425
Bu boyda Qazan elinə hücum edən tayfaya, düşmən elinə münasibət birmənalı deyildir. Azərbaycan,
eləcə də bəzi türk tədqiqatçıları bunu qonşuluqda yaşayan və oğuzlarla düşmənçilik münasibətində olan
kafirlərin adı ilə bağlayırlar. Əbülqaziyə görə bu yağmalanmanın səbəbkarı qonşu kafir tayfalar yox,
peçeneqlərdir. Bu mülahizə isə eposun tanınmış tədqiqatçısı V.M.Jirmunski tərəfindən təsdiqlənir və
müdafiə edilir. Amma bizə belə gəlir ki, həmin dövrdə peçeneqlər oğuzlardan xeyli uzaqda idi və bizə gəlib
çatan bir sıra məlumatlara görə, onların oğuzlarla düşmənçilik münasibətləri hələ kəskinləşməmişdi [4, 47].
V.M.Jirmunski, görünür, Əbulqazinin türklərin tarixi yerləşməsi və işğalları ilə bağlı faktlara əsaslanıb bu
yağmalanmada peçeneq izini irəli çəkir [5, 528-529].
Bütün bu mülahizələrə onu da əlavə etmək lazımdır ki, Qazan bəyin evinin düşmən tərəfindən
yağmalanması oğuz idarəçiliyinə son qoymaq, yaxud onu əsaslı şəkildə sarsıtmaq məqsədi daşıyırdı. Hücüm
edən düşmənin adı da aydın idi. Bu, Oğuz elinin başlıca düşmənlərindən olan Şöklü Məlik idi. Qazan –
Şöklü Məlik qarşıdurması oğuz xaqanlıq idarəçiliyinin sınağı idi. Qazan xan bu sınaqdan yaxşı çıxsa da, bu
döyüş Oğuz eli üçün tarixi bir məqam idi. Hücuma məruz qalan xanlıq idarəçiliyin baş sərkərdələrindən biri
idi və düşmən onun üzərində müvəqqəti qələbə qazanmışdı. Nəhayət, boyun sonunda ədalət bərpa olunur,
xeyir-şər mübarizəsi sona çatır. Qazan düşmən üzərində qələbə qazanır, bu da öz mahiyyətinə görə Oğuz
elinin qələbəsi idi, sonrakı bölmələrdə bu barədə ətraflı danışacağıq [3, 49-51]. Qazan bəyə qəbilə başçısı
olan bəylər köməyə gedir. Qazanın qələbəsi xanlıq bəylərinin birgə köməyi ilə mümkün olur.
Eposdan görünür ki, Daş Oğuzun başçısı Qazan xanın dayısı Aruz qocadır. İç Oğuzla Daş Oğuz nəsil
şəcərəsinə görə yaxın oğduğu kimi, gündəlik məişət həyatındakı qohumluq əlaqələrinə görə də bu
qohumluğu möhkəmlətməkdə idilər. Məsələn, Bamsı Beyrək Daş oğuzlardan evlənmişdir, o, İç Oğuzdan
olan bəylərbəyinin qaynı idi. Belə qohumluq əlaqələri iki el arasındakı münasibətlərin tənzimlənməsində
mühüm rol oynayır. Hətta onlar arasında münasibətlər kəskinləşdikdə tənzimlənmə imkanı saxlanılır.
Müxtəlif qəbilələrin başçısı olan bəylərin hər birinin 40 cəngavəri vardır.
Oğul övladı olduqdan sonra bəylik alıb özünə yeni taxt quran cavan igidlərin də qırx nəfərlik dəstəsi
vardır. Dastan mətninə görə, divana üz tutub «aqın» (hücum) üçün icazə istəyənlərə, düşmən qalasından
çıxıb vətənə dönmüş igidlərə, atasını dustaqlıqdan qurtarmağa gedən döyüşçülərə silahlı dəstə verilir.
Məsələn, Uşun Qoca oğlu Əgrəg «üç yüz say cidalu yigit» götürüb yola çıxır [3, 110]. Belə xahişlər, icazələr
olanda car çəkilir, könüllülər yığılır, «sancaq bəylərini Bayandır xan özü müəyyənləşdirir, “Yigirmi dörd
sancaq bəgi gəlsün” – dedi [3, 95].
Bu könüllülər hünər göstərmək üçün, ərənlik, alplıq iftixarı ilə səfərə çıxırlar. Dastanın iki boyunda
Oğuz elinin geniş kütləsi silaha sarılır. Qazan oğlunu xilas etməyə gedəndə, oğlanın anası duymadan buyurur
ki, «Toqsan tümən gənc oğuz ardımca gəlsün! Oğlan tutsaqdır, bəglər bilsün, - dedi» [3, 74]. Burada doxsan
igidin mütəşəkkil yürüşü görünmür, Qazana köməyə gedən bu qüvvənin başçısı da bilinmir, lakin boyun
sonunda oğuz bəyləri isə igidləri ilə düşməni məhv edirlər [3, 77].
Xan Bayındırın özünü müdafiə edən nizami ordusu yoxdur. Ancaq bəylərin igidləri peşəkar
döyüşçülərdir. Onlar lazım gələndə eli, ayrı-ayrı qəhrəmanları müdafiə edirlər. Ancaq döyüşlərdə hər iki
tərəfdən təlafat çox olur.
İç Oğuz və Daş Oğuz tayfalarının Bayandır xana tabeliyində dövlətçiliyin zəif də olsa formalaşma
prinsipləri vardır. Belə ki, tayfa hakimiyyətinə daxil olan 24 oğuz tayfasından hər birinə yalnız xanlar xanı
Bayandır xanın fərman verməsi, əmr etmək hüququ təsdiq edilməmişdir. Daha doğrusu, 24 tayfa başçısı
razılığa gəlmişlər ki, xanlıqda yalnız Bayandır xan fərman verə bilər, xanlığa daxil olan bütün tayfaların
başçıları isə ona tabedirlər.
Lakin bununla belə, tayfa başçıları olan bəylər tam sərbəstdir, xanın qadağa çərçivəsindən çıxmamaqla
onlar öz qəbilə və ya tayfalarında müstəqildir. Lakin bütün bunlarla yanaşı, onlar xanlar xanı Bayandır xanın
və ya Salur Qazanın iradəsinə tabe idilər. Qam Qan oğlu Bayandır xanın buyruqları oğuzda mütləq qayda-
qanunlar sistemini təşkil edir. İstər onun ildə bir dəfə şadlıq edib oğuz bəylərini qonaq etməsi, atdan, ayğır,
dəvədən buğra, qoyundan qoç qırdırıb bir yerdə ağ otaq, bir yerdə qırmızı otaq, bir yerdə qara otaq
qurdurması, bununla da oğuzun övladsız şəxslərinin həm Tanrı, həm də onun özü tərəfindən bir növ
cəzalandırılması, övladlılara isə diqqət və ehtiramını bildirməsi, Bayandır xanın bir yazda, bir də payızda
buğa ilə buğrasını savaşdırması (Dirsə xan oğlu Buğac boyu), tamaşa təşkil edib gəncləri sınağa çəkməsi,
bəylərin ondan qoşun istəməsi və xanın iyirmi dörd vilayətin pəhləvan bəylərindən ibarət kömək – qoşun
dəstəsi göndərməsi (Qazılıq qoca oğlu Yeynək boyu), qonşu ellərdən xərac gələrkən onu bəylərə – cavanlara
paylaması Bayandır xanın oğuzda böyük nüfuz sahibi olmasını bir daha təsdiqləyir.
Oğuz elində idarəçilikdə zorakılıq yoxdur. Bayandır xana, eləcə də öz tayfasına, qəbiləsinə məhəbbət
oğuzlar içərisində genişdir. Burada oturaq həyata keçid əlamətləri güclüdür. Tayfanın güzəranının
yaxşılaşması, əkin-biçin işlərinin genişləndirilməsi üçün mərkəzi idarəçilikdən tədbirlərin görülməsi nəzərə
426
çarpmır. Ayrı-ayrı igidlərin söyləmələrində ilxı, sürü, dəvələr, çöl-çayırın vəsfindən görünür ki, oğuz eli
maldar görüşlərinə daha çox tabedir.
Xanlıqda idarəçilik və dövlətçilik tələblərinin möhkəmləndirilməsinə elə meyl göstərildiyi nəzərə
çarpmır. Əksinə, xanlığı möhkəmləndirmək tədbirləri əvəzinə, eposda ayrı-ayrı qəhrəmanlar, onların taleyi,
qalada dustaq olmaları, yaxud doğmaları tərəfindən xilas olması üçün xan Bayandırın razılığı ilə görülən
tədbirlər üstünlük təşkil edir. Yaxud eposda düşmən tayfaların hücumu, tayfalararası münasibətlər, onların
kəskinləşməsi və tənzimlənməsi daha çox görüntü yaradır. Amma bütün bunlara baxmayaraq, «Kitabi-Dədə
Qorqud»da oğuz dövləti və onun idarəçilik nümunəsi bütün görünən və görünməyən cəhətləri ilə özünü
göstərir ki, bunun da ayrıca tədqiqinə ehtiyac vardır.
Epik yaddaşda yaşayan oğuz dövlətçiliyi və idarəciliyinin müxtəlif ənənələri türk eposunda sonralar da
ayrı-ayrı şəkillərdə, formalarda yaşamışdır. Bu isə ümumilikdə türkün qədim dövlət idarəçilik ənənələrini
öyrənmək baxımından xüsusi əhəmiyyətə malikdir. İlk, ibtidai dövlət tipi kimi, Bayandır xan dövlətçiliyi
türkün qədim idarəçilik formalarından biri kimi qəbul edilməlidir.
Xan Bayındırın başçılıq etdiyi xanlıq İç və Daş Oğuz qəbilə birləşməsi əsasında yaranan idarəçiliyə
əsaslansa da bütövlükdə qədim xaqan dövlətçiliyi tiplərindən biri idi.
İdarəçiliyin özündə də bu tayfa və dövlətlərin başçıları bu və ya digər şəkildə təmsil olunurdu. Əgər
Bayandır xan oğuzların baş xaqanı idisə, Salur Qazan onun bəylərbəyisi – İç Oğuzu təmsil edən
qəhrəmanlardandı. Aruz Qoca isə Daş Oğuzun başçısı idi. Oğuz elində tayfalararası münasibətlərin
qoruyucusu Qazan xan idisə, hər tayfanın, xüsusən Daş Oğuza daxil qəbilələrlə münasibət tənzimləyicisi
Aruz qoca idi. O, həm də Qazan bəyin dayısı idi.
«Kitabi-Dədə Qorqud» eposunda oğuz tayfası ilə bağlı iki tip ziddiyyət mövcuddur. Təbii ki, onların
birincisi tayfaxarici ziddiyyətlər idi. Yəni oğuzun düşmənləri hesab edilən kafirlər hücum edib eli talamağa,
onun varidatını ələ keçirməyə, qız-gəlinini aparmağa, igidlərini əsir etməyə fürsət axtarırdı. Bunu biz ikinci
boyda («Salur Qazanın evi yağmalandığı boyı bəyan edər»), dördüncü boyda («Qazan bəg oğlı Uruz bəgin
tutsaq oldığı boyını bəyan edər, xanım, hey!..») və on birinci boyda («Salur Qazan tutsaq olub oğlı Uruz
çıqardığı boyı bəyan edər»də) görə bilirik. Bu boylarda – kafir talanlarına məruz qalan oğuz elinin qonşuları
ilə xarici ziddiyyətlərdə olduğu diqqəti çəkir.
«… Kafərin casusı casusladı. Vardı kafərlər arğunı Şökli Məlikə xəbər verdi. Yedi bin qaftanının ardı
yırtıxlu, yarımından qara saçlu, sası dinlü, din düşməni alaca atlu kafər bindi yılğadı, dün burcuğında Qazan
bəgin ordısına gəldi. Altun ban evlərin kafərlər çapdılar, qaza bənzər qızı-gəlini çığırışdırdılar. Tölə-tölə
şahbaz atlarını bindilər. Qatar-qatar qızıl dəvələrini yetdilər. Ağır xəzinəsini, bol aqçasını yağmaladılar. Qırq
incə bellü qız ilə Boyı uzun Burla xatun yesir getdi. Qazan bəgün qarıcıq olmış anası qara dəvə boynında
asılu getdi» [3, 42-43].
«Kitabi-Dədə Qorqud» oğuzları bütün ziddiyyət və təzadları, xarici və daxili düşmənləri ilə mübarizə
şəraitindəki həyatı, gerçəkliyə, əsaslanan dünyagörüşü, idarəçilik sistemi ilə eposda canlandıra bildi. Yunan
eposundan bir az irəli gedərək ziddiyyət və qarşıdurmaları Allahlar, hökmdarlar arasından yox, real insanlar,
qəbilə və tayfa halında yaşayan, dövlət yaradan, cəmiyyət quran insanlar arasından götürüb eposa gətirdi.
Oğuz eposunda rast gəldiyimiz ölkə idarəçiliyi sistemi, dövlət tipi dünyanın ən qədim ibtidai idarəedicilik
formalarından biridir. Bu idarəçilik sistemi nə qıpçaq eposunda, nə də dünya xalqlarına məxsus başqa epik
bədii nümunələrdə təkrarlanır.
Xan-xaqan idarəçiliyinə əsaslanan bu dövlətçilik sistemi dövrü üçün öz demokratikliyi ilə seçildiyi
kimi, müstəqil idarəçiliyinə görə də indiyədək məlum bütün dövlətçilik formalarından fərqlənir. «Kitabi-
Dədə Qorqud» indiyədək türklər, o cümlədən oğuz mədəniyyəti, tarixi, coğrafiyası, dövlətçilik ənənələri və
s. ilə bağlı deyilmiş bütün neqativ mülahizələri alt-üst edir. O, oğuzların tarixən zəngin mədəniyyəti olduğu
kimi, bu mədəniyyətə söykənən milli-mənəvi və əxlaqi ənənələrinin mövcudluğunu da təsdiqləyir.
Dünya eposundan fərqli olaraq «Kitabi-Dədə Qorqud»un baş qəhrəmanı tək bir cəngavər, tənha bir
qəhrəman yox, bütün oğuz elidir. Oğuz eli eposda mənəvi-əxlaqi dəyərlərin, milli özünəməxsusluğun,
cəngavərlik, vətənsevərlik simvoludur. Ozanlar oğuz elinin toyu, busati, cəngavərlik həyatını tək bir
qəhrəmanın adı ilə bağlamır. Hər fərdi qəhrəmanlıq son nəticədə bütün oğuz qəhrəmanlarının, yaxud oğuzu
təmsil edən qəhrəmanların iştirakı ilə tamamlanır. Bu isə oğuzların qəbilə və tayfa birliyi, onların yekdilliyi
və qüdrəti ilə bilavasitə əlaqədardır. Məsələn, «Qazılıq qoca oğlı Yegnək boyını bəyan edər, xanım, hey!»
boyuna diqqət yetirək: «İç Oğuz (Taş Oğuz) bəgləri söhbətə dərilmişdi. Yemə-içmə idi.
Qazılıq qoca, deərlərdi bir kişi var idi. Bayındır xanın vəziri idi. Şərabın itisi başına çıqdı. Qaba dizin
üzərinə çökdi, Bayındır xandan aqın dilədi. Bayındır xan dəstur verdi: «Nerəyə dilərsən, var!» - dedi.
Qazılıq qoca iş görmüş, iş yarar adam idi... Günlərdə bir gün Düzmürd qələsınə gəldi...