155
Əvvəla,
onu deyək ki, ümumtürk və Şərq-müsəlman mədəniyyətinin
tərkib hissəsi kimi Azərbaycan mədəniyyəti bugünki vəziyyətinə uzunillik
inkişaf yolu keçərək gəlib çıxmışdır. Təbii ki, bu mədəniyyətin
formalaşmasında və inkişafında müxtəlif dövrlərdə cəmiyyətdə gedən
çoxşaxəli proseslərin mühüm rolu olmuşdur.
Erkən Orta əsrlərdə islamlaşmış ərazilərdə bəzi sosial-siyasi hadisələr
baş verdi ki, həmin hadisələrin təsiri və həm də nəticəsi olaraq bir sıra dini
ehkam və yasaqlar ya tamamilə aradan qaldırıldı,
ya da xeyli dərəcədə
yumşaldıldı. Belə ki, VIII-IX yüzilliklərdən başlayaraq, hakimiyyət uğrunda
gedən siyasi çarpışmalarda məğlubiyyətə uğrayan bir sıra nüfuzlu İslam
ideoloqları arasında bu dini dünyagörüşün bəzi müddəalarının təshihi və
yeniləşdirilməsi meylləri yarandı ki, bu da ayrı-ayrı təriqətlərin meydana
gəlməsiylə nəticələndi (5, 87-89).
Orta əsrlərdə Azərbaycan müxtəlif feodal imperiyalarının əsarəti altında
olmuş, əvvəlcə monqolların, sonra isə Teymurilər imperiyasının işğalları baş
vermişdir. Bu işğal və basqılar zəminində bir sıra üsyanlar, etirazlar meydana
gəlmişdi. Belə etiraz formalarından biri də mahiyyətində müəyyən
demokratik
ideya və azadlıq düşüncələrini əks etdirən insanların, savadlı və ziyalı
şəxslərin toplaşma məkanı və formalarından biri də təriqət və cərəyanlar idi.
Nə qədər ədəbi-bədii, fəlsəfi-estetik mahiyyət kəsb etməsindən asılı olmayaraq
təriqətlər müəyyən mənada, bəzən rəmzi simvolik, bəzən isə birbaşa olaraq
insanın daxili-mənəvi azadlığı ideyasını təbliğ edir və yayırdı. Bu prizmadan
baxdıqda, orta əsrlər Azərbaycan mədəniyyətinin formalaşması və inkişafında
mühüm rol oynayan təriqət və cərəyanların – ideya, fikir, əqidə
generatorlarının cəmiyyətin ideoloji əsaslarının təşkil olunmasındakı rolunu
görmək mümkündür. Məsələn, sufi-dərvişlər təkkə ocağında cəmləşərək öz
ayin, mərasim və ideyalarını icra və təbliğ edirdilər. Təkkə ocağında təriqətə
qulluq edən, məxsusi mərasimlər keçirən sufi-dərvişlər
tərəfindən təriqət
məzmunu daşıyan hekayətlər rəmzi-simvolik rəvayətlər düzüb qoşulur və
təbliğ olunurdu.
Və ya XIV əsrdə Azərbaycan ərazisində yaranan, daha sonra bir sıra
ərazilərə də yayılan hürufilik təriqətinin mahiyyəti, əslində, yadellilərə, zülm
və əsarətə qarşı mübarizə, insan azadlığı və hüquqlarının əldə olunmasına
çağırış idi. Bunu isə Rey Oldenburqun vurğuladığı fransız və amerikan
inqilabının, eləcə də ingilis maarifçiliyinin meydana gəlməsində mühüm rol
oynayan kafe, qəhvəxana, meyxana kimi “üçüncü məkanlar”la
müqayisə
etmək mümkündür. Əslində, bu məkanlar müəyyən ideya və fikirlərin
müzakirə olunduğu, vahid əqidə ətrafında birləşən insanların toplaşdığı məkan
kimi mühüm əhəmiyyət kəsb edir.
Bundan əlavə, əgər biz Azərbaycan folklor nümunələrinə, xüsusən nağıl
və dastan süjetlərinə baxsaq görərik ki, burada insanların toplaşdığı, biri-biri
ilə ünsiyyətə girdiyi, fikir mübadiləsi etdiyi məkanlardan biri də çayxanalar,
aşxana, hamam və karvansaraylardır. Dastan və nağıllarımızda səfərə çıxan
156
qəhrəman hər zaman gecələmək üçün karavansaraylara, mehmanxanalara üz
tutur, çayxanalara qonaq olur və bu
yerlərdə müxtəlif insanlarla, olay və
hadisələrlə qarşılaşır. Özü də bu hadisə və olaylar həmişə onun gedəcəyi
yerlər, görəcəyi işlərlə əlaqəli olur. Dastan və ya nağıl qəhrəmanı çətinliyə
düşdükdə, əlacsız vəziyyətdə qaldıqda bu məkanlarda rast gəldiyi insanlardan
aldığı xəbərlə, məlumatla yoluna davam edir, öz hədəfinə doğru irəliləyir.
Məsələn, “Baftaçı Şah Abbas” nağılında dərviş libasını geyinib şəhərə çıxan
Şah Abbas yuxuda gördüyü hadisələrlə bir aşxanada rastlaşır (2, 280-282).
Yaxud “Aşıq Qərib” dastanında Dəli Mahmudun qəhvəxanasına yollanan Aşıq
Qərib oradakıların xahişi ilə Təbrizi vəsf eləyir və camaatın gözü qarşısında
Güloğlanla burada deyişir (1, 173-174). Daha bir nümunə göstərək. “Qurbani”
dastanında Gəncə şəhərinin daş mehmanxanasının çayçısına gələn Qurbani
oradıkıların qarşısında Dədə Yediyar kimi ustad sənətkarı məğlub edir (1, 222-
225).
Bütün bu faktlar onu deməyə əsas verir ki, Rey Oldenburqun qeyd etdiyi
xüsusi
məkanlar, Azərbaycan mədəniyyətində də aktiv məkanlar kimi xüsusi
əhəmiyyət kəsb etmiş, cəmiyyətin və ayrı-ayrı insan qruplarının toplaşdığı,
cəmləşdiyi yerlər kimi yaddaşlarda əks olunmuşdur.
Hal-hazırki zamanımızda da, istər gənclərin, istərsə də orta və yaşlı
nəslin nümayəndələrinin toplaşdığı, üz tutduğu ən mühüm məkanlar məhz
çayxanalar, çay evləri, klub və kinoteatrlardır. İnsanlar sosial durumlarına,
peşə və maraqlarına, dünyagörüşü və əqidələrinə və s. parametrlərə əsasən
müxtəlif məkanlarda öz istirahət vaxtlarını keçirir,
ünsiyyət və müzakirələr
təşkil edirlər. Bu məkanlar, əslində, asudə vaxtın səmərəli və rahat keçirilməsi,
insanların ünsiyyət və münasibət ehtiyaclarının ödənilməsi baxımından
mühüm əhəmiyyət kəsb edir. İnsanlar belə məkanlara qidanlanmaqdan daha
çox ünsiyyət və münasibət üçün üz tuturlar.
Ümumiyyətlə, Rey Oldenburqun “üçüncü məkanlar”la bağlı məsələyə
hansı aspektdən yanaşmasından və Pyotr Laponun bu məsələyə münasibətdə
hansı mövqe tutmasından asılı olmayaraq qeyd etməliyik ki, kafe, qəhvəxana,
çayxana, klub, bərbərxana, hamam, ticarət mərkəzləri və s. kimi insanların
toplaşdığı tarixi və müasir məkanların mahiyyətində çoxsaylı faktorlarla
yanaşı, informasiya
mübadiləsi və müzakirəsi, eləcə də ünsiyyət və
kommunikasiya ehtiyacı mühüm yer tutur. Bu məkanlar məhz məlumat, xəbər,
söz-söhbət, şayiə, yalan, həqiqət və s.-dən ibarət olan informasiya məkandır.
Lakin bu məkanların rolu və funksiyası informasiya-kommunikasiya
texnologiyaları meydana gələnə qədərki dövr üçün fərqli məzmun kəsb
edirdisə, İKT-dən sonrakı dövr üçün yeni məna ehtiva etməkdədir. Təbii ki, bu
zəmində kitabxanaların da mahiyyəti, forma və məzmunu da dəyişikliyə
məruz qalmışdır. Bu məsələyə bir qədər sonra yenidən qayıdacağımızı nəzərə
alaraq, Pyotr Laponun qeyd olunan məqaləsində kitabxanların “üçüncü
məkan” kimi təhlili perspektivlərinə və onların sosial mahiyyəti ilə bağlı
məsələlərə diqqət yetirək.