_____________Milli Kitabxana_____________
77
qanunvericilik hansı həddə qədər onlara məlumat vermək imkanı
verir? Bunu özləri üçün dəqiqləşdirməlidirlər. Həmçinin qarşı tərəf –
ictimaiyyət, QHT-lər, jurnalistlər özləri üçün dəqiqləşdirməlidirlər
ki, hansı həddə qədər informasiya əldə etmək olar və o istiqamətdə
mübarizə aparmalıdırlar. Mənim fikrimcə, bu işlərə nail olunsa, onda
hansısa ortaq məxrəc tapıla biləcək.
Üzeyir Cəfərov: Bəzi ölkələrdə peşəkar jurnalistlər məlumatları o
qədər sərrast şəkildə çatdırırlar ki, orada dövlət və hərbi sirr
elementləri olsa belə, bu sirrin açılması kimi görünmür.
Yaşar Cəfərli: Üzeyir bəyin dediyi məsələyə bir balaca əlavə
etmək istəyirəm. Əgər hər hansı bir jurnalist qanunu pozub dövlət
sirrini və yaxud da ki, hərbi sirri yayırsa o qanun qanşısında
məsuliyyət daşıyır. İnanmıram ki, hansısa jurnalist bilərəkdən bu
qanunu poza.
Əslində biz mətbuatı izləsək aydın görərik ki, hansı insanlar,
jurnalistlər, QHT-lər hərbi sahədə fəaldırlar. Hərbi sahdə hansı
dövlət qurumlarının olduğu da bəllidir. Fikrimcə, ilk addım bundan
ibarət olmalıdır ki, bunlar arasında görüşün baş tutmasına və
danışıqların aparılmasına çalışılmalıdır. Biz bilirik ki, müəyyən
məlumatlar var ki, bəzi güc strukturlarında buna cəhd edirlər, sadəcə
haradansa icazəmi gözləyirlər, yoxsa ürək eləmirlər və s. Bu görüş
baş tutarsa başqa məsələlərin də qarşısı alınar. Başqa nə etmək olar,
burada artıq bir sıra təkliflər səsləndi. Təbii ki, Qərb ölkələrinin,
NATO dövlətlərinin, yaxın qonşuların təcrübələrini götürüb tətbiq
etmək olar. Eyni zamanda başqa bir təklif: güc strukturları özləri öz
konsepsiyalarını açıqlayıb addım ata bilərlər ki, fəal insanlar, QHT-
lər başa düşsünlər ki, qanundan başqa reallıqlar bizi bu cür addım
atmağa vadar edir. Sadəcə qaçıb gizlənməık lazım deyil.
Sevil Nuriyeva: Tamamilə doğrudur. Bunun yekunu olaraq
bir qənaətə gəlinir ki, bütün təkliflərin fövqündə dövlət qurumu
və cəmiyyət arasında və burada əsas bağlayıcı rolunu oynayan
QHT-lər və jurnalistlərlə münasibətdə demokratik dəyərlər ön
plana çıxarsa, cəmiyyətdə öz güc strukturlarına qarşı münasibət
_____________Milli Kitabxana_____________
78
əksinə, müsbətə formalaşar və o güc strukturlarının rəhbərliyi öz
cəmiyyəti ilə təmasdan qaçmamaqla onlardan biri olduğunu
nümayiş etdirmiş olacaq və dolayısı ilə hər iki tərəfin bir-birinə
güvəni, inamı artacaq. Bununla da cəmiyyətimizin bu
qüsurundan çıxış yolu axtarılıb tapılacaq.
Mən buna görə Sizə təşəkkür edirəm. Sağolun ki, belə bir
layihə ilə çıxış etdiniz. “Hərbi sahədə informasiya əldə etmək
mədəniyyətinin inkişafı” layihəsi şərçivəsində bu verilişi
gerçəkləşdirdik. Orduya gəlincə, Azərbaycan öz ordusunu sevir,
öz ordusunu sevməyən kimsə tapılmaz. Amma içində
qüsurlarının olduğunu dilə gətirəndə də daha mükəmməl, daha
şəffaf, daha güclü olması arzusu ilə bunu edirik. Çünki
qəhrəmanları və qəhrəmanlığı çox sevirik. Qəhrəmanların və
qəhrəmanlığın bol olsun Azərbaycan!
