42
naziri E.Məmmədyarov 2006-cı ilin ikinci yarısında azərbaycanlılar Dağlıq Qarabağa qayıtdıqdan sonra orada
referendumun keçirilməsinin mümkünlüyü haqda bəyanatlarla çıxış etdi. O, hətta referendumun müddəti ilə bağlı
fərqli fikirlərin olduğunu da dilə gətirdi: “ermənilər referendumun 5, biz isə 15 ildən sonra keçirilməsini istəyirik”.
Lakin az sonra Azərbaycan daha qətiyyətli mövqe nümayiş etdirə bildi.
Minsk qrupu həmsədrlərinin vasitəçiliyi ilə 2007-ci ilin yanvarında Moskvada, martında Cenevrədə, aprelində
Belqradda Azərbaycan və Ermənistan xarici işlər nazirlərinin görüşləri keçirildi. Bu görüşlərin nəticələri və müzakirə
olunan məsələlərlə bağlı həmsədrlərin ayri-ayrılıqda açıqlamaları oldu. Cenevrədə təməl prinsiplərinin, o cümlədən,
Dağlıq Qarabağ ətrafındakı rayonların azad edilməsi, Qarabağdakı qondarma rejim üçün aralıq statusu verilməsi ilə
bağlı məsələlərin müzakirə olunduğu bildirildi. Belqrad danışıqlarından sonra amerikalı həmsədr M.Brayza tərəflərin
ötən il verilən əsas prinsiplərin bazasında razılaşmaya yaxın olduqlarını bəyan etdi. O, bu prinsiplərin Dağlıq Qarabağ
ətrafındakı beş rayonun azad edilməsi, iki rayonla (Laçın və Kəlbəcər) bağlı müzakirələrin davam etdirilməsi, Dağlıq
Qarabağ və Ermənistan arasında dəhlizin təmin olunması, statusla bağlı referendum deyil, səsvermənin
keçirilməsindən ibarət olduğu haqda məlumat verdi. Rusiyalı həmsədr Y.Merzlyakov isə “tərəflərin əsas prinsipləri
razılaşdırmağa yaxın olduqlarını” təsdiq etdi. Y.Merzlyakovun az sonra verdiyi açıqlama həmsədrlərin bu nikbinliyinə
və danışıqların hansı istiqamətdə getdiyinə aydınlıq gətirdi: “Rusiya Dağlıq Qarabağı müstəqil dövlət saymır, lakin bu
o demək deyil ki, Rusiya onu Azərbaycanın hissəsi hesab edir... Bizim ölkə Azərbaycanın ərazi bütölüyünü tanıyır.
Lakin bu o demək deyil ki, biz Qarabağı Azərbaycanın hissəsi kimi tanıyırıq”. Azərbaycan hakimiyyətinin
danışıqların məzmunu ilə bağlı eyni vaxtda verdiyi açıqlamalar həmsədrlərin mövqeyi ilə ziddiyət təşkil edirdi.
Prezident İ.Əliyev 2007-ci ilin may ayında Azərbaycanın konkret mövqeyi ilə bağlı ilk dəfə açıqlama verdi: “Əvvəlki
danışıqlarda 5 rayonun boşaldılması məsələsi qoyulurdusa, son danışıqlarda 7 rayonun dərhal boşaldılması məsələsi
müzakirə edilir... Laçın və Kəlbəcərin qaytarılması ilə bağlı heç bir şərt qoyula bilməz... Yalnız qaçqınlar öz
torpaqlarına, o cümlədən Şuşa və digər yerlərə qayıtdıqdan sonra Qarabağın statusu məsələsi həll oluna bilər”.
Ermənistan rejimi də eyni vaxtda əks mövqedən çıxış edərək, danışıqlarda Dağlıq Qarabağ ermənilərinin “öz
müqəddaratını təyinetmə hüququnun” əsas məsələ kimi müzakirə olunduğunu bildirdi. Tərəflərin tamamilə zidd
mövqelərdən çıxış etdiyi bir şəraitdə həmsədrlər yenidən xarici işlər nazirlərini bir araya gətirdilər. Bu görüş 2007-ci
il noyabrın sonu dekabrın əvvəlində Madriddə təşkil edildi. Həmsədrlər müzakirələrdən sonra tərəflərə yeni təməl
prinsiplərini təqdim etdilər. Yeni təməl prinsiplərinə münasibəti öyrənmək üçün həmsədrlərin 2008-ci ilin yanvarında
Azərbaycan və Ermənistan prezidentləri ilə keçirdikləri görüşlər heç bir nəticə vermədi.
