Azərbaycan SSR sovet gömrük sistemi şəraitində (1920-1991)
217
ötmüş malların satışından 1249872 manat (50,3 faiz),
müsadirə edilən qaçaq
malların satışından isə 33229 manat (1,5 faiz) və 1438 manat (0,07 faiz)
digər gəlirlər daxil olmuşdu [82, 59].
Yuxarıda adları qeyd edilən sənədlər – SSRİ-nin 1991-ci il Gömrük
Məcəlləsi və “Gömrük tarifi haqqında” Qanun təsdiq edilməmişdən öncə
Gömrük Əməkdaşlığı Şurasında (GƏŞ), Tarif və Ticarət haqqında Baş
Sazişin (GATT) mənzil-qərargahında baxılmışdı. Bu qanun layihələri göm-
rük işinin beynəlxalq təcrübədə qəbul edilən ümumi prinsiplərinə uyğun
olduğuna görə müsbət qiymətləndirilmişdi. Bu sənədlər öz dövründə ölkədə
gömrük işinin təşkili
sahəsində qismən də olsa, islahatlar aparmağa imkan
verdi. Yeni Məcəllə gömrük sistemində üçpilləli idarəçiliyi qanuniləşdirdi:
mərkəzi gömrük orqanı – regional gömrük idarələri – gömrükxanalar.
DGNBİ-ni əvəz edən yeni mərkəzi orqan Gömrük Komitəsi oldu.
SSRİ Prezidentinin 15 iyun 1991-ci il fərmanı ilə Komitənin Əsasnaməsi
təsdiq edildi. Yeni Gömrük Məcəlləsində iki orqanın – Gömrük-tarif Şurası
və narkotik vasitələr və psixotrop maddələrin beynəlxalq qanunsuz dövriy-
yəsinə qarşı mübarizə üzrə koordinasiya Şurasının yaradılması nəzərdə
tutulurdu. Lakin, 1991-ci ilin Gömrük Məcəlləsi və Gömrük tarifi haqqında
Qanun nisbətən mütərəqqi sənədlər olsalar da, hər halda iqtisadiyyatın,
xarici iqtisadi əlaqələrin və gömrük işinin idarə edilməsinə inzibati-amirlik
metodları ilə yanaşmanın təsiri yetərincə hiss olunurdu.
1991-ci ildə yeni və son sovet Gömrük Məcəlləsi və Gömrük Tarifi
qəbul edildi. Məcəllə gömrük sisteminə müasir yanaşma ilə fərqlənirdi.
Həmin sənədə əsasən yerlərdə gömrük sisteminin yeni qurumlarının və
təşkilatlarının yaradılmasına başlanıldı. Bakı gömrükxanasının bazasında
Respublika Gömrük İdarəsi təşkil olundu. Gömrük xidmətinin fəaliyyətini
stimullaşdırmaq
məqsədi ilə Nazirlər Kabineti “Gömrük fəaliyyətinin bəzi
növlərindən daxil olan vəsaitlərin istifadə olunması haqqında” 1991-ci il 6
sentyabr tarixli 304 nömrəli qərarı oldu. Azərbaycanın fəaliyyətdə olan
Bakı, Astara və Culfa gömrükxanalarının siyahısına həmin il daha 4
gömrükxana – Gəncə, Binə, Xudafərin və Sədərək gömrükxanaları əlavə
edildi. 1992-ci ilin yanvarında, SSRİ dağıldıqdan az sonra Azərbaycanda bu
sahə üzrə idarəetmənin yeni strukturu – Dövlət Gömrük Komitəsi yaradıldı.
Azərbaycanın gömrük xidməti həmin dövrdə cəmi 150 nəfər şəxsi heyətə, 7
gömrükxana, 3 gömrük postuna və çox məhdud yük və sərnişin dövriy-
yəsinə malik idi.
1991-ci ildən başlayaraq xarici ticarətdə liberallaşdırma
prinsipinin
elan edilməsi xarici iqtisadi fəaliyyətlə məşğul olanların sayını kütləvi
surətdə artırdı. Bütün bunlarla bərabər, təsərrüfat mexanizminin yenidən
qurulması, o cümlədən xarici ticarət sahəsində müəssisə və təşkilatlara
xarici tərəfdaşlarla birbaşa əlaqə saxlamaq hüququ verilsə də, dövlət
maraqlarının tənzimlənməsində köhnəlmiş formalar işə yaramırdı.
Azərbaycan dövlətçiliyi tarixində gömrük işi
218
Digər
tərəfdən, gömrük tənzimlənməsinin çox məhdud vasitələrə
malik olması xarici ticarət münasibətlərində kontragentlərlə əlaqələrin
formalaşmasında ciddi maneə idi. Real vəziyyət xarici iqtisadi əlaqələr və
gömrük tənzimlənməsinin daha müasir, dinamik və çevik metodlarla idarə
edilməsini, gömrük orqanlarının funksiya genişləndirilməsini tələb edirdi.
SSRİ-nin yeni Gömrük Məcəlləsi və “Gömrük tarifi haqqında”
qanunu sovet dövrünün əvvəlki gömrük qanunvericilik aktlarından daha
mütərəqqi və radikal olmasına baxmayaraq, real
həyatda yeni tipli gömrük
sisteminin yaradılması mümkün olmadı. SSRİ süqut etdikdən sonra, Rusi-
yada, MDB üzvü olan digər respublikalarda, o cümlədən Azərbaycanda
milli gömrük xidmətləri təşkil edildi. Keçmiş SSRİ ərazisində fəaliyyətdə
olan gömrükxanaların 5 faizi və onların əmlakı Azərbaycanda qaldı.
Azərbaycan SSR sovet gömrük sistemi şəraitində (1920-1991)
219
NƏTİCƏ
Sovet dövlət aparatının yaradıldığı ilk illərdə gömrük mühafizəsinin
tarixən formalaşmış xidməti vəzifələrini həyata keçirən orqan kimi yox,
daha çox sərhəddə dövlət maraqlarını qoruyan siyasi orqan kimi baxılırdı.
Azərbaycan İnqilab Komitəsi və Azərbaycan
SSR XXTK-nin təsdiq
etdikləri Əsasnaməyə görə, gömrük və sərhəd mühafizəsi arasında malların
gizli daşınması və qaçaqmalçılığın qarşısının alınması sahəsində funksiyalar
bölüşdürüldü. Azərbaycan sovet hökumətinin gömrük işinin müxtəlif
sahələrinə aid qəbul etdiyi bir sıra qərarlar respublikanın xarici ticarət və
gömrük-tarif siyasətinin formalaşmasına təsir etdi.
1920-1921-ci illərdə Azərbaycan XKS-nin birbaşa nəzarətində olan
gömrükxanalarda Azərbaycanın nəfinə gömrük rüsumlarının yığılması
RSFSR hökumətini narahat etməyə bilməzdi. sovet dövlət quruculuğunun
ilk illərində Azərbaycan İnqilab Komitəsinin xarici ticarətin milliləş-
dirilməsi və mal mübadiləsi aparılmasında müstəsna
səlahiyyətin respublika
Xarici Ticarət Komissarlığına verilməsi haqqında dekreti bu sahədə
müstəqil siyasət yeritmək cəhdi idi. Qısa vaxt ərzində olsa da, xarici
dövlətlərlə ticarət münasibətlərinin qurulması sahəsində danışıqların aparıl-
ması, ictimai təşkilat və fiziki şəxslərlə ticarət sövdələşmələrinə rəhbərlik
edilməsi yalnız bu komissarlığa tapşırıldı;
Sovet Rusiyası Azərbaycanda maraqlarının siyasi, hüquqi və iqtisadi
təminatının yaradılmasına can atırdı. Azərbaycan
Rusiyaya hər şeydən əvvəl
yanacaq təchizatçısı, rus mallarının satış bazarı və güclü dəniz nəqliyyatı
qovşağı kimi lazım idi. Azərbaycan SSR-nin gömrük xidmətinin idarə
edilməsinin Moskvaya tabe edilməsinin də kökündə bu maraqlar dururdu.
Rusiya Azərbaycanın xarici dövlətlərlə iqtisadi əlaqələrinə mane olmaqla
ixrac potensialımızdan digər dövlətlərə qarşı təsir vasitəsi kimi istifadə
edirdi. Neft sənayesini və balıq vətəgələrini xarici dövlətlərə konsessiyaya
verməklə, normal idxal-ixrac tarifi və gömrük vergiləri tətbiq etməklə
respublikamız böyük mənfəət əldə edə bilərdi. Əksinə,
xeyli miqdarda nefti
və digər strateji xammallar digər sovet respublikalarına əvəzi ödənilmədən
daşınırdı.
ZSFSR İttifaq Soveti sovet respublikaları arasında ticarəti sərbəst elan
edərək bütün gömrük məhdudiyyətlərinin ləğv edilməsini nəzərdə tutan
qərar qəbul etdi. “Zaqafqaziya Sovet Respublikası Gömrük İdarəsinin təşkili
haqqında” 1922-ci il 24 sentyabr tarixli dekreti ilə gömrük nəzarəti Azər-
baycanın tabeçiliyindən çıxarıldı.