IX HİSSƏ
AZƏRBAYCANDA HƏRBİ SAHƏDƏ İNFORMASİYA
ƏLDƏ ETMƏK MƏDƏNİYYƏTİNİN İNKİŞAFININ
PERSPEKTİVLƏRİ
Müşahidələr göstərir ki, son 3 il ərzində Azərbaycanın müdafiə və
təhlükəsizlik sahəsinin KİV-lə əlaqələri yüksələn xətlə gedir. Amma
buna baxmayaraq, bu gün güc strukturlarında informasiya
islahatlarının aparılması zərurəti getdikcə artır. Bu istiqamətdə
aşağıdakı konkret işlərin görülməsi zərurətə çevrilib:
1. Güc strukturlarının mətbuatla əlaqələrini tənzimləyəcək
sənədlərin qəbulu zəruridir. Xüsusilə Müdafiə Nazirliyinin mətbuat
xidmətinin və informasiya idarəsinin, eyni zamanda ayrı-ayrı hərbi
hissələrin cəmiyyəti məlumatlandırma sistemini təkmilləşdirəcək
yeni sənədlərin, əsasnamələrin qəbul edilməsi qaçılmazdır. Burada
əsas məqsəd Azərbaycan Müdafiə Nazirliyinin cəmiyyətlə, o
cümlədən kütləvi informasiya vasitələri ilə münasibətlərinin nizama
salınması olmalıdır;
_____________Milli Kitabxana_____________
79
2. Bu gün Azərbaycanın müdafiə və təhlükəsizlik sahəsində
həyata keçirilən islahatların tərəfsiz, obyektiv və dolğun şəkildə
ictimaiyyətin diqqətinə çatdırılmasını təmin etmək istiqamətində
məsuliyyət dərəcələrinin müəyyənləşdirilməsi zəruridir;
3. Azərbaycanda hərbi sahədə informasiya əldə edilməsini
asanlaşdıran qanunvericilik sənədlərinin qəbul oluması və ya mövcud
qanunlarda təkmilləşdirilmələr aparılması vacibdir;
3. Güc strukturlarının nəzarətində olan bu və digər KİV
orqanlarının fəaliyyətinin təkmilləşdirilərək konkretləşdirilməsi,
onların qarşısına qoyulan vəzifə və tapşırıqların XXI əsrin
qaydalarına uyğunlaşdırılması vacibdir. Bu uyğunlaşma
Azərbaycanın müdafiə və təhlükəsizlik sahəsinin Avroatlantik
məkana inteqrasiyasının sürətlənməsinə öz töhfəsini verməlidir;
4. Azərbaycanda "hərbi jurnalist" termininin özünə aydınlıq
gətirilməlidir. "Hərbi jurnalist" kimdir, kimlər bu vəzifəni tuta bilər?"
kimi suallara cavablar verilməlidir. Qeyd edək ki, hazırda
Azərbaycanda hərbi jurnalist hazırlayan hər hansı ali təhsil
müəssisəsi yoxdur. İstər güc strukturlarının tabeliyində olan
qəzetlərdə, istərsə də müstəqil KİV-lərdə çalışanların əksəriyyəti ya
mülki ali təhsil müəssisələrinin jurnalistika fakültəsini bitirənlərdir,
ya da onlar, ümumiyyətlə, Azərbaycan jurnalistikasında çalışanların
böyük əksəriyyəti kimi, başqa fakültələri bitiriblər. Bu gün güc
strukturlarında çalışanların əksəriyyəti hesab edir ki, hərbi
jurnalistlər müstəqil KİV və EİV-də çalışa bilməzlər. Onlar yalnız və
yalnız güc strukturlarının nəzdində olan qəzetlərdə çalışa bilərlər.
