V.Potyomkinin bu
yaxınlarda olan səfərindən Türkiyə hökumət başçılarının məmnun qaldığını ən
səmimi sözlərlə ifadə etdi. R.Saydam belə hesab edirdi ki, yaxın vaxtlarda Türkiyə
ilə SSRİ arasında danışıqlara başlayıb, iki ölkə arasında faktiki mövcud olan
ittifaqı hüquqi cəhətdən tamamlamaq