2008-ci il martın 14-də BMT Baş Assambleyasının 62-ci sessiyasında Qarabağ məsələsi müzakirə olundu və
“Azərbaycanın işğal olunmuş ərazilərindəki vəziyyət haqqında” qətnamə qəbul edildi. Bu, BMT Təhlükəsizlik
Şurasının 1993-cü il qətnamələrindən sonra beynəlxalq səviyyədə qəbul olunmuş ən ciddi sənəd idi. Qətnamədə
Azərbaycanın suverenliyi və ərazi bütövlüyünə hörmətlə yanaşıldığı bir daha bildirilir, Ermənistanın işğalçı
qüvvələrinin zəbt olunmuş ərazilərdən qeyd-şərtsiz çıxarılması tələb olunur, erməni işğalı nəticəsində yaranmış
vəziyyətin, yəni işğalçı Ermənistanın zəbt olunmuş ərazilərdə yaratdığı qondarma qurumun heç bir dövlət tərəfindən
tanınmamasının zəruriliyi vurğulanırdı. Sessiya iştirakçılarından 40 dövlət qətnamənin lehinə, 7 dövlət əleyhinə səs
verdi, 100 dövlət bitərəf qaldi. Lehinə səs verənlərin böyük əksəriyyətini müsəlman dövlətləri təşkil edirdi. Minsk
qrupuna həmsədrlik edən hər üç ölkə–ABŞ, Rusiya, Fransa qətnamənin əleyhinə səs verdilər. Səsvermənin nəticələri
Minsk qrupu çərçivəsində aparılan danışıqların Azərbaycan üçün təhlükəli perspektivlərinə bir daha aydınlıq gətirdi.
43
2008-ci il avqustun əvvəllərində Tiflisin Cənubu Osetiyada öz suveren hüquqlarını bərpa etmək cəhdi və buna
cavab olaraq Rusiyanın Gürcüstana hərbi müdaxilə etməsi regionda hərbi-siyasi şəraiti dəyişdirdi. Gürcüstan danışıqların
heç bir nəticə verməyəcəyini dərk edərək, ərazi bütövlüyünü hərbi yolla bərpa etməyə cəhd göstərdi, lakin Rusiya buna
imkan vermədi. Kreml işğalçı və ilhaqçı mahiyyətini açıq-aydın nümayiş etdirdi. Gürcüstan regionda yaradılmış
qondarma qurumların, onların “öz müqəddəratını təyin etmə və azadlıq hərəkatları”nın üzərindən pərdəni götürərək, bu
hərəkatların xaricdən təşkil və idarə olunduğunu sübut etdi. Gürcüstan dünyanın rəğbətlə yanaşdığı “öz müqəddəratını
təyinetmə hərəkatı” ilə deyil, birbaşa rus işğalı ilə üz-üzə qaldı. Bu vəziyyət Gürcüstana ciddi beynəlxalq dəstək üçün
təminat verdi və Rusiyanın güc tətbiqi ilə işğal olunmuş ərazilərdən çıxarılması üçün əsas yaratdı. Yeni şəraitdə Qarabağ
məsələsi ilə də bağlı fərqli yanaşmalar meydana çıxdı. Vasitəçilik etmək istəyən ölkələrin sayı artdı. İlk olaraq Türkiyə və
İran vasitəçilik təşəbbüsləri ilə çıxış etdilər. Moskva və Vaşinqton da təşəbbüsü əldən verməmək üçün fəallaşdılar. 2008-
ci il noyabrın 2-də Moskvanın təşəbbüsü ilə Rusiya, Azərbaycan və Ermənistan prezidentləri birgə Bəyannamə
imzaladılar. Bəyannamədə danışıqların beynəlxalq hüquq normaları əsasında davam etdirilməsi, Minsk qrupu formatının
saxlanılması, münaqişənin siyasi yolla nizama salınması, qarşılıqlı etimadın gücləndirilməsi kimi məsələlər əks olundu.
Lakin bu diplomatik fəallıq və təşəbbüslər heç bir nəticə vermədi.
Bundan sonra da münaqişənin nizama salınması istiqamətində müəyyən təşəbbüslər oldu. Minsk qrupunun
həmsədri olan ölkələrin prezidentləri Böyük səkkizliyin İtaliya (10 iyul 2009-cu il) və Kanadada (26 iyun 2010-cu il)
keçirilən sammitlərində Dağlıq Qarabağ münaqişəsinin həlli yollarına dair birgə bəyanatla çıxış etdilər. Prezidentlər
yeniləşmiş Madrid prinsiplərini müdafiə etdiklərini bildirdilər. Həmsədr ölkələr Türkiyə-Ermənistan münasibətlərinin
normallaşdırılması və bu müstəvidə Dağlıq Qarabağ məsələsinin həllinə də təsir göstərməyə cəhd etdilər. Onların
vasitəçiliyi ilə 2009-cu il oktyabrın 10-da İsveçrənin Sürix şəhərində iki ölkə arasında münasibətlərin
normallaşdırılmasına dair 2 sənəd imzalandı. Bu, Azərbaycan dövləti və cəmiyyəti tərəfindən kəskin etirazla qarşılandı.
Nəticədə Türkiyə parlamenti bu sənədləri ratifikasiya etmədi. Minsk qrupu həmsədrlərinin təşəbbüsü və iştirakı ilə 2010-
cu il oktyabrın 7-dən 12-dək Dağlıq Qarabağ ətrafındakı 7 rayona Qiymətləndirmə missiyası həyata keçirildi. Missiyanın
hesabatı 2011-ci ilin mart ayında qismən açıqlandı və əsasən bölgədəki acınacaqlı vəziyyəti, qanunsuz məskunlaşdırma
məsələlərini əks etdirdi. 2010-cu ilin noyabrında Lissabonda NATO-nun növbəti sammiti keçirildi, yeni Təhlükəsizlik
konsepsiyası qəbul olundu. Bu konsepsiyada Cənubi Qafqazdakı münaqişələrə də münasibət bildirildi və bu
münaqişələrin ölkələrin ərazi bütövlüyü çərçivəsində həllinin vacibliyi əks etdirildi. ATƏT-in Astanada keçiriləcək Zirvə
toplantısına da böyük ümidlər bəslənilirdi. Bu sammit 11 ildən sonra 2010-cu il dekabrın 1-də baş tutdu, lakin heç bir
ciddi sənəd qəbul olunmadı. Həmsədr ölkələrin, Azərbaycan və Ermənistan prezidentlərinin adından verilən birgə
bəyanatla münaqişənin dinc vasitələrlə nizama salınmasının vacibliyi vurğulandı.
Bütün bu hadisələrin fonunda Rusiya daha çox fəallıq göstərmişdir. Rusiya prezidentinin təşəbbsü ilə Azərbaycan,
Rusiya, Ermənistan prezidentlərinin Moskvada (18 iyul 2009-cu il), Kişinyovda (9 oktyabr 2009-cu il), Soçidə (25 yanvar
2010-cu il), Sankt-Peterburqda (17 iyun 2010-cu il), Həştərxanda (27 oktyabr 2010-cu il), yenə Soçidə (5 mart 2011-ci il)
və Kazanda (24 iyun-2011-ci il) üçtərəfli görüşləri keçirildi, lakin ciddi bir nəticə əldə olunmadı. Qərb dövlətlərinin
təşəbbüsü ilə Almaniyanın Münhen şəhərində Azərbaycan və Ermənistan prezidentlərinin arasında təşkil olunan görüş də
(22 noyabr 2009-cu il) nəticəsiz qaldı. Bütün bu görüşlərə, danışıqlara baxmayaraq Ermənistan öz mövqeyindən,
Azərbaycana qarşı əsassız iddialarından geri çəkilmədi. Danışıqların heç bir nəticə verməməsi Azərbaycan cəmiyyətində
radikal addımlara meyli gücləndirmişdir. Azərbaycan Ordusunun hərbçisi Mübariz İbrahimovun hərəkəti buna əyani
nümunədir. O, 2010-cu il iyunun 18-də təkbaşına cəbhə xəttini keçmiş, düşmənin böyük canlı qüvvəsi ilə döyüşə girmiş,