Qısası, onların məntiqincə, əgər jurnalist güc strukturunun qəzetində
çalışırsa, o, "hərbi jurnalist"dir, yox, əgər hansısa müstəqil KİV-də
çalışırsa, o, "ordu barədə anlayışı olmayan kəsdir";
5. Güc strukturlarının tabeliyində olan qəzetlərdə çalışan hərbi
qulluqçuların əhəmiyyətli hissəsinin qısa zaman kəsiyində mülki
jurnalistlərlə əvəz edilməsi zəruridir. Təcrübə göstərir ki, "rütbə və
vəzifə asılılığı" hərbi jurnalistlərin müstəqilliyinə, məlumatları
_____________Milli Kitabxana_____________
80
tərəfsiz və obyektiv yazmalarına mane olan əsas amildir. Belə ki, güc
strukturlarının tabeliyində olan jurnalist hansısa bir hadisəni obyektiv
şəkildə qeydə almaqdan çəkinə bilər, çünki sabah onu bu əməl
səbəbindən başqa bir hərbi hissəyə, özü də jurnalist peşəsindən uzaq
bir qulluğa göndərə bilərlər;
6. Ali təhsil müəssisələrində və eyni zamanda Azərbaycan Ali
Hərbi Məktəbində hərbi jurnalistləri hazırlayan kadrların
yetişdirilməsi zəruridir. Yaxşı olar ki, bu məsələdə prioritet məhz
mülki ali təhsil müəssisələrinə verilsin. Eyni zamanda mülki təhsil
müəssisələrində təhsil alan hərbi jurnalistlər təhsil müddətinin
müəyyən hissəsini məhz Ali Hərbi Məktəbdə keçirə bilərlər ki, bu da
onların peşəkar təcrübələrinin formalaşmasında böyük rol oynaya
bilər. Qeyd edək ki, postsovet ölkələrində belə bir təcrübə artıq
mövcuddur. Misal üçün, Belarus Dövlət Universitetində hərbi fakültə
mövcuddur. Bu fakültənin məzunları Silahlı Qüvvələrin müxtəlif
informasiya strukturlarında çalışa bilərlər;
7. Azərbaycanda hərbi jurnalistika ənənələrini formalaşdırmaq və
hərbi sahədə fəaliyyət göstərən və ya bu sahəyə marağı olan
jurnalistlərə qanun çərçivəsində ordudan "nəyi yazmaq olar, nəyi
yox"u başa salmaq lazımdır. Hərbi jurnalistika sahəsində çalışan
KİV-in və jurnalistlərin peşəkar səviyyəsinin, imkanlarının
artırılması qaçılmazdır;
8. Güc strukturları dinc dövrdə və xüsusi şəraitlərdə KİV-in və
hərbi jurnalistlərin söz və mətbuat azadlığının gerçəkləşdirilməsinə
dəstək göstərməli, onların bu və digər məsələ ilə bağlı müstəqil
jurnalist araşdırmasına imkan yaratmalıdır;
9. Hərbi mövzulara maraq göstərən jurnalistlərin hüquq və
azadlıqlarının, onların müəllif hüquqlarının qorunması, hərbi
jurnalistika sahəsində, xüsusi şəraitlərdə çalışan KİV-in və
jurnalistlərin fəaliyyətini nəzərdə tutan hüquqi bazanın yaradılması
və inkişafı zəruridir. Hərbi jurnalistlərin peşə etikasının
_____________Milli Kitabxana_____________
81
formalaşdırılması və ona riayət olunmasına ictimai nəzarətin həyata
keçirilməsi vacibdir;
10. Müdafiə və təhlükəsizilk sahəsindəki vəziyyəti diqqət
mərkəzində saxlayan KİV və jurnalistlərlə güc strukturları arasında
konstruktiv dialoqun inkişaf etdirilməsi, KİV-lə güc strukturlarının
mətbuat xidmətləri arasında sıx və məhsuldar əməkdaşlığın təşkil
olunması lazımdır.
Beləliklə, bu gün Azərbaycanda peşəkar hərbi jurnalistlər
ordusunun yaradılması işi çox zəruridir. Bunsuz silahlı qüvvələrdə
həyata keçirilən islahatların cəmiyyətə lazımınca çatdırılmasına və
nəticədə vətəndaşların bu məsələdə hökumətə dəstək olmasına nail
olmaq mümkün deyil. Eyni zamanda bunsuz ölkdə hərbi sahədə
informasiya əldə etmək mədəniyyətinin inkişafına nail olunması
mümkün deyil.
NATO standartlarına uyğunlaşmağı məqsəd qoymuş bir ölkədə
KİV və ordu arasında sadalanan problemlərin olması acınacaqlıdır.
Faktiki olaraq Azərbaycanda ictimaiyyətin Silahlı Qüvvələrdə
islahatlar prosesinə dəstəyi hiss edilmir ki, burada da məsuliyyət
məhz güc strukturlarının, xüsusilə də Müdafiə Nazirliyinin
informasiya siyasətini formalaşdıran məmurların üzərinə düşür.
Faydalı məlumatlar
“Doktrina” Jurnalistlərin Hərbi Araşdırmalar Mərkəzi İctimai
Birliyi
2005-ci ilin mayında Azərbaycanın NATO ilə İPAP sənədini
imzalaması dövründə bir qrup hərbi jurnalist və hərbi ekspert
tərəfindən “Doktrina” JHAM-ın yaradılmasına qərar verildi. Bundan
sonra təşkilat aktiv şəkildə Azərbaycanın NATO ilə əməkdaşlığı
çərçivəsində razılaşdırılmış sənədlərin ordumuza tətbiqi proseslərinin
monitorinqinə başladı. “Doktrina” JHAM-ın fəaliyyətinin
rəsmiləşdirilməsi üçün 2007-ci ilin sonlarında qeydiyyat üçün
_____________Milli Kitabxana_____________
82
Ədliyyə Nazirliyinə müraciət edildi. 2007-ci ilin dekabrında isə
təşkilat ictimai birlik kimi dövlət qeydiyyatına alındı. Təşkilatın
nizamnaməsindən göründüyü kimi birliyin məqsəd və vəzifələri
dəyişməyib: “Doktrina” JHAM hərbi jurnalistika sahəsində
araşdırma aparır, bu sahənin inkişafına dəstək verir, jurnalist
fəaliyyəti ilə əlaqədar əldə edilmiş məlumatları araşdırır və təhlil
edir, ictimaiyyətdə müdafiə və vətənpərvərlik sahəsində
maarifləndirmə işi aparır.
“Doktrina” JHAM-ın fəaliyyətini əsasən 3 istiqamətə bölmək olar:
birincisi, ölkənin müdafiə və təhlükəsizlik sektorunda (buraya bütün
güc strukturları daxildir) baş verən proseslərin öyrənilməsi və
araşdırılması, uğurların və problemlərin üzə çıxarılması, taktiki və
strateji proqnozların irəli sürülməsi və ictimai məlumatlandırma.
İkincisi, ölkə KİV-də fəaliyyət göstərən və hərbi məqalələrlə çıxış
edən jurnalistlərə münasibətin qurulması və hərbi jurnalistikanın
peşəkarlığının artırılmasına səylərin göstərilməsi və nəhayət
üçüncüsü, Azərbaycanın beynəlxalq təşkilatlarla və dövlətlərlə
müdafiə və təhlükəsizlik sahəsində əməkdaşlığının vəziyyətinin
öyrənilməsi, Cənubi Qafqazda hərbi-siyasi tədbirlərin, geosiyasi
vəziyyətin öyrənilməsi və araşdırılması sahəsində tədqiqatların
aparılması.
Hər üç istiqamətdə “Doktrina” məqsədlərinə müəyyən qədər nail
olub. Xüsusilə “Doktrina” JHAM-ın 2003-cü ildən başlayaraq
Azərbaycanın müdafiə və təhlükəsizlik sektorunda baş verən itkilərin
statistikasını aparması, Azərbaycanın NATO ilə razılaşdırdığı “Sülh
Naminə Tərəfdaşlıq” proqramı (PfP), bu sənəddən irəli gələn İPAP,
PARP, İPP, PAP-T, OCC və s. sənədlər çərçivəsində orduda həyata
keçirilən islahatların monitorinqini aparması diqqətçəkəndir. Bu gün
“Doktrina” JHAM-ın həyata keçirdiyi araşdırmaların,
monitorinqlərin nəticələri əksər yerli KİV və QHT-lər tərəfindən, o
cümlədən beynəlxalq təşkilatlar tərəfindən mötəbər bir informasiya
kimi istifadə istifadə olunur və bu da fəaliyyətimizin nəticələrinin
səmərəliliyinə sübut kimi hesab edilə bilər.
_____________Milli Kitabxana_____________
83
Konkret layihələrə gəldikdə isə, “Doktrina” mərkəzi 2008-ci ildən
etibarən Azərbaycan Təhlükəsizlik və Müdafiə
İctimai
Assosiasiyasının illik hesabatlarının hazırlanmasında iştirak edir.
2009-cu ilin avqust ayında isə Açıq Cəmiyyət İnstitutu – Yardım
Fondunun maliyyə dəstəyi ilə “Hərbi sahədə informasiya əldə etmək
mədəniyyətinin inkişafı” layihəsini reallaşdırmağa başlayıb.
Bununla yanaşı təşkilatda təmsil olunan ekspertlər və jurnalistlər
ölkənin ayrı-ayrı KİV-lərində məqalələrlə çıxış edir, ekspert rəyləri
verirlər. “Doktrina” ekspertlərinin tez-tez xarici ölkələrdə mötəbər
tədbirlərdə iştirak etməsi, Azərbaycanın müdafiə islahatlarında
ictimai töhfənin artırılmasına yönəlik səylərimizin daha da
təkmilləşdirilməsinə səbəb olur.
“Doktrina” JHAM ölkədə hərbi sahədə yazmağa maraq göstərən
jurnalistlərlə daima bir yerdədir, onlarla əlaqə saxlanılır, lazımi
informasiya dəstəyi, ekspert yardımı edilir. İmkan düşdükcə hərbi
yazarlar arasında müxtəlif mövzularda müzakirələrin aparılmasına,
müxtəlif layihələrdə onların iştirak etmələrinə çalışılır. “Doktrina”
JHAM ekspertləri ölkənin bir sıra KİV və QHT-lərindən olan
həmkarlarla Azərbaycanda hərbi jurnalistikanın inkişafının təmin
edilməsi, mexanizmlərin yaradılması, güc strukturları ilə media
təmsilçiləri arasında əməkdaşlığın qurulması istiqamətində səylə
çalışırlar və müəyyən uğurlar ortadadır.
“Doktrina” JHAM-ın sədri Cəsur Sümərinlidir (Məmmədov)
(
cesursumer@mail.ru
). C.Sümərinli eyni zamanda “MilAz”
İnformasiya Agentliyinin baş direktoru, “Ayna” və “Zerkalo”
qəzetlərinin hərbi təhlilçisidir.
“Hərbi Jurnalistlər” İctimai Birlıiyi
“Hərbi Jurnalistlər” İctimai Birliyi 2007-ci ilin mart ayında bir
qrup ehtiyatda olan hərbi qulluqçu və media təmsilçisi tərəfindən
yaradılıb. Bu ictimai birlik Azərbaycanda hərbi jurnalistikanın
inkişafına, hərbi sahədə baş verən proseslərin şəffaflığına çalışır.
_____________Milli Kitabxana_____________
84
Silahlı Qüvvələrdə islahatlar prosesinin öyrənilməsi və bu
istiqamətdə ictimai məlumatlandırmanın aparılmasını “Hərbi
Jurnalistlər” İctimai Birliyinin qarşısımda duran hədəflərdən biridir.
“Hərbi Jurnalistlər” İctimai Birliyi 2008-ci ildən etibarən
Azərbaycan Təhlükəsizlik və Müdafiə İctimai Assosiasiyasının illik
hesabatlarının hazırlanmasında iştirak edir. 2009-cu ilin avqust
ayında isə Açıq Cəmiyyət İnstitutu – Yardım Fondunun maliyyə
dəstəyi ilə “Hərbi sahədə informasiya əldə etmək mədəniyyətinin
inkişafı” layihəsində tərəfdaş təşkilatdır.
Təşkilatın sədri ehtiyatda olan polkovnik-leytenant Üzeyir
Cəfərovdur. Ü.Cəfərov həmçinin
www.milaz.info
saytının baş
redaktorudur.
_____________Milli Kitabxana_____________
85
İçindəkilər:
Müəllifdən--------------------------------------------------------------3
I HISSƏ. Azərbaycanda hərbi sahədə informasiya əldə etmək
mədəniyyətinin tarixi ---- ----------------------------------------------5
II HİSSƏ. Dağlıq Qarabağ münaqişəsi və sonra Ordu – KİV
əlaqələri -------------------------------------------------------------------9
III HİSSƏ. Güc strukturları ilə KİV arasında əlaqələrin
mövcud vəziyyəti -------------------------------------------------------16
IV HİSSƏ. Hərbi sahədə məlumatlar niyə açıq olmalıdır?
Dünya təcrübəsi --------------------------------------------------------19
V HİSSƏ. Azərbaycanda hərbi sahədə şəffaflıq tərəfdarı olan
beynəlxalq təşkilatlar -------------------------------------------------32
VI HİSSƏ. Nəyi əldə etmək olmaz? Hərbi sirr haqqında
mövcud qanunvericilik ------------------------------------------------35
VII HİSSƏ. Rəsmilər, media və ekspertlər nə düşünür?- --–42
VIII HİSSƏ. İnformasiyalı cəmiyyət: Azərbaycan keçid
mərhələsində -------------------------------------------------------------64
VIII HİSSƏ. Azərbaycanda hərbi sahədə informasiya əldə
etmək mədəniyyətinin inkişafının perspektivləri ----------------78
Faydalı məlumatlar ------------------------------------------------81
Dostları ilə paylaş: |