73
qalasında elə bir qüvvətli düşmənin və ətraf xanların qarşısında
müqavimət göstərə bilməyib, bütünlüklə qırılarıq. Ona görə bu
işin əlacını qabaqdan görmək lazımdır. Biz gərək dağların
içində, möhkəm və keçilməz yerdə elə bir əbədi və sarsılmaz
qala tikək ki, onu güclü düşmən belə mühasirə edə bilməsin.
Qalanın bir tərəfi dağlarda olan ellərin üzünə daima açıq olmalı
və mahallarla rabitəmiz, əlaqəmiz (bir an belə) kəsilməməlidir
(55, s.115).
Cənubdan gələn həyəcanlı xəbərlər və Azərbaycanda baş
verən hadisələr, qanlı feodal ara müharibələri şəraitində,
Şahbulaq qalası da o qədər etibarlı sığınacaq deyildir. Təcili
tədbirlər görülməli və daha etibarlı, möhkəm qala salınmalı idi.
Artıq yuxarıda deyildiyi kimi, Pənahəli xan geniş tərkibli
məsləhət şurası çağırdı və yeni qala salınması haqqında qəti
fikrə gəlindi. Qarabağ xanlığının yeni paytaxtı - Şuşa qalasının
tikilməsinə qərar verildi. Beləliklə tezliklə Azərbaycan
ərazisində yeni bir şəhər əmələ gəldi. Şuşa şəhəri - qalası XVIII
əsrin ortalarında meydana çıxsa da özünün siyasi, iqtisadi və
mədəni inkişafına görə bir çox orta əsr Azərbaycan şəhərlərini
qabaqlamışdır (6, s.51).
Salnaməçilərin verdikləri məlumata görə, Şuşa qalasının
tikilməsi tarixçəsi belə olmuşdur: - Pənahəli xanın yeni paytaxt
yaratmaq fikrində olduğunu bilən saray əyanlarından bir qrupu
ona dəniz səviyyəsindən 1800-2000
metr yüksəklikdə olan və üç
tərəfdən təbii müdafiəsi olan, meşələrlə örtülmüş, bir tərəfdən
uçurum, digər tərəfdən isə sıldırım qayalarla əhatə olunmuş, bir
növ təbii qalanı xatırladan yeri göstərdilər. Xanlığın gələcək
paytaxtı və başlıca istinadgah-istehkamı olacaq belə bir qalanın
salınmasına başlıca tələbləri Pənahəli xan özü müəyyən
etmişdir.
Mirzə Camal yazır: «Xanın (Pənah xanın) bir neçə nəfər
bilici və məlumatlı adamı gedib, qalanın yerini və ətrafını
yoxladı. Qalanın içində iki-üç bulaqdan başqa axar su yox idi.
Bu bulaqların suyu isə qala camaatına kifayət etməzdi. Ona görə
güman gələn yerlərdə quyu qazdırıb, müəyyən etdilər